2 Samuele

19 Bo songaka Yoabi nde: “Ntotila ke dila mpi kele na mawa sambu na Absalomi.”+ 2 Na kilumbu yina, kununga* kumaka mawa sambu na bantu yonso, sambu bo waka nde ntotila vandaka na mawa sambu na mwana na yandi. 3 Kilumbu yina, bantu vutukaka na pima yonso na mbanza+ bonso bantu yina ke wa nsoni sambu bo me tina bitumba. 4 Ntotila fikaka luse na yandi mpi vandaka kuboka na ndinga ya ngolo nde: “Mwana na mono Absalomi! Absalomi mwana na mono, mwana na mono!”+

5 Ebuna Yoabi kotaka kisika ntotila vandaka na nzo mpi tubaka nde: “Bubu yai nge me pesa bansadi na nge yonso nsoni, bayina me gulusa bubu yai luzingu* na nge, luzingu* ya bana na nge ya babakala,+ ya bana na nge ya bankento,+ ya bankento na nge, mpi ya bamakangu na nge.+ 6 Nge ke zola bantu yina ke mengaka nge mpi ke menga bantu yina ke zolaka nge, sambu bubu yai nge me monisa pwelele nde bamfumu na nge ti bansadi na nge kele kima ya mpamba na meso na nge, sambu mono ke ndima nde kana Absalomi vandaka na luzingu bubu yai mpi beto bankaka fwaka, yo zolaka kuvanda mbote sambu na nge. 7 Ntangu yai, telama, basika mpi lembika* bansadi na nge, sambu mono ke zenga kieleka na zina ya Yehowa nde kana nge basika ve, ata muntu mosi ve ta bikala ti nge mpimpa ya bubu yai. Yo ta vanda mbi mingi sambu na nge kuluta mbi yonso yina me bwilaka nge banda kileke na nge tii bubu yai.” 8 Yo yina ntotila telamaka mpi vandaka na kielo ya mbanza, mpi bo zabisaka bantu yonso nde: “Ntotila me vanda na kielo.” Ebuna bantu yonso kwisaka na ntwala ya ntotila.

Kansi Izraele tinaka, konso muntu na nzo na yandi.+ 9 Bantu yonso na makanda yonso ya Izraele vandaka kutulana ntembe mpi kutuba nde: “Ntotila gulusaka beto na maboko ya bambeni na beto,+ mpi yandi gulusaka beto na maboko ya bantu ya Filistia; kansi ntangu yai yandi me tina insi sambu na Absalomi.+ 10 Ebuna Absalomi, yina beto tulaka mafuta sambu na kuvanda ntotila na beto,+ me fwa na bitumba.+ Ntangu yai, sambu na nki beno ke sala ve ata kima sambu na kuvutula ntotila?”

11 Ntotila Davidi tindaka nsangu yai na banganga-nzambi Zadoki+ ti Abiatare:+ “Tubila bankuluntu ya Yuda+ nde, ‘Sambu na nki beno fwete vanda bantu ya nsuka na kuvutula ntotila na nzo na yandi, na ntangu ndinga ya Izraele ya mvimba me kumina ntotila na nzo na yandi? 12 Beno kele bampangi na mono; beno kele bampangi na mono ya menga.* Sambu na nki beno fwete vanda bantu ya nsuka na kuvutula ntotila?’ 13 Beno fwete tuba na Amasa+ nde, ‘Keti nge kele ve mpangi na mono ya menga? Nzambi kupesa mono ndola ya ngolo kana nge kuma ve mfumu ya basoda na mono na kisika ya Yoabi yantika ntangu yai tii kuna.’”+

14 Ebuna yandi bendaka* bantima ya bantu yonso ya Yuda bonso nde bo vandaka muntu mosi, mpi bo tindilaka ntotila ndinga nde: “Kwisa kuvutuka, nge ti bansadi na nge yonso.”

15 Ntotila yantikaka kuvutuka mpi kumaka na Yordani, ebuna bantu ya Yuda kwisaka na Gilgale+ sambu na kukutana ti ntotila mpi kufidisa yandi na kusabuka Yordani. 16 Ebuna Shimei+ mwana ya Gera, muntu ya Benyamini ya Bahurimi, kulumukaka nswalu ti bantu ya Yuda sambu na kukutana ti ntotila Davidi, 17 mpi bantu 1 000 ya Benyamini vandaka ti yandi. Siba+ mpi, nsadi ya nzo ya Saule ti bana na yandi 15 mpi bansadi 20, kulumukaka nswalu na Yordani na ntwala ya ntotila. 18 Yandi* sabukaka kisika ya bo lenda sabuka na makulu sambu na kunata bantu ya nzo ya ntotila na kusabuka mpi na kusala mambu yonso yina yandi me zola. Kansi Shimei mwana ya Gera fukamaka luse na ntoto na ntwala ya ntotila ntangu yandi zolaka kusabuka Yordani. 19 Yandi tubilaka ntotila nde: “Bika nde mfumu na mono kumona mono ve mbi, mpi yandi yibuka ve mbi yina nsadi na nge salaka+ kilumbu yina mfumu na mono ntotila basikaka na Yeruzalemi. Bika nde ntotila kutula ve mambu yina na ntima, 20 sambu nsadi na nge me zaba mbote nde mono me sala disumu; yo yina bubu yai mono me vanda muntu ya ntete na kati ya nzo ya mvimba ya Yozefi na kukwisa kukulumuka sambu na kukutana ti mfumu na mono ntotila.”

21 Na mbala mosi, Abishai+ mwana ya Seruya+ tubaka nde: “Keti bo fwete fwa ve Shimei sambu na diambu yai, sambu yandi singaka muntu yina Yehowa me tulaka mafuta?”+ 22 Kansi Davidi tubaka nde: “Diambu yai me tadila beno na nki, beno bana ya Seruya,+ sambu bubu yai beno nwanisa mono? Keti bo fwete fwa muntu bubu yai na Izraele? Keti mono ke zaba ve nde bubu yai mono kele ntotila ya Izraele?” 23 Ebuna ntotila tubilaka Shimei nde: “Nge ta fwa ve.” Mpi ntotila diaka ndefi na ntwala na yandi.+

24 Mefibosheti,+ mutekolo ya Saule, kwisaka mpi kukulumuka sambu na kukutana ti ntotila. Yandi yobisaka ve makulu na yandi, yandi zengaka ve mandefo na yandi, mpi yandi yobisaka ve bilele na yandi tuka kilumbu yina ntotila kwendaka tii kilumbu yina yandi kwisaka kuvutuka na ngemba. 25 Ntangu yandi kwisaka na* Yeruzalemi sambu na kukutana ti ntotila, ntotila tubilaka yandi nde: “Mefibosheti, sambu na nki nge kwendaka ve ti mono?” 26 Ebuna yandi tubaka nde: “Mfumu na mono ntotila, nsadi na mono+ kusaka mono. Sambu nsadi na nge tubaka nde, ‘Bika nde bo yidika mpunda na mono sambu mono mata na zulu na yo mpi mono kwenda ti ntotila,’ sambu nsadi na nge kele ti kifu na makulu.+ 27 Kansi yandi kusilaka nsadi na nge makambu na mfumu na mono ntotila.+ Ata mpidina, mfumu na mono ntotila kele bonso wanzio ya Nzambi ya kieleka, yo yina sala mambu yonso yina ke monana mbote na meso na nge. 28 Bantu yonso ya nzo ya tata na mono lendaka kuvanda bantu yina mfumu na mono ntotila fwete fwa, kansi nge tulaka nsadi na nge na kati ya bantu yina ke diaka na mesa na nge.+ Ebuna nki nswa mono kele na yo ya kuboka diaka na ntotila?”

29 Kansi ntotila tubilaka yandi nde: “Sambu na nki kulanda kutuba mutindu yai? Mono bakaka lukanu nde nge ti Siba beno fwete kabula kilanga.”+ 30 Ebuna Mefibosheti tubilaka ntotila nde: “Bika yandi baka yo yonso, awa ya mfumu na mono ntotila me kwisa na nzo na yandi na ngemba.”

31 Ebuna Barzilai+ muntu ya Gileadi katukaka na Rogelimi mpi kulumukaka na Yordani sambu na kufidisa ntotila na Yordani. 32 Barzilai vandaka mununu kibeni, yandi vandaka ti bamvula 80, mpi yandi pesaka ntotila madia ntangu yandi vandaka na Mahanayimi,+ sambu yandi vandaka mvwama kibeni. 33 Yo yina ntotila tubilaka Barzilai nde: “Sabuka ti mono, ebuna mono ta pesa nge madia na Yeruzalemi.”+ 34 Kansi Barzilai tubilaka ntotila nde: “Bilumbu* ya luzingu na mono me bikala ikwa sambu mono tombuka ti ntotila na Yeruzalemi? 35 Mono kele ti bamvula 80 bubu yai.+ Keti mono lenda swaswanisa mambu ya mbote ti ya mbi? Keti mono, nsadi na nge, lenda zaba ntomo ya bima ya mono ke dia mpi ke nwa? Keti mono lenda widikila diaka ndinga ya miyimbi-bankunga ya babakala ti ya bankento?+ Ebuna sambu na nki nsadi na nge fwete vanda kizitu ya bo me yika na mfumu na mono ntotila? 36 Yo me fwana nde nsadi na nge kunata ntotila na Yordani. Sambu na nki ntotila fwete pesa mono matabisi yai? 37 Pardo, bika nde nsadi na nge kuvutuka, mpi bika nde mono fwa na mbanza na mono, pene-pene ya maziamu ya tata na mono mpi ya mama na mono.+ Kansi nsadi na nge Kimami+ yandi yai. Bika nde yandi sabuka ti mfumu na mono ntotila, mpi nge lenda sadila yandi mambu yina ke monana mbote na meso na nge.”

38 Yo yina ntotila tubaka nde: “Kimami ta sabuka ti mono, mpi mono ta sadila yandi mambu yina ke monana mbote na meso na nge; mambu yonso yina nge ke lomba mono, mono ta sadila nge yo.” 39 Ntangu yai, bantu yonso yantikaka kusabuka Yordani, ebuna ntangu ntotila sabukaka, ntotila pesaka Barzilai beze+ mpi sakumunaka yandi; ebuna Barzilai vutukaka na nzo. 40 Ntangu ntotila sabukaka sambu na kukwenda na Gilgale,+ Kimami sabukaka ti yandi. Bantu yonso ya Yuda mpi kati-kati ya bantu ya Izraele nataka ntotila na kusabuka.+

41 Ebuna bantu yonso ya Izraele kwisaka pene-pene ya ntotila mpi tubilaka yandi nde: “Sambu na nki bampangi na beto, bantu ya Yuda, bakaka nge mpi nataka ntotila ti bantu ya nzo na yandi na kusabuka Yordani, kumosi ti bantu yonso ya Davidi?”+ 42 Bantu yonso ya Yuda pesaka bantu ya Izraele mvutu nde: “Sambu ntotila kele muntu ya dibuta na beto.+ Sambu na nki diambu yai ke pesa beno makasi? Keti kele ti kima yina beto me dia na mbongo ya ntotila, to keti bo me pesaka beto dikabu?”

43 Kansi, bantu ya Izraele pesaka bantu ya Yuda mvutu nde: “Beto kele ti bitini kumi na ntotila, yo yina beto kele ti nswa mingi na Davidi kuluta nge. Ebuna sambu na nki nge me vweza beto? Keti yo lombaka ve nde beto vanda bantu ya ntete na kuvutula ntotila?” Kansi ndinga ya bantu ya Yuda nungaka* ya bantu ya Izraele.