1 Bansangu

17 Ntangu Davidi kumaka kuzinga na nzo na yandi,* yandi tubilaka mbikudi Natani+ nde: “Tala, mono ke zinga na nzo ya banti ya sedre+ kansi sanduku ya kuwakana ya Yehowa kele na nsi ya bilele ya tenta.”+ 2 Natani vutudilaka Davidi nde: “Sala mambu yonso yina kele na ntima na nge, sambu Nzambi ya kieleka kele ti nge.”

3 Kaka na mpimpa yina, ndinga ya Nzambi kwisilaka Natani nde: 4 Kwenda kutubila nsadi na mono Davidi nde, ‘Yehowa me tuba nde: “Nge ve muntu ta tungila mono nzo ya mono ta zinga.+ 5 Sambu katuka kilumbu yina mono basisaka Izraele tii bubu yai, mono me zingaka ve na nzo, kansi mono vandaka kuzinga bubu na tenta yai mbasi na tenta ya nkaka, mpi bubu na nzo-tenta yai mbasi na nzo-tenta ya nkaka.*+ 6 Na ntangu yonso yina mono vandaka kukwenda ti Izraele ya mvimba, keti mono tubaka ata ngogo mosi na bazuzi ya Izraele yina mono tulaka sambu na kugungula bantu na mono Izraele nde, ‘Sambu na nki beno me tungila mono ve nzo ya banti ya sedre?’”’

7 Ntangu yai tubila nsadi na mono Davidi nde, ‘Yehowa ya makesa ke tuba nde: “Mono bakaka nge na banseke, sambu nge yambula kukeba mameme, mpi nge kuma ntwadisi ya bantu na mono Izraele.+ 8 Mono ta vanda ti nge bisika yonso ya nge ta kwenda,+ mpi mono ta fwa* bambeni na nge yonso na ntwala na nge;+ mpi mono ta sala nde zina na nge kukuma bonso zina ya bantu ya nene ya ntoto.+ 9 Mono ta sola kisika mosi sambu na bantu na mono Izraele mpi ta tula bo kuna, ebuna bo ta zinga kuna mpi bo ta yangisa bo diaka ve; mpi bantu ya mbi ta niokula bo* diaka ve mutindu bo salaka na ntangu ya ntama,+ 10 katuka kilumbu yina mono tulaka bazuzi sambu na kutwadisa bantu na mono Izraele.+ Ebuna mono ta bedisa bambeni na nge yonso.+ Diaka, mono ke songa nge nde, ‘Yehowa ta sala dibuta ya kimfumu* sambu na nge.’

11 “‘“Ntangu bilumbu na nge ta suka mpi nge ta kwenda sambu na kuvanda ti ba-nkaka na nge, mono ta basisa mwana* na nge na nima na nge, mosi na kati ya bana na nge,+ mpi mono ta tedimisa kimfumu na yandi ngolo.+ 12 Yandi muntu ta tunga nzo sambu na mono,+ mpi mono ta tedimisa kiti na yandi ya kimfumu ngolo kimakulu.+ 13 Mono ta kuma tata na yandi, mpi yandi ta kuma mwana na mono.+ Mono ta katula ve zola na mono ya kwikama na yandi+ mutindu mono katulaka yo na muntu yina vandaka na ntwala na nge.+ 14 Mono ta sala nde yandi vanda na nzo na mono mpi na kimfumu na mono kimakulu,+ mpi kiti na yandi ya kimfumu ta zinga kimakulu.”’”+

15 Natani songaka Davidi mambu yai yonso mpi mbona-meso yai yonso.

16 Ebuna ntotila Davidi kotaka, yandi vandaka na ntwala ya Yehowa, mpi yandi tubaka nde: “O Yehowa Nzambi, mono kele nani? Mpi nzo na mono kele nki sambu nge nata mono ntama mutindu yai?+ 17 O Nzambi, bonso nde yo me lunga ve, nge ke tuba mpi sambu na nzo ya nsadi na nge tii na bilumbu yina ke kwisa ntama na ntwala,+ mpi nge me tala mono bonso nde mono kele muntu yina bo fwete tombula diaka,* O Yehowa Nzambi. 18 Inki ya nkaka nsadi na nge Davidi lenda tubila nge diaka sambu na lukumu yina nge me pesa mono ata nge me zaba nsadi na nge mbote-mbote?+ 19 O Yehowa, sambu na nsadi na nge mpi na kuwakana ti ntima na nge,* nge me sala mambu yai yonso ya nene na mutindu nge me monisa bunene na nge.+ 20 O Yehowa, ata muntu mosi ve kele bonso nge,+ mpi Nzambi ya nkaka kele ve katula nge;+ mambu yonso ya beto me wa na makutu na beto ke ndimisa yo. 21 Ebuna inki dikanda ya nkaka na ntoto kele bonso bantu na nge Izraele?+ Nzambi ya kieleka kwendaka mpi sumbaka bo diaka sambu bo vanda bantu na yandi.+ Nge kudisadilaka zina na mutindu nge salaka mambu ya nene mpi ya ke pesa boma,+ mpi nge kulaka makanda na ntwala ya bantu na nge+ yina nge sumbaka diaka na Ezipte. 22 Nge kumisaka bantu na nge Izraele bantu na nge mosi ntangu yonso;+ ebuna nge, O Yehowa, nge kumaka Nzambi na bo.+ 23 Ntangu yai, O Yehowa, bika nde mambu yina nge silaka sambu na nsadi na nge ti nzo na yandi kulungana ntangu yonso, mpi bika nde nge sala kaka mutindu nge silaka.+ 24 Bika nde zina na nge kuzinga mingi* mpi kuvanda ya kunanguka+ kimakulu, sambu bantu kutuba nde, ‘Yehowa ya makesa, Nzambi ya Izraele, kele Nzambi na Izraele,’ mpi bika nde nzo ya nsadi na nge Davidi kukuma ngolo na ntwala na nge.+ 25 Sambu nge, Nzambi na mono, nge me monisa nsadi na nge lukanu na nge ya kusadila yandi dibuta ya kimfumu.* Yo yina nsadi na nge ke samba nge mutindu yai ti kutula ntima. 26 Ntangu yai, O Yehowa, nge kele Nzambi ya kieleka, mpi nge me sila mambu yai ya mbote sambu na nsadi na nge. 27 Yo yina bika nde yo pesa nge kiese na kusakumuna nzo ya nsadi na nge, mpi bika nde yo landa kuvanda kimakulu na ntwala na nge, sambu nge, O Yehowa, nge me sakumunaka, mpi yo me bakaka lusakumunu kimakulu.”