Kulonga

23 “Ata bakala mosi ve yina bo me kumisaka mukobo na mutindu bambuma na yandi ya kibakala me panzanaka to yina bo me zengaka nitu na yandi ya kibakala lenda kota na dibundu ya Yehowa.+

2 Ata mwana-makangu mosi ve lenda kota na dibundu ya Yehowa.+ Tii na ndonga ya kumi ya bantu, ata mwana na yandi mosi ve lenda kota na dibundu ya Yehowa.

3 Ata muntu mosi ve ya Amoni to muntu ya Moabi lenda kota na dibundu ya Yehowa.+ Tii na ndonga ya kumi ya bantu, ata mwana na bo mosi ve lenda kota ata fioti na dibundu ya Yehowa, 4 sambu bo pesaka beno ve madia mpi masa sambu na kusadisa beno na nzila, na ntangu beno vandaka kubasika na Ezipte,+ mpi sambu bo futaka Balami mwana ya Beore muntu ya Petore ya Mezopotamia sambu na kusinga* nge.+ 5 Yehowa Nzambi na nge buyaka kuwila Balami.+ Kansi, Yehowa Nzambi na nge kumisaka kusinga yina lusakumunu sambu na nge,+ sambu Yehowa Nzambi na nge zolaka nge.+ 6 Nge fwete sosa ve ata fioti mambote na bo to kimvwama na bo bilumbu na nge yonso.+

7 Nge fwete menga ve muntu ya Edomi, sambu yandi kele mpangi na nge.+

“Nge fwete menga ve muntu ya Ezipte, sambu nge kumaka munzenza na insi na yandi.+ 8 Ndonga ya tatu ya bana yina bo ta buta lenda kota na dibundu ya Yehowa.

9 Ntangu nge me sala camp sambu na kunwanisa bambeni na nge, nge fwete buya konso kima ya mbi.*+ 10 Kana bakala mosi me kuma mvindu sambu masa ya babakala+ me basika yandi na mpimpa, yandi fwete basika na nganda ya camp mpi kukota diaka ve na camp. 11 Kana nkokila me bwa, yandi fwete yobila masa, ebuna yandi lenda vutuka na camp na ntangu ya kudinda ya ntangu.+ 12 Bo fwete sola kisika mosi ya kinsweki* na nganda ya camp, mpi nge fwete kwenda kuna. 13 Nge fwete vanda ti pawu na kati ya bisadilu na nge. Ntangu nge ke sondamana na nganda, nge fwete timuna dibulu ti yo mpi kuzika tufi na nge na nima. 14 Sambu Yehowa Nzambi na nge ke tambula na kati ya camp na nge+ sambu na kugulusa nge mpi kupesa bambeni na nge na maboko na nge, mpi camp na nge fwete vanda santu,+ mpidina yandi ta mona ve ata kima mosi ya mvindu na kati na nge mpi yandi ta yambula ve kufidisa nge.

15 “Nge fwete pesa ve mpika na maboko ya mfumu na yandi kana yandi me tina mfumu na yandi mpi me kwisa na nge. 16 Yandi lenda zinga na kati na beno na konso kisika yina yandi me sola na mbanza mosi na kati ya bambanza na nge, konso kisika yina yandi me zola. Nge fwete niokula yandi ve.+

17 “Ata mwana-nkento mosi ve ya Izraele lenda kuma ndumba ya tempelo,+ ata mwana-bakala mosi mpi ve ya Izraele lenda kuma ndumba ya tempelo.+ 18 Nge fwete nata ve na nzo ya Yehowa Nzambi na nge lufutu yina bo ke pesaka nkento ya ndumba to lufutu yina bo ke pesaka* bakala ya ndumba* sambu na kulungisa lusilu mosi buna, sambu yo yonso zole kele bima ya nzanzi na meso ya Yehowa Nzambi na nge.

19 “Nge fwete lomba ve mpangi na nge na kufuta ti luta,+ yo vanda luta ya mbongo, ya madia, to ya konso kima yina muntu lenda lomba luta. 20 Nge lenda lomba munzenza na kufuta ti luta,+ kansi nge fwete lomba ve mpangi na nge na kufuta ti luta,+ sambu Yehowa Nzambi na nge kusakumuna nge na bisalu na nge yonso na insi yina nge ke kwenda kubaka.+

21 “Kana nge sala lusilu na Yehowa Nzambi na nge,+ kusukinina ve na kulungisa yo.+ Sambu Yehowa Nzambi na nge ta lomba nge yo kibeni; kana ve yo ta vanda disumu sambu na nge.+ 22 Kansi kana nge buya kusala lusilu, nge ta sala ve disumu.+ 23 Nge fwete zitisa mambu yina munoko na nge ke tuba,+ mpi nge fwete lungisa lusilu yina munoko na nge silaka na Yehowa Nzambi na nge+ bonso dikabu ya luzolo ya mbote.

24 “Kana nge kota na kilanga ya vinu ya nkweno na nge, nge lenda dia bambuma yina me fwana na kulungisa nzala* na nge, kansi nge fwete tula ve ata mbuma mosi na kitunga na nge.+

25 “Kana nge kota na kilanga ya bambuma ya nkweno na nge, nge lenda katula bambuma ya kuyela na diboko na nge, kansi nge fwete tula ve mbele na mbuma ya nkweno na nge.+