Ezekiele

37 Diboko ya Yehowa vandaka na zulu na mono, ebuna na nzila ya mpeve na yandi Yehowa bakaka mono mpi tululaka mono na kati-kati ya muwanda,+ mpi yo vandaka ya kufuluka ti mikwa. 2 Yandi tambusaka mono na bandambu na yo yonso, mpi mono monaka nde mikwa mingi kibeni vandaka na ntoto na muwanda yina, mpi yo vandaka ya kuyuma kibeni.+ 3 Yandi yulaka mono nde: “Mwana ya muntu, keti mikwa yai lenda vutuka na luzingu?” Mono tubaka nde: “Yehowa Mfumu ya Kuluta Nene, nge muntu me zaba.”+ 4 Ebuna yandi tubilaka mono nde: “Bikula sambu na mikwa yai, mpi tubila yo nde, ‘Beno mikwa ya kuyuma, beno wa ndinga ya Yehowa:

5 “‘Yehowa Mfumu ya Kuluta Nene ke tuba na mikwa yai nde: “Mono ta sala nde mpema kukota na kati na beno, ebuna beno ta vutuka na luzingu.+ 6 Mono ta tula misisa mpi nsuni na zulu na beno, mpi mono ta fika beno mpusu mpi ta tula mpema na kati na beno, ebuna beno ta vutuka na luzingu; mpi beno ta zaba nde mono kele Yehowa.”’”

7 Na nima mono bikulaka mutindu bo songaka mono. Kaka ntangu mono bikulaka, makelele wakanaka, makelele ya bima ya ke tutana, ebuna mikwa yantikaka kuvukana, mukwa mosi ti mukwa ya nkaka. 8 Ebuna mono monaka misisa ti nsuni me kwisa na zulu na yo, mpi mpusu fikaka yo. Kansi mpema vandaka kaka ve na kati na yo.

9 Na nima yandi tubilaka mono nde: “Bikula sambu na mupepe. Mwana ya muntu, bikula mpi tuba na mupepe nde, ‘Yehowa Mfumu ya Kuluta Nene me tuba nde: “O mupepe,* katuka na ndambu ya mipepe iya mpi kwisa kukota, mpi bula na zulu ya bantu yai ya bo fwaka, sambu bo vutuka na luzingu.”’”

10 Yo yina mono bikulaka mutindu yandi songaka mono mpi mpema* kotaka na kati na bo, ebuna bo yantikaka kuzinga mpi kutelama,+ kimvuka mosi ya nene kibeni ya basoda.

11 Na nima yandi tubilaka mono nde: “Mwana ya muntu, mikwa yai kele nzo ya mvimba ya Izraele.+ Bo ke tuba nde, ‘Mikwa na beto kele ya kuyuma, mpi kivuvu na beto me fwa.+ Bo me fwa beto kibeni.’ 12 Yo yina bikula mpi tubila bo nde, ‘Yehowa Mfumu ya Kuluta Nene me tuba nde: “Bantu na mono, mono ta kangula maziamu na beno+ mpi ta basisa beno na maziamu na beno mpi mono ta nata beno na insi ya bantu ya Izraele.+ 13 O bantu na mono, beno ta zaba nde mono kele Yehowa ntangu mono ta kangula maziamu na beno mpi ntangu mono ta basisa beno na maziamu na beno.”’+ 14 ‘Mono ta tula mpeve na mono na kati na beno mpi beno ta vutuka na luzingu,+ mpi mono ta tula beno na insi na beno; ebuna beno ta zaba nde mono mosi Yehowa, muntu me tuba mpi mono me sala yo,’ Yehowa muntu me tuba.”

15 Ndinga ya Yehowa kwisilaka mono diaka nde: 16 “Ebuna nge, mwana ya muntu, baka kitini mosi ya nti mpi sonika na zulu na yo nde, ‘Sambu na Yuda mpi sambu na bantu ya Izraele bayina kele ti yandi.’*+ Na nima, baka kitini ya nti ya nkaka mpi sonika na zulu na yo nde, ‘Sambu na Yozefi, kitini ya nti ya Efrayimi, mpi nzo ya mvimba ya Izraele bayina kele ti yandi.’*+ 17 Ebuna vukisa yo sambu yo kuma kaka nti mosi na diboko na nge.+ 18 Ntangu bantu na nge* ta tubila nge nde, ‘Keti nge ta songa beto ve kana mambu yai ke tendula inki?’ 19 songa bo nde, ‘Yehowa Mfumu ya Kuluta Nene me tuba nde: “Mono ta baka kitini ya nti ya Yozefi, yina kele na diboko ya Efrayimi, mpi makanda ya Izraele yina kele ti yandi, ebuna mono ta vukisa yo ti kitini ya nti ya Yuda; mpi mono ta sala nde yo kuma kaka kitini mosi ya nti,+ ebuna yo ta kuma kaka mosi na diboko na mono.”’ 20 Bitini ya banti yina nge ta sonika na zulu na yo fwete vanda na diboko na nge sambu bo mona yo.

21 “Ebuna songa bo nde, ‘Yehowa Mfumu ya Kuluta Nene me tuba nde: “Mono ta katula bantu ya Izraele na kati ya makanda yina bo kwendaka, mpi mono ta vukisa bo kisika mosi katuka na bandambu yonso mpi ta nata bo na insi na bo.+ 22 Mono ta kumisa bo dikanda mosi mpamba na insi yina,+ na bangumba ya Izraele, ebuna ntotila mosi mpamba ta yala bo yonso,+ mpi bo ta vanda diaka ve makanda zole; bo ta kabwana mpi diaka ve na bimfumu zole.+ 23 Bo ta kudibebisa diaka ve ti biteki na bo ya nzanzi,* ti mambu na bo ya mbi mpi ti masumu na bo yonso.+ Mono ta gulusa bo na mambu na bo yonso ya kukonda kwikama yina bo sadilaka masumu, mpi mono ta kumisa bo bunkete. Bo ta vanda bantu na mono, mpi mono mosi ta vanda Nzambi na bo.+

24 “‘“Nsadi na mono Davidi ta vanda ntotila na bo,+ mpi bo yonso ta vanda kaka ti ngungudi mosi.+ Bo ta landa bankanu na mono mpi ta zitisa mbote-mbote bansiku na mono.+ 25 Bo ta zinga na insi yina mono pesaka nsadi na mono, Yakobi, kisika yina ba-nkaka na beno zingaka,+ ebuna bo ta zinga kuna kimakulu,+ bo ti bana na bo* ti bana ya bana na bo;+ mpi nsadi na mono Davidi ta vanda mfumu* na bo kimakulu.+

26 “‘“Ebuna mono ta sala kuwakana mosi ya ngemba ti bo;+ yo ta vanda kuwakana mosi ya kukonda nsuka ti bo. Mono ta tula bo na insi na bo, ta kumisa bo mingi+ mpi ta tula kisika na mono ya santu na kati na bo kimakulu. 27 Tenta* na mono ta vanda ti* bo, ebuna mono ta vanda Nzambi na bo, mpi bo ta vanda bantu na mono.+ 28 Ebuna makanda ta zaba nde mono, Yehowa, muntu ke santisa Izraele na ntangu kisika na mono ya santu kele na kati na bo kimakulu.”’”+