Kapu 57

Nkenda Sambu na Bantu ya Ntantu

NA NIMA ya kutungulula Bafarize sambu na bansiku na bau ya bambuta ya bwimi, Yezu mekatuka ti balongoki na yandi. Nge lenda kuyibuka nde, ntangu mingi ve na ntwala, yandi kukaka ve na kwenda kupema ti bau ntangu bibuka kwisaka kukuta bau. Ntangu yai, ti balongoki na yandi, yandi mekwenda na ntoto ya Tire ti Sidoni, yina kele na bakilometere mingi na ndambu ya nordi. Yau kemonana nde yai kele nzyetolo mosi kaka ya Yezu kesala ti balongoki na yandi na kuluta bandilu ya Izraele.

Na nima ya kuzwa nzo sambu na kuvanda, Yezu mesonga bau nde yandi kezola ve ata muntu mosi kuzaba kisika ya bau kele. Kansi, ata nkutu na teritware ya bantu ya Izraele ve, yandi lenda ve kuluta nkatu kuzabana. Nkento mosi ya Mugreki, ya kubutukaka na teritware yina, na Fenisia ya Siria, memona yandi mpi meyantika na kubondila yandi nde: “Mfumu, Mwana ya Davidi, wila mono mawa! Mwana na mono ya nkento ke na mpeve ya mbi, ebuna yandi ke mona mpasi mingi.” Kansi, Yezu kevutula ve ata ngogo mosi.

Na nima ya mwa ntangu, balongoki metubila Yezu nde: “Kula yandi! Yandi ke tula makelele mingi ntangu yandi ke kwisa kulanda beto!” Na kutendulaka kikuma yandi kesala bonso yandi kemona yandi ve, Yezu ketuba nde: “Nzambi tindaka mono kaka sambu na bantu ya Israele yina kele bonso mameme yina me vilaka.”

Kansi, nkento yango kelemba ve. Yandi mepusana na Yezu mpi mefukama na ntwala na yandi. Yandi medodokila yandi nde: “Mfumu, sadisa mono!”

Mawa ya inki mutindu ntima ya Yezu fwete kuvanda na yau sambu na dodokilu na yandi ya kufuluka na masonga! Kansi, yandi metubila dyaka mukumba na yandi ya ntete, ya kusamuna na bantu ya Nzambi, bantu ya Izraele. Na mbala mosi, yau kemonana nde sambu na kumeka lukwikilu na yandi, yandi metubila mawi ya kimbuta ya Bayuda kevandaka na yau na ntwala ya bantu ya makanda ya nkaka, na kutubaka nde: “Ke mbote ve na kubaka mampa ya bana sambu na kulosila yo [bana ya, NW] bambwa.”

Na ndinga na yandi ya kufuluka na mawa mpi na mutindu na yandi ya kutala, Yezu kesonga mpenza mawi na yandi ya mawa sambu na bantu yina kele ve Bayuda. Nkutu yandi melembika kufwanisa ya Bantu ya Makanda na bambwa ntangu yandi kebinga bau nde “bana ya bambwa.” Na kisika ya kuwa nsoni, nkento yango mesadila ntubilu ya Yezu yina metala mawi ya kimbuta ya Bayuda mpi metuba na kudikulumusa yonso nde: “E Mfumu, yo kele kieleka, kansi ata [bana ya, NW] bambwa mpi ke diaka bitini ya mampa yina ke bwaka na nsi ya mesa ya bamfumu na bo.”

Yezu mevutula nde: “Nge kele nkento mosi ke na lukwikilu ya ngolo! Mambu yina ya nge me zola, yo ta salama.” Mpi yau mesalama! Ntangu yandi mevutuka na nzo na yandi, yandi mekuta mwana na yandi na zulu ya mbeto, ya kubeluka mpenza.

Katuka na ndambu ya lweka ya masa ya Sidoni, Yezu ti balongoki na yandi mezenga insi sambu na kwenda na ndambu ya zulu ya Nzadi ya Yordani. Na ntembe ve, bau kesabuka Yordani na kisika mosi na zulu ya Nzadi ya Galilea mpi kekota na ntoto ya Dekapoli na ndambu ya esti ya nzadi. Kuna bau memata na ngumba mosi, kansi bantu mezwa bau mpi bau menatila Yezu bantu na bau ya kufwa makulu, bikata, bifwa-meso, bifwa-makutu ti bikata ya nkaka mingi mpi bantu ya maladi. Bau kelosa bau na makulu ya Yezu, na mutindu ya kutuba, mpi yandi kebelula bau. Bantu keyituka, ntangu bau kemona bababa ketuba, bifwa-makulu ketambula, mpi bifwa-meso kemona; mpi bau kekembila Nzambi ya Izraele.

Yezu metula dikebi ya ngolo na muntu mosi yina kele kifwa-makutu mpi ketubaka na mpasi. Mbala mingi, bifwa-makutu kewaka nsoni, mingimingi na kati ya bantu. Mbala ya nkaka Yezu memona mawi ya kuswaswana ya muntu yai. Ebuna, Yezu mekatula yandi na kati ya kibuka na mawa yonso sambu na kunata yandi na kingenga. Ntangu bau kele bau mosi, Yezu memonisa kima ya yandi tasala sambu na yandi. Yandi metula misapi na yandi na kati ya makutu ya muntu yango mpi, na nima ya kulosa mate, yandi mesimba ludimi na yandi. Na nima, na kutalaka na zulu, Yezu mepema ngolo mpi metuba nde: “Kanguka!” Na mbala mosi, muntu yango meyantika na kuwa, mpi yandi mekuka kutuba mbote.

Ntangu Yezu mesala bimangu yai mingi ya kubelula, bibuka memonisa ntonda. Bau ketuba nde: “Mambu yonso ya yandi [mesala], yo kele ya mbote: Bantu yina vandaka na makutu ya kufwa, bo ke wa; bantu yina vandaka bababa, bo ke tuba.” Matayo 15:​21-31; Marko 7:​24-37.

▪ Sambu na inki Yezu mebelula ve mwana ya nkento ya Mugreki na mbala mosi?

▪ Na nima, na wapi Yezu menata balongoki na yandi?

▪ Inki mutindu Yezu mekudimonisa muntu ya mawa sambu na kifwa-makutu yina ketubaka na mpasi?