Keti Kubelula na Bimpa Kele Tii Bubu Yai?

“NDIMA Yezu, nge tabeluka!” Kutuba ya mutindu yai nataka Alexandre, muntu mosi ya Église évangélique, na kundima nde kunwa nkisi sambu na kubeluka kele kumonisa kukonda ya lukwikilu. Yandi ndimaka mpenza nde kaka lukwikilu na yandi yau mosi mpamba tabelula yandi na kimpa. Benedita, muntu mosi ya ngolo ya Katolika waka kyese ya ngolo ntangu yandi waka mutindu bantu vandaka kubeluka na kimpa na tempelo ya Aparecida do Norte, na ntoto ya São Paulo, na Brésil. Na kutubaka na ndinga ya mazi yina mama-mbuta na yandi longaka yandi, Benedita lombaka ngolo ya kubelula bambefo na kisambu na Mama na Beto ya Aparecida, na Anthony, ti na “basantu” yankaka.

Nkutu tii bubu yai na nsuka ya mvu-nkama ya 20, yau kele pwelele nde bantu kekwikila kaka na kubelula ya bimpa​—⁠sambu na inki? Ziku, sambu bankaka kelembaka nitu ntangu baminganga kekukaka ve na kubelula maladi ti mpasi ya bantu na bau ya zola, mingimingi bana na bau. Bayina kele ti maladi ya kemanaka ve lenda mona nde mutindu nkisi mekuma ntalu mingi, yau kele mbi ve na kusosa kubeluka sambu na lukwikilu. Bankaka kemonaka na TV, mabundu ti bantu mingi kebelula Sida, maladi ya ntima, kansere, maladi ya kilawu, ya tansio, ti maladi yankaka mingi. Ata bau kekwikila na mambu yina to ve, bau lenda sosa yau sambu kima yankaka ya kusala kevandaka ve. Dyaka, bayina keyindulaka nde kele bampeve ya mbi bantu keloka bau maladi, lenda yindula nde nkisi ya munganga kele ti ngolo ve ya kubelula bau.

Na ndambu yankaka, kele ti bantu yina kebuyaka ti ngolo yonso, to kebedisaka, ngindu ya kubelula na bimpa na nzila ya “basantu” ya mefwaka to ya banganga-nkisi. Na kutadilaka zulunalu mosi (Jornal da Tarde), Dráusio Varella, longoki ya mutindu nitu kenwanaka ti maladi, ketuba nde kundima bimpa kele “kuseka lukwikilu ya bantu ya kukonda mayele ti bantu ya kukonda kivuvu.” Yandi keyika nde: “Na kutulaka kivuvu na bimpa, bamingi lenda bikisa kulanda nkisi ya mbote sambu na bampukumuni yina.” Ye, The New Encyclopædia Britannica ketendula nde: “Na ntangu ya ntama, kubelula kukonda nkisi vandaka salama na bisika ya santu ti na bisalu ya lusambu, mpi siansi ya baminganga kemonisaka nde kubelula ya mutindu yina kesalamaka sambu na bupusi ya bandongi ya kesadisaka na bamvwandilu ya mbote.” Kansi, kele ti bantu ya kendimaka nde bau belukaka mpenza na kimpa. Sambu na bau, kubeluka salamaka mpenza!

Bantu yina kuzaba Biblia kezabaka nde Yezu Kristu belulaka bambefu mbala mingi, yandi vandaka sala yau na “ngolo ya Nzambi.” (Luka 9:​42, 43) Yau yina, bau lenda kudiyula nde, ‘Keti ngolo ya Nzambi kesalaka mpi kebelulaka bantu tii bubu yai?’ Kana ee, sambu na inki bantu kenungaka ve na kubelula bambefo mutindu bau kesilaka? Keti yau kele sambu mbefo kevandaka ve ti lukwikilu ya mingi to sambu makabu na yandi kevandaka fyoti? Keti yau kele mbote sambu na Mukristu na kusosa kubeluka na kimpa kana yandi kebela maladi ya mpasi mingi to ya kebelukaka ve? Ye, keti mutindu ya bimpa yina vandaka kununga kaka, ya Yezu salaka, tabika kusalama dyaka? Nge tazwa mvutu na bangyufula yai ya mfunu na disolo ya melanga.