“Kyese ya bakala yina kele ti nkento ya mbote”

MBALA mingi, bantu mingi ketubaka pwelele nde Bambangi ya Yehowa kefwaka makwela ya bantu. Kansi, makwela mingi yina nkwelani mosi mpamba kele Mbangi ya Yehowa kemonisa nde mambu yai kele ya luvunu. Kuzitisa ndongisila ya Biblia na luzingu ya dibuta kenataka kyese na makwela, mutindu mukanda yai ya bo basisaka na zulunalu mosi ya Kifalansa kemonisa yo.

“Kiteso ya bamvula 28 melunga ntangu yai, banda mono kezingaka na kyese ti nkento mosi ya mbote yina kele Mbangi ya Yehowa. Yandi sansaka bana na mono tanu, na kati na bo, zole kuvandaka bana na yandi ve. Kansi, yandi vandaka kubaka bo yonso kiteso mosi mpi yandi vandaka kuzola bo mingi. Mono kele direktere ya kompani mosi bubu yai. Mono kele ti bantu ya kisalu 45. Mono kezabisa beno nde yandi mesadisaka mono mingi sambu kisalu na mono kusalama mbote. Mpi sambu mono kukuma na kifulu ya mono kele bubu yai. Yo yina, ntangu mono monaka disolo mosi na zulunalu ya mono ketangaka mbala na mbala, ketuba nde Bambangi ya Yehowa kele kigonsa sambu na kitini ya ntoto ya Lot-et-Garonne (France), mono bakaka lukanu ya kupesa beno kimbangi ya kyeleka.”

Mukanda yango ketuba dyaka nde: “Bo kenwaka ve makaya to kulauka malafu. Keti yai kele kigonsa? Bo kele Bakristu ya kezolaka kimpwanza, bo kendimisaka ve na ngolo bantu yankaka na kulanda bansiku yina bo kelandaka. Kansi, bo kepesaka mbandu ya mbote na mambu mingi. . . . Bo kekotaka ve na muyibi ya mbongo to na kuteka dyamba. Bo kesalaka ve lusilu ya kukonda kukwela, ebuna mono kezabisa beno ya kyeleka nde, bo kevandaka ti luzingu mosi ya mbote. . . .

“Ziku beno lenda yufula mono nde: Ebuna sambu na nki nge mosi kele Mbangi ya Yehowa ve? Sambu yo kelombaka kuvanda ti lukwikilu ya Bukristu mpi kuzitisa bansiku mbote. Mono kesonga beno nde yo kele pete ve sambu na bantu mingi.”