Bangyufula ya Batangi

Keti yo kele mayele nde Mukristu ya kyeleka kukwenda na mafwa to na feti ya makwela yina tasalama na nzo-Nzambi mosi?

Kana beto kwenda na kisika ya bo kesala konso mutindu yina ya lusambu ya luvunu, yo tapesa ve Yehowa kyese ata fyoti mpi beto fwete buya na kusala yo. (2 Korinto 6:14-17; Kusonga 18:4) Mafwa ya bo mesala na nzo-Nzambi kele mutindu mosi ya lusambu yina bo ketubilaka mambu ya kewakanaka ve ti Masonuku. Mu mbandu, malongi yina ketubaka nde moyo kefwaka ve mpi nde bantu yonso ya mbote kekwendaka na zulu. Mbala yankaka yo kelombaka kusala mambu bonso kidimbu ya kulunsi mpi kulanda kisambu yina nganga-Nzambi to pastere kesala. Bisambu mpi mambu yankaka ya lusambu yina kewakana ve ti malongi ya Biblia lenda vanda mpi na kati ya mambu yina bo tasala na feti ya makwela na nzo-Nzambi to kisika yankaka. Kana Mukristu mevanda na kati ya kimvuka yina bantu yonso kesala mambu yina bo kesalaka na lusambu na bo ya luvunu, yo lenda vanda mpasi sambu na yandi na kukonda kusala bonso bo. Yo kele ve mayele ata fyoti na kuditula na kigonsa ya nene ya mutindu yina!

Inki beto lenda tuba kana Mukristu mosi kemona mpenza nde yandi fwete kwenda kaka na mafwa to na feti ya makwela yina tasalama na nzo-Nzambi? Mu mbandu, bakala yina kele mumpani lenda lomba na nkento na yandi yina kele Mukristu na kufidisa yandi na kisika ya mutindu yina. Keti yandi lenda kwenda ti bakala na yandi sambu na kutala kaka na meso? Sambu na kulungisa bampusa ya bakala na yandi, nkento yina lenda baka desizio ya kukwenda ti yandi, ti dibanza nde yandi takota ve na bisambu yina tasalama. Kansi, yandi lenda baka mpi desizio nde yandi takwenda ve, sambu yandi keyindula nde mambu yina tasalama lenda vanda na bupusi ya ngolo mingi na mawi na yandi na mpila nde yo pusa yandi na kufwa minsiku ya Nzambi. Yandi mosi muntu fwete baka desizio na yandi. Yandi fwete zenga na ntima na yandi, nde yandi fwete kuditanina sambu na kuvanda na kansansa ya mbote.​—1 Timoteo 1:19.

Na kutuba ya mbote, yo tavanda sambu na mambote na yandi kana yandi tendudila bakala na yandi nde yandi takota ve na mambu yonso ya bisambu yina tasalama kuna to kuyimba bankunga to kunyekisa ntu na yandi ntangu bo tasamba. Na nsadisa ya ntendula na yandi, bakala na yandi lenda mona nde kunata nkento na yandi lenda basisa mambu yankaka yina tapesa yandi ve kyese. Yandi lenda ndima na kukwenda yandi mosi sambu yandi kezolaka nkento na yandi, sambu na kuzitisa lukwikilu na yandi, to sambu na kubuya mavwanga. Kansi kana yandi lomba kaka nde nkento na yandi kukwenda ti yandi, nkento lenda kwenda kansi sambu na kutala mambu yonso kaka na meso.

Beto fwete vila mpi ve bangindu yina bampangi na beto Bakristu tavanda na yo kana bo mona beto na bisambu na nzo-Nzambi mosi. Keti yo talwadisa kansansa ya bampangi yankaka? Keti nge talembisa kikesa na nge kukonda kubwa na lusambu ya biteki yina bo kevandaka na yo? Ntumwa Polo kusyamisaka beto na ‘kusola mambu yina ya kuluta mfunu sambu na kuvanda bantu ya kieleka ti ya kukonda kifu na kilumbu yina ya Kristo ta kwisa kuvutuka.’​—Filipi 1:10.

Kana dikambu yango metadila mpangi na beto ya musuni, bupusi yankaka lenda katuka na bampangi ya dibuta na beto. Ata mpidina, Mukristu fwete tadila mbote mambu yonso yina tasalama na ntwala ya kubaka desizio. Na nima ya kutadila mambu yankaka, yandi lenda mona nde ata dyambu mosi ya mpasi tasalama ve kana yandi kwenda na mafwa to na feti ya makwela na nzo-Nzambi sambu na kutala na meso mpamba. Kansi, yo lenda monana nde kukwenda na kisika ya mutindu yina lenda lwadisa mingi kibeni kansansa ya muntu yandi mosi to ya bampangi yankaka kuluta mambote yina yandi tabaka kuna. Ata konso nki desizio yina yandi tabaka, Mukristu fwete keba mbote na mpila nde desizio na yandi kubebisa ve kansansa na yandi ya mbote na ntwala ya Nzambi ti bantu.