Kimfumu ya Nzambi Kele Inki?

INKI kuvandaka ntu-dyambu ya kisalu ya kusamuna ya Yezu? Yezu yandi mosi kutubaka nde yo vandaka Kimfumu ya Nzambi. (Luka 4:43) Ntangu bantu vandaka kuwidikila yandi, ntembe kele ve nde bo vandaka kuwa yandi ketubila mbala mingi Kimfumu. Keti bo vandaka kuyituka? Keti bo yulaka yandi kana Kimfumu yango kuvandaka inki? Ve. Baevanzile ketubila ve bangyufula ya mutindu yina. Keti yo kezola kutuba nde bantu yina kuzabaka mbote Kimfumu ya Nzambi?

Kyeleka kele nde Masonuku ya ntama, yina Bayuda vandaka kuzitisa mpi kutadila bonso ya santu, vandaka kutendula Kimfumu yina mpi kusadila bangogo ya pwelele sambu na kumonisa nki kuvandaka Kimfumu yango mpi nki yo tasala. Bubu yai, beto lenda longuka mambu mingi dyaka ya metala Kimfumu yina na kutangaka Biblia, mutindu Bayuda kusalaka. Bika beto tadila bakyeleka nsambwadi yina Biblia kelonga beto na yina metala Kimfumu. Bayuda ya ntangu ya Yezu ti yina kuzingaka na ntwala na yandi vandaka kuzaba bakyeleka tatu ya ntete. Na nsungi ya mvu-nkama ya ntete, Kristu ti bantumwa na yandi kuzabisaka bakyeleka tatu yankaka yina kelanda. Kyeleka ya nsuka memonanaka pwelele na ntangu na beto.

1. Kimfumu ya Nzambi kele guvernema mosi ya kyeleka yina tazinga kimakulu. Mbikudulu ya ntete ya Biblia kumonisaka nde Nzambi zolaka kutinda ngulusi sambu na bantu ya kwikama. Mbikudulu kubingaka yandi nde “nkuna,” mpi yandi muntu takatula bampasi yonso yina kuyantikaka na kukolama ya Adami, Eva, ti Satana. (Kuyantika 3:15, NW) Bamvula mingi na nima, Nzambi kutubilaka Ntotila ya kwikama Davidi dyambu mosi ya kitoko ya metala “nkuna” yango, to Mesia. Yandi zolaka kukuma Ntotila ya Kimfumu mosi. Guvernema yango zolaka kuswaswana ti baguvernema yonso yankaka. Yo zolaka kuzinga kimakulu.​—2 Samuele 7:12-14.

2. Kimfumu ya Nzambi tafwa baguvernema yonso ya bantu. Profete Daniele kumonaka na mbona-meso mosi kulandana ya bimfumu ya ngolo ya nsi-ntoto, banda luzingu yonso ya bantu tii na ntangu na beto. Tala mutindu mbona-meso yina kesuka na kyese yonso: “Ntangu ya bantotila [ya bantu ya nsuka] yina ta yala, Nzambi ya zulu ta tula ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.” Yo yina, bimfumu to baguvernema yonso ya nsi-ntoto yai tafwa kimakulu, kumosi ti bitumba, luyalu na bo ya nku, mpi mambi na bo. Mutindu mbikudulu ya Daniele kemonisa yo, kubika fyoti Kimfumu ya Nzambi tayala nsi-ntoto ya mvimba. (Daniele 2:44, 45) Kimfumu yai kele ya kyeleka mpi yo kele guvernema mosi mpamba yina tayala na ntoto.a

3. Kimfumu ya Nzambi tamanisa bitumba, maladi, nzala, mpi lufwa. Bambikudulu ya Biblia ya kepesa kyese kemonisa mambu yina Kimfumu ya Nzambi tasala awa na nsi-ntoto. Yo talungisa mambu yina ata guvernema mosi ve ya bantu mesalaka, mpi yina bo takuka kusala ve. Yindula fyoti, minduki yonso ya bitumba tavanda dyaka ve kimakulu! Nzambi tabukabuka yo. ‘Yandi tasukisa bitumba na nsi-ntoto yonso.’ (Nkunga 46:10) Badoktere, balupitalu, mpi ba maladi ya mitindu yonso tavanda dyaka ve. “Ata muntu mosi ve . . . ta tuba diaka nde: ‘Mono ke bela.’” (Yezaya 33:24) Nzala tavanda dyaka ve, mpi bantu takonda ve madya ya mbote. ‘Ntoto tafuluka na ble mingi, bangumba tafuluka na bima ya bilanga.’ (Nk. 72:16) Mafwa, matanga, basimetiere, bamorge, mpi bampasi yina mambu yai kenataka tavanda dyaka ve. Lufwa, yina kele mbeni na beto ya kewilaka beto ve mawa, tasuka kimakulu. Nzambi “ta sukisa lufwa kimakulu! Yandi ta katula mansanga na meso ya bantu yonso.”​—Yezaya 25:8.

4. Kimfumu ya Nzambi kele ti Mfumu yina Nzambi meponaka. Mesia kuditulaka ve Mfumu, mpi bo ponaka yandi ve na bantu ya kukonda kukuka. Yehowa Nzambi yandi mosi muntu kuponaka yandi. Batitre Mesia ti Kristu kemonisa yo mosi nde Nzambi muntu kutulaka yandi Mfumu. Batitre yai zole ketendula “Mupakulami.” Yo yina, Yehowa mepakulaka Ntotila yai, to meponaka yandi, sambu na kisalu mosi ya sipesiali. Nzambi kutubaka sambu na yandi nde: “Tala muntu na mono, ya mono ke pesa ngolo, muntu ya mono solaka, ya mono ke monina kiese. Mono me tulaka yandi mpeve na mono, yandi ta longa konso bantu mambu ya kieleka.” (Yezaya 42:1; Matayo 12:17, 18) Katula Ngangi na beto, nani yankaka mezaba kuluta mbote mutindu ya Mfumu yina mefwana sambu na beto?

5. Mfumu ya Kimfumu ya Nzambi memonisaka na meso ya bantu yonso nde yandi mefwana. Yezu, muntu ya Nazareti, kumonisaka nde yandi vandaka Mesia yina Nzambi kusilaka. Yandi butukaka na dibuta yina Nzambi kuponaka. (Kuyantika 22:18; 1 Bansangu 17:11; Matayo 1:1) Ntangu yandi vandaka na ntoto, yandi lungisaka bambikudulu mingi yina vandaka kutubila Mesia ya bo sonikaka bamvu-nkama mingi na ntwala. Mpi, Nzambi kumonisaka katuka zulu nde yandi vandaka Mesia. Inki mutindu? Nzambi kutubaka tuka na zulu, mpi kubingaka Yezu nde Mwana na yandi; bawanzyo kutubaka nde Yezu kuvandaka Mesia yina Nzambi kusilaka; mpi Yezu kusalaka bidimbu ya nkumbwa, mbala mingi na meso ya bantu, ebuna yo monisaka pwelele nde ngolo na yandi vandaka kukatuka na Nzambi.b Yezu kumonisaka mbala na mbala mutindu ya Mfumu yina yandi zolaka kuvanda. Yandi vandaka kaka ve na ngolo ya kusadisa bantu, kansi yandi vandaka mpi na mpusa ya kusala yo. (Matayo 8:1-3) Yandi vandaka kudibanza sambu na bantu yankaka, yandi vandaka kuwila bantu mawa, yandi vandaka kikesa mpi yandi vandaka muntu ya kudikulumusa. Bo sonikaka na Biblia disolo ya ketubila luzingu na yandi na ntoto sambu beto yonso kutanga yo.

6. Kimfumu ya Nzambi kele ti bantu 144 000 yina tayala ti Kristu. Yezu kutubaka nde bantu yankaka, mpi bantumwa na yandi, zolaka kuyala ti yandi na zulu. Yandi bingaka kimvuka ya bantu yina nde “kibuka ya fyoti.” (Luka 12:32, NW) Na nima, ntumwa Yoane kumonaka na mbona-meso nde kibuka yina ya fyoti tavanda ti bantu 144 000. Bo tasala kisalu mosi ya kyese na zulu, bo tavanda bantotila mpi tasala bonso banganga-Nzambi kumosi ti Kristu.​—Kusonga 5:9, 10; 14:1, 3.

7. Kimfumu ya Nzambi, ya keyala ntangu yai na zulu, kele ya kuyilama sambu na kuyala na ntoto ya mvimba. Kyeleka yai ya nsuka kele kyeleka ya kuluta kusepedisa na bakyeleka yonso ya beto melonguka. Biblia kepesa banzikisa mingi ya kemonisa nde Nzambi kupesaka Yezu kiyeka ya Kimfumu na zulu. Ntangu yai, yandi keyala kuna na zulu, mpi kubika fyoti yandi tayalumuna luyalu na yandi na ntoto ya mvimba mpi talungisa bambikudulu ya kitoko yina beto mekatuka kutubila. Kansi, inki mutindu beto lenda zaba nde Kimfumu ya Nzambi ke na kuyala ntangu yai? Mpi nki ntangu yo tayantika kuyala na ntoto?

[Banoti na nsi ya lutiti]