Beto Kezinga na Bantangu ya Mpasi

BIBLIA kutubaka nde bantu takutana ti “bantangu ya mpasi ya kukangila ntima.” (NW) Yo kebinga nsungi yai nde “bilumbu ya nsuka.” (2 Timoteo 3:1-5; 2 Piere 3:3-7) Yezu Kristu kutubilaka nsungi yina mosi ntangu yandi vandaka kupesa mvutu na ngyufula mosi yandi balongoki na yandi kuyulaka na yina metala “nsuka ya ntoto.” (Matayo 24:3) Keti beto kezinga ntangu yai na bilumbu ya nsuka? Fwanisa mambu yina Biblia kutubaka ti mambu yina barapore ya mebasika ntama mingi ve ketuba ya beto mevutukila na nsi, mpi zenga nge mosi.

Mambu yina Biblia kutubaka: bitumba na ntoto ya mvimba​—Luka 21:10; Kusonga 6:4.

Mambu yina barapore ya mebasika ntama mingi ve ketuba: “Ntalu ya bantu yina kufwaka na bitumba na mvu-nkama ya 20 meluta mbala tatu ntalu ya bantu yina kufwaka na bitumba na bamvu-nkama yonso ya meluta, banda na lubutuku ya Kristu.”​—Worldwatch Institute.

Mambu yina Biblia kutubaka: nzala ti maladi​—Luka 21:11; Kusonga 6:5-8.

Mambu yina barapore ya mebasika ntama mingi ve ketuba: Na mvu 2004 bantu kiteso ya bamilio 863 na ntoto ya mvimba vandaka ve kudya mbote, ntalu yai meluta ntalu ya 2003 na bamilio 7.​—Organisation des Nations unies pour l’alimentation et l’agriculture.

Kiteso ya miliare mosi ya bantu kezinga na bisika yina luzingu kele mpasi; bamiliare 2,6 ya bantu mekonda kisika ya kulosa mvindu mpi kabine; bamiliare 1,1 ya bantu mekonda masa ya mbote ya kunwa.​—Worlwatch Institute.

Bantu bamilio 500 kebela malaria; bamilio 40 kezinga ti SIDA; na mvu 2005 tiberkiloze kufwaka bamilio 1,6 ya bantu.​—Organisation mondiale de la santé.

Mambu yina Biblia kutubaka: kubebisa ntoto​—Kusonga 11:18, NW.

Mambu yina barapore ya mebasika ntama mingi ve ketuba: “Mambu ya bantu kesala mesalaka nde ntama mingi ve mitindu mingi ya bambisi ti banti tavila.” “Yo kemonana nde na ntoto ya mvimba mupepe (nature) takuka dyaka ve kusala kiteso ya bisalu zole na kati ya bisalu tatu yina yo kesalaka sambu na kutanina luzingu ya bantu.”​—Évaluation des écosystèmes pour le millénaire.

“Ba gaz à effet de serre yina bantu mesalaka mebebisaka mpenza climat ya ntoto, ebuna yo lenda vanda ti bigonsa ya mbi mpenza sambu na planete na beto.”​—NASA, Institut Goddard pour les études spatiales.

Mambu yina Biblia kutubaka: nsangu ya mbote ya Kimfumu talongama na ntoto ya mvimba​—Matayo 24:14; Kusonga 14:6, 7.

Mambu yina barapore ya mebasika ntama mingi ve ketuba: Na mvu 2007, Bambangi ya Yehowa 6 957 854 kulutisaka bangunga miliare 1,4 na kulonga nsangu ya mbote ya Kimfumu ya Nzambi na bansi 236.—Annuaire des Témoins de Jéhovah 2008.

Mutindu beto memona yo dezia, Biblia kutubaka nde ata na kati ya bansangu yai yonso ya mbi, bantu tavanda ti kikuma ya kutula ntima. Yezu kutubilaka ‘nsangu ya mbote’ ya Kimfumu ya Nzambi. Kimfumu ya Nzambi kele inki? Sambu na nki yo kepesa bantu kikuma ya kutula ntima na makwisa ya mbote? Mpi nki mutindu Kimfumu ya Nzambi tavanda ti bupusi na luzingu na nge?

[Bangogo sambu na kubenda dikebi ya kele na lutiti 5]

Biblia kutubilaka mambu ya kesalama na ntoto ya beto kemona bubu yai