Abrahami Muntu ya Lukwikilu

Na nkokila mosi, Abrahami metelama na nganda. Ntangu yandi ketala bambwetete na zulu, yandi keyituka kansi keyindula lusilu yina Nzambi pesaka yandi yina vandaka kutuba nde bana na yandi takuma mingi bonso bambwete ya zulu. (Kuyantika 15:5) Sambu na Abrahami, bambwete vandaka nzikisa yina vandaka kuyibusa yandi lusilu ya Yehowa. Bambwete yina vandaka kupesa yandi mpi kivuvu. Ata mpidina, kana Yehowa vandaka ti ngolo ya kuganga luyalanganu yai ya nene mpi bima yonso ya kele na kati, keti yandi lendaka mpi ve kupesa Abrahami ti sara makuki ya kubuta? Abrahami vandaka ti lukwikilu ya mutindu yina.

LUKWIKILU KELE INKI? Biblia kesadilaka ngogo “lukwikilu” sambu na kutubila kwikama ya ngolo na kima yina kemonikaka ve. Lukwikilu ya mutindu yina mesimbama na nzikisa mosi ya ngolo. Muntu yina kekwikilaka na Nzambi ketulaka dikebi na kulungana ya balusilu ya Yehowa mpi kendimaka nde yo talungana.

INKI MUTINDU ABRAHAMI MONISAKA LUKWIKILU? Abrahami monisaka nde yandi kekwikilaka na balusilu ya Nzambi. Sambu yandi vandaka ti lukwikilu ya ngolo, Abrahami yambulaka bwala yina yandi butukaka mpi ndimaka nde Yehowa talungisa lusilu na yandi ya kukwenda na bwala yankaka. Na lukwikilu, Abrahami kwendaka na nsi Kanana ti kivuvu nde na bilumbu kekwisa bana na yandi tazinga na nsi yina. Na lukwikilu, Abrahami lemfukaka na kutambika Izaki mwana na yandi bonso kimenga mpi ndimaka nde kana yo vandaka mfunu Yehowa zolaka kufutumuna Izaki.​—Baebreo 11:8, 9, 17-19.

Abrahami tulaka dikebi na makwisa kansi ve na mambu ya melutaka. Ata luzingu na yandi ti Sara vandaka mbote na mbanza Ure kuluta na mbanza Kanana, “bo landaka ve na kuyindula bwala yina bo yambulaka.” (Baebreo 11:15, Today’s English Version) Kansi, bo tulaka dikebi na mutindu Nzambi zolaka kusakumuna bo mpi bana na bo na makwisa.​—Baebreo 11:16.

Keti lukwikilu ya Abrahami vandaka ya kyeleka? Ee. Yehowa lungisaka balusilu na yandi yonso. Na nima, bana ya Abrahami kumaka mingi mpi salaka dikanda mosi ya zabanaka na zina Izraele. Nsuka-nsuka, bantu ya Izraele tungaka na Kanana ntoto yina Yehowa silaka na kupesa Abrahami.​—Yozue 11:23.

INKI MALONGI BETO KEBAKA? Beto lenda ndima nde Yehowa ta lungisa balusilu na yandi. Ata bantu keyindulaka nde balusilu yankaka ya Nzambi talungana ve, beto kekwikilaka nde “Nzambi lenda sala mambu yonso.”​—Matayo 19:26.

Mbandu ya Abrahami kelonga beto mpi na kutula dikebi na mambote yina beto tabaka na makwisa kansi ve na mutindu mambu salamaka na ntangu ya ntama. Jason bakisaka mambu yai. Yandi belaka maladi mosi ya ngolo yina salaka nde binami mingi ya nitu vandaka kusala diaka ve (paralysé). Jason ketuba nde: “Mono fwete ndima nde, bantangu yankaka mono keyindulaka mambu yina melutaka ntama.” Yandi keyika nde: “Kele ti mambu ya fyoti-fyoti yina mono kesalaka ve, mumbandu kuyamba nkento na mono Amanda.”

Ata mpidina, Jason kekwikilaka mpenza nde Yehowa talungisa balusilu na yandi, tanga mpi lusilu yina kemonisa nde ntama mingi ve ntoto na beto takituka paladisu mpi nde bantu ya kwikama ta zinga mvula na mvula ti mavimpi ya mbote.a (Nkunga 37:10, 11, 29; Yezaya 35:5, 6; Kusonga 21:3, 4) Jason ketendula nde: “Mono kemona nde bilumbu ya mbote kuluta kele na ntwala, kubika fyoti mambu yai yonso tavanda ya ntama​—mawa, mpasi mpi masumu—​tavanda dyaka ve.” Yai kele mpenza mbandu ya mbote ya lukwikilu bonso yina ya Abrahami!

[Noti na nsi ya lutiti]