“Yehowa Ke Vilaka Mono Ve”

Mono butukaka na 1983. Ntangu mono vandaka mwana-fioti, mono vandaka kuyela mbote kansi ntangu mono lungisaka bamvula 10, mono yantikaka kuwa mpasi mingi na nitu ya mvimba. Kiteso ya bamvula zole na nima, kilumbu mosi ntangu mono telemaka na suka, mono vandaka kukuka ve kutambula. Mono salaka bikesa ya kutelema kansi makulu na mono vandaka kaka pete-pete. Banda kilumbu yina mono ke tambulaka diaka ve. Maladi yina me salaka mpi nde mono yela diaka ve. Bubu yai, mono kele kaka nkufi bonso mwana-fioti.

Mono vandaka kaka na nzo bangonda mingi. Kilumbu mosi, Bambangi ya Yehowa zole ya bankento kwisaka na nzo, mbala mingi kana banzenza me kwisa, mono vandaka kubumbana. Kansi, kilumbu yina mono ndimaka kusolula ti bo. Ntangu bo vandaka kutubila Paladisu, mono yibukaka mambu yina mono waka ntangu mono vandaka ti bamvula tanu. Na ntangu yina, mpangi Jethro yina vandaka misionere na nsi Suriname vandaka kukwisa na bwala na beto mbala mosi konso ngonda mpi yandi vandaka kulonguka Biblia ti papa. Mpangi Jethro vandaka kuzola mono, mono mpi vandaka kuzola yandi mingi. Diaka, ba-nkaka na mono vandaka kunata mono na balukutakanu ya Bambangi ya Yehowa yina vandaka kusalama na bwala na beto. Yo yina, ntangu mpangi Florence yina kwisaka ti mpangi yina ya nkaka kilumbu yina, yulaka mono kana mono ta zola kulonguka mambu mingi, mono ndimaka.

Mpangi Florence kwisaka diaka ti bakala na yandi Justus mpi mono yantikaka kulonguka ti bo Biblia. Ntangu bo bakisaka nde mono zabaka ve kutanga, bo sadisaka mono mpi na nima mono zabaka kutanga. Kilumbu mosi bo songaka mono nde bo me tinda bo na kukwenda kusamuna na Suriname. Yo pesaka mono mpasi sambu ata Mbangi ya Yehowa mosi ve vandaka na Orealla sambu mono landa kulonguka ti yandi. Ata mpidina, mono sepelaka sambu Yehowa vilaka mono ve.

Ntangu fioti na nima, mpangi Floyd yina vandaka mupasudi-nzila kwisaka na Orealla mpi yandi kwisaka na nzo na beto ntangu yandi vandaka kusamuna nzo na nzo. Ntangu yandi lombaka mono na kulonguka Biblia, mono sekaka mpi yandi yulaka mono nde: “Sambu na nki nge me seka?” Mono songaka yandi nde mono me longukaka kamukanda Inki Nzambi Kelombaka? Mpi mono yantikaka kulonguka kamukanda Nzayilu ya Ke Nataka na Luzingu ya Mvula na Mvula.a Mono tendudilaka yandi kikuma yina me salaka nde mono longuka diaka ve. Beto landaka kulonguka ti mpangi Floyd mukanda Nzayilu kansi na nima bo tindaka yandi mpi na kukwenda kusamuna kisika ya nkaka. Mono vandaka diaka ve ti muntu ya kulonguka ti yandi.

Kansi na 2004, mpangi Granville mpi Joshua yina vandaka bapasudi-nzila ya nene, kwisaka na Orealla. Bo vandaka kusamuna nzo na nzo mpi bo kwisaka na nzo na beto. Ntangu bo lombaka mono na kulonguka Biblia, mono sekaka. Mono lombaka bo na kuyantika kulonguka ti mono mukanda Nzayilu banda na luyantiku. Mono vandaka na mfunu ya kumona kana bo ta longa mono kaka mambu yina beto longukaka ti balongi na mono ya ntete. Mpangi Granville songaka mono nde bo ke sala balukutakanu na Orealla. Ata mono vandaka kubasika ve bamvula kiteso ya kumi, mono sepelaka kukwenda. Yo yina, mpangi Granville tulaka mono na kiti ya bikata mpi nataka mono na Nzo ya Kimfumu.

Ntangu fioti na nima, mpangi Granville lombaka mono na kusala masolo na Nzo-Nkanda ya Kisalu ya Teokrasi. Yandi tubaka nde: “Nge kele kikata kansi nge ke tubaka. Kilumbu kele nge ta sala diskure. Kwikila mambu ya mono ke songa nge.” Mambu yina yandi tubaka pesaka mono kikesa.

Mono yantikaka kusamuna ti mpangi Granville. Kansi banzila mingi ya Orealla vandaka mvindu mpila ya kutambula na kiti ya bikata vandaka ve. Yo yina, mono lombaka mpangi Granville na kutula mono na velo ya bikata mpi kupusa mono. Beto kumaka kutambula mbote. Na Aprili 2005, mono bakaka mbotika. Ntangu fioti na nima, bampangi longaka mono mutindu ya kusala na mikanda mpi na sono mpi mono kumaka kusala na mikanda mpi na sono na Nzo ya Kimfumu.

Diambu ya mawa salamaka na 2007, papa fwaka na masa, bwatu ya bo vandaka na kati dindaka. Yo pesaka beto mpasi mingi. Mpangi Granville sambaka ti beto mpi tangilaka beto baverse yina pesaka beto kikesa. Bamvula zole na nima, diambu ya nkaka ya mpasi salamaka. Mpangi Granville fwaka mpi na masa. Bwatu ya bo vandaka na kati dindaka.

Na dibundu yina ya fioti beto vandaka diaka ve ti nkuluntu, beto bikalaka kaka ti nsadi ya kisalu mosi. Lufwa ya mpangi Granville pesaka mono mpasi kibeni sambu yandi vandaka nduku na mono ya ngolo. Yandi sadisaka mono mingi na kimpeve ti na kinsuni. Na lukutakanu yina beto salaka na nima ya lufwa na yandi, mono vandaka kutanga baparagrafe na Kulonguka ya Nzozulu ya Nkengi. Na nima, ya kutanga paragrafe ya ntete mpi ya zole, mono yantikaka kudila mpi mansanga landaka kukulumuka. Yo yina, mono kulumukaka na estrade.

Mono yantikaka kuwa mbote ntangu bampangi ya dibundu ya nkaka kwisaka kusadisa beto na Orealla. Diaka, Betele tindaka mpangi Kojo yina vandaka mupasudi-nzila ya nene. Mono waka kiese ntangu mama ti leke na mono ya bakala yantikaka kulonguka mpi bakaka mbotika. Na Marsi 2015 mono kumaka nsadi ya kisalu. Na nima, mono salaka diskure na mono ya ntete. Kilumbu yina mono waka kiese mpi mono dilaka ntangu mono yindulaka mambu yina mpangi Granville songaka mono, ntangu yandi tubaka nde: “Kilumbu kele nge ta sala diskure na Nzo ya Kimfumu. Kwikila mambu ya mono ke songa nge.”

Na manaka ya JW Télédiffusion mono ke monaka bambandu ya bampangi ya nkaka yina kele bonso mono. Ata bo kele bikata, bo ke salaka ngolo na kisalu ya Yehowa mpi bo kele na kiese. Mono mpi lenda sala mambu mingi na kisalu ya Yehowa. Lukanu na mono ya kusadila ngolo na mono na kisalu ya Yehowa pusaka mono na kusala kisalu ya kimupasudi-nzila ya ntangu yonso. Na Septembri 2019, bo songaka mono nsangu mosi yina pesaka mono kiese mingi mpi yo yitukisaka mono kibeni. Bo songaka mono nde mono me kuma nkuluntu na dibundu na beto yina kele ti bansamuni kiteso ya 40.

Mono kele na ntonda ya mingi sambu na bampangi yina me longukaka ti mono mpi yina me sadisaka mono na kisalu ya Yehowa. Kuluta yonso, mono ke pesa Yehowa mersi mingi sambu yandi ke vilaka mono ve.