Madya ya Mfumu

BETO mekuma na Kiya na nkokila. Yezu ti balongoki na yandi 12 mekutana na suku mosi ya nene sambu na kudya madya ya Pake. Muntu yina kebasika kele Judas Iscariote. Yandi mekwenda kutubila banganga-Nzambi mpila ya kukanga Yezu.

Kilumbu yitaka na ntwala, Judas kwendaka kumona bau mpi yulaka bau nde: ‘Inki beno tapesa mono kana mono sadisa beno na kukanga Yezu?’ Bau vutudilaka yandi nde: ‘Bibende makumi tatu ya mbongo.’ Judas kekwenda ntangu yai kukutana na bau mpi kunata bau na Yezu.

Madya ya Pake manaka. Kansi Yezu yantikaka na kupesa bau madya yankaka ya mfunu. Yandi pesaka bantumwa na yandi dimpa mpi tubaka nde: ‘Beno dya, sambu yai kele nitu na mono yina tapesama sambu na beno.’ Na nima yandi pesaka bau dikopa ya vinu mpi tubaka nde: ‘Beno nwa, sambu yai kele menga na mono yina tatyamuka sambu na beno.’ Bible kebinga madya yango nde ‘madya ya nkokila ya Mfumu,’ to ‘madya ya Mfumu.’

Bana ya Israele vandaka kudya madya ya Pake sambu na kuyibuka dyaka mpimpa yina wanzyo ya Nzambi taninaka bana ya ntete ya konso dibuta ya bana ya Israele, kansi yandi fwaka bayina ya Egypte. Kansi ntangu yai, Yezu Kristu zolaka nde balongoki na yandi kuyindula yandi, bonso muntu yina kupesaka luzingu na yandi sambu na bau. Bau fwete kudya madya yina ya mfunu konso mvula.

Na nima ya kudya Madya ya Nkokila ya Mfumu, Yezu tubilaka bantumwa na yandi na kuvanda ngolo, mpi kikesa na lukwikilu. Na nima bau yonso sambilaka Nzambi na kuyimbaka bankunga mpi bau kwendaka. Bau katukaka na kati ya mpimpa, minwi meluta. Inki kisika bau kwendaka?.