Yezu Ke Zinga

NKENTO ya beno kemona awa zina na yandi Maria Madelene, nduku ya Yezu, mpi bantu yai zole melwata bilele ya mpembe kele bawanzyo. Maria kenyeka sambu na kutala na kati ya kisika bau tulaka nitu ya Yezu. Kisika yai kele dizyami. Kansi nitu ya Yezu kele dyaka ve! Nani mekatula yau?

Ntangu Yezu fwaka, banganga-Nzambi kwisaka kutuba na Pilate nde: ‘Yandi metuba nde yandi tafutumuka na nima ya bilumbu tatu. Pesa nsiku nde bantu kwenda kukengidila dizyami kana ve, balongoki na yandi takwisa kuyiba nitu na yandi mpi tatuba na nima nde yandi mefutumuka!’ Pilate tubilaka bau nde: ‘Beno tinda basoda sambu na kukengidila dizyami.’

Kansi na kilumbu ya tatu, na suka kibeni, wanzyo mosi ya Jéhovah monikaka na mbala mosi. Yandi katulaka ditadi yina vandaka kukangisa munoko ya dizyami. Basoda bwaka ngambu sambu na matekita na boma. Na nima, ntangu bau talaka na kati ya dizyami, nitu ya Yezu vandaka dyaka ve! Na yau, bankaka na kati ya basoda kwendaka na mbanza kutubila banganga-Nzambi. Banganga-Nzambi pesaka bau mbongo mpi tubaka nde: ‘Beno tuba nde balongoki na yandi kwisaka na mpimpa mpi bau meyiba nitu na yandi ntangu beto vandaka kulala.’

Na ntangu yina, bankento yina vandaka banduku ya Yezu kwendaka na dizyami. Bau yitukaka ntangu bau monaka dizyami ya mpamba! Na mbala mosi, bawanzyo zole basikilaka bau mpi tubilaka bau nde: ‘Yezu mefutumuka. Beno kwenda kuzabisa balongoki na yandi.’ Ntangu bau bakaka ntinu sambu na kwenda kutubila bankaka, muntu mosi tedimisaka bau! Yau vandaka Yezu, yina tubilaka bau na kwenda kuzabisa balongoki na yandi.

Balongoki ndimaka ve ntangu bankento zabisaka bau mambu yina. Kansi, Pierre na Jean kwendaka ntinu na dizyami. Yau vandaka ya mpamba! Bau vutukaka, kansi Maria Madelene yina kwisaka mpi na dizyami, bikalaka pana. Na nima, yandi talaka na kati ya dizyami mpi monaka bawanzyo zole.

Nitu ya Yezu kwendaka wapi? Nzambi vidisaka yau. Nzambi futumunaka ve Yezu na kupesaka yandi nitu yina yandi vandaka na yau ntangu ya lufwa na yandi. Yandi pesaka yandi nitu ya kimpeve bonso yina ya bawanzyo. Kansi, Yezu lungaka kubaka nitu ya bumuntu mpi kumonisa na balongoki na yandi nde yandi vandaka kuzinga.