Ntumwa Pierre na Nzo ya Corneille

BENO kemona awa ntumwa Pierre na banduku na yandi zole. Kansi, sambu na nki muntu mefukama na ntwala ya Pierre? Keti yandi kesala mbote na kufukama mutindu yai? Nani yandi kele?

Muntu yai zina na yandi Corneille. Yandi kele mfumu ya basoda ya Rome. Corneille kuzaba Pierre ve, kansi bo zabisaka yandi na kubinga ntumwa na nzo na yandi. Sambu na inki?

Balongoki ya ntete ya Yezu vandaka Bayuda; kansi Corneille ve. Ata mpidina, Corneille zolaka Nzambi, yandi vandaka kusambila ngolo Nzambi mpi vandaka kusadisa bantu na yandi mbote. Kilumbu mosi na nima ya midi, yandi monaka wanzyo na ndosi, mpi wanzyo tubilaka yandi nde: ‘Nzambi keyangalala sambu na nge mpi yandi mendima bisambu na nge. Tinda bantu na Joppé sambu bau binga muntu mosi zina na yandi Pierre. Yandi kele na nzo ya Simon, yina kele penepene na masa ya nene.’

Nswalu, Corneille tindaka bantu na Joppé. Kilumbu yina kulandaka, ntangu bantu yai finamaka penepene na mbanza, Pierre vandaka na zulu ya nzo ya Simon. Yandi monaka lele ya nene katukaka na zulu mpi kulumukaka mpi bambisi ya mutindu na mutindu vandaka na zulu ya lele yina: bambisi ya mvindu yina nsiku ya Nzambi buyisaka na kudya. Kansi ndinga mosi wakanaka mpi tubaka nde: ‘Pierre telama. Fwa mpi dya.’

Pierre vutulaka nde: ‘Ikele ve! Mono medyaka ntete ve kima ya mvindu.’ Kansi ndinga kulandaka nde: ‘Bima ya Nzambi kemona ya mbote, nge bika kumona yau mvindu.’ Mambu yina kusalamaka mbala tatu. Ntangu Pierre vandaka kuyindula sambu na mambu yina, bantu ya Corneille tindaka kumaka mpi sosaka na kumona yandi.

Ebuna Pierre kulumukaka mpi tubilaka bau nde: ‘Mono yai muntu beno kesosa. Sambu na nki beno mekwisa?’ Bau vutudilaka yandi nde: ‘Wanzyo mosi metubila Corneille na kubinga nge na nzo na yandi.’ Kilumbu yina kulandaka, Pierre na banduku na yandi zole kwendaka na Cezarée kisika vandaka kuzinga Corneille.

Corneille bingaka bampangi na yandi na banduku na yandi. Ntangu Pierre kumaka, Corneille kwisaka kuyamba yandi mpi bwaka na makulu na yandi mpi fukamaka. Pierre tubilaka yandi nde: ‘Ikele ve, telama. Mono kele kaka muntu.’ Bible kebuyisa kufukama na ntwala ya muntu mpi na kusambila yandi. Beto fwete sambila muntu ve, kansi kaka Jéhovah.

Pierre tubaka na bantu yina yonso kutanaka na nzo ya Corneille nde: ‘Mono kemona nde Nzambi keyambaka bantu yonso yina kezola kusadila yandi.’ Mpi kaka na ntangu Pierre vandaka kutuba, Nzambi tindaka mpeve santu na yandi mpi bantu yonso yantikaka na kutuba na bandinga ya kuswaswana. Mambu yina yitukisaka balongoki yina vandaka Bayuda bayina kwisaka na ntumwa Pierre. Bau vandaka kuyindula nde Nzambi vandaka kumonisa nlemvo na yandi kaka na Bayuda. Dyambu yai kulongaka bau nde Nzambi keswasikisaka bantu ve. Sambu na yandi, ata mpusu mosi kuluta mpusu yankaka ve.