Kapu 17

Yezu Melonga Nikodemo

NTANGU yandi kele na Paki ya mvu 30 T.B., Yezu kesala bidimbu ya nene to bimangu. Yau yina, bantu mingi ketula lukwikilu na yandi. Nikodemo, mambere ya Sanedreni, kinzonzi ya nene ya Bayuda, keyituka mpi kezola kuzaba mambu ya kuluta mingi. Ebuna yandi mekwenda kutala Yezu na tombe ya mpimpa, mbala ya nkaka yandi kewa boma nde yandi tabebisa lukumu na yandi ti bamfumu ya nkaka ya Bayuda kana bau kumona yandi.

Yandi ketuba nde: “Longi, beto zaba nde Nzambi me tindaka nge sambu na kulonga beto; sambu ata muntu mosi ve lenda sala bidimbu mutindu nge ke salaka, kana Nzambi kele na yandi ve.” Na kupesa mvutu, Yezu metubila Nikodemo nde sambu na kukota na Kimfumu ya Nzambi, muntu fwete “butuka diaka mbala ya zole.”

Kansi, inki mutindu muntu lenda kubutuka dyaka mbala ya zole? Nikodemo meyufula nde: “Keti yandi lenda vutuka na divumu ya mama na yandi sambu na kubutuka diaka mbala ya zole?”

Ve, kubutuka mbala ya zole ketendula mpila yina ve. Yezu metendula nde: “Ata muntu mosi ve lenda kota na Kimfumu ya Nzambi kana yandi me butukaka ve na masa ti na Mpeve-Santu.” Ntangu Yezu kubakaka mbotika mpi mpeve santu kulumukaka na zulu na yandi, mpila yina yandi kubutukaka “na masa ti na Mpeve-Santu.” Nzambi kumonisaka nde yandi butaka mwana ya kimpeve yina kevandaka ti kivuvu ya kukota na kati ya Kimfumu ya zulu, na kulandisaka ndinga ya kukatukaka na zulu nde: ‘Yai kele Mwana na mono yina ya mono [mendimaka, NW].’ Na nima, na Pantekoti ya mvu 33 T.B., bantu ya nkaka ya kubotama tabaka mpeve santu mpi mpila yina, bau tabutuka dyaka bonso bana ya kimpeve ya Nzambi.

Kansi kisalu ya Mwana ya Nzambi ya kinsuni ya sipesiali kele mfunu. Yezu ketubila Nikodemo nde: “Mutindu Moize tulaka nioka mosi ya kibende na zulu ya dikunzi na ntoto ya zelo na zelo, bo ta tula Mwana-muntu mpi mutindu yina, sambu konso muntu yina me ndima yandi na ntima na yandi, yandi kuvanda na moyo ya mvula na mvula.” Ee, mutindu yau kulombamaka nde bantu ya Izraele yina banyoka ya ndikila kutatikaka kutala nyoka ya kibende sambu na kuguluka, mutindu mosi mpi bantu yonso fwete kutula lukwikilu na Mwana ya Nzambi sambu na kuguluka na nkadilu na bau ya lufwa.

Na nima, sambu na kumonisa kisalu ya Yehowa ya zola na mambu yai, Yezu metubila Nikodemo nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina [kemonisa lukwikilu na yandi, NW] yandi kufwa ve, kansi yandi kuvanda na moyo ya mvula na mvula.” Na yau, awa na Yeruzalemi, kaka bangonda sambanu na nima ya kuyantika kisalu na yandi, Yezu memonisa pwelele nde yandi kele nzila ya Yehowa Nzambi mesadila sambu na kugulusa bantu.

Yezu mefula na kutendudila dyaka Nikodemo nde: “Nzambi tindaka ve Mwana na yandi na nsi-ntoto sambu na kwisa [kusambisa, NW],” disongidila sambu na kuzengila yau nkanu ya mbi, to na kulola yau, na kuzengilaka bantu nkanu ya lufwa. Kansi, mutindu Yezu ketuba nde, bau tindaka yandi “sambu inza kuguluka na nsadisa na yandi.” (NW)

Nikodemo mekwisa na boma yonso na Yezu na kati ya tombe. Ebuna yau kele kyese na kumona nde Yezu mesukisa disolo na yandi na kutubaka nde: “Mambu ya bendaka ndola yo yai: Mwini [yina ya Yezu kufwanisaka ti luzingu mpi malongi na yandi] me kwisaka awa na nsi-ntoto, kansi bantu ke lutaka kuzola mpimpa; bo ke zolaka mwini ve, sambu bo ke salaka mambu ya mbi. Konso muntu yina ke salaka mambu ya mbi yandi ke buyaka mwini; yandi ke kwisaka penepene na mwini ve, mbaimbai mambu na yandi ya mbi ta monana. Kansi muntu yina ke salaka mambu ya kieleka, yandi ke kwisaka penepene na mwini, sambu bo mona nde yandi ke lemfukilaka Nzambi na mambu yina ya yandi ke salaka.” Yoane 2:23–3:21; Matayo 3:​16, 17; Bisalu 2:1-4; Kutanga 21:9.

▪ Inki mepusa nswalu Nikodemo na kwenda kutala Yezu, mpi sambu na inki yandi mekwisa na mpimpa?

▪ “Kubutuka diaka mbala ya zole” ketendula inki?

▪ Inki mutindu Yezu memonisa kisika na yandi na luguluku na beto?

▪ Yezu kwisaka ve sambu na kusambisa nsi-ntoto ketendula inki?