Kapu 30

Yezu Kepesa Mvutu na Bafundi na Yandi

NTANGU bamfumu ya dibundu ya Bayuda mefunda Yezu nde yandi mevwenza nsiku ya Kisabatu, yandi mevutula nde: “Tata na mono ke salaka kisalu na yandi ntangu yonso; mono mpi mono fweti sala.”

Ata Bafarize metuba, kisalu ya Yezu kele ve mutindu ya kisalu ya mebuyisama na nsiku ya Kisabatu. Kisalu na yandi ya kusamuna ti ya kubelula kele ntuma ya kukatukaka na Nzambi, mpi na kulandaka mbandu ya Nzambi, yandi kefula na kusala yau konso kilumbu. Kansi, mvutu na yandi mepesa nkutu Bayuda makasi ya kuluta yina ya bau kuvandaka na yau ntete, mpi bau kesosa kufwa yandi. Sambu na inki?

Yau kele sambu ntangu yai bau kekwikila kaka ve nde Yezu kevwenza Kisabatu kansi bau ketadila dyambu ya yandi kutubaka nde yandi kele Mwana ya Nzambi bonso luvwezo kibeni. Kansi Yezu kewa boma ve mpi metubila bau mambu ya nkaka yina metala ngwisana na yandi ya lemvo ti Nzambi. Yandi ketuba nde: “Sambu Tata ke zolaka mwana; yandi ke songaka yandi konso kisalu yina ya yandi mosi ke salaka.”

Yezu melanda nde: “Mutindu Tata . . . ke tedimisaka bantu na lufwa, mutindu yina mpi Mwana na yandi ke pesaka moyo na bayina yandi zola pesa yo.” Ya kyeleka, Mwana kele na kuyita kutedimisa bafwa na mutindu mosi ya kimpeve! Yezu ketuba nde: “Muntu yina ke waka malongi na mono, ke ndimaka mpi muntu yina tindaka mono, . . . yandi me basika na lufwa, yandi me baka moyo.” Ee, yandi kelanda nde: “Na ntangu ke kwisa​—⁠na kutuba ya mbote, yo mpi me lunga dezia​—⁠bantu yina me fwaka ta wa ndinga ya Mwana-Nzambi; bayina [kulundaka yau, NW], bo ta baka moyo.”

Ata yau kezabana nde Yezu metedimisa ntete ve ata muntu mosi na lufwa na mutindu mosi ya kyeleka, yandi ketubila bafundi na yandi nde lufutumuku ya bafwa ya mutindu yina tasalama. Yandi ketuba nde: “Beno yituka ve sambu na mambu yina; na ntangu ke kwisa, bantu yonso yina me fwaka kele na maziamu, bo ta wa ndinga na yandi, ebuna bo ta basika na maziamu na bo.”

Yau kemonana pwelele nde tii ntangu yai, Yezu meyitaka kumonisa ntete ve na meso ya bantu kiyeka na yandi ya mfunu na lukanu ya Nzambi na mutindu mosi ya pwelele mpenza. Kansi bafundi ya Yezu kezaba mambu mingi kuluta kimbangi na yandi mosi na yina metala mambu yai. Yezu meyibuka bau nde: “Beno tindaka bantu na beno na kwenda kuyula Yoane-Batiste, ebuna yandi tubaka kitemwe sambu na mambu ya kieleka.”

Kaka bamvula zole na ntwala, Yoane Mbotiki kutubilaka bamfumu yai ya dibundu ya Bayuda mambu ya metala Muntu yina kekwisa na nima na yandi. Na kuyibukaka bau zola ya mingi ya bau vandaka na yau ntete sambu na Yoane yina kele ntangu yai na boloko, Yezu ketuba nde: “Beno ndimaka na kiese na kuvanda na nsemo na yandi mwa-ntangu fioti.” Yezu keyibusa bau mambu yai sambu na kusadisa bau, ee, sambu na kugulusa bau. Kansi yandi mesimbama ve na kimbangi ya Yoane.

Yezu ketuba nde: “Bisalu ya mono ke salaka [yika mpi bimangu ya yandi kusalaka], yina ya Tata me songaka mono na kusala, bisalu yina ke songaka kitemwe ya mbote sambu na mono; yo ke songaka nde Nzambi me tindaka mono.” Katula yai, yandi keyika nde: “Tata yina tindaka mono yandi ke tubaka mpi kitemwe ya mbote sambu na mono.” Nzambi kutaka kimbangi sambu na Yezu, mu mbandu, na mbotika na yandi, na kutubaka nde: “Yai kele Mwana na mono, ya mono ke zolaka mingi.”

Ya kyeleka, bafundi ya Yezu kele ata na kikuma mosi ve ya kubuya Yandi. Masonuku yina ya bau kebula ntulu nde bau ketangaka keta kimbangi sambu na yandi! Yezu mesukisa nde: “Kana ya kieleka beno kwikilaka Moize, beno zolaka kukwikila mono mpi, sambu yandi sonikaka mambu me tadila mono. Kana beno ke ndimaka ve mambu ya yandi sonikaka, nki mutindu beno lenda ndima mambu yai ya mono ke tubaka?” Yoane 5:​17-47; 1:​19-27; Matayo 3:⁠17.

▪ Sambu na inki kisalu ya Yezu kevwenza ve Kisabatu?

▪ Inki mutindu Yezu ketendula kiyeka na yandi ya mfunu na lukanu ya Nzambi?

▪ Na kumonisa nde yandi kele mwana ya Nzambi, kimbangi ya nani Yezu metubila?