Kapu 69

Ngyufula ya Metala Kitata

NA NTANGU ya nkinsi, disolo ya Yesu ti bamfumu ya Bayuda mekuma ngolo. Yezu kendima nde: “Mono zaba nde beno kele bantu ya dikanda ya Abrahami. Kansi beno ke sosa na kufwa mono, sambu beno ke ndimaka ve malongi na mono. Mono ke tubaka mambu yina ya Tata na mono me songaka mono, kansi beno, beno ke salaka mambu yina ya tata na beno me tubilaka beno.”

Ata nkutu bau kezaba ve tata na bau, Yezu kemonisa pwelele nde tata na bau kele ya kuswaswana ti tata na yandi. Nkatu kuzaba nani Yezu ketubila, bamfumu ya Bayuda kevutula nde: “Tata na beto kele Abrahami.” Bau keyindula nde bau kele lukwikilu mosi ti Abrahami, yina kuvandaka nduku ya Nzambi.

Kansi, Yezu mepesa bau mpasi na ntima ti mvutu yai: “Kana ya kieleka beno kele bantu ya dikanda ya Abrahami, beno zolaka kusala mambu yina ya yandi salaka.” Ya kyeleka, mwana ya kyeleka kelandaka mbandu ya tata na yandi. Yezu ketuba nde: “Ata mono ke tubilaka beno mambu ya kieleka yina ya Nzambi tubilaka mono, kansi ntangu yai beno ke sosa kaka mpila ya kufwa mono. Abrahami salaka mambu ya mutindu yina ata fyoti ve.” Ebuna Yezu ketuba dyaka nde: “Beno ke sala mambu yina ya tata na beno mpi vandaka kusala.”

Kansi, bau kebakisa kaka ve nani Yezu ketubila. Bau kekangama kaka nde bau kele bana ya Abrahami kibeni, na kutubaka nde: “Beto kele bana-makangu ve.” Mpila yina, na kubulaka ntulu nde bau kele bansambidi ya kyeleka bonso Abrahami, bau ketuba nde: “Beto kele na Tata mosi, nde Nzambi.”

Kansi, keti ya kyeleka Nzambi kele Tata na bau? Yezu kevutula nde: “Kana ya kieleka Nzambi kele Tata na beno, beno zolaka kuzola mono, sambu mono me katukaka na Nzambi, ebuna ntangu yai mono kele awa. Mono me kwisaka na ngolo na mono mosi ve, kansi yandi tindaka mono. Sambu na nki beno ke bakisaka ve mambu ya mono ke tubilaka beno?”

Yezu memeka na kumonisa bamfumu ya dibundu yai malanda ya kubuya na bau yina bau kebuya yandi. Kansi ntangu yai yandi ketuba pwelele kibeni nde: “Tata na beno kele Satana, beno ke zolaka kusala mambu yina ya tata na beno ke zolaka.” Dyabulu kele tata ya inki mutindu? Yezu kumonisaka yandi bonso mukusi mpi kutubaka nde: “Yandi kele muntu ya luvunu mpi tata ya luvunu.” Ebuna Yezu kesukisa nde: “Muntu yina kele ya Nzambi, yandi ke waka mambu ya Nzambi ke tubaka. Kansi beno, beno kele bantu ya Nzambi ve, yo yina beno ke waka mambu na yandi ve.”

Na makasi yonso sambu na lubedisu ya Yezu, Bayuda kevutula nde: “Keti beto ke tubaka mbote ve nde nge kele muntu ya Samaria, nge ke na mpeve ya mbi?” Ntubilu “muntu ya Samaria” mesadilama bonso luvwezo mpi kunganina, sambu bantu ya Samaria bau meyinaka bau na Bayuda.

Nkatu kutubila difingu ya luvwezo yina kemonisa nde yandi kele muntu ya Samaria, Yezu kevutula nde: “Mono ke na mpeve ya mbi ve. Mono ke zitisaka tata na mono, kansi beno ke zitisaka mono ve.” Na kulandaka, Yezu mepesa lusilu ya kuyitukisa nde: “Konso muntu yina ke landaka malongi na mono, yandi ta fwa ve ata fioti.” Ya kyeleka, Yezu kezola kutuba ve nde bayina yonso kelanda yandi tafwa ve na sansa ya kyeleka. Kansi, yandi kezola kutuba nde bau tabika kumona ve lufwa ya kimakulu, to “lufwa ya zole,” yina kele ve ti lufutumuku.

Kansi, Bayuda kebaka bangogo ya Yezu na sansa ya kyeleka. Yau yina, bau ketuba nde: “Ntangu yai, beto me bakisa nge mbote-mbote nde nge ke na mpeve ya mbi. Abrahami me fwaka, baprofete mpi me fwaka, ebuna nge, nge ke tuba nde: ‘Konso muntu yina ke landaka malongi na mono, yandi ta fwa ve ata fioti.’ Tata na beto Abrahami me fwaka; nge banza nde nge me luta yandi na nene? Baprofete mpi me fwaka. Nge ke kuditula, nge kele nani?”

Na disolo yai yonso, yau kele pwelele nde Yezu kele na kutubila bantu yai dyambu ya kyeleka nde yandi kele Mesia ya kusilamaka. Kansi na kisika ya kupesa mvutu na mbala mosi na ngyufula na bau na yina metala nani yandi kele, Yezu ketuba nde: “Kana mono ke kudipesaka lukumu mono mosi, lukumu na mono zolaka kuvanda ya mpamba. Tata na mono muntu ke pesaka mono lukumu. Beno ke tubaka sambu na yandi nde: ‘Yandi kele Nzambi na beto.’ Beno zaba yandi ve, kansi mono zaba yandi. Kana mono tuba nde mono zaba yandi ve, mono zolaka kuvanda muntu ya luvunu bonso beno.”

Na kulandaka, Yezu ketubila dyaka Abrahami muntu ya kwikama, na kutubaka nde: “Tata na beno Abrahami vandaka na kiese na kuzaba nde yandi ta mona kilumbu yina ya mono ta kwisa; yandi monaka yo, ebuna yandi vandaka na kiese sambu na yo.” Ee, ti meso ya lukwikilu, Abrahami kuyangalalaka na ntwala sambu na kukwisa ya Mesia yina kusilamaka. Na kukonda lukwikilu, Bayuda kevutula nde: “Nge me lungisa ntete ve bamvula makumi tanu, ebuna nge ke tuba nde nge me monaka Abrahami?”

Yezu kevutula nde: “Mono ke tubila beno mambu ya kieleka: Ntangu Abrahami vandaka me butuka ntete ve, mono [vandaka, NW].” Na ntembe ve, Yezu ketubila luzingu na yandi na ntwala ya kukuma muntu, ntangu yandi vandaka muntu ya kimpeve ya ngolo na zulu.

Na makasi sambu na kutuba ya Yezu nde yandi kuvandaka na ntwala ya Abrahami, Bayuda melokuta matadi sambu na kulosila yandi. Kansi yandi mebumbana mpi mebasika na tempelo nkatu bau kusala yandi mbi. Yoane 8:​37-59; Kusonga 3:14; 21:⁠8.

▪ Inki mutindu Yezu memonisa nde yandi ti bambeni na yandi kele ti batata ya kuswaswana?

▪ Inki kele ntendula ya mutindu ya Bayuda ya kubinga Yezu nde Muntu ya Samaria?

▪ Na inki sansa Yezu kezola kutuba nde balongoki na yandi tamona ve lufwa ata fyoti?