Kapu 82

Yezu Mekwenda Dyaka na Yeruzalemi

NTAMA ve Yezu mebaka dyaka nzila, na kulongaka mbanza na mbanza mpi bwala na bwala. Yau kemonana nde yandi kele na distrike ya Perea, na simu ya Nzadi ya Yordani kana nge kele na Yudea. Kansi yandi kekwenda na Yeruzalemi.

Filozofi ya Bayuda yina ketubaka nde kaka ntalu ya bantu fyoti taguluka kele mbala ya nkaka kima ya mepusa muntu mosi na kuyufula nde: “Mfumu, keti bantu fioti kaka ta guluka?” Na mvutu na yandi, Yezu mepusa bantu na kuyindula na yina metala dyambu ya melombama sambu na kuguluka: “Beno tula ngolo [disongidila, kunwana, to kusala kikesa] na kukota na kielo yina kele ya fioti.”

Kikesa ya ngolo ya mutindu yina kele ya nswalunswalu “sambu,” Yezu kelanda nde: “Bantu mingi ta meka na kukota, kansi bo ta kuka ve.” Sambu na inki bau takuka ve? Yandi ketendula nde ‘mfumu ya nzo ta telama, yandi ta kwisa kukanga kielo. Ebuna na ntangu yina beno ta vanda na nganda, beno ta yantika kubula na kielo ti kutuba nde: “Mfumu, kangula beto kielo.” Ntangu yai mfumu ta tubila beno nde: “Mono zaba ve kana beno me katuka wapi. [Beno katuka awa, beno yonso bansadi ya kukonda lunungu, NW]!” ’

Bantu yina ya kekangama na nganda kemonana nde bau kekwisa na ntangu yina mebonga na bau mosi kaka. Kansi na ntangu yango, kyelo ya dibaku ya mbote kele ya kukanga mpi ya kutula fungula. Sambu na kukota, yau lombamaka nde bau kukwisa na ntwala, ata nkutu ntangu yango zolaka kuvanda mbote ve sambu na bau. Ya kyeleka, nsukulu ya mawa kevingila bayina kekingisa na kutula lusambu ya Yehowa na kisika ya ntete na luzingu na bau!

Bamingi na kati ya Bayuda, yina Yezu metindama sambu na kulonga, kusadilaka ve dibaku na bau ya kitoko sambu na kundima ngidika ya Nzambi kusalaka sambu na luguluku. Yau yina, Yezu ketuba nde bau tadila mpi takwetisa meno na bau ntangu bau talosama na nganda. Na ndambu ya nkaka, bantu yina takatuka “na este, na weste, na norde ti na sude,” ee, na makanda yonso, “ta kwisa kuvanda na mesa na Kimfumu ya Nzambi.”

Yezu kelanda nde: “Bantu ya nkaka yina kele bantu ya nsuka [Bayuda ti bantu yina kele Bayuda ve ya kenyokwamaka, mpi kevwenzamaka] ntangu yai bo ta kuma bantu ya ntete, bayina kele bantu ya ntete [Bayuda ya lukumu na kimvwama ti lusambu] ntangu yai bo ta kuma bantu ya nsuka.” Kukuma na bau bantu ya nsuka kesongidila nde bamolo mpi bantu ya kukonda ntonda ya mutindu yai tavanda ve na Kimfumu ya Nzambi ata inki mutindu.

Ntangu yai, Bafarize mekwisa na Yezu mpi bau ketuba nde: “Katuka awa, kwenda na kisika ya nkaka. Sambu Erode Antipasi ke zola kufwa nge.” Yau lenda kuvanda nde yandi mosi Erode kuyantikaka na kutuba buna sambu na kutinisa Yezu na teritware yina. Ngatu Erode vandaka kuwa boma ya kudikotisa na lufwa ya mbikudi ya nkaka ya Nzambi bonso yandi kusalaka na lufwa Yoane Mbotiki. Kansi Yezu ketubila Bafarize nde: “Beno kwenda kutubila [mukengi, NW] yina nde: ‘Na kilumbu ya bubu ti mbasi mono ke basisa bampeve ya mbi, mono ke belula bantu, ebuna na kilumbu ya tatu mono ta manisa kisalu na mono.’ ”

Na nima ya kumanisa kisalu na yandi kuna, Yezu melanda nzyetolo na yandi na Yeruzalemi sambu, mutindu yandi ketendula, “profete ya Nzambi fweti fwa na kati ya Yeruzalemi, kansi na kisika ya nkaka ve.” Sambu na inki yau kelomba nde Yezu bau fwete kufwa yandi na Yeruzalemi? Sambu Yeruzalemi kele ntu-mbanza, kisika bamambere 71 ya Kinzonzi ya nene ya Sanedreni kele mpi kisika bimenga ya bambisi ya konso mvula kepesamaka. Yau yina, yau lendaka kundimama ve nde “Mwana-dimeme ya Nzambi” bau kufwa yandi kisika ya nkaka katula Yeruzalemi.

Yezu kebokuta nde: “Yeruzalemi, Yeruzalemi! Nge ke fwaka baprofete, bantu yina ya Nzambi me tindilaka nge, nge ke fwaka bo na matadi! Mbala mingi mono zolaka kutula bantu na nge kisika mosi mutindu nsusu ke kutikisaka bana na yandi na nsi ya mapapu na yandi, kansi beno zolaka ve! Ntangu yai, bwala na beno tabika yo mosi kaka.” Sambu bau losaka Mwana ya Nzambi, dikanda yango bau mezengila yau nkanu!

Ntangu Yezu kelanda na kukwenda na Yeruzalemi, bau mebingisa yandi na nzo ya mfumu mosi ya Bafarize. Beto kele na Kisabatu, mpi bantu kele na kutalatala yandi kibeni, sambu muntu mosi yina kebelaka maladi ya kuvimba nitu kele pana, yau kemonana nde makulu na yandi ti maboko kele ya kufuluka na masa. Yezu ketubila Bafarize ti bantu ya Bansiku yina kele pana, na kuyufulaka bau nde: “Keti yo kele nsiku na kubelula muntu na [kisabatu, NW] to ve?”

Bau yonso mevanda pima. Ebuna Yezu mebelula muntu yango mpi mezabisa yandi na kukwenda. Na nima yandi meyufula nde: “Kana muntu mosi na kati na beno ke na mwana to ngombe yina me kwenda kubwa na dibulu ya masa, keti yandi ta basisa yandi ve na ntangu yo yina, ata na [kisabatu, NW]?” Dyaka, ata muntu mosi ve mepesa mvutu. Luka 13:22–14:6; Yoane 1:⁠29.

▪ Inki Yezu kemonisa nde yau melombama sambu na kuguluka, mpi sambu na inki bamingi mekangama na nganda?

▪ Banani kele “bantu ya nsuka” yina takuma bantu ya ntete, mpi “bantu ya ntete” yina takuma bantu ya nsuka?

▪ Yau kemonana nde sambu na inki bau kutubaka nde Erode zolaka kufwa Yezu?

▪ Sambu na inki yau lenda kundimama ve nde mbikudi bau kufwa yandi na nganda ya Yeruzalemi?