Kapu 123

“Tala, Muntu Yandi Yai!”

NA KUYITUKAKA sambu na nkadilu ya Yezu mpi na kuzabaka nde yandi kele ve ti makambu, Pilate mesosa mutindu ya nkaka ya kuyambula yandi. Yandi metubila kibuka nde: “Beno ke na kifu mosi nde na konso Nkinsi ya Paki mono fweti basisila beno muntu mosi ya boloko.”

Barabasi, mufwi ya bantu ya ngolo, kele mpi na boloko, ebuna Pilate meyufula nde: “Nani na kati ya bantu yai beno zola nde mono bikila beno: . . . Barabasi to Yesu yai ya bo ke bingaka Kristo?”

Ya kundimisama na bambuta ya banganga-Nzambi yina kepusa bau, bantu melomba nde bau kuyambula Barabasi kansi bau kufwa Yezu. Nkatu kulemba, Pilate mevutula, na kuyufulaka dyaka nde: “Nani na kati ya bantu yai zole beno zola nde mono bikila beno?”

Bau meboka nde: “Barabasi.”

Pilate meyufula na mawa yonso nde: “Ebuna Yezu yai ya bo ke bingaka nde Kristo, beno zola nde mono sala yandi nki?”

Na ndinga mosi, bau mevutula nde: “Tula yandi na zulu ya nti!” “Tula yandi na zulu ya nti!” (NW)

Na kuzabaka nde bau kelomba lufwa ya muntu ya kukonda makambu, Pilate melatama nde: “Inki mambu ya mbi muntu yai salaka? Mono me mona ve mambu ya mbi yina ya yandi fweti fwa. Yo yina, mono ke songa bantu na mono na kubula yandi fimbu, ebuna mono ke bika yandi.”

Ata yandi memeka na kusala ngolo, kibuka na makasi, ya kupusama na bamfumu na bau ya mabundu, kelanda na kuboka nde: “Bika yandi kutulama na zulu ya nti!” (NW) Sambu na makasi na bau ya kupusama na banganga-Nzambi, kibuka kezola menga. Mpi yindula, kaka bilumbu tanu na ntwala, ngatu bantu ya nkaka na kati ya Bayuda kuvandaka na kati ya bayina kuyambaka Yezu na Yeruzalemi bonso Ntotila! Na ntangu yai, balongoki ya Yezu, kana bau kele pana, mevanda pima mpi kekudimonisa ve.

Pilate, ntangu yandi memona nde bikesa na yandi kesala ve ata kima mosi ya mbote, kansi yau kebasisa dyaka mavwanga, mebaka masa mpi meyobisa maboko na yandi na meso ya kibuka, mpi metuba nde: “Lufwa ya muntu yai kele mambu na mono ve!” Ntangu bau mewa mpila yina, bau mevutula nde: “Menga na yandi yo kubwa na zulu ya ntu na beto ti ya bana na beto!”

Ebuna, na kuwakana ti bampusa na bau​—⁠mpi na kusepedisa kibuka na kisika ya kusala mambu yina ya yandi kezaba nde yau kele mbote​—⁠Pilate mebasisila bau Barabasi. Yandi mebaka Yezu mpi mekatudisa yandi bilele mpi mebudisa yandi bafimbu. Yai vandaka ve kubula ya mpamba. Mukanda Journal de l’Association des médecins américains ketendula nsadilu ya kubula fimbu ya bantu ya Roma mutindu yai:

“Kisadilu ya bau vandaka kusadila kuvandaka fimbu ya nkufi (flagrum to flagellum) yau vandaka ti bansinga ya kwire na nda ya kuswaswana, ya kutunga to ve, na katikati na yau bau vandaka kutula bambuma ya fyotifyoti ya bibende to bitini ya fyotifyoti ya mikwa ya dimeme ya meno kibeni. . . . Basoda ya Roma na kubulaka ti ngolo yonso mbala na mbala na zulu ya mukongo ya muntu, bambuma yina ya bibende vandaka kubasisa matutu, mpi kwire ti mikwa ya dimeme vandaka kuzenga kimpusu ya nitu ti misuni. Na nima, ntangu kubula vandaka kulanda, yau vandaka kupasula misuni yina kele penepene na mikwa, mpi yau vandaka kubasisa mwa misuni ya kuvukana ti menga.”

Na nima ya munyokudi yai ya kubula, bau menata Yezu na nzo ya Guvernere, mpi basoda yonso mebingama. Kuna basoda melanda na kunyokula yandi na kutungaka mpu ya bansende mpi bau metula yau na zulu ya ntu na yandi. Bau metula nsinga ya ngolo na diboko na yandi ya kibakala, mpi bau melwatisa yandi lele ya mpumbu, mutindu ya lele ya bamfumu kelwataka. Na nima bau metubila yandi na luvwezo yonso nde: “Mbote, mfumu ya Bayuda!” Dyaka, bau kelosila yandi mate mpi bau kebula yandi mbata na luse. Na kubakaka nsinga yina ya ngolo ya kele na diboko na yandi, bau kesadila yau sambu na kubula yandi na ntu, na kukotisaka dyaka ngolo bansende ya “mpu” na yandi ya luvwezo na mpusu ya ntu.

Lukumu ya nene ti kikesa ya Yezu na ntwala ya minyokudi yai meyitukisa kibeni Pilate na mpila nde yandi mepusama na kusala kima ya nkaka sambu na kugulusa yandi. Yandi metubila kibuka nde: “Tala, mono ke kwisa kunatila beno yandi awa na nganda, sambu beno bakisa nde mono ke mona ata kisina ya mambu mosi ve ya beno ke funda yandi.” Ngatu yandi keyindula nde ntangu bau tamona mutindu Yezu kenyokwama, yau talembika bantima na bau. Ntangu Yezu metelama na ntwala ya bantu ya ntima ngolo, ti mpu ya bansende mpi lele ya zulu ya mpumbu mpi ti luse ya kebasisa menga ye kemonisa mpasi, Pilate ketuba nde: “Tala, muntu yandi yai!”

Ata yandi menyatama mpi mebulama, muntu ya kuluta mfunu na kati ya nkenda yonso yandi yai metelama, ya kyeleka, muntu ya kuluta nene ya ntangu yonso! Ee, Yezu memonisa lukumu ya pima mpi nye yina metuba mingi, na mpila nde, ata nkutu Pilate fwete kundima, sambu bangogo na yandi mosi kemonana nde yau kemonisa bankadulu ya luzitu mpi ya mawa. Yoane 18:39–19:5; Matayo 27:​15-17, 20-30; Marko 15:​6-19; Luka 23:​18-25.

▪ Na inki mutindu Pilate memeka na kuyambula Yezu?

▪ Inki mutindu Pilate memeka na kudibasisa na makambu?

▪ Inki mutindu kubulama na fimbu vandaka kusalama?

▪ Inki mutindu Yezu mevwenzama na nima ya kubulama fimbu?

▪ Inki dyambu ya nkaka Pilate memeka na kusala sambu na kuyambula Yezu?