KAPU 30

Lusadisu Sambu na Kununga Boma na Beto

KETI nge kemonaka nde yo kele pete na kusadila Yehowa?— Longi ya Nene kutubaka ve nde yo tavanda pete. Na mpimpa na ntwala nde bo fwa yandi, Yezu kutubilaka bantumwa na yandi nde: “Kana bantu ya nsi-ntoto yai kumenga beno, beno fweti zaba nde bo mengaka mono ntete.”—Yoane 15:18.

Piere kubulaka ntulu nde yandi tabikisa ve Yezu ata fyoti, kansi Yezu kutubaka nde kaka na mpimpa yina, Piere tabuya mbala tatu nde yandi mezaba ve Yezu. Piere mpi kusalaka mpenza kaka mutindu yina! (Matayo 26:31-35, 69-75) Sambu na nki dyambu ya mutindu yina kusalamaka?— Yo salamaka sambu Piere ti bantumwa yankaka kuwaka boma.

Keti nge kezaba sambu na nki bantumwa kukumaka na boma?— Sambu bo salaka ve kima mosi ya mfunu mpenza. Kana beto zaba kima yango, yo le sadisa beto na kusadila Yehowa ata muntu metubila beto to mesala beto kima ya nki mutindu. Kansi, ntete, beto tadila mambu yina kusalamaka na mpimpa ya nsuka yina Yezu kulutisaka ti bantumwa na yandi.

Ntete, bo taka nkinsi ya Pake kumosi. Yo vandaka madya mosi ya mfunu mingi ya bo vandaka kudya konso mvula sambu na kuyibusa bantu ya Nzambi mutindu Nzambi kukatulaka bo na kimpika na Ezipte. Na nima Yezu kubasisaka madya yankaka ya mfunu mingi ya yandi dyaka ti bo. Beto tatubila yo na kapu mosi yina talanda na nima mpi beto tatendula mutindu madya yango kesadisaka beto na kuyibuka Yezu. Na nima ya kudya madya yina mpi ya kupesa bantumwa na yandi kikesa, Yezu kunataka bo na kilanga ya Getsemane. Bo vandaka kukwenda mingi na kisika yai sambu bo vandaka kuzola yo mingi.

Ntangu bo kumaka kuna, Yezu kukwendaka mwa ntama na kisika na yandi mosi sambu na kusamba. Yandi songaka mpi Piere, Yakobo, ti Yoane nde beno samba. Kansi, bo lalaka mpongi. Yezu kukwendaka mbala tatu na kisika na yandi mosi sambu na kusamba, mpi bambala yonso tatu ya yandi vandaka kuvutuka, yandi vandaka kukuta Piere ti bayina yankaka kaka ya kulala! (Matayo 26:36-47) Keti nge kezaba sambu na nki yo lombaka nde bo vanda kaka meso ya kukangula sambu na kusambila?— Beto tubila dyambu yai.

Na nkokila yina, Yudasi Iskariote kuvandaka pana ntangu bo yantikaka na kuta nkinsi ya Pake ti Yezu mpi ti bantumwa yankaka. Mutindu nge le yibuka yo, Yudasi kukumaka dezia muyibi. Ntangu yai yandi kumaka muyekudi. Yandi zabaka kisika Yezu vandaka kukutana mbala mingi ti bantumwa na yandi na kilanga ya Getsemane. Yo yina Yudasi kunataka basoda na kisika yina sambu bo kanga Yezu. Ntangu bo kumaka, Yezu kuyulaka bo nde: “Beno ke sosa nani?”

Basoda nde: ‘Yezu.’ Yezu kuwaka boma ve, yo yina yandi vutulaka nde: “Mono yandi yai.” Basoda kuyitukaka mingi mpenza sambu na kikesa ya Yezu yo yina bo vutukaka na nima mpi bo bwaka na ntoto. Na nima, Yezu kutubaka nde: ‘Kana beno kesosa mono, beno bikisa bantumwa na mono bo kwenda.’—Yoane 18:1-9.

Ntangu basoda kukangaka Yezu mpi kangisaka yandi maboko, bantumwa kuwaka boma mpi bo tinaka. Kansi Piere ti Yoane zolaka kuzaba mutindu mambu talutila, yo yina bo vandaka kulanda na mwa kitamina. Nsukansuka, bo nataka Yezu na nzo ya Kaifa yina kuvandaka mfumu ya banganga-Nzambi. Sambu Yoane kuzabanaka na mfumu ya banganga-Nzambi, santinele kukotisaka yandi ti Piere na lupangu.

Banganga-Nzambi kuvukanaka dezia na nzo ya Kaifa sambu na kusambisa yandi. Bo vandaka kusala yonso sambu na kufwa Yezu. Yo yina bo vandaka kukotisa bantu na tribinale yango sambu bo kwisa kuta kitemwe ya luvunu na zina ya Yezu. Bantu vandaka kubula Yezu makofi ti bambata. Ntangu mambu yai yonso vandaka kuluta, Piere kuvandaka penepene.

Nsadi mosi ya nkento, santinele yina kukotisaka Piere ti Yoane, kumonaka yandi. Yandi tubaka nde: “Si nge mpi, nge vandaka ti Yesu.” Kansi Piere kubuyaka nde yandi mezaba ve Yezu. Na nima ya mwa ntangu, mwana-nkento yankaka kumonaka Piere mpi kusongaka bayina kutelamaka pana nde: “Muntu yai mpi vandaka ti Yesu.” Piere kubuyaka dyaka nde yandi mezaba ve Yezu. Na nima dyaka, kibuka mosi ya bantu kumonaka Piere mpi bo tubilaka yandi nde: “Ya kieleka, nge mpi, nge ke vandaka ti bo.” Na mbala ya tatu, Piere kubuyaka dyaka mpi yandi tubaka nde: “Mono zaba muntu yina ve!” Piere kuzengaka nkutu Nzambi nde yandi vandaka kutuba kyeleka, ebuna Yezu kubalulaka ilungi sambu na kutala Piere.—Matayo 26:57-75; Luka 22:54-62; Yoane 18:15-27.

Keti nge mezaba sambu na nki Piere kukusaka?— Ya kyeleka, yandi kusaka sambu yandi vandaka na boma. Kansi sambu na nki yandi vandaka na boma? Inki dyambu yandi salaka ve sambu kikesa na yandi kuvanda mingi? Yindula fyoti. Inki mambu Yezu kusalaka sambu na kubaka kikesa?— Yandi sambaka Nzambi, mpi Nzambi kusadisaka yandi na kubaka kikesa. Yibuka mpi nde Yezu kutubilaka Piere mbala tatu na kusamba, na kukangula meso, mpi na kulala mpongi ve. Kansi nki Piere kusalaka?—

Piere kulalaka kwa yandi na bambala yina tatu. Yandi sambaka ve, mpi yandi kangulaka ve meso. Yo yina, yandi susumukaka ntangu bo kangaka Yezu. Na nima, na ntangu bo vandaka kusambisa Yezu, kubula yandi mpi kuyidika mutindu ya bo tasala sambu na kufwa yandi, Piere kuwaka boma mpenza. Kansi, ntangu fyoti na ntwala, Yezu kutubilaka bantumwa na yandi nde bo takutana ti nki mambu?— Yezu kutubilaka bo nde kaka mutindu nsi-ntoto kumengaka yandi, yo tamenga bo mpi.

Ntangu yai, beto yindula dyambu mosi ya le kumina beto ya mefwanana ti yina kukuminaka Piere. Yindula ntete kana nge kele na kati ya nzo-nkanda na ntangu bankaka meyantika kutuba mambu ya mbi na yina metala bantu yina kepesaka ve lusaku na dibendelo to kesalaka ve fete ya Lubutuku. Ebuna, inki nge tasala kana muntu mosi kutala nge ebuna yandi kuyula nge nde: “Keti ya kyeleka beno kepesaka ve lusaku na dibendelo?” To bankaka le tuba nde: “Beto kewaka nde beno kesalaka ve nkutu fete ya Lubutuku!” Keti nge tawa boma na kuta masonga?— Keti nge tasosa kukusa, mutindu Piere kusalaka?—

Na nima, Piere kuwaka mawa mpenza na mutindu yandi buyaka nde yandi mezaba ve Yezu. Ntangu yandi bakisaka mambu ya yandi salaka, yandi basikaka na nganda sambu na kudila. Ya kyeleka, yandi vutukaka na Yezu. (Luka 22:32) Ntangu yai, yindula fyoti. Inki le sadisa beto na kukonda kuwa boma mingi yina le sala nde beto tuba kima mosi bonso yina ya Piere kutubaka?— Kuvila ve nde, Piere kusambaka ve mpi yandi kukangulaka ve meso. Ebuna nge tatuba nde nki kima beto fwe sala sambu na kuvanda longoki ya Longi ya Nene?—

Ntembe kele ve nde beto fwe lomba lusadisu ya Yehowa na kisambu. Ntangu Yezu kusambaka, keti nge kezaba nki Nzambi kusalaka sambu na yandi?— Yandi tindaka wanzyo mosi yina kwisaka kupesa yandi kikesa. (Luka 22:43) Keti bawanzyo ya Nzambi le sadisa beto?— Biblia ketuba nde: “Wanzio ya Nzambi me ziungaka bantu yina ke lemfukaka na yandi, yandi ke katulaka bo na kigonsa.” (Nkunga 34:8) Kansi sambu na kubaka lusadisu ya Nzambi, beto fwe suka ve kaka na kusamba. Keti nge mezaba kima yankaka ya beto fwete sala?— Yezu kutubilaka balongoki na yandi nde bo lala ve mpongi mpi bo kangula meso. Nge keyindula nde nki kima le sadisa beto na kusala yo?—

Beto fwe landaka mbotembote mambu yina bo ketubaka na balukutakanu na beto ya Bukristu mpi kutulaka dikebi na mambu ya beto ketangaka na Biblia. Kansi beto fwe sambaka mpi Yehowa mbala na mbala mpi kulomba yandi na kusadisa beto na kusadila yandi. Kana beto sala mutindu yina, beto tabaka lusadisu sambu na kununga boma na beto. Ebuna, beto tavandaka na kyese ntangu beto tazwaka baokazio ya kutubila bankaka mambu ya metala Longi ya Nene ti Tata na yandi.

Baverse yai le sadisa beto na kukonda kubikisa ata fyoti nde boma ya bantu yankaka kukangisa beto nzila na kusala mambu ya mbote: Bingana 29:25; Yeremia 26:12-15, 20-24; mpi Yoane 12:42, 43.

[Kifwanisu ya kele na lutiti 159]

Sambu na nki yo lombaka nde Piere, Yakobo, ti Yoane kuvanda kaka meso ya kukangula?

[Kifwanisu ya kele na lutiti 160]

Sambu na nki Piere kuwaka boma mingi yina kusalaka nde yandi kusa nde yandi mezaba ve Yezu?

[Kifwanisu ya kele na lutiti 160]

Inki mambu le sala nde nge kudiwa mutindu Piere kudiwaka?