KAPU 33

Yezu Lenda Tanina Beto

NTANGU Yezu kuyelaka mpi ntangu bo songaka yandi mutindu Nzambi kutaninaka yandi ntangu yandi vandaka fyoti, keti nge keyindula nde yandi sambaka Yehowa mpi kupesaka yandi mersi?— Nge keyindula nde mbala yankaka nki mambu Yezu kutubilaka Maria ti Yozefi na nima ntangu bo songaka yandi nde bo taninaka luzingu na yandi ntangu bo nataka yandi na Ezipte?—

Ya kyeleka, Yezu kele dyaka ve bebe. Nkutu yandi kezingaka dyaka ve na ntoto mutindu yandi zingaka ntete na nsungi mosi buna. Kansi keti nge kemonaka ve nde bubu yai, bantu mingi kemonisaka nde bo keyindulaka nde Yezu kele kaka bonso bebe mosi ya mevanda na kidikilu?— Yo kemonanaka na Lubutuku, ntangu beto kemonaka bifwanisu ya Yezu bonso bebe na bisika mingi.

Ata Yezu kezingaka dyaka ve na ntoto, keti nge kendimaka nde yandi kele na moyo?— Ee, Nzambi kutedimisaka yandi na bafwa, mpi ntangu yai yandi ke Ntotila ya ngolo na zulu. Nge keyindula nde yandi le sala nki sambu na kutanina bayina kesadilaka yandi?— Ntangu Yezu kuvandaka na ntoto, yandi monisaka mutindu ya yandi lendaka kutanina bayina vandaka kuzola yandi. Beto tala nki mutindu yandi salaka yo kilumbu mosi ya yandi vandaka na kati ya maswa ti balongoki na yandi.

Yo vandaka na nkokila. Yezu kulongaka bantu kilumbu ya mvimba na Nzadi ya Galilea, yina kuvandaka dizanga mosi ya nene ya bakilometre kiteso ya 20 na nda mpi 12 na nene. Ebuna yandi songaka balongoki na yandi nde: “Beto sabukeno na simu ya dizanga yai.” Yo yina, bo kotaka na kati ya maswa mosi mpi bo yantikaka na kusabuka dizanga. Yezu kulembaka mpenza, yo yina yandi kwendaka na nsuka ya maswa mpi yandi lalaka na zulu ya kuse. Ntama mingi ve, yandi lalaka mpongi mpenza.

Balongoki na yandi kulalaka ve sambu na kusabula maswa. Bo vandaka kusabuka mbote na mwa ntangu fyoti, kansi na nima, mupepe mosi ya ngolo kukwisaka na mbala mosi. Yo vandaka kubula ngolo mpenza mpi kitembo vandaka kukuma kaka ngolo. Masa yina kitembo vandaka kutombula yantikaka kukota na kati ya maswa, mpi masa yantikaka kufuluka na maswa.

Balongoki kuwaka boma nde bo tadinda. Kansi Yezu kuvandaka ve na boma. Yandi vandaka kaka na mpongi na nsuka ya maswa. Nsukansuka, balongoki kutedimisaka yandi nde: ‘Longi, Longi, gulusa beto; beto kezola kufwa na kitembo yai.’ Ntangu Yezu kuwaka mpidina, yandi telamaka mpi yandi tubilaka mupepe ti kitembo. Yandi tubaka nde: “Bika makelele! Vanda pima!”

Na mbala mosi, mupepe kumanaka mpi dizanga kukumaka nye. Balongoki kuyitukaka. Bo vandaka bo memonaka ntete ve dyambu ya mutindu yina. Bo yantikaka na kutuba bo na bo nde: “Muntu yai kele nki mutindu? Yandi ke nganina ata mupepe ti masa, ebuna yo ke wila yandi!”—Luka 8:22-25; Marko 4:35-41.

Keti nge mezaba kana Yezu kele nani?— Keti nge mezaba kisika yandi bakaka ngolo na yandi yina ya nene?— Yo lombaka nde balongoki kuwa ve boma ntangu Yezu kuvandaka ti bo, sambu Yezu kuvandaka ve muntu bonso bantu yonso. Yandi lendaka kusala mambu ya kuyituka, yina muntu yankaka lendaka kusala ve. Bika mu tela nge dyambu yankaka ya yandi salaka kilumbu mosi ntangu kitembo kutelamaka na nzadi.

Dyambu yai kusalamaka kilumbu yankaka, mwa ntangu fyoti na nima. Ntangu nkokila kubwaka, Yezu kusongaka balongoki na yandi na kukota na maswa mosi sambu bo kwenda na ntwala na yandi na simu yina yankaka ya nzadi. Ebuna Yezu kutombukaka yandi mosi na ngumba. Yo vandaka kisika mosi ya pima ya yandi lendaka kusamba Tata na yandi, Yehowa Nzambi.

Balongoki kukotaka na maswa mpi bo yantikaka kusabuka nzadi. Kansi ntama mingi ve, mupepe yantikaka na kubula. Yo kumaka kubula ngolo mingi. Na lere yina mpimpa kuvandaka yo mebwa dezia. Balongoki kukulumusaka lele ya maswa, na nima bo yantikaka kusabuka ti bankayi. Kansi mpila ya kukwenda ntama mingi kuvandaka ve sambu mupepe yina ya ngolo vandaka kukatuka na ndambu yina ya bo vandaka kukwenda. Kitembo yina ya ngolo vandaka kutombula maswa ndambu na ndambu, mpi masa vandaka kukota na kati. Balongoki kusalaka kikesa sambu na kukuma na lweka ya nzadi, kansi bo kukaka ve.

Na ntangu yina, Yezu kuvandaka kaka yandi mosi na ngumba. Yandi salaka bantangu mingi kuna. Kansi na ntangu yina, yandi monaka nde balongoki na yandi vandaka na kigonsa sambu kitembo kuvandaka ngolo mingi. Yo yina yandi kulumukaka na ngumba mpi yandi kwendaka na lweka ya nzadi. Yezu zolaka kusadisa balongoki na yandi, yo yina yandi yantikaka kutambula na zulu ya nzadi yina vandaka kunikana ngolo sambu na mupepe!

Inki takumina nge kana nge meka na kutambula na zulu ya masa?— Nge tadinda mpi nge le fwa. Kansi Yezu kele muntu mosi ya kuswaswana. Yandi kele na ngolo ya mutindu yankaka. Yezu kutambulaka na kitamina mosi ya nda na ntwala ya kukuma kisika maswa kuvandaka. Ebuna ntangu tongo yantikaka kutana, balongoki kumonaka Yezu kekwisa na zulu ya masa na ndambu ya bo vandaka. Kansi bo ndimaka ve mambu ya bo vandaka kumona. Bo waka boma mingi mpenza, mpi bo bokaka na ndinga ya ngolo ti boma yonso. Ebuna Yezu kutubilaka bo nde: “Beno bwisa ntima! Yai mono. Beno vanda na boma ve!”

Kitembo kumanaka kaka na ntangu Yezu kukotaka na maswa. Balongoki kuyitukaka dyaka. Bo fukamaka na ntwala ya Yezu mpi bo tubaka nde: “Ya kieleka, nge kele Mwana-Nzambi!”—Matayo 14:22-33; Yoane 6:16-21.

Keti yo zolaka kuvanda kyese ve na kuzinga na ntangu yina sambu na kumona mutindu Yezu kusalaka mambu yina?— Keti nge mezaba sambu na nki Yezu kusalaka bidimbu yina ya kuyituka?— Yandi salaka bidimbu yina sambu yandi vandaka kuzola balongoki na yandi mpi yandi vandaka kuzola kusadisa bo. Kansi yandi salaka mpi bidimbu yango sambu na kusonga ngolo ya mingi ya yandi vandaka na yo mpi mambu yina yandi tasala na bilumbu kekwisa ntangu yandi takuma Mfumu ya Kimfumu ya Nzambi.

Ata bubu yai, Yezu kesadilaka mbala mingi ngolo na yandi sambu na kutanina balongoki na yandi na bikesa yina Satana kesalaka sambu na kukanga bo nzila na kutubila bankaka mambu ya Kimfumu ya Nzambi. Kansi Yezu kesadilaka ve ngolo na yandi sambu na kutanina balongoki na yandi na mpila nde bo bela ve to sambu na kubelula bo na ntangu bo kebelaka. Sambu nsukansuka bantumwa ya Yezu yonso kufwaka. Yakobo, yina kuvandaka mpangi ya Yoane, bo fwaka yandi, mpi Yoane yandi mosi bo tulaka yandi na boloko.—Bisalu 12:2; Kusonga 1:9.

Yo kele mpi mutindu mosi bubu yai. Yo vanda bantu yina kesadilaka Yehowa to bayina kesadilaka yandi ve, bo yonso le bela mpi le fwa. Kansi kubika fyoti, mambu tasoba ntangu Yezu takuma Mfumu na guvernema ya Nzambi. Na ntangu yina, ata muntu mosi ve tavanda na mfunu ya kuvanda na boma sambu Yezu tasadila ngolo na yandi sambu na kusakumuna bantu yonso yina kelemfukilaka yandi.—Yezaya 9:5, 6.

Baverse yankaka ya kesonga ngolo ya nene ya Yezu, muntu yina Nzambi metulaka Mfumu na Kimfumu na Yandi, kele Daniele 7:13, 14; Matayo 28:18; mpi Efezo 1:20-22.

[Bifwanisu ya kele na lutiti 172]

Inki mutindu nge kemonaka Yezu—bonso Ntotila mosi ya ngolo to bonso bebe mosi ya kukonda ngolo?

[Kifwanisu ya kele na lutiti 173]

Inki mambu Yezu ketubila mupepe ti kitembo?

[Kifwanisu ya kele na lutiti 174]

Sambu na nki Yezu kusalaka bidimbu ya kuyituka?

[Kifwanisu ya kele na lutiti 176]

Inki mutindu Yezu ketaninaka balongoki na yandi bubu yai?