Yezu Me Samuna Mingi na Galilea

Yezu ti balongoki na yandi iya me lutisa kilumbu ya mvimba na kisalu ya kusamuna na Kapernaumi. Na nkokila, bantu ya Kapernaumi me natila yandi bambefo sambu yandi belula bo. Yezu kele ve ti ntangu mingi ya kuvanda yandi mosi na kingenga.

Na suka-suka ya kilumbu yina me landa, ntangu mudidi kele ntete, Yezu me basika mpi me kwenda na nganda yandi mosi. Yandi me mona kisika mosi yina yandi lenda samba tata na yandi na kingenga. Kansi yandi me lutisa ve ntangu mingi kuna. Ntangu “Simoni ti bantu yina vandaka ti yandi” me mona nde Yezu kele ve, bo me kwenda kusosa yandi. Ziku Piere kele na ntwala sambu Yezu vandaka na nzo na yandi.—Marko 1:36; Luka 4:38.

Ntangu bo me mona Yezu, Piere me tuba nde: “Bantu yonso ke sosa nge.” (Marko 1:37) Ya kieleka, bantu ya Kapernaumi ke zola nde Yezu kubikala na bwala na bo. Bo me sepela kibeni na mambu yina yandi me sala, yo yina bo ke sosa “kukanga yandi sambu yandi kwenda ve ntama ti bo.” (Luka 4:42) Kansi, keti Yezu kwisaka na ntoto ntete-ntete sambu na kubelula bambefo? Diaka, keti yandi fwete sala kisalu na yandi kaka na mbanza yai? Inki yandi tubaka sambu na yo?

Yezu me songa balongoki na yandi nde: “Beto kwenda kisika ya nkaka, na babwala ya pene-pene, sambu mono samuna mpi kuna, sambu yo yina kikuma ya mono kwisilaka.” Nkutu, Yezu me zabisa bantu yina ke zola nde yandi bikala na bwala na bo nde: “Mono fwete zabisa mpi nsangu ya mbote ya Kimfumu ya Nzambi na bambanza ya nkaka, sambu bo tindaka mono sambu na yo.”—Marko 1:38; Luka 4:43.

Ya kieleka, kikuma ya mfunu yina Yezu kwisaka na ntoto kele ya kulonga mambu ya me tala Kimfumu ya Nzambi. Kimfumu yina ta santisa zina ya tata na yandi mpi yo ta manisa bampasi yonso ya bantu kimakulu. Ntangu Yezu salaka bimangu sambu na kubelula bantu, yandi monisaka nde Nzambi muntu tindaka yandi. Mutindu mosi mpi, bamvula mingi na ntwala, Moize salaka mambu ya kuyituka sambu na kumonisa nde Nzambi muntu tindaka yandi.—Kubasika 4:1-9, 30, 31.

Yo yina, Yezu me katuka na Kapernaumi sambu na kukwenda kulonga na bambanza ya nkaka, mpi balongoki na yandi iya me kwenda ti yandi. Balongoki yango kele: Piere ti mpangi na yandi Andre, Yoane ti mpangi na yandi Yakobo. Mposo mosi na ntwala, Yezu bingaka bo sambu na kusala ti bo nzietelo na yandi ya ntete mpi kusamuna ti bo.

Yezu ti balongoki na yandi tambulaka na Galilea ya mvimba sambu na kulonga, mpi kisalu yina butaka mbuma ya mbote. Ya kieleka, nsangu ya me tala Yezu me kwenda ntama kibeni. Biblia ke tuba nde “nsangu na yandi mwanganaka na Siria ya mvimba,” na distrike ya bambanza kumi ya bo ke bingaka Dekapolisi, mpi yo kwendaka tii na simu ya nkaka ya Nzadi ya Yordani. (Matayo 4:24, 25) Bantu mingi yina me katuka na babwala yai mpi na Yudea me landa Yezu ti balongoki na yandi. Bantu mingi me natila yandi bambefo sambu yandi belula bo. Yezu me yamba bo; yandi me belula bambefo mpi me basisa bampeve ya mbi na bantu yina kele ti bademo.