Banani Nzambi Me Bingisa na Madia?

Yezu me katuka kubelula muntu mosi yina vandaka kubela maladi ya ngolo yina ke vimbisaka makulu mpi yandi kele kaka na nzo ya Mufarize yina bingisaka yandi. Yandi me mona nde banzenza ya nkaka ke pona bisika ya lukumu, yo yina yandi me sadila dibaku yai sambu na kupesa dilongi ya me tala kudikulumusa.

Yezu me tuba nde: “Kana muntu me bingisa nge na nkinsi ya makwela, kuvanda ve na kisika ya kuluta lukumu. Ziku yandi bingisaka mpi muntu ya nkaka yina me luta nge na lukumu. Ebuna muntu yina bingisaka beno zole ta kwisa kutubila nge nde, ‘Bikila muntu yai kisika na nge.’ Mpi nge ta kwenda ti nsoni kuvanda na kisika ya nsuka.”—Luka 14:8, 9.

Yezu me tuba diaka nde: “Kana bo me bingisa nge, kwenda kuvanda na kisika ya nsuka, sambu ntangu muntu yina bingisaka nge ta kwisa, yandi ta songa nge nde, ‘Nduku na mono, mata na kisika ya lukumu.’ Ebuna nge ta vanda na lukumu na meso ya bantu yonso yina bo bingaka nge ti bo.” Kusala mutindu yai ke monisa nde beto kele ti bikalulu ya mbote, kansi yo ke tendula mpi mambu mingi. Yezu me tuba nde: “Sambu konso muntu yina ke kudinangula bo ta kulumusa yandi, mpi konso muntu yina ke kudikulumusa bo ta nangula yandi.” (Luka 14:10, 11) Ya kieleka, Yezu ke siamisa bantu yina ke widikila yandi na kumonisa kikalulu ya kudikulumusa.

Na nima, Yezu me pesa dilongi ya nkaka sambu na Mufarize yina bingisaka yandi; dilongi yango ke tadila mutindu ya kusala nkinsi yina kele mfunu mingi na meso ya Nzambi. Yandi me tuba nde: “Kana nge ke yidika madia ya midi to ya nkokila, kubinga ve banduku na nge, bampangi na nge, bantu ya dibuta na nge, to bamvwama yina ke zingaka pene-pene na nge. Sambu bo mpi lenda bingisa nge kilumbu ya nkaka, ebuna yo ta kuma lufutu na nge. Kansi, kana nge ke sala nkinsi, bingisa bansukami, bantu ya kele ti bifu na nitu, bantu ya makulu-kifu, mpi bifwa-meso; ebuna nge ta vanda na kiese, sambu bo kele ve ti kima ya kufuta nge.”—Luka 14:12-14.

Yo kele mbote na kubingisa banduku na beto, bampangi ya dibuta mpi bantu yina ke zingaka pene-pene na beto sambu na kudia ti beto mpi Yezu me tuba ve nde yo kele mbi. Kansi, yandi ke zola kumonisa nde kupesa madia na bantu yina kele na mpasi mu mbandu bansukami, bantu ya kele ti bifu na nitu, to bifwa-meso lenda nata balusakumunu mingi. Yezu me songa muntu yina me bingisa yandi nde: “Bo ta futa nge na lufutumuku ya bantu ya lunungu.” Muntu mosi na kati ya bantu yina bo bingisaka me ndima mambu yina mpi yandi me tuba nde: “Kiese na muntu yina ke dia na Kimfumu ya Nzambi.” (Luka 14:15) Muntu yai me bakisa nde yo kele dibaku mosi ya mbote kibeni. Kansi mbandu yina Yezu me pesa na nima ke monisa nde bantu yonso ve ke bakisa diambu yina. Yandi me tuba nde:

“Muntu mosi salaka nkinsi ya nene, mpi yandi bingisaka bantu mingi. Yandi tindaka mpika na yandi . . . sambu na kutubila bantu yina bo bingisaka nde, ‘Beno kwisa, sambu ntangu yai mambu kele ya kuyilama.’ Kansi bo yonso yantikaka kupesa bikuma. Ya ntete tubilaka yandi nde, ‘Mono sumbaka kilanga mpi mono fwete kwenda kutala yo; mono ke lomba nge na kulolula mono.’ Ya nkaka tubaka nde, ‘Mono sumbaka bangombe kumi ya bo me kangisa zole-zole mpi mono ke kwenda kutala yo; mono ke lomba nge na kulolula mono.’ Ya nkaka diaka tubaka nde, ‘Mono me katuka kukwela, yo yina mono lenda kwisa ve.’”—Luka 14:16-20.

Bikuma yai me fwana ve. Na kutuba ya mbote, muntu ke talaka kilanga to bitwisi na ntwala nde yandi sumba yo, yo yina yo kele ve mfunu na kukwenda kutala yo na nima ya kusumba yo. Muntu ya tatu ke kudibongisa ve sambu na kukwela, kansi yandi me kwela dezia. Yo yina, diambu yai lenda kanga yandi ve nzila ya kundima emvitasio mosi ya mfunu. Ntangu mfumu me wa bikuma yai yonso, yandi me wa makasi mpi me zabisa mpika na yandi nde:

“Kwenda nswalu na babala-bala ya nene ti na banzila ya fioti ya mbanza, mpi kwisa kunata awa bansukami, bantu ya kele ti bifu na nitu, bifwa-meso, mpi bantu ya makulu-kifu.” Mpika yai me sala mutindu yina, kansi bisika ya nkaka me bikala. Yo yina, mfumu me zabisa mpika na yandi nde: “Kwenda na banzila ya nene mpi na banzila ya fioti, mpi songa bo na kukota, sambu nzo na mono kufuluka. Sambu mono ke tubila beno nde, ata muntu mosi ve na kati ya bantu yina mono bingisaka ta dia madia ya nkinsi na mono.”—Luka 14:21-24.

Mbandu yai ya Yezu me katuka kupesa ke monisa mutindu Yehowa Nzambi pesaka Yezu mukumba ya kubingisa bantu yina ta yala na Kimfumu ya zulu. Bayuda, mingi-mingi bamfumu ya mabundu, kele bantu ya ntete yina bo bingisaka. Kisalu ya kusamuna ya Yezu monisaka nde bantu mingi na kati na bo buyaka. Kansi, Nzambi bingisaka kaka ve Bayuda. Yezu me monisa pwelele nde na bilumbu ke kwisa bo ta bingisa kimvuka ya nkaka, mu mbandu bansukami ya dikanda ya Bayuda mpi bantu yina kumaka bantu ya dibundu ya Bayuda. Na nima, bo ta bingisa kimvuka ya tatu mpi ya nsuka, disongidila bantu yina Bayuda vandaka kumona nde bo kele mfunu ve na meso ya Nzambi.—Bisalu 10:28-48.

Ya kieleka, mambu yina Yezu me tuba me ndimisa mambu yai muntu mosi na kati ya bantu yina bo bingisaka tubaka: “Kiese na muntu yina ke dia na Kimfumu ya Nzambi.”