Beto Me Vukana Sambu na Kusala Luzolo ya Yehowa

NA NTOTO ya mvimba, kele ti baorganizasio mingi ya mambu ya mabundu, ya politiki, ya mumbongo mpi ya luzingu ya bantu; mpi konso organizasio kele ti mambu na yo, balukanu na yo mpi bangindu na yo. Kansi kele ti organizasio mosi ya kele ve bonso baorganizasio yonso ya nkaka. Ndinga ya Nzambi ke tuba pwelele nde organizasio yango kele Bambangi ya Yehowa.

² Diambu ya kiese kele nde, nge me kotaka na organizasio ya Yehowa. Sambu nge me bakisaka luzolo ya Nzambi, yo yina nge ke sala yo ntangu yai. (Nk. 143:10; Bar. 12:2) Nge kele nsadi ya kikesa yina ke salaka ti kimvuka ya bampangi ya ntoto ya mvimba yina ke zolanaka. (2 Bak. 6:4; 1 Pie. 2:17; 5:9) Mutindu Ndinga ya Nzambi silaka yo, kisalu yai ke natilaka nge balusakumunu mpi kiese mingi. (Bing. 10:22; Mar. 10:30) Mutindu nge ke salaka luzolo ya Yehowa na kwikama yonso bubu yai, nge ke kudibongisa sambu na kubaka luzingu ya mbote mpi ya mvula na mvula na bilumbu ke kwisa.—1 Tim. 6:18, 19; 1 Yoa. 2:17.

³ Yehowa, Ngangi na beto ya Nene, kele ti organizasio mosi mpamba na ntoto ya mvimba. Yandi kele Mfumu ya bima yonso mpi yandi muntu ke twadisaka organizasio yango. Beto ke tudilaka yandi ntima ya mvimba. Yandi kele Zuzi na beto, Muntu ya ke pesaka beto bansiku mpi Ntotila na beto. (Yez. 33:22) Sambu yandi kele Nzambi ya ndonga, yandi me yidikaka mambu sambu beto “sala kumosi ti yandi” sambu na kulungisa lukanu na yandi.—2 Bak. 6:1, 2.

⁴ Sambu nsuka ya nsi-ntoto yai me kuma pene-pene, beto fwete landa kutambula na lutwadisu ya Yezu Kristu, Ntotila yina Nzambi me tulaka. (Yez. 55:4; Kus. 6:2; 11:15) Yezu yandi mosi muntu tubaka nde balongoki na yandi ta sala mambu ya nene kuluta yina yandi salaka ntangu yandi vandaka kusamuna awa na ntoto. (Yoa. 14:12) Mambu yai kele ya kieleka sambu balongoki ya Yezu ta kuma mingi mpi ta samuna bamvula mingi na teritware ya kuluta nene. Bo ta samuna nsangu ya mbote ya Kimfumu na ntoto ya mvimba.—Mat. 24:14; 28:19, 20; Bis. 1:8.

⁵ Diambu yai ke na kusalama. Kansi mutindu Yezu tubaka, kisalu ya kulonga nsangu ya mbote ta suka na ntangu yina Yehowa me tulaka. Mambu yonso yina Nzambi me tubaka ya kele na Biblia ke monisa nde kilumbu ya nene ya Yehowa mpi ya boma me kuma kibeni pene-pene.—Yoe. 2:31; Sef. 1:14-18; 2:2, 3; 1 Pie. 4:7.

⁶ Mutindu beto ke bakisa luzolo ya Yehowa na ntangu yai ya nsuka, beto fwete sala bikesa mingi sambu na kusala mambu yina Nzambi ke lombaka. Yo ke lomba nde beto zaba mbote-mbote mutindu organizasio ya Nzambi ke tambulaka mpi beto pesa yo kibeni maboko. Organizasio ya Nzambi ke salaka mambu na kuwakana ti minsiku ya Biblia, bansiku, bantuma mpi malongi yina kele na Ndinga ya Nzambi yina bo me sonikaka na nsadisa ya mpeve santu.—Nk. 19:7-9.

⁷ Ntangu bansadi ya Yehowa ke lemfukaka na lutwadisu yai ya Biblia, bo ke zingaka na ngemba mpi ke salaka na bumosi. (Nk. 133:1; Yez. 60:17; Bar. 14:19) Inki ke salaka nde na bisika yonso bampangi kuvanda ti kinduku ya ngolo? Zola. Zola ke twadisaka beto mpi beto me lwataka yo. (Yoa. 13:34, 35; Bakol. 3:14) Bumosi yina Yehowa ke pesaka beto ke sadisaka beto na kulanda kutambula nzila mosi ti kitini ya zulu ya organizasio na yandi.

⁸ Bambikudi yai: Yezaya, Ezekiele mpi Daniele monaka bambona-meso ya ke monisa kitini ya zulu ya organizasio ya Yehowa. (Yez. kapu 6; Ezek. kapu 1; Dan. 7:9, 10) Mutindu mosi, ntumwa Yoane monaka mbona-meso ya ke monisa kitini ya organizasio yai ya zulu mpi yandi ke songa beto yo na bunkufi na mukanda ya Kusonga. Yandi monaka Yehowa na kiti ya kimfumu ya lukumu mpi bawanzio yina vandaka pene-pene na yandi vandaka kutuba nde: “Santu, santu, santu kele Yehowa Nzambi, Nkwa-Ngolo Yonso, yina vandaka, yina kele, mpi yina ke kwisa.” (Kus. 4:8) Yoane monaka mpi “na kati-kati ya kiti ya kimfumu . . . mwana-dimeme me telama,” disongidila Yezu Kristu, Mwana-Dimeme ya Nzambi.—Kus. 5:6, 13, 14; Yoa. 1:29.

⁹ Mbona-meso yai ya ke monisa Yehowa me vanda na kiti ya Kimfumu ke tendula nde yandi kele Mfumu ya organizasio yai. 1 Bansangu 29:11, 12 ke tuba mambu yai sambu na yandi mpi sambu na kiyeka ya nene yina yandi kele ti yo: “O Yehowa, bunene, ngolo, kitoko, lukumu, mpi nkembo kele ya nge, sambu bima yonso ya kele na zulu mpi na ntoto kele ya nge. Kimfumu kele ya nge, O Yehowa. Nge kele Muntu yina me kudinangula bonso mfumu na zulu ya yonso. Bimvwama mpi nkembo ke katukaka na nge, mpi nge ke yalaka bima yonso; kiyeka mpi ngolo kele na diboko na nge, mpi diboko na nge lenda kumisa bantu yonso bantu ya nene mpi lenda pesa bo ngolo.”

¹⁰ Sambu Yezu Kristu kele nduku ya kisalu ya Yehowa, yandi kele na kisika ya kunanguka na zulu mpi Nzambi me pesaka yandi kiyeka ya nene. Ya kieleka, Nzambi “me tulaka mpi bima yonso na nsi ya makulu na yandi, mpi yandi me tulaka yandi mfumu ya bima yonso na dibundu.” (Baef. 1:22) Ntumwa Polo tubaka mambu yai sambu na Yezu: “Nzambi tombulaka yandi na kisika mosi ya kunanguka mpi pesaka yandi na luzolo yonso zina yina me luta bazina yonso ya nkaka, sambu na zina ya Yezu mabolongo yonso—ya bayina kele na zulu mpi ya bayina kele na ntoto mpi ya bayina kele na nsi ya ntoto—kufukama mpi konso ludimi kundima pwelele nde Yezu Kristu kele Mfumu na nkembo ya Nzambi, Tata na beto.” (Bafil. 2:9-11) Yo yina, beto lenda tula ntima ya mvimba na lutwadisu ya lunungu ya Yezu Kristu.

¹¹ Mbikudi Daniele monaka na mbona-meso Mbuta ya Bilumbu me vanda na kiti na yandi ya kimfumu mpi bawanzio “funda mosi mbala funda vandaka kusadila yandi, mpi mbala mafunda kumi mafunda kumi vandaka kutelama na ntwala na yandi.” (Dan. 7:10) Biblia ke binga kimvuka yai ya bawanzio nde “bampeve sambu na kisalu ya santu, yina yandi ke tindaka sambu na kusadila bantu yina ta baka luguluku.” (Baeb. 1:14) Bigangwa yai yonso ya kimpeve kele ya kuyidika na ‘bakiti ya kimfumu, bimfumu, baluyalu mpi biyeka.’—Bakol. 1:16.

¹² Kana beto ke baka ntangu ya kutadila mambu yai ya kitini ya zulu ya organizasio ya Yehowa, beto ta bakisa mutindu Yezaya kudiwaka ntangu yandi monaka na mbona-meso “Yehowa me vanda na kiti mosi ya kimfumu ya nda mpi ya kunanguka,” mpi “baserafe vandaka me telama na zulu na yandi.” Yezaya tubaka nde: “Mawa na mono! Imene sambu na mono, sambu mono kele muntu ya kele ti bikobo ya mvindu, mpi mono ke zinga na kati ya bantu ya kele ti bikobo ya mvindu; sambu meso na mono me mona Ntotila, Yehowa ya makesa yandi mosi!” Ya kieleka, Yezaya yitukaka ngolo mpi kudikulumusaka ntangu yandi bakisaka bunene ya organizasio ya Yehowa. Diambu yai simbaka kibeni ntima ya Yezaya. Yo yina ntangu yandi waka ndinga mosi ke basika na zulu mpi ke binga bantu na kusala kisalu mosi ya mfunu ya kuzabisa bantu bandola ya Yehowa, yandi tubaka nde: “Mono yandi yai! Tinda mono!”—Yez. 6:1-5, 8.

¹³ Kuzaba mpi kubakisa organizasio ya Yehowa ke simbaka mpi ntima ya bansadi na yandi. Mutindu organizasio ya Yehowa ke kwenda na ntwala, beto ke sala ngolo sambu na kutambula nzila mosi ti yo. Beto ke sala ngolo sambu na kumonisa nde beto ke tulaka ntima na organizasio ya Yehowa bubu yai.

¹⁴ Na kapu 1 ya mbikudulu ya Ezekiele, yandi me mona Yehowa me vanda na zulu ya pusu-pusu ya nene ya zulu. Pusu-pusu yai ya ke yitukisa ke monisa kitini ya organizasio ya Yehowa yina ke monanaka ve. Mutindu Yehowa me vanda na zulu ya pusu-pusu yina, ke monisa nde yandi ke twadisa yo mbote mpi ke sadila yo na kuwakana ti lukanu na yandi.—Nk. 103:20.

¹⁵ Konso dikulu ya pusu-pusu yai kele ti dikulu ya nkaka na kati na yo ya kele nene kiteso mosi mpi ya kutelama mbote. Yo yina makulu yai vandaka “kukwenda na bandambu yonso iya.” (Ezek. 1:17) Makulu yina lenda soba nzila na mbala mosi. Ata mpidina, Nzambi ke twadisaka pusu-pusu yai na mayele yonso. Yehowa ke bikaka ve nde organizasio na yandi kukwenda konso kisika yina yo ke zola kukwenda. Ezekiele 1:20 ke tuba nde: “Yo vandaka kukwenda kisika yina mpeve vandaka kupusa yo na kukwenda.” Yehowa muntu ke salaka nde organizasio na yandi kukwenda konso kisika yina mpeve na yandi ke pusaka yo na kukwenda. Konso muntu fwete kudiyula nde: ‘Keti mono ke tambulaka nzila mosi ti yo?’

¹⁶ Kutambula nzila mosi ti organizasio ya Yehowa ke tendula ve kaka kukwenda na balukutakanu mpi kusala kisalu ya kusamuna. Ntete-ntete, yo ke tendula kukwenda na ntwala mpi kuyela na kimpeve. Beto ‘ke zikisaka mambu ya kuluta mfunu’ mpi beto ke diaka ntangu yonso madia ya kimpeve. (Bafil. 1:10; 4:8, 9; Yoa. 17:3) Beto fwete vila mpi ve nde konso kisika yina organizasio kele, mambu ke tambulaka mbote mpi bantu ke wakanaka mbote. Yo yina, beto fwete bakisa mfunu ya kusadila mbote bima ya kimpeve mpi ya kinsuni yina Yehowa ke pesaka beto sambu na kusala kisalu na yandi. Kana beto ke landa kutambula nzila mosi ti pusu-pusu ya zulu ya Yehowa, beto ta zinga na kuwakana ti nsangu yina beto ke longaka.

¹⁷ Ti lusadisu ya organizasio ya Yehowa, beto ke kwenda na ntwala sambu na kusala luzolo na yandi. Kuvila ve nde, Yehowa muntu ke tambusaka pusu-pusu yai ya zulu. Yo yina, kana beto ke landa kutambula ti pusu-pusu na yandi, yo ta monisa nde beto ke zitisaka Yehowa mpi ke tulaka ntima na Ditadi na beto. (Nk. 18:31) Biblia ke sila nde: “Yehowa ta pesa bantu na yandi ngolo. Yehowa ta sakumuna bantu na yandi mpi ta pesa bo ngemba.” (Nk. 29:11) Sambu beto kele na kati ya organizasio ya Yehowa bubu yai, beto ke bakaka kikesa mpi beto ke vandaka na ngemba yina yandi ke pesaka bantu na yandi. Ya kieleka, beto ta landa kubaka balusakumunu mingi kana beto ke sala luzolo ya Yehowa bubu yai mpi kimakulu.