Bametode ya Kusamuna Nsangu ya Mbote

YEZU vandaka nsamuni ya kikesa ya nsangu ya mbote mpi yandi bikilaka balongoki na yandi mbandu. Yandi vandaka kukwenda kutala bantu sambu na kusolula mpi kulonga bo na banzo na bo mpi na bisika ya bantu mingi. (Mat. 9:35; 13:36; Luka 8:1) Yezu vandaka kusolula ti muntu mosi-mosi. Yandi vandaka kulonga balongoki na yandi na kingenga mpi yandi vandaka kusolula ti bimvuka ya nene ya bantu. (Mar. 4:10-13; 6:35-44; Yoa. 3:2-21) Yandi sadilaka konso dibaku ya mbote yina yandi kutanaka ti yo sambu na kupesa bantu kikesa mpi kivuvu. (Luka 4:16-19) Ata ntangu yandi vandaka na mfunu ya kupema mpi ya kudia mwa kima, yandi vandaka kulutisa ve mabaku ya kuta kimbangi. (Mar. 6:30-34; Yoa. 4:4-34) Ntangu beto ke tangaka masolo ya Biblia yina ke tubilaka kisalu ya Yezu, yo ke pusaka beto kibeni na kulanda mbandu na yandi kaka mutindu yo pusaka bantumwa!—Mat. 4:19, 20; Luka 5:27, 28; Yoa. 1:43-45.

² Beto tadila mabaku yina Bakristu kele na yo bubu ya kusala kisalu yina Yezu Kristu yantikaka bamvula kiteso ya 2 000 me luta.

³ Beto Bambangi ya Yehowa, beto ke zabaka nde kusamuna nsangu ya mbote ya Kimfumu nzo na nzo na mutindu ya mbote kele mfunu mingi. Beto ke sadilaka metode yai banda bamvula mingi kibeni, yo ke sadisaka bantu na kuzaba beto. Mbuma ya mbote yina beto me bakaka ke monisa nde kusadila metode yai ya kusolula ti bantu mingi na ntangu ya nkufi kele mfunu. (Mat. 11:19; 24:14) Kisalu ya kusamuna nzo na nzo kele mutindu ya mbote ya beto ke monisaka zola sambu na Yehowa mpi sambu na nkweno na beto.—Mat. 22:34-40.

⁴ Kusamuna nzo na nzo kele ve metode ya mpa yina Bambangi ya Yehowa me basisa bilumbu yai. Ntumwa Polo tubaka nde yandi vandaka kulonga bantu na banzo na bo. Ntangu yandi tendudilaka bankengi ya Efezo kisalu na yandi, yandi tubaka nde: “Tuka kilumbu ya ntete yina mono kumaka na provense ya Azia, . . . mono buyaka ve na kuzabisa beno mambu yonso yina vandaka mfunu mpi na kulonga beno . . . nzo na nzo.” Na mutindu yina mpi na mitindu ya nkaka, Polo “taka kimbangi mbote-mbote na Bayuda mpi na Bagreki nde bo fwete balula ntima na Nzambi mpi kukwikila na Mfumu na beto Yezu.” (Bis. 20:18, 20, 21) Na ntangu yina, bamfumu ya Roma vandaka kupusa bantu na kusambila biteki mpi bantu “kudipesaka mingi na boma ya banzambi.” Yo vandaka kulomba nde bantu kusosa nswalu kibeni “Nzambi yina salaka nsi-ntoto mpi bima yonso yina kele na kati na yo,” Muntu yina vandaka ‘kuzabisa bantu ya bisika yonso nde bo fwete balula ntima.’—Bis. 17:22-31.

⁵ Bubu yai, yo ke lomba nde beto zabisa bantu nsangu ya mbote na nswalu yonso. Nsuka ya nsi-ntoto yai ya mbi ke na kukuma pene-pene. Mutindu beto me zaba mambu yai, beto fwete samuna diaka ti kikesa. Beto me monaka ve metode ya nkaka ya mbote katula metode yai ya beto ke sadilaka banda bamvula mingi ya kusosa bantu yina kele na nzala ya kieleka nzo na nzo. Yo ke butaka mbuma ya mbote bubu kaka mutindu yo butaka mbuma na bilumbu ya Yezu mpi ya bantumwa.—Mar. 13:10.

⁶ Keti nge ke kudipesaka kibeni na kisalu ya nzo na nzo? Kana mpidina, zaba nde Yehowa ke sepelaka ti nge. (Ezek. 9:11; Bis. 20:35) Kisalu ya kusamuna nzo na nzo lenda vanda mpasi sambu na nge. Ziku nitu ke pesa nge ve nzila, to nge ke samuna na teritware yina bantu mingi ke zolaka ve kuwa nsangu na beto to Leta me buyisaka kisalu na beto. Mbala ya nkaka, nge ke vandaka nsoni-nsoni mpi nge ke kukaka ve kuyantika kusolula ti bantu yina nge me zaba ve. Yo yina, konso ntangu ya nge ke salaka kisalu ya nzo na nzo, nge ke bangaka mwa fioti. Kulemba ve nitu. (Kub. 4:10-12) Mambu ya nge ke kutana ti yo me fwanana ti yina bampangi na nge ya bisika ya nkaka ke kutana ti yo.

⁷ Yezu silaka balongoki na yandi nde: “Mono kele ti beno bilumbu yonso tii na nsukilu ya ngidika ya bima.” (Mat. 28:20) Lusilu yai ke pesaka beto kikesa sambu na kusala kisalu ya kukumisa bantu balongoki. Beto ke kudiwaka bonso ntumwa Polo, yina tubaka nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.” (Bafil. 4:13) Baka mambote na mambu yina dibundu na beno me yidikaka sambu na kuta kimbangi nzo na nzo. Kana nge ke samuna ti bampangi ya nkaka, bo ta pesa nge kikesa mpi ta sadisa nge. Samba Nzambi sambu yandi sadisa nge na kununga konso diambu ya mpasi yina nge lenda kutana ti yo mpi sala ngolo sambu na kuvanda nsamuni ya kikesa ya nsangu ya mbote.—1 Yoa. 5:14.

⁸ Kana nge ke zabisa bantu ya nkaka nsangu ya mbote, nge ta zwa mabaku ya kusonga bo ‘kikuma ya kivuvu na nge.’ (1 Pie. 3:15) Nge ta mona pwelele luswaswanu yina kele na kati ya bantu yina kele ti kivuvu ya Kimfumu mpi bayina kele ve ti yo. (Yez. 65:13, 14) Nge ta vanda na kiese ya kuzaba nde nge lemfukaka na nsiku ya Yezu yina ke tuba nde “bika nde nsemo na beno kusema,” mpi nge lenda sadisa nkutu bantu ya nkaka na kuzaba Yehowa mpi kieleka yina ke nataka na luzingu ya mvula na mvula.—Mat. 5:16; Yoa. 17:3; 1 Tim. 4:16.

⁹ Bo ke yidikaka mambu sambu na kusamuna nzo na nzo na kati-kati ya mposo, na kilumbu ya Mposo ti Lumingu. Na bisika yina yo ke vandaka mpasi na kukuta bantu na banzo na ntangu, mabundu ya nkaka ke yidikaka manaka sambu na kuta kimbangi na nkokila. Mbala ya nkaka bantu ke yambaka banzenza kukonda mpasi na nsuka ya nima ya midi to na nkokila, kansi ve na suka.

¹⁰ Yezu songaka balongoki na yandi na ‘kusosa’ bantu yina me fwana. (Mat. 10:11) Sambu na kusosa bantu yina me fwana, Yezu sukaka kaka ve na kisalu ya kusamuna nzo na nzo. Ya kieleka, yandi vandaka kuta kimbangi na konso dibaku yina yandi vandaka kukutana ti yo, yo vanda yandi yidikaka yo na ntwala to na dibaku ya mbote. (Luka 8:1; Yoa. 4:7-15) Bantumwa mpi vandaka kulonga bantu na bisika ya mutindu na mutindu.—Bis. 17:17; 28:16, 23, 30, 31.

¹¹ Mutindu mosi bubu yai, lukanu na beto kele ya kulonga nsangu ya Kimfumu na bantu yonso kana mpila kele. Yo ke tendula nde beto fwete landa bametode yina Yezu ti balongoki na yandi sadilaka sambu na kukumisa bantu balongoki mpi kuzaba mbote mutindu mambu mpi luzingu ya bantu ya teritware na beto ke soba. (1 Bak. 7:31) Mu mbandu, Bansamuni me bakaka mbuma ya mbote ntangu bo ke kwendaka kukutana ti bantu na bisika ya bo ke tekaka to ke salaka. Kuta kimbangi na bala-bala me butaka mbuma ya mbote na bansi mingi, kaka mutindu kuta kimbangi na baparke, na bisika yina bakaminio ke telamaka, to na konso kisika yina beto lenda kuta bantu me butaka mbuma. Mabundu ya nkaka me tulaka bamesa ya mikanda to bashario na teritware na bo. Diaka, Betele lenda yidika mambu sambu na bambanza ya nene bampangi ya mabundu mingi kukwenda kuta kimbangi ya sipesiali na bisika yina bantu ke lutaka mingi na makulu. Yo ke salaka nde bansamuni kulonga nsangu ya mbote na bantu yina ke vandaka ve na banzo ntangu bo ke kwendaka kutala bo.

¹² Kana beto me kutana ti muntu yina me sepela ti nsangu ya Biblia na bisika yina bantu ke vandaka mingi, beto lenda pesa yandi mukanda yina me fwana. Sambu na kuyedisa mpusa yina, nge lenda pesa yandi nimero na nge ya telefone to baadresi na nge ya nkaka mpi kusala yonso sambu na kuvutukila yandi. Nge lenda lomba yandi na kukota na site jw.org, to nge lenda pesa yandi adresi ya Nzo ya Kimfumu mosi ya pene-pene. Nge lenda mona nde kuta kimbangi na bisika ya bantu mingi lenda vanda mutindu ya mbote ya kuyedisa kisalu na nge.

¹³ Kansi, kisalu ya bo me pesaka Bakristu bubu ke suka ve na kusamuna nsangu ya mbote. Kana nge ke zola kusadisa bantu na kundima kieleka yina ke nataka na luzingu, nge fwete vutukilaka mbala na mbala bantu yina sepelaka ti kieleka sambu bo kuma Bakristu ya kuyela.

¹⁴ Yezu songaka balongoki na yandi nde: “Beno ta vanda bambangi na mono . . . tii na kisika ya kuluta ntama ya ntoto.” (Bis. 1:8) Kansi yandi songaka bo diaka nde: “Yo yina, beno kwenda mpi beno kumisa bantu ya makanda yonso balongoki, . . . beno longa bo na kuzitisa mambu yonso ya mono songaka beno.” (Mat. 28:19, 20) Kuvutukila bantu lenda natila beto kiese mingi na kisalu ya Yehowa. Ntembe kele ve nde, bantu yina sepelaka na nsangu ya mbote na mbala ya ntete ya nge kwendaka kutala bo ta sepela kumona nge diaka. Kana nge longa bo mambu mingi ya kele na Biblia, nge ta kumisa lukwikilu na bo na Nzambi ngolo mpi nge ta sadisa bo na kubakisa nzala na bo ya mambu ya kimpeve. (Mat. 5:3) Kana nge ke kudibongisa mbote mpi nge ke vutukila bo na ntangu yina me fwana sambu na bo, nge lenda yantika kulonguka Biblia ti bo. Konso ntangu ya nge ke vutukila muntu, lukanu na nge fwete vanda ya kuyantika kulonguka Biblia ti yandi. Beto ke sukaka kaka ve na kukuna mbuma ya kieleka kansi beto ke losilaka yo mpi masa.—1 Bak. 3:6.

¹⁵ Bansamuni ya nkaka ke kukaka ve kusala bamvutukilu ya mpa. Mbala ya nkaka nge me yikanaka kusadila bangogo ya nkufi sambu na kubanda masolo na kisalu ya kusamuna mpi nge ke sepelaka mingi kusala mutindu yina na kisalu ya kusamuna. Kansi, kana nge yibuka nde nge fwete vutuka sambu na kusolula ti muntu yina mambu ya Biblia, nge lenda kuma kuwa boma. Nge fwete kudibongisa mbote sambu yo luta mbote. Sadila bandongisila ya mbote yina beto ke bakaka na lukutakanu ya kati-kati ya mposo. Nge lenda lomba mpi nsamuni mosi ya me zaba kulonga mbote na kufidisa nge.

¹⁶ Ntangu Filipo vandaka kusolula ti prozelite mosi ya Muyuda yina vandaka kutanga Ndinga ya Nzambi, yandi yulaka nde: “Keti nge ke zaba kibeni mambu ya nge ke tanga?” Bakala yina vutulaka nde: “Ya kieleka, inki mutindu mono lenda zaba kana muntu kutendudila mono ve?” Disolo ya Biblia yina kele na Bisalu kapu 8 ke monisa mutindu Filipo yantikaka ti verse ya Masonuku yina bakala yango vandaka kutanga mpi yandi “zabisaka yandi nsangu ya mbote ya Yezu.” (Bis. 8:26-36) Beto me zaba ve bantangu ikwa Filipo lutisaka ti bakala yina. Kansi Filipo tendudilaka yandi nsangu ya mbote na pwelele yonso, yo yina bakala yina ndimaka mpi lombaka nde yandi baka mbotika. Yandi kumaka longoki ya Yezu Kristu.

¹⁷ Bubu yai, bantu mingi ke zabaka ve Biblia, yo yina yo lenda lomba nde nge vutukila bo mbala mingi mpi nge longuka ti bo Biblia na mudindu na nsungi ya bamposo, bangonda, to nkutu na nsungi ya mvula mosi to ya bamvula mingi na ntwala nde bo kuma ti lukwikilu mpi bo fwana sambu na kubaka mbotika. Kansi kukanga ntima mpi lusadisu ya zola yina nge ta pesa sambu na kusadisa bantu ya ntima ya masonga na kukuma balongoki, ta natila nge mambote mutindu Yezu tubaka: “Kiese ke vandaka mingi na kupesa, kansi na kubaka kiese ke vandaka fioti.”—Bis. 20:35.

¹⁸ Ntembe kele ve nde nge ta zola kulonguka Biblia ti bantu na nsadisa ya mukanda mosi na kati ya mikanda yina bo me yidikaka sambu na kulonguka Biblia ti bantu. Kana nge ke sadila bandongisila yina beto ke bakaka na lukutakanu ya kati-kati ya mposo mpi nge ke samuna ti bampangi yina ke longaka mbote, nge ta kuma kutwadisa mbote kulonguka ya Biblia yina ke buta mbuma mpi nge ta sadisa bantu ya nkaka na kukuma balongoki ya Yezu Kristu.

¹⁹ Kana nge kele na mfunu ya lusadisu sambu na kuyantika mpi kutwadisa kulonguka ya Biblia ti muntu, solula ti nkuluntu mosi to mpangi mosi ya ke twadisaka mbote kulonguka ya Biblia. Bangindu yina ke basikaka na Mukanda ya Lukutakanu Luzingu mpi Kisalu mpi yina bo ke monisaka na bansonga na lukutakanu, ta sadisa nge mpi. Tula ntima na Yehowa mpi songaka yandi mpusa na nge na kisambu. (1 Yoa. 3:22) Yo yina kana mpila kele, baka lukanu ya kulonguka Biblia ti muntu mosi yo vanda nge ke longukaka dezia ti muntu mosi ya dibuta na beno. Kana nge ke longuka Biblia ti bantu, nge ta sepela diaka mingi ti kisalu na nge ya kusamuna.

²⁰ Ntangu beto ke sadisaka bantu na kuzaba Yehowa Nzambi mpi na kukuma balongoki ya Yezu Kristu, bo ke kumaka bampangi na beto ya dibundu. Balongoki ya Biblia ke yelaka na kimpeve kana bo me zaba organizasio ya Yehowa mpi kana bo ke pesa yo maboko. Kulonga bo na kusala mutindu yina kele kibeni mfunu. Bo me basisaka bavideo mpi kamukanda Banani Kesala Luzolo ya Yehowa Bubu Yai? sambu na lukanu yai. Bangindu ya nkaka ya kele na Kapu 4 ya mukanda yai lenda sadisa nge mpi.

²¹ Kaka ntangu nge me yantika kulonguka Biblia ti muntu mosi, sadisa yandi na kubakisa nde Yehowa ke sadila organizasio mosi sambu kisalu ya kusamuna kusalama bubu yai na ntoto. Monisa mfunu ya bisadilu na beto ya kulongukila Biblia mpi tendula mutindu bansadi ya luzolo ya mbote yina me kudipesaka na Nzambi ke niemaka yo mpi ke kabulaka yo na ntoto ya mvimba. Lomba longoki na nge ya Biblia na kukwenda ti nge na balukutakanu na Nzo ya Kimfumu. Tendudila yandi mutindu balukutakanu ke salamaka mpi sadisa yandi na kuzabana ti bampangi. Sadisa yandi mpi na kuzabana ti Bambangi ya Yehowa ya nkaka na balukutakanu ya nziunga mpi ya distrike. Na mabaku yai mpi ya nkaka, yandi mosi ta mona mutindu bansadi ya Yehowa ke monisaka zola, kidimbu yina ke sadisaka bantu na kuzaba Bakristu ya kieleka. (Yoa. 13:35) Kana muntu yina ke sepela ti kieleka ke landa kumonisa ntonda sambu na organizasio ya Yehowa, yandi ta pusana pene-pene ya Yehowa.

²² Bakristu ya ntete vandaka kulonga Ndinga ya Nzambi ti kikesa. Bo salaka bakopi ya Masonuku sambu na kutangaka yo bo mosi mpi sambu na kulongukaka yo na dibundu. Bo vandaka kulongisila bankaka na kutanga Ndinga ya Nzambi yina kele ya kieleka. Bakopi ya bo vandaka kusonika na maboko na bo mosi vandaka ve mingi mpi bo vandaka kuzitisa yo mingi kibeni. (Bakol. 4:16; 2 Tim. 2:15; 3:14-17; 4:13; 1 Pie. 1:1) Bubu yai, Bambangi ya Yehowa ke sadilaka bametode ya mpa ya kuniema mikanda sambu na kubasisa bamilio ya Babiblia mpi bamilio ya bisadilu ya kulongukila Biblia. Bisadilu yango kele: batrakiti, tumikanda, mikanda mpi bazulunalu na bandinga mingi kibeni.

²³ Ntangu nge ke longa bantu ya nkaka nsangu ya mbote, kuvila ve na kusadila bisadilu ya kulongukila Biblia yina organizasio ya Yehowa me basisaka. Kana nge yibuka mambote yina nge me bakaka ntangu nge ke tangaka mpi ke longukaka mikanda ya Bambangi ya Yehowa, yo ta pusa nge na kusonga yo na bantu ya nkaka.—Baeb. 13:15, 16.

²⁴ Bantu mingi kibeni me kumaka kusadila ntete-ntete Internet sambu na kuzaba bansangu. Yo yina, katula kusadila mikanda ya ke tendulaka Biblia, site Internet na beto jw.org, kele kisadilu ya mbote kibeni sambu na kumwanga nsangu ya mbote. Bantu mingi na ntoto ya mvimba ke sadilaka ordinatere sambu na kutanga to kulanda lutangu ya Biblia yina bo me kotisaka ndinga mpi ya mikanda yina ke tendulaka Biblia na bandinga mingi. Bantu yina ke buyaka kusolula ti beto to bayina ke zingaka na bisika yina bo kele ve ti mabaku mingi ya kusolula ti Bambangi ya Yehowa lenda sosa kuzaba balukwikilu na beto na nzila ya site jw.org na banzo na bo.

²⁵ Yo yina, beto ke sadisaka bantu na kuzaba site jw.org na konso dibaku ya mbote. Kana muntu me yula ngiufula ya me tala balukwikilu na beto, beto lenda sadila telefone to ordinatere sambu na kusonga yandi mvutu kaka na ntangu yina. Kana beto me kutana ti muntu yina ke tuba ndinga ya nkaka, yo vanda ndinga ya bidimbu, beto lenda songa yandi site Internet na beto sambu yandi baka Biblia mpi mikanda yina ke tendulaka Biblia na ndinga na yandi. Bansamuni mingi me sadilaka bavideo na site Internet na beto sambu na kuyantika disolo ya Biblia ti muntu.

²⁶ Yezu songaka bantu yina vandaka kutula dikebi na ndinga na yandi nde: “Beno kele nsemo ya nsi-ntoto. . . . Bika nde nsemo na beno kusema na ntwala ya bantu, sambu bo mona bisalu na beno ya mbote mpi bo pesa nkembo na Tata na beno yina kele na zulu.” (Mat. 5:14-16) Balongoki yina landaka mbandu ya Nzambi sambu bo salaka mambu bonso Yezu, yina tubaka sambu na yandi mosi nde: “Mono kele nsemo ya nsi-ntoto.” Yezu pesaka Bakristu mbandu ya mbote mutindu yandi bikaka nde “nsemo ya luzingu” kupela sambu na mambote ya bantu yonso yina zolaka kuwa nsangu.—Yoa. 8:12.

²⁷ Ntumwa Polo bikilaka beto mpi mbandu ya mbote ya beto fwete landa. (1 Bak. 4:16; 11:1) Ntangu yandi vandaka na Atene, konso kilumbu yandi vandaka kuta kimbangi na zandu, na bantu yina vandaka pana. (Bis. 17:17) Bakristu ya Filipi landaka mpi mbandu na yandi. Yo yina, Polo sonikilaka bo nde bo vandaka kuzinga “na kati ya ndonga ya bantu ya mbi mpi ya me bebaka,” mpi bo vandaka kupela “bonso minda na nsi-ntoto” na kati ya bantu yina. (Bafil. 2:15) Bubu yai, beto lenda bika nde kieleka ya Kimfumu kupela na bangogo mpi na bisalu na beto konso ntangu ya beto kele ti dibaku ya kuzabisa bantu nsangu ya mbote. Ya kieleka, mbandu ya mbote yina beto ke pesaka mutindu beto ke vandaka bantu ya masonga mpi ya mbote lenda benda dikebi ya bantu ya nkaka na kumona nde beto kele ve bonso bantu ya nsi-ntoto. Kana beto ke zabisa bo nsangu ya mbote, bo ta zaba sambu na nki beto kele ve bonso bantu ya nkaka.

²⁸ Bansadi mingi ya Yehowa ke zabisaka nsangu ya mbote na bantu yina bo ke kutanaka ti bo na kisalu, na nzo-nkanda, na bataksi, to na bisika ya nkaka ntangu bo ke salaka bisalu na bo ya konso kilumbu. Ntangu beto ke sala nzietelo, beto lenda vanda ti dibaku ya kusolula ti bantu yina beto ke sala ti bo nzietelo. Konso muntu fwete vanda ya kuyilama sambu na kukumisa konso disolo yina bantu me basisa dibaku ya kuta kimbangi. Beto fwete vanda ya kuyilama sambu na kusolula ti bantu ya nkaka na konso dibaku ya mbote.

²⁹ Beto ta samuna ti kikesa kana beto ke vila ve nde ntangu beto ke sala mutindu yina, beto ke pesaka Ngangi na beto nkembo mpi ke kumisaka zina na yandi. Diaka, beto lenda sadisa bantu ya ntima ya masonga na kuzaba Yehowa sambu bo sadila yandi mpi bo baka kivuvu ya luzingu yina bantu ke bakaka ntangu bo ke kwikilaka na Yezu Kristu. Yehowa ke waka kiese na bikesa ya mutindu yina mpi yandi ke monaka nde yo kele kisalu ya santu.—Baeb. 12:28; Kus. 7:9, 10.

³⁰ Luzolo ya Yehowa kele nde beto longa nsangu ya Kimfumu na ntoto ya mvimba, yo vanda na bambanza mpi na babwala. Yo yina, Betele ke pesaka teritware na mabundu mpi na bansamuni yina ke salaka kisalu ya kusamuna na bisika yina kele ntama ti mabundu. (1 Bak. 14:40) Kusala mutindu yai ke wakana ti mutindu Nzambi yidikaka mambu na mvu-nkama ya ntete. (2 Bak. 10:13; Bag. 2:9) Mutindu kisalu ya kusamuna nsangu ya Kimfumu ke yela nswalu na bilumbu yai ya nsuka, beto fwete yidika mambu mbote sambu beto samuna mbote-mbote na teritware ya dibundu na beto.

³¹ Nkengi na kisalu muntu ke twadisaka mambu yai. Nsadi ya kisalu mosi lenda kabisa bateritware na bampangi. Beto kele ti bateritware ya mitindu zole: bateritware ya bimvuka ya kisalu ya kusamuna mpi bateritware ya konso nsamuni. Na bisika yina teritware kele fioti, bankengi ya bimvuka ta vanda ti bateritware ya bimvuka yina bansamuni ya bimvuka na bo lenda samuna. Kansi, na bisika yina bateritware kele mingi, konso nsamuni lenda baka teritware na yandi mosi.

³² Nsamuni yina kele ti teritware na yandi ta vanda ti kisika ya kusamuna na bilumbu yina dibundu ke salaka ve balukutakanu ya kisalu ya kusamuna to ntangu yandi me vukana ve ti bansamuni ya kimvuka na bo sambu na kikuma mosi buna. Mu mbandu, bansamuni ya nkaka ke bakaka teritware yina kele pene-pene ya kisika yina bo ke salaka mpi bo ke samunaka na ntangu bantu ke pemaka sambu na kudia to na nima ya kisalu. Mabuta ya nkaka ke bakaka teritware pene-pene ya nzo na bo sambu na kusamuna na bankokila ya nkaka. Kana nsamuni kele ti teritware na yandi mosi na kisika ya mbote, yo lenda sadisa yandi na kusadila mbote ntangu na yandi na kisalu ya kusamuna. Beto lenda sadila mpi bateritware ya bansamuni sambu na kuta kimbangi na kimvuka. Kana nge ke zola kuvanda ti teritware na nge mosi, nge lenda lomba yo na mpangi yina ke talaka mambu ya teritware.

³³ Yo vanda nkengi ya kimvuka ya kisalu ya kusamuna muntu me baka teritware sambu na kimvuka ya mvimba, to nsamuni me lomba teritware na yandi mosi, nsamuni yina me baka teritware fwete sala ngolo sambu na kukutana ti bantu na konso nzo. Mutindu beno me yidika mambu sambu na kulonga bantu mingi na teritware fwete fwa ve bansiku ya me tala kubumba kinsweki ya bansangu ya bantu. Konso nkengi ya kimvuka to nsamuni yina me baka teritware fwete sala ngolo na kumanisa yo na bangonda iya. Kana yandi me manisa yo, yandi fwete songa mpangi yina ke talaka mambu ya teritware. Na kutadila mambu ya nkaka, nsamuni lenda bikala ti teritware yina sambu yandi sala yo diaka to yandi lenda vutula yo na mpangi yina ke talaka mambu ya teritware.

³⁴ Kana bampangi yonso ya dibundu ke sala na bumosi, bo lenda samuna na teritware ya mvimba. Yo lenda sala mpi nde bansamuni zole to mingi kusamuna ve na teritware mosi na ntangu mosi, sambu yo lenda pesa bantu ya beto ke kwendaka kutala makasi. Mpidina, beto ta monisa nde beto ke zitisa bampangi na beto mpi bantu ya teritware na beto.

³⁵ Bantu yonso fwete longuka mambu ya Yehowa Nzambi, Mwana na yandi mpi Kimfumu na yandi. (Kus. 14:6, 7) Beto ke zolaka kusadisa bantu ya bandinga yonso na kubinga zina ya Yehowa sambu bo guluka mpi bo lwata kimuntu ya Bukristu. (Bar. 10:12, 13; Bakol. 3:10, 11) Inki bampasi beto ke kutanaka ti yo ntangu beto ke longaka nsangu ya mbote na bisika yina bantu ke tubaka bandinga mingi? Inki mutindu beto lenda nunga bampasi yina sambu na kupesa bantu mingi dibaku ya kuwa nsangu ya Kimfumu na ndinga yina bo ke bakisaka mbote?—Bar. 10:14.

³⁶ Bo ke pesaka konso dibundu teritware na kutadila ndinga na yo. Yo yina, na bateritware yina bantu ke tubaka bandinga mingi, bansamuni ya mabundu mingi ke samunaka kaka na bateritware yango. Kana yo kele mpidina, yo ta vanda mbote nde bansamuni ya konso dibundu kusamuna kaka na bantu yina ke tubaka ndinga ya dibundu na bo. Bo ta sala mpi mutindu yina ntangu bo ke kabula ba emvitasio konso mvula. Kansi ntangu bansamuni ke ta kimbangi na bisika ya bantu mingi to na dibaku ya mbote, bo lenda solula ti bantu yonso mpi kupesa mikanda na bandinga yonso.

³⁷ Bantangu ya nkaka, mabundu ya bandinga ya nkaka ke kukaka ve kusamuna mbala na mbala na teritware ya dibundu na bo yina kele ntama. Kana mpidina, bankengi na kisalu ya mabundu yina kele na teritware yango fwete solula bo na bo sambu na kuwakana mutindu ya mbote ya kusamuna na teritware yina ya mvimba. Kusala mutindu yai ta pesa bantu yonso dibaku ya kuwa nsangu ya Kimfumu mpi yo ta sala nde bansamuni ya mabundu mingi kukutanaka ve na banzo mpi bisika ya mutindu mosi.—Bing. 15:22.

³⁸ Inki beto fwete sala kana muntu yina beto me kuta na nzo mosi ke tubaka ve ndinga na beto? Beto fwete yindula ve nde bansamuni yina ke tubaka ndinga na yandi ta kwisa kutala yandi. Bansamuni ya nkaka me longukaka bangogo ya pete ya kuyantika disolo ti muntu na ndinga yina bo ke waka bantu mingi ke tuba na teritware na bo. Beto lenda songa muntu mutindu ya kutanga to ya kubaka mikanda na ndinga na yandi na site Internet na beto jw.org, to beto lenda songa yandi nde beto ta natila yandi mukanda na ndinga na yandi.

³⁹ Kana muntu yina me monisa mpusa ya masonga, beto fwete sosa nsamuni ya me fwana sambu na kusadisa yandi na ndinga yina yandi ke bakisa. Beto lenda songa yandi mpi kisika ya pene-pene yina bo ke salaka balukutakanu na ndinga na yandi. Kana yandi ke zola nde muntu mosi ya ke tubaka ndinga na yandi kukwisa kutala yandi, beto lenda songa yandi mutindu yandi lenda kotisa bansangu na yandi na jw.org. Ebuna Betele ta sala ngolo na kuzwa nsamuni, kimvuka, to dibundu mosi ya pene-pene yina lenda sadisa yandi.

⁴⁰ Beto ta yambula kutala muntu yina kaka kana yandi me songa beto nde mpangi mosi ya ke tubaka ndinga na yandi kwisaka kutala yandi. Bantangu ya nkaka, Betele lenda songa bankuluntu nde bo me zwa ve nsamuni ya ke tubaka ndinga ya muntu yina. Kana mpidina, beto fwete sala yonso sambu na kulanda kuyedisa mpusa ya muntu yina. Kana mpila kele, beto lenda longuka Biblia ti yandi, beto lenda sala yo na nzila ya mukanda mosi ya kele na ndinga na yandi. Kana beto ke sadila bifwanisu mbote mpi ke lomba yandi na kutanga baverse yina bo me pesa, yandi ta zaba malongi ya Biblia yina yo ke lombaka nde muntu kuzaba ntete. Muntu mosi ya dibuta na yandi yina me zaba mbote ndinga na yandi mpi ndinga na beno lenda sadisa beno na kubalula mambu yina beno ke tuba.

⁴¹ Sambu na kunata muntu yina ke sepela na kieleka na organizasio ya Nzambi, beto fwete bingisa yandi na balukutakanu na beto, ata yandi ta bakisa ve mambu yonso ya bo ke longa. Ntangu bo ke tanga baverse, beto lenda sadisa yandi na kumona yo na Biblia ya ndinga na yandi, kana yo kele. Kuvukana ti bantu ya nkaka na dibundu lenda pesa yandi kikesa mpi yo lenda sadisa yandi na kuyela diaka na kimpeve.

⁴² Bimvuka Yina Kele Ve ti Bantwadisi: Yo kele kimvuka yina kele ti bansamuni yina ke samunaka na ndinga ya nkaka yina dibundu ke sadilaka ve balukutakanu, ata yo kele ve ti nkuluntu to nsadi ya kisalu yina me fwana sambu na kutwadisa lukutakanu konso mposo na ndinga yina. Betele lenda ndima nde dibundu mosi kutwadisa kimvuka mosi ya mutindu yina kana yo ke lungisa mambu yai:

1. (1) Bantu mingi na teritware yina ke tubaka ndinga mosi ya me swaswana ti yina dibundu ke sadilaka balukutakanu.

2. (2) Bansamuni fioti me zaba ndinga yango to ke zola kulonguka yo.

3. (3) Kimvuka ya bankuluntu ke zola kutwadisa mpi kuyidika mambu sambu bampangi kusamuna na ndinga yina.

Kana kimvuka ya bankuluntu ke zola kutwadisa kimvuka ya mutindu yai, bankuluntu fwete solula ti nkengi ya nziunga. Yandi lenda zaba mabundu ya nkaka yina ke sosa mpi kulonga bantu na ndinga yina mpi yandi lenda songa beno mambu ya mfunu yina ta sadisa beno na kupona dibundu yina me fwana kibeni na kutwadisa kimvuka yina. Kana beno me pona dibundu yina, bankuluntu lenda tinda mukanda na Betele mpi kulomba nde Betele kundima nde dibundu yango kutwadisa kimvuka yina ya ndinga ya nkaka.

⁴³ Bimvuka: Betele lenda ndima nde dibundu mosi kutwadisa kimvuka mosi kana yo me lungisa mambu yai:

1. (1) Bantu ya ke sepela ti kieleka na ndinga yina fwete vanda mingi mpi beno ke mona nde kuyela lenda salama na bilumbu ke kwisa.

2. (2) Kele ti mwa bansamuni ya ke tubaka ndinga yango to ke longuka yo.

3. (3) Nkuluntu to nsadi ya kisalu mosi ya me fwana fwete vanda sambu na kutwadisa ata lukutakanu mosi to kitini ya lukutakanu mosi konso mposo na ndinga yina, mu mbandu diskure ya bantu yonso to Kulonguka ya Nzozulu ya Nkengi.

⁴⁴Kana beno me lungisa mambu yai na mutindu ya me fwana, kimvuka ya bankuluntu fwete tinda mukanda mosi ya kele ti bansangu yina yonso na Betele sambu na kulomba Betele na kundima nde dibundu mosi kutwadisa kimvuka yango. Kana nkuluntu muntu ke twadisa kimvuka yina, beno ta binga yandi “nkengi ya kimvuka,” kansi kana yo kele nsadi ya kisalu, beno ta binga yandi “nsadi ya kimvuka.”

⁴⁴ Kana bo me ndima nde kimvuka mosi kubasika, kimvuka ya bankuluntu ya dibundu yina ta twadisaka kimvuka yango ta tala kana yo ta lomba nde bo yika bitini ya nkaka ya balukutakanu mpi mbala ikwa na ngonda kimvuka yango ta salaka balukutakanu yina. Bo lenda yidika mpi balukutakanu ya kisalu ya kusamuna sambu na kimvuka yango. Bantu yonso ya kimvuka yina fwete salaka na lutwadisu ya kimvuka ya bankuluntu yina ke twadisaka kimvuka yina. Bankuluntu fwete pesaka bandongisila ya me fwana mpi bo fwete monisa nde bo ke tulaka dikebi ya ngolo sambu na kulungisa bampusa ya kimvuka yina. Kana nkengi ya nziunga me samuna ti kimvuka yina na mposo yina yandi ke tala dibundu yina ke twadisaka kimvuka yango, yandi ta tindila Betele rapore ya nkufi ya ke monisa mutindu kimvuka yango ke yela mpi bampusa ya kimvuka yango. Na ntangu ya me fwana, kimvuka yina lenda kuma dibundu. Yehowa ta wa kiese kana bampangi yonso ke landa lutwadisu na yandi.—1 Bak. 1:10; 3:5, 6.

⁴⁵ Bakristu yina me kudipesaka na Nzambi kele ti mukumba ya kuzabisa bantu ya nkaka nsangu ya mbote. Yo kele ti mitindu mingi ya kusala yo, kansi bampangi mingi na kati na beto ke zolaka kubasika na kisalu ya kusamuna ti bantu ya nkaka. (Luka 10:1) Yo yina, mabundu ke salaka lukutakanu ya kisalu ya kusamuna na kati-kati ya mposo, na kilumbu ya Mposo mpi ya Lumingu. Bilumbu ya kupema ke vandaka mpi bilumbu ya mbote sambu na kuta kimbangi na kimvuka, sambu bampangi mingi ke salaka ve kisalu ya kinsuni. Komite ya Kisalu ya Dibundu ke yidikaka manaka sambu na kusala balukutakanu ya kisalu ya kusamuna na bantangu mpi na bisika yina me fwana, yo vanda na ntangu to na nkokila.

⁴⁶ Kuta kimbangi na kimvuka ke sadisaka bansamuni na kusamuna kumosi mpi na ‘kupesana kikesa.’ (Bar. 1:12) Bansamuni ya mpa lenda samuna ti bansamuni ya ntama mpi ya me zaba kusamuna mbote sambu bo baka formasio. Na bisika ya nkaka, yo lenda vanda mbote nde bansamuni zole to mingi kusamuna kisika mosi sambu na kuditanina. Ata nge me yidika manaka sambu na kusamuna nge mosi na teritware, kuvila ve nde kukwenda na lukutakanu ya kisalu ya kusamuna na kimvuka na beno lenda pesa bampangi ya nkaka kikesa. Kuzaba nde bampangi ya nkaka ke samuna na kisika ya nge ke samuna, lenda kitisa nge ntima. Bapasudi-nzila mpi bampangi ya nkaka fwete yindula ve nde bo fwete kwisaka kaka na konso lukutakanu ya kisalu ya kusamuna yina dibundu me yidikaka, mingi-mingi kana bo ke salaka yo konso kilumbu. Ata mpidina, bo lenda kwenda kupesa maboko na balukutakanu ya nkaka ya kisalu ya kusamuna konso mposo.

⁴⁷ Bika nde beto yonso kulanda mbandu yina Yezu ti bantumwa na yandi bikaka! Beto fwete tula ntima nde Yehowa ta sakumuna bikesa ya beto ke salaka sambu na kusala mingi kisalu ya mfunu ya kusamuna nsangu ya mbote ya Kimfumu.—Luka 9:57-62.