DILONGI 18
Mutindu ya Kuzaba Bakristu ya Kieleka
Bantu mingi kibeni ke tubaka nde bo kele Bakristu. Ata mpidina, bo yonso ve ke ndimaka mambu ya mutindu mosi mpi bo yonso ve ke zitisaka bansiku ya mutindu mosi. Ebuna, nki mutindu beto lenda zaba mpenza Bakristu ya kieleka?
1. Mukristu kele nani?
Bakristu kele balongoki ya Yezu Kristu to bantu yina ke landaka yandi. (Tanga Bisalu 11:26.) Inki mutindu bo ke monisaka nde bo kele balongoki ya Yezu? Yezu tubaka nde: “Kana beno bikala na ndinga na mono, beno kele kibeni balongoki na mono.” (Yoane 8:31) Yo ke tendula nde Bakristu ya kieleka fwete lemfuka na malongi ya Yezu. Yezu vandaka kulonga ntangu yonso mambu ya Biblia. Bakristu ya kieleka ke salaka mpi mutindu mosi.—Tanga Luka 24:27.
2. Inki mutindu Bakristu ya kieleka ke monisilanaka zola?
Yezu songaka balongoki na yandi nde: “Beno zolana beno na beno mutindu mono me zolaka beno.” (Yoane 15:12) Inki mutindu Yezu monisaka nde yandi vandaka kuzola balongoki na yandi? Yandi vandaka kulutisa ntangu ti bo, kupesa bo kikesa mpi kusadisa bo. Nkutu yandi pesaka luzingu na yandi sambu na bo. (1 Yoane 3:16) Mutindu mosi mpi, Bakristu ya kieleka ke zolanaka ve kaka na munoko. Bo ke monisilanaka zola na mambu ya bo ke tubaka mpi ke salaka.
3. Inki kisalu Bakristu ya kieleka ke salaka mingi?
Yezu pesaka balongoki na yandi kisalu. “Yandi tindaka bo na [kulonga nsangu ya mbote ya] Kimfumu ya Nzambi.” (Luka 9:2) Bakristu ya ntete vandaka kulonga na bisika yina bo vandaka kusambila Nzambi, na bisika ya bantu mingi mpi na banzo ya bantu. (Tanga Bisalu 5:42; 17:17.) Bubu yai mpi, Bakristu ya kieleka ke longaka malongi ya Biblia na bisika yonso yina bantu kele. Bo ke zolaka bantu ya nkaka, yo yina bo ke sadilaka na kiese yonso ntangu mpi ngolo na bo sambu na kulonga bantu nsangu ya Biblia yina ke pesaka kivuvu mpi kikesa.—Marko 12:31.
LONGUKA MAMBU MINGI
Beto tala mambu yina ke salaka nde Bakristu ya kieleka kuvanda ve mutindu mosi ti bantu yina ke landaka ve malongi mpi mbandu ya Yezu.
4. Bo ke sosaka kubakisa malongi ya Biblia
Bakristu ya ntete vandaka kusadila malongi ya Ndinga ya Nzambi
Bantu yonso ve ya ke tubaka nde bo kele Bakristu ke sadilaka malongi ya Biblia. Beno tala VIDEO mpi na nima beno pesa mvutu na ngiufula ya ke landa.
Inki mutindu mabundu yina ke kudibingaka nde Bakristu kangaka bantu nzila ya kulonguka mambu yina Yezu longaka?
Yezu longaka malongi yina vandaka kukatuka na Ndinga ya Nzambi. Beno tanga Yoane 18:37 mpi na nima beno pesa mvutu na ngiufula yai:
Mutindu Yezu monisaka yo, nki mutindu beto ke zabaka Bakristu yina kele “na lweka ya kieleka”?
5. Bo ke longaka malongi ya Biblia
Bakristu ya ntete vandaka kulonga bantu ya nkaka
Na ntwala nde Yezu kukwenda na zulu, yandi pesaka balongoki na yandi kisalu mosi yina ke landa kusalama tii bubu yai. Beno tanga Matayo 28:19, 20 mpi Bisalu 1:8. Na nima beno pesa mvutu na ngiufula yai:
Tii nki ntangu mpi tii na nki kisika yo ta lomba kulonga nsangu ya mbote?
6. Bo ke sadilaka mambu ya bo ke longaka
Inki ndimisaka bakala mosi na zina ya Tom nde yandi zwaka dibundu ya kieleka? Beno tala VIDEO mpi na nima beno pesa mvutu na bangiufula ya ke landa.
Mutindu video me monisa yo, nki pusaka Tom na kubika mambu ya dibundu?
Inki ke ndimisaka yandi nde yandi me zwaka dibundu ya kieleka?
Mambu ya beto ke salaka ke vandaka mfunu mingi kuluta mambu yina beto ke tubaka. Beno tanga Matayo 7:21 mpi na nima beno pesa mvutu na ngiufula yai:
Inki ke vandaka mfunu mingi sambu na Yezu: Keti yo kele mambu ya beto ke longaka to mambu ya beto ke salaka?
7. Bo ke zolanaka
Bakristu ya ntete vandaka kuzolana
Keti Bakristu ya kieleka ke tulaka mpenza luzingu na bo na kigonsa sambu na bampangi na bo Bakristu? Beno tala VIDEO mpi na nima beno pesa mvutu na bangiufula ya ke landa.
Mutindu video me monisa yo, nki pusaka mpangi Lloyd na kutula luzingu na yandi na kigonsa sambu na mpangi Johansson?
Nge ke ndima nde mambu yina yandi salaka ke monisa nde yandi kele Mukristu ya kieleka?
Beno tanga Yoane 13:34, 35 mpi na nima beno pesa mvutu na bangiufula yai:
Inki mutindu balongoki ya Yezu (to Bakristu ya kieleka) ke sadilaka bantu yina kele ve mpusu mosi ya nitu ti bo to insi mosi ti bo mambu?
Na ntangu ya bitumba, zola ke pusaka Bakristu na kusala nki?
BANTU YA NKAKA KE TUBAKA NDE: “Nzambi ke ndimaka mabundu yonso.”
Inki verse ya Biblia nge lenda tangila bo sambu na kumonisa mutindu beto lenda zaba Bakristu ya kieleka?
NA BUNKUFI
Bakristu ya kieleka ke zitisaka malongi ya Biblia, ke monisilanaka zola ya kieleka mpi ke longaka malongi ya Biblia.
Inki Nge Me Simba?
Malongi ya Bakristu ya kieleka ke katukaka na wapi?
Inki kikalulu ke sadisaka bantu na kuzaba Bakristu ya kieleka?
Inki kisalu Bakristu ya kieleka ke salaka?
TALA MPI
Tala mutindu kimvuka mosi ya bantu ke salaka bikesa ya kulanda malongi mpi mbandu ya Yezu Kristu.
Tala mambu yina sadisaka nkento mosi ya vandaka ntete masere na kuzwa “dibuta ya bampangi ya ntoto ya mvimba.”
“Bo Sadilaka Biblia Sambu na Kupesa Mvutu na Konso Ngiufula!” (Nzozulu ya Nkengi, Aprili 1, 2014)
Tala mutindu Bakristu ya kieleka ke monisilaka bampangi na bo Bakristu zola ntangu bo ke vandaka na mfunu ya lusadisu.
Beto Ke Sadisaka Bampangi na Beto Ntangu Bampasi Ke Bwilaka Bo—Kitini na Yo (3:57)
Tala mutindu Bakristu ya kieleka bubu yai, ke landaka mbandu ya Bakristu ya ntete mpi ke salaka mambu yina ke sadisaka bantu na kuzaba balongoki ya Yezu.
“Inki Kele Bidimbu ya Dibundu ya Kyeleka?” (Nzozulu ya Nkengi, Aprili 1, 2012)