Bangyufula Ya Batangi

Na sansa ya kyeleka, keti luswaswanu kele na kati ya bangogo ya Biblia “mameme ya nkaka” ti “kibuka ya nene”?

Ee, ata nkutu mfunu kele ve ya kulutisa ndilu na nsadilu ya bangogo yango, to ya kuwa makasi kana mbala ya nkaka, muntu mesadila ngogo mosi na kisika ya yina ya nkaka.

Bakristu mingi meyikamaka ti mikapu ya kele ti bangogo yai. Mosi na yau kele na Yoane 10:​16, NW. Kuna, Yezu ketuba nde: “Mono kele ti mameme ya nkaka, yina kele ve ya lupangu yai; bayina mpi, mono fwete kukotisa bau, mpi bau tawa ndinga na mono, mpi bau takituka kibuka kaka mosi, ngungudi mosi kaka.” Ntubilu ya nkaka, “kibuka ya nene,” kele na Kusonga 7:⁠9. Beto ketanga nde: “Na nima mono talaka diaka, ebuna mono monaka [kibuka ya nene, NW] ya bantu; ata muntu mosi ve lungaka kutanga bantu yina yonso. Bantu yina vandaka ya makanda yonso ti ya bandinga yonso ti ya bansi yonso. Bo me telama na ntwala ya kiti ya kimfumu ti na ntwala ya Mwana-dimeme. Bo me lwata bamvwela ya mpembe, na diboko ya konso muntu vandaka na mandala ya diba.”

Beto tadila ntete Yoane 10:16. Mameme kele banani? Yau tavanda mbote na kuyibuka nde balongoki ya kwikama ya Yezu yonso kebingama mameme. Na Luka 12:​32, yandi bingaka balongoki na yandi ya kele ti kivuvu ya kuzinga na zulu “kibuka ya fyoti.” Kibuka ya inki? Ya mameme. “Mameme” ya “kibuka ya fyoti” tavanda Bamfumu na zulu. Kansi, kele ti bantu ya nkaka yina kele ti makwisa ya kuswaswana, mpi Yezu ketadila bau bonso mameme.

Beto lenda kumona yau na Yoane kapu 10. Na nima ya kutubila mameme, mu mbandu bantumwa na yandi, ya yandi bingaka sambu na kuzinga na zulu, Yezu yikaka na mvese 16 nde: “Mono kele ti mameme ya nkaka, yina kele ve ya lupangu yai; bayina mpi, mono fwete kukotisa bau.” Bambangi ya Yehowa mebakisaka tuka ntama nde na mvese yai Yezu vandaka kutubila bantu yina kele ti kivuvu ya kuzinga na ntoto. Yau vandaka dyambu ya bakwikami mingi ya bantangu ya ntwala ya bukristu, bonso Abrahami, Sara, Noa mpi Malashi vandaka kutudila ntima. Beto kekotisa bau na kikuma na kati ya “mameme ya nkaka” ya Yoane 10:16. Na ntangu ya Luyalu ya mvula funda mosi, bambangi ya kwikama yina ya ntwala ya bukristu tafutumuka, bau talonguka kuzaba Yezu Kristu kele nani mpi tandima yandi, mpi bau takuma “mameme ya nkaka” ya Ngungudi ya Mbote.

Beto kezaba mpi nde yantika lubokilu ya kimvuka ya ba 144000 kusukaka, mafuku ya bantu mekumaka bakristu ya kyeleka. Bau mpi kebingama ti kikuma “mameme ya nkaka,” sambu bau kele ve na kati ya “kibuka ya fyoti.” Kansi, mameme ya nkaka bubu yai, kekinga ti ntima na zulu zulu na kuzinga na kati ya Paladisu na ntoto.

Ntangu yai, inki beto lenda kutuba sambu na yina metala “kibuka ya nene” ya metubilama na Kusonga 7:9? Sambu na yau, kana beto kutadila mvese 13 ti ngyufula yina meyulama: “Bau kele banani mpi bau mekatuka wapi?” Beto kemona mvutu na Kusonga 7:14: “Ikele bayina mekatuka na mpasi ya nene.” Yau yina, “kibuka ya nene” mesalama na bayina mesabuka to meguluka na mpasi ya nene. Bonso mvese 17 ketuba yau, bau ‘tatwadisama na banto ya masa ya luzingu,’ na ntoto.

Kansi beno kebakisa nde, sambu bau guluka na mpasi ya nene ya mefinama, bau fwete kuyobisa ntete bamvwela na bau ya nda na kati ya menga ya Mwana ya Dimeme, na kukumaka bansambidi ya kyeleka. Yau yina, ata Kusonga 7:9 ketendula kibuka yina na nima ya mpasi, beto lenda kusadila ngogo “kibuka ya nene” na bayina yonso kele ti kivuvu ya kuzinga na zulu ya ntoto, mpi kesala kisalu ya busantu bubu yai, na ntwala mpasi ya nene kuyantika ti ndwanisa ya makanda na zulu ya lusambu ya luvunu.

Na bunkufi, beto lenda kutuba nde ngogo “mameme ya nkaka” kele ti nsansa ya kuluta nene: yau kevukisa bansadi yonso ya Nzambi yina kele ti kivuvu ya kuzinga mvula na mvula na ntoto. Na kati, yau kele ti kalasi mosi ya fyoti ya bantu yina mefwanana na mameme yina kele na kuvukisama na “kibuka ya nene” yina kele ti kivuvu ya kuguluka na mpasi ya nene. Bamingi na kati ya Bakristu ya kyeleka yina ya kezinga bubu yai, kele na kati ya mameme ya nkaka mpi ya kibuka ya nene.

Kansi, yau kele mfunu na kuvutukila nde, kana yau kele mbote na kuzaba bantendula yai ya bunda, yau kele kibeni mfunu ve na Mukristu kulutisa nzikisa ya bangogo yina​—⁠nkadilu ya lenda kubingama kufimpa bangogo. Polo kukebisaka bankaka ya vandaka ya “kufuluka na lulendo” ya vandaka kukota na “mazonza ya bangogo.” (1 Timoteo 6:​4, NW) Kana beto mosi kesala luswaswanu ya bangogo, yau kele mbote. Kansi, yau kuvanda na kubasisa yau to na kuyindula yau, yau kele mfunu ve na kusambisa muntu ya nkaka ya lenda kuvanda kesadilaka ve bangogo ya Biblia na sansa ya kyeleka.