“Beno Vanda Bambeni ya Satana” Mutindu Yezu Kuvandaka

“Beno vanda bambeni ya Satana, ebuna yandi ta tina beno, yandi ta kwenda ntama.”​—YAK. 4:7.

 1. Inki kimbeni Yezu kuzabaka nde yandi takutana na yo na ntoto, mpi yo zolaka kusuka inki mutindu?

¹ YEZU KRISTU kuzabaka nde yandi takutana ti kimbeni ya Dyabulu. Dyambu yai kumonanaka pwelele na mambu yina Nzambi tubilaka nyoka, disongidila mpeve ya mbi yina kukolamaka mpi kutubaka na nzila na yo, nde: “Mono tatula kimbeni na kati na nge ti nkento [kitini ya zulu ya organizasio ya Yehowa] mpi na kati ya nkuna na nge ti nkuna na yandi. Yandi [Yezu Kristu] tatatika nge na ntu, ebuna nge tatatika yandi na kisingini.” (Kuy. 3:14, 15, NW; Kus. 12:9) Kutatika yina nyoka zolaka kutatika Yezu na kisingini ketendula nde yandi zolaka kumona mpasi kaka mwa ntangu fyoti na mutindu bo zolaka kufwa yandi na ntangu yandi tavanda na ntoto, sambu na nima Yehowa zolaka kufutumuna yandi sambu na kubaka lukumu na zulu. Kansi kutatika yina Yezu zolaka kutatika nyoka na ntu ketendula nde Satana tafwa lufwa mosi ya kimakulu.​—Tanga Bisalu 2:31, 32; Baebreo 2:14.

 2. Sambu na nki Yehowa kutulaka ntima nde Yezu takuka kuvanda mbeni ya Dyabulu?

² Yehowa vandaka kutula ntima nde Yezu takuka kulungisa kisalu na yandi mpi kuvanda mbeni ya Dyabulu na ntangu yandi tavanda na ntoto. Sambu na nki Yehowa kutulaka ntima nde Yezu takuka kusala yo? Sambu yandi gangaka Yezu na zulu bamvula mingi na ntwala, yandi talaka yandi, mpi yandi zabaka nde “kapita [yai] ya kisalu” mpi mwana ya ntete ya “bima yonso ya Nzambi salaka” vandaka bulemfu mpi ya kwikama. (Bing. 8:22-31; Kol. 1:15) Yo yina ntangu yandi tindaka Yezu na ntoto mpi kupesaka Satana nswa ya kumeka yandi tii na lufwa, Nzambi kutulaka ntima nde Mwana na yandi mosi kaka ya kubutukaka tanunga.​—Yoa. 3:16.

Yehowa Ketaninaka Bansadi na Yandi

 3. Inki kevandaka nkadilu ya Satana na ntwala ya bansadi ya Yehowa?

³ Yezu kubingaka Dyabulu nde “mfumu ya nsi-ntoto yai” mpi kukebisaka balongoki na Yandi nde bo tamonisa bo mpasi mutindu bo monisaka yandi. (Yoa. 12:31; 15:20) Nsi-ntoto, ya kele na maboko ya Satana Dyabulu, kemengaka Bakristu ya kyeleka sambu bo kesadilaka Yehowa mpi kele bansamuni ya lunungu. (Mat. 24:9; 1 Yoa. 5:19) Dyabulu kenongaka mingimingi bapakulami yina mebikalaka yina tayala ti Kristu na Kimfumu na yandi ya zulu. Satana kenongaka mpi Bambangi mingi ya Yehowa yina kele ti kivuvu ya kuzinga kimakulu na paladisu ya ntoto. Ndinga ya Nzambi kekebisa beto nde: “Mbeni na beno Satana ke kwendaka kuzieta bonso ntambu yina ke dila; yandi ke sosa muntu ya kudia.”​—1 Pie. 5:8.

 4. Inki kemonisa nde bantu ya Nzambi menungaka na kuvanda bambeni ya Dyabulu na bilumbu na beto?

⁴ Bonso organizasio yina kebakaka lusadisu ya Yehowa Nzambi, beto kenungaka na kuvanda bambeni ya Dyabulu. Beto tadila mambu yai: Na bamvula 100 yina mekatuka kuluta, baluyalu yankaka ya kuluta nku ya badiktatere kusalaka na mpila nde Bambangi ya Yehowa kuvanda dyaka ve. Kansi ntalu ya Bambangi kelanda na kukuma mingi mpi yo mekuma ntangu yai penepene ya 7 000 000 na mabundu kuluta 100 000 na nsi-ntoto ya mvimba. Kansi bantu yina kele dyaka ve na luzingu kele badiktatere ya nku yina kunyokulaka bantu ya Yehowa!

 5. Inki mutindu Yezaya 54:17 melunganaka na bansadi ya Yehowa?

⁵ Ntangu yandi tubilaka dibundu ya Izraele ya ntama bonso nkento na yandi, Nzambi kusilaka nde: “Batolotolo ya bo ta sala sambu na kufwa nge; yo ta sala nge kima ve; kiteso mosi, konso muntu yina ta zola kufunda nge, nge ta bedisa yandi. ‘Mutindu yo yai mono Mfumu Nzambi ke talaka bantu na mono, mutindu yo yai mono ke nungisaka bo.’” (Yez. 54:11, 17) Lusilu yai melunganaka na bantu ya Yehowa na ntoto ya mvimba na nsungi yai ya “bilumbu ya nsuka.” (2 Tim. 3:1-5, 13) Beto kelanda na kuvanda bambeni ya Dyabulu, mpi ata tolotolo mosi ve yina yandi kemeka kusadila sambu na kumanisa bantu ya Nzambi tanunga, sambu Yehowa kele na lweka na beto.​—Nk. 118:6, 7.

 6. Mbikudulu ya Daniele kesonga beto inki na yina metala mambu yina tabwila luyalu ya Dyabulu na bilumbu kekwisa?

⁶ Na nsuka ya ngidika ya bima yai yonso ya mbi ya kekwisa nswalu, Yezu tafwa mitindu yonso ya luyalu ya Satana kimakulu. Ntangu yandi sonikaka na ngolo ya mpeve ya Nzambi, profete Daniele kubikulaka nde: “Ntangu ya bantotila yina [ya kele na ntangu na beto] ta yala, Nzambi ya zulu ta tula [na zulu] ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso [yina keyala ntangu yai] ebuna yandi ta yalaka tii kuna.” (Dan. 2:44) Ntangu mambu yai talungana, luyalu ya Satana mpi ya bantu ya kukonda kukuka tavanda dyaka ve. Bima yonso ya kesala ngidika ya bima ya Dyabulu tafwa kimakulu, mpi Kimfumu ya Nzambi tayala kukonda kimbeni na ntoto ya mvimba.​—Tanga 2 Piere 3:7, 13.

 7. Inki mutindu beto kezaba nde konso nsadi ya Yehowa lenda nunga na kuvanda mbeni ya Dyabulu?

⁷ Ntembe kele ve ata fyoti nde Yehowa tatanina organizasio na yandi mpi yo takwenda na ntwala na kimpeve. (Tanga Nkunga 125:1, 2.) Ebuna beto? Biblia kesonga beto nde beto lenda nunga na kuvanda bambeni ya Dyabulu, mutindu Yezu kuvandaka. Ya kyeleka, mbikudulu yina Kristu kupesaka na nzila ya ntumwa Yoane kemonisa nde ata bo kekutana ti kimbeni ya Satana, kibuka ya nene ya bantu yina kele ti kivuvu ya kuzinga na ntoto taguluka na nsuka ya ngidika yai. Na kutadila Masonuku, bo keboka nde: “Nzambi na beto yina me vanda na kiti ya kimfumu, ti Mwana-dimeme [Yezu Kristu], bo bantu ke gulusaka beto.” (Kus. 7:9-14) Biblia ketuba nde bapakulami kenunga Satana, mpi banduku na bo, “mameme ya nkaka,” kenunga mpi na kuvanda bambeni na yandi. (Yoa. 10:16; Kus. 12:10, 11) Kansi yo kelomba kikesa mingi mpi kusamba na masonga yonso sambu Nzambi ‘kukatula beto na maboko ya muntu ya mbi.’​—Mat. 6:13.

Mbandu ya Kukuka na Yina Metala Kuvanda Mbeni ya Dyabulu

 8. Inki kuvandaka mpukumuna ya ntete ya bo mesonikaka yina Dyabulu kusadilaka sambu na kukusa Yezu na ntoto ya zelo na zelo, mpi inki mvutu Kristu kupesaka?

⁸ Dyabulu kusosaka kufwa kwikama ya Yezu. Na ntoto ya zelo na zelo, Satana kusadilaka bampukumuna sambu na kunata Yezu na kulemfukila dyaka ve Yehowa. Kansi, Yezu kupesaka mbandu ya kukuka na yina metala kuvanda mbeni ya Satana. Na nima ya kusala kibansa bilumbu 40 mpi mpimpa 40, yo fwete vanda nde Yezu vandaka ti mpusa ya ngolo ya kudya. Satana kutubaka nde: “Kana nge kele Mwana-Nzambi, tuba na matadi yai, yo kuma mampa.” Kansi Yezu kubuyaka na kusadila ngolo yina Nzambi kupesaka yandi sambu na mambote na yandi mosi. Yo yina, Yezu tubaka nde: “Bo sonikaka na Mukanda ya Nzambi nde: ‘Muntu ke zingaka kaka ve sambu na mampa ya yandi ke diaka, kansi yandi ke zingaka mpi sambu na mambu yina yonso ya Nzambi ke tubaka.’”​—Mat. 4:1-4; Kul. 8:3.

 9. Sambu na nki beto fwete nwana ti bampukumuna ya Dyabulu ya kumeka kusadila bampusa na beto ya kinsuni ya kubutukila?

⁹ Bubu yai, Dyabulu kesosaka kusadila bampusa ya kinsuni ya kubutukila ya bansadi ya Yehowa. Yo yina beto fwete vanda ti lukanu ya kunwana ti bampukumuna ya kuvukisa nitu, yina mepanzanaka mingi na nsi-ntoto yai ya mansoni. Ndinga ya Nzambi ketuba pwelele nde: “Keti beno zaba ve nde bantu ya mbi ta vanda bantu ya Kimfumu ya Nzambi ve? Beno kudikusa ve; bantu yina ke salaka pite na bantu yina me kwelaka to na bayina me kwelaka ve, bantu yina ke sambaka banzambi ya biteki, babakala yina ke ladisaka babakala ya nkaka . . . ata muntu mosi ve na kati ya bantu yina ta vanda muntu ya Kimfumu ya Nzambi.” (1 Kor. 6:9, 10) Yo kele pwelele nde bantu yina kezingaka luzingu ya mansoni mpi kebuyaka na kubalula ntima tavanda ve ti nswa ya kuzinga na ntoto ya mpa ya Nzambi.

10. Na kulandaka mambu yina Matayo 4:5, 6 ketuba, inki mpukumuna yankaka Satana kusadilaka sambu na kumeka kufwa kwikama ya Yezu?

¹⁰ Na yina metala mosi na kati ya bampukumuna yina Yezu kukutanaka ti yo na ntoto ya zelo na zelo, Masonuku ketuba nde: “Satana nataka Yesu na Yerusalemi, bwala ya santu, yandi tulaka yandi na zulu ya ludi ya Nzo-Nzambi ya Bayuda, ebuna yandi nde: ‘Kana nge kele Mwana-Nzambi, nge kudilosa na ntoto. Sambu bo sonikaka na Mukanda ya Nzambi nde: “Nzambi ta songa bawanzio na yandi nki bo ta sala sambu na nge: Bo ta nata nge na maboko na bo, Mpidina dikulu na nge ta tutana ve na ditadi.”” (Mat. 4:5, 6) Satana vandaka kuzola kutuba nde yo zolaka kumonisa na mutindu mosi ya kuyituka nde Yezu kele Mesia. Kansi na kutuba ya masonga, yo zolaka kuvanda dyambu mosi ya mbi, ya lulendo yina Nzambi zolaka kundima ve mpi kupesa ve maboko. Dyaka, Yezu kutaninaka kwikama na yandi na Yehowa mpi kusadilaka verse ya Biblia sambu na kupesa mvutu. Yandi tubaka nde: “Bo sonikaka mpi na Mukanda ya Nzambi nde: ‘Kumeka Mfumu Nzambi na nge ve.’”​—Mat. 4:7; Kul. 6:16.

11. Inki mutindu Satana lenda pukumuna beto, mpi inki mambu yo lenda basisa?

¹¹ Satana lenda pukumuna beto na kusosa lukumu na mitindu mingi. Yandi lenda sosa kupusa beto na kulanda mitindu ya kulwata ti ya kuyidika nitu ya ntoto yai to na kusala bansaka ya kele mbote ve. Kansi kana beto zitisa ve bandongisila ya Biblia mpi kulanda nsi-ntoto, keti beto lenda vingila nde bawanzyo kutanina beto na malanda ya mbi ya nzila ya mutindu yina? Ata Ntotila Davidi kubalulaka ntima na masumu na yandi ti Batsheba, Nzambi kutaninaka yandi ve na malanda ya bisalu na yandi. (2 Sam. 12:9-12) Bika nde beto meka ve Yehowa na mutindu ya mbi, mbala yankaka na kuyedisaka kinduku ti nsi-ntoto.​—Tanga Yakobo 4:4; 1 Yoane 2:15-17.

12. Inki mpukumuna Matayo 4:8, 9 ketubila, mpi inki mvutu Mwana ya Nzambi kupesaka?

¹² Mpukumuna yankaka dyaka ya Dyabulu kusadilaka na ntoto ya zelo na zelo ketadila kiyeka ya politiki yina yandi zolaka kupesa Yezu. Satana songaka Yezu bimfumu yonso ya nsi-ntoto ti lukumu na yo mpi yandi tubaka nde: “Yai yonso ya nge ke mona, mono ta pesa nge yo kana nge fukama sambu na kusamba mono.” (Mat. 4:8, 9) Yo vandaka dyambu mosi ya mbi kibeni na kusosa kubaka lusambu yina Yehowa mpamba kele na nswa ya kubaka mpi kupusa Yezu na kudimonisa muntu ya kukonda kwikama na Nzambi! Na kuyedisaka mpusa ya kubaka lusambu ya bantu, wanzyo yina kuvandaka ntete ya kwikama kukumaka Satana Dyabulu, mpukumuni ya masumu, ya bwimi, mpi ya mbi kibeni. (Yak. 1:14, 15) Kansi na kuswaswana ti yandi, Yezu vandaka na lukanu ya kubikala ya kwikama na Tata na yandi ya zulu, yo yina yandi tubaka nde: “Katuka, Satana! Sambu bo sonikaka na Mukanda ya Nzambi nde: ‘Nge fweti samba Mfumu Nzambi, Nzambi na nge. Kaka yandi mpamba nge fweti samba.’” (Beto bantu metengimisa bisono.) Na mutindu yina, Yezu kumonisaka dyaka na mutindu ya pwelele mpi ya ngolo nde yandi kele mbeni ya Dyabulu. Mwana ya Nzambi kuzolaka ve ata kima mosi ya nsi-ntoto ya Satana mpi yandi lendaka ve ata fyoti kusambila muntu ya mbi!​—Mat. 4:10; Kul. 6:13; 10:20.

“Beno Vanda Bambeni ya Satana, Ebuna Yandi Ta Tina Beno”

13, 14. (a) Na kumonisaka Yezu bimfumu yonso ya nsi-ntoto, inki Dyabulu vandaka kupesa yandi? (b) Inki mutindu Satana kemekaka kubebisa beto?

¹³ Na kumonisaka Yezu bimfumu yonso ya nsi-ntoto, Dyabulu vandaka kupesa yandi kiyeka yina ata muntu mosi ve mevandaka na yo ntete. Satana kutulaka ntima nde mambu ya Yezu kumonaka zolaka kusepidisa yandi mpi kundimisa yandi nde yandi lendaka kukuma ntwadisi ya politiki ya kuluta nene na ntoto. Bubu yai, Dyabulu kepesaka beto ve bimfumu, kansi yandi kemekaka kubebisa bantima na beto na mambu ya beto kemonaka, kewaka mpi keyindulaka.

¹⁴ Dyabulu muntu keyalaka nsi-ntoto yai. Yandi keyalaka mpi bima yina kemwangaka bansangu. Yo yina, mpila ya kuyituka kele ve nde bima yina nsi-ntoto kebasisaka sambu na kutala, kuwidikila mpi kutanga mefuluka ti mansoni mpi nku. Bakompani ya nsi-ntoto ya kesalaka bapiblisite kesosaka kupusa beto na kukuma ti mpusa mingi ya kusumba bima ya beto kele ti yo ve mfunu. Na banzila ya mutindu yai, Dyabulu kepukumunaka beto ntangu yonso ti nzala ya bima ya kinsuni yina lenda sepidisa meso, makutu, mpi mabanza. Kansi ntangu beto kebuyaka kutala, kuwidikila mpi kutanga mambu yina ya Masonuku kebuya, beto ketubaka na mukyeleka nde: “Katuka, Satana!” Na mutindu yina beto kelandaka mbandu ya Yezu mpi kebuyaka ti ngolo yonso nsi-ntoto ya mvindu ya Satana. Beto kemonisaka mpi nde beto kele ve bantu ya nsi-ntoto ya Satana na mpila beto kemonisaka na kikesa yonso nde beto kele Bambangi ya Yehowa mpi balongoki ya Kristu na kisalu, na nzo-nkanda, na kisika ya beto kezingaka, mpi na kati ya dibuta na beto.​—Tanga Marko 8:38.

15. Sambu na nki kuvanda bambeni ya Satana ketendula kubikala meso ya kukangula ntangu yonso?

¹⁵ Ntangu yandi nungaka ve na mbala ya tatu na kupukumuna Yezu na kufwa kwikama na yandi na Nzambi, “Satana bikaka yandi.” (Mat. 4:11) Kansi, ngindu ya Satana kuvandaka ve ya kuyambula na kumeka Yezu, sambu Biblia ketubila beto nde: “Ntangu Satana manisaka na kumeka yandi [na ntoto ya zelo na zelo] na banzila ya mutindu na mutindu, yandi bikisaka yandi fioti.” (Luka 4:13) Kana beto nunga na kuvanda bambeni ya Dyabulu, beto fwete pesa Yehowa mersi. Kansi beto fwete landa mpi na kusosa lusadisu ya Nzambi, sambu Dyabulu takwisa kumeka beto dyaka na ntangu yankaka yina tavanda ya mbote sambu na yandi​—kansi yo lenda vanda kaka ve na ntangu yina beto kevingila nde yandi lenda kwisa kumeka beto. Yo yina beto fwete bikala meso ya kukangula ntangu yonso mpi kuvanda ya kuyilama na kusadila Yehowa kisalu ya santu ata beto kutana ti inki mpukumuna yina.

16. Inki ngolo Yehowa kepesaka beto, mpi sambu na nki beto fwete samba sambu na kubaka yo?

¹⁶ Sambu na kusadisa beto na kikesa na beto ya kuvanda bambeni ya Dyabulu, beto fwete samba sambu na kubaka mpeve santu ya Nzambi, yina kele ngolo ya meluta bangolo yonso na luyalanganu. Yo tasadisa beto na kusala mambu yina beto lenda kuka ve kusala na ngolo na beto mosi. Yezu kundimisaka balongoki na yandi nde bo lenda baka mpeve ya Nzambi ntangu yandi tubaka nde: “Beno bantu [ya kukonda kukuka mpi] ya mbi, kana beno zaba kupesa makabu ya mbote na bana na beno, zaba nde Tata yina kele na zulu ta pesa mpenza Mpeve na yandi na bantu yina ke lombaka yandi Mpeve!” (Luka 11:13) Bika beto landa na kusamba Yehowa sambu yandi pesa beto mpeve santu na yandi. Sambu ngolo yai ya kuluta nene kesadisaka beto na lukanu na beto ya kuvanda bambeni ya Dyabulu, beto takuka na kununga. Katula kusamba na masonga yonso mpi mbala na mbala, beto fwete lwata binwaninu yonso ya kimpeve ya kekatuka na Nzambi sambu ‘mayele ya Satana kubedisa beto ve.’​—Ef. 6:11-18.

17. Inki kyese kusadisaka Yezu na kuvanda mbeni ya Dyabulu?

¹⁷ Kele ti kima yankaka ya kusadisaka Yezu na kuvanda mbeni ya Dyabulu, ebuna yo lenda sadisa beto mpi. Biblia ketuba nde: “[Yezu] kangaka ntima ntangu bo fwaka yandi na zulu ya [nti ya mpasi, NW]. Yandi monaka nsoni ve na kufwa lufwa ya mutindu yina, sambu yandi vandaka kutala kaka kiese yina vandaka kuvingila yandi. Ebuna ntangu yai, yandi me vanda na diboko ya kibakala ya kiti ya kimfumu ya Nzambi.” (Baeb. 12:2) Beto lenda baka kyese ya mutindu mosi kana beto kenwanina kimfumu ya Yehowa, kepesa lukumu na zina na yandi ya santu, mpi kelanda na kutala lufutu ya luzingu ya mvula na mvula yina kevingila beto. Beto tavanda na kyese mingi mpenza ntangu Satana mpi bisalu na yandi yonso tavanda dyaka ve kimakulu mpi “bantu yina ke kudikulumusaka, bo ta zinga mbote na ngemba mpenza na ntoto”! (Nk. 37:11) Yo yina, beto landa na kuvanda bambeni ya Satana mutindu Yezu kuvandaka.​—Tanga Yakobo 4:7, 8.

Inki Mvutu Nge Tapesa?

• Inki nzikisa kendimisa beto nde Yehowa ketaninaka bantu na yandi?

• Inki mutindu Yezu kupesaka mbandu na yina metala kuvanda mbeni ya Satana?

• Na nki mitindu beto lenda vanda bambeni ya Dyabulu?

[Kifwanisu ya kele na lutiti 30]

Kinduku ti nsi-ntoto kekumisaka beto bambeni ya Nzambi

[Kifwanisu ya kele na lutiti 32]

Yezu kubuyaka ntangu Satana kupesaka yandi bimfumu yonso ya nsi-ntoto