Bo Kewaka Dyaka Ve Nsuka Boma

NA NSUKA ya bamvu 1970, Gary ti Karen kundimaka nde nsuka ya ntoto kufinamaka. Yo yina bo katukaka na mbanza mpi kukwendaka na bwala mpi bo bakaka lukanu ya kusala bo mosi mpenza bima yina bo vandaka ti yo mfunu. Bo vandaka ti mpusa ya kuguluka.

Sambu na kuzwa mayele yina bo zolaka kuvanda na yo mfunu, bo sumbaka babuku, kukotaka banzo-nkanda ti baseminere mpi kuzabisaka yo na bantu mingi. Bo salaka masamba mpi kukunaka banti ya nkufi 50 ya kebutaka bambuma. Bo bumbaka bankeni mpi bisadilu. Bo longukaka na kuyedisa bimenina mpi kubumba madya. Nduku mosi kulongaka bo mutindu ya kufwa bambisi, kuzenga misuni na yo, mpi kuyanga yo. Karen kulongukaka na kuswasisa banti mpi misisa na mfinda sambu bo kuka kudya yo kana madya ya bo tabumba kumana. Gary kulongukaka mutindu ya kusala esanse na nsadisa ya masangu, ya kusala dituka ya kibende, mpi kutunga nzo ya zolaka kuvanda ve ti mfunu ya bima yina kukatukaka na bisika yankaka.

Karen ketuba nde: “Sambu na mambu ya mbi mpenza yina vandaka kusalama na nsi-ntoto na ntangu yina, mu vandaka kuyindula nde kubika fyoti luzingu ya bantu tasuka.” Gary ketendula nde: “Bonso baleke yankaka, mu vandaka kusala ngolo sambu na kutula nsuka na kimbeni sambu na bantu ya mpusu ya nitu yankaka, na Bitumba ya Vietnam, mpi na kukonda masonga. Kansi, mu bakisaka nswalu nde mu vandaka kudikusa. Mu vandaka kumona bonso nde bantu bo mosi vandaka kuditula na nzila ya lufwa.”

Gary ketuba nde: “Na mpimpa mosi, mu vandaka ti mwa ntangu ebuna mu bakaka Biblia mpi kutangaka banda na Matayo tii na Kusonga. Na nima ya bampimpa iya ya kulandaka, mu tangaka yo dyaka. Na suka ya kilumbu ya tanu, mu songaka Karen nde: ‘Beto kezinga na bilumbu ya nsuka. Kubika fyoti, Nzambi tasala mambu sambu na kutula bunkete na ntoto. Beto fwete sosa bantu yina taguluka.’” Gary ti Karen yantikaka kukwenda na dibundu mosi na nima yankaka sambu na kusosa bantu yina kuvandaka ti mpusa ya kuyilama sambu na nsuka.

Ntama mingi ve, Mbangi mosi ya Yehowa kukokulaka na kyelo na bo, mpi bo yantikaka kulonguka Biblia. Karen keyibuka nde: “Mu vandaka na kyese kibeni, sambu bo vandaka kutendudila munu mpenza Masonuku. Mu vandaka kusosa kyeleka ya metala ntangu ya nsuka, mpi nsukansuka mu zwaka yo. Yo vandaka ti kivuvu mosi ya kyeleka sambu na makwisa. Kansi, dyambu ya kuluta mbote, mu yantikaka kusala bangwisana ti Tata na munu ya zulu, Ngangi mpi Nzambi ya luyalanganu.”

Gary ketuba nde: “Luzingu na munu kubakaka ntendula ya kyeleka. Ntangu mu yantikaka kulonguka Biblia, mu lendaka kuyambula ve. Mu tangaka bambikudulu ya Biblia, kufimpaka banzikisa ya vandaka kumonisa nde yo vandaka kulungana, mpi kumaka kundima nde kubika fyoti Nzambi tasala mambu. Mu yindulaka nde, ‘Bantu fwete kudibongisa, sambu na mambu ya mpasi ve, kansi sambu na luzingu yina Nzambi kezola sambu na beto.’” Gary ti Karen kukumaka ti mutindu ya mbote ya kutadila makwisa. Na kisika ya kudiyangisa sambu na nsuka ya ntoto, bo kumaka kutula ntima nde Nzambi takatula mambu ya kepesaka bantu mpasi mpi tavutula ntoto paladisu.

Inki Gary ti Karen ke na kusala ntangu yai, bamvula kiteso ya 25 na nima? Karen ketuba nde: “Mu kelanda na kuyedisa zola na munu sambu na Yehowa Nzambi, kutunga lukwikilu na munu na yandi, mpi kusala ngolo sambu na kusadisa bankaka na kusala mutindu mosi. Gary ti munu kepesanaka maboko na ntangu beto kesalaka na mpila nde bangwisana ya dibuta na beto kuvanda ngolo mpi beto vanda na bumosi na lusambu ya Nzambi. Beto kesalaka ngolo sambu na kulanda na kuvanda ti manaka ya mbote mpi kusala nde mutindu na beto ya kuzinga kuvanda ya pete, na mpila nde beto kuka kutula dikebi na bankaka ti na bampusa na bo.”

Gary keyika nde: “Mu kesambaka mbala na mbala sambu Kimfumu ya Nzambi kukwisa mpi kunata ndembikilu na bamilio ya bantu. Konso ntangu ya mu kezabisaka bantu nsangu ya mbote ya Kimfumu ya Nzambi, mu kesambaka sambu mu kuka kupesa mwa kivuvu ya kekatuka na Biblia ata na muntu mosi. Na nsungi ya bamvula kuluta 25, Yehowa mepesaka mvutu na kisambu yai na zola yonso. Karen ti munu, beto kekwikilaka nde kubika fyoti Yehowa tanata bansoba ya nene na ntoto, kansi beto kewaka dyaka ve nsuka boma.”—Matayo 6:9, 10; 2 Piere 3:11, 12.

[Kifwanisu ya kele na lutiti 9]

Ntangu yai, Gary ti Karen kele na kyese ya kusadisa bankaka na kuzwa kivuvu ya kekatuka na nsangu ya Biblia