5 Nzambi Kendimaka Mabundu Yonso—Keti Yo Kele Kyeleka?

Mambu yina ziku nge mewaka: “Kaka mutindu banzila mingi kenataka kisika mosi, kele mpi ti mabundu mingi yina kenataka na Nzambi. Konso muntu fwete sola dibundu yina tanata yandi na Nzambi.”

Mambu yina Biblia kelongaka: Lusambu na beto fwete vanda ya masonga mpi beto fwete buya luvunu. Yezu kuzabisaka bamfumu ya mabundu ya bilumbu na yandi, kikuma yina Nzambi kubuyaka bo: “Yezaya tubaka mambu ya kieleka ntangu yandi tubaka na ntwala sambu na beno bantu ya luvunu, mutindu bo sonikaka na mukanda ya Nzambi nde: ‘Bantu yai ke zitisaka mono kaka na munoko, kansi na ntima ve.’” (Marko 7:6) Kansi, masonga mpamba mefwana ve sambu Nzambi kundima lusambu na beto.

Yezu kumonisaka yo pwelele ntangu yandi tubilaka, kifu ya nene yina bamfumu ya mabundu mpi bilandi na bo vandaka kusala na lusambu yina bo vandaka kupesa Nzambi. Yandi monisaka bo nde: “Bisambu yina ya bo ke sambaka mono kele ya mpamba, sambu bo ke longaka bansiku ya bantu bonso nde malongi ya Nzambi.” (Marko 7:7) Lusambu na bo kuvandaka “ya mpamba,” to ya kukonda mfunu, sambu bo vandaka kutula malongi ya binkulu na bo na ntwala ya bansiku ya Nzambi.

Na kisika ya kundima dibanza yina ketubaka nde, mabundu to banzila mingi kenataka na Nzambi, Biblia kelongaka nde nzila kele kaka mosi. Matayo 7:13, 14 ketuba nde: ‘Beno kota na kielo ya fioti. Sambu nzila ya nene kenataka bantu na lufwa, bantu mingi kekwendaka na nzila yina. Kansi kielo ti nzila yina kenataka bantu na moyo kele nkaka mpenza, bantu fioti mpamba kemonaka yo.’

Mutindu kuzaba kyeleka lenda sadisa nge: Yindula mutindu nge takudiwa kana nge mekudibongisaka mbote na nsungi ya bangonda mingi sambu na kusala nsaka ya kubaka ntinu, mpi na nima ya kusala yo nge mebasika muntu ya ntete, ebuna na nima bo mezabisa nge nde, nge kele dyaka ve muntu ya ntete sambu nge fwaka nsiku mosi kukonda kuzaba. Nge lenda kudiwa bonso nde bikesa yonso yina nge salaka kele ya mpamba. Keti dyambu ya mutindu yai lenda salama na lusambu yina beto kepesaka Nzambi?

Ntangu ntumwa Polo kufwanisaka lusambu na beto ti nsaka ya kubaka ntinu, yandi sonikaka nde: “Muntu yina ke salaka bansaka, yandi lenda nunga ve kana yandi ke landaka bansiku ya bansaka ve.” (2 Timoteo 2:5) Nzambi tandima beto kana beto kesambila yandi na ‘kulandaka bansiku,’ disongidila mutindu yandi kezolaka. Beto lenda sambila ve Nzambi na mutindu yina beto mosi mepona, kaka mutindu muntu yina kebaka ntinu tanunga ve kana yandi kesala mambu na luzolo na yandi mosi.

Sambu na kusepedisa Nzambi, lusambu na beto fwete vanda ya masonga. Yezu kutubaka nde: “Bantu ya kieleka ta sambaka Tata na ntima na bo na mabanza ya kieleka.” (Yoane 4:23) Biblia, ndinga ya Nzambi kesadisaka beto na kuzaba nzila ya kyeleka yina kenataka na Nzambi.​—Yoane 17:17.a

[Noti na nsi ya lutiti]

[Bangogo sambu na kubenda dikebi ya kele na lutiti 8]

Keti mabundu yonso kelongaka bantu na kusamba Nzambi mutindu yandi kezolaka?