Longuka na Ndinga ya Nzambi

Sambu na Nki Beto Fwete Sadila Zina ya Nzambi?

Disolo yai kepesaka bamvutu na bangyufula yina ziku nge mekudiyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

 1. Sambu na nki Nzambi mekudipesaka zina?

Ntembe kele ve nde nge kezolaka nde bantu kubinga nge na zina na nge na kisika ya kusadila batitre bonso “muntu,” “bakala,” “nkento,” to “mama.” Zina kesadisaka sambu na kuswaswanisa bantu. Bantu kebingaka Nzambi na batitre bonso “Mfumu Nzambi,” ‘Nzambi Nkwa-Ngolo Yonso’ mpi ‘Ngangi ya nene.’ (Kuyantika 15:2; 17:1; Longi 12:1, NW) Kansi, yandi mosi mekudipesaka zina sambu na kusadisa beto na kusala bangwisana ya mbote ti yandi. Na Kikongo, zina ya Nzambi kele Yehowa.​—Tanga Yezaya 42:8.

Ata bambaludi mingi ya Biblia meyingisaka zina ya Nzambi na batitre bonso “Nzambi” mpi “Mfumu,” zina yango kemonana bambala penepene ya 7 000 na maniskri ya ntama ya Kiebreo. Yo kele pwelele nde, Nzambi kezolaka nde bantu kuzaba zina na yandi.​—Tanga Yezaya 12:4.

 2. Sambu na nki kuzaba zina ya Nzambi kele mfunu?

Kuzaba zina ya Nzambi ketendula mambu mingi kuluta kuzaba mutindu ya kubinga yo. Kuzaba zina ya Nzambi ketendula kuvanda ti bangwisana ya mbote ti yandi. Zina Yehowa ketendula nde “Yandi Kekumisaka.” Yo kendimisa beto nde Nzambi lenda kuma konso kima yina yandi kezola sambu na kulungisa lukanu na yandi. Yo yina, kuzaba zina ya Nzambi ketendula kundima nde yandi talungisa balusilu na yandi. (Nkunga 9:11) Lukwikilu ya bantu yina mezaba zina ya Nzambi mpi kesadilaka yo kepusaka bo na kutudila yandi ntima mpi kutula yandi na kisika ya ntete na luzingu na bo. Yehowa Nzambi tatanina bantu na yandi na mutindu yina.​—Nkunga 91:14.

 3. Sambu na nki Nzambi kezolaka nde bantu kuzaba zina na yandi?

Nzambi kezolaka nde bantu kuzaba zina na yandi sambu yo kenatilaka bo mambote. Yo kesadisaka bo na kukuma banduku na yandi mpi kuvanda ti kivuvu ya kuzinga mvula na mvula. Yo yina, Yehowa kezola nde beto zabisa bantu zina na yandi!​—Tanga Yoane 17:3; Roma 10:13, 14.

Yezu zabisaka bantu zina ya Nzambi ntangu yandi vandaka kulonga bo mambu ya Nzambi, bansiku na yandi mpi balusilu na yandi. Bubu yai, Balongoki ya Yezu kelanda kusala kisalu ya kuzabisa zina ya Nzambi na bantu ya makanda yonso. Bo kesala yo na bumosi sambu bo kele ‘bantu yina kenataka zina ya Nzambi.’​—Tanga Bisalu 15:14; Yoane 17:26.

 4. Inki mutindu Nzambi tasantisa zina na yandi?

Yehowa Nzambi kezolaka kusantisa zina na yandi sambu bantu bebisaka yo. Mu mbandu, bantu yankaka ketubaka nde yandi megangaka ve luzingu yo yina yo mefwana ve nde bantu kulemfukila yandi. Bankaka dyaka ketubaka nde yandi kekudibanzaka ve sambu na bantu mpi nde yandi kele na kisina ya bampasi na bo. Bantu ya mutindu yai kefingisaka zina ya Nzambi. Kansi, bo tasalaka ve mutindu yina kimakulu. Nzambi tafwa bantu yina kefingisaka zina na yandi.​—Tanga Nkunga 83:18, 19.

Yehowa takumisa zina na yandi ntangu Kimfumu na yandi tafwa bimfumu yonso ya bantu mpi tavutula bantu na ngemba mpi na lutaninu. (Daniele 2:44) Kubika fyoti, bantu yonso tabakisa nde Yehowa kele Nzambi ya kyeleka.​—Tanga Ezekiele 36:23; Matayo 6:9.

Inki nge fwete sala? Sambu na kukwenda penepene na Nzambi nge fwete longuka Ndinga na yandi mpi kuvukana ti bantu yina kezolaka yandi. Ntangu Yehowa takumisa zina na yandi, yandi tavila ve bansadi na yandi ya kwikama.​—Malashi 3:16.

Sambu na kuzaba mambu mingi, tala kapu 1 ya mukanda yai, Inki Biblia Kelongaka Mpenza? yina Bambangi ya Yehowa mebasisaka.

[Kifwanisu ya kele na lutiti 10]

Zina ya Nzambi na maniskri ya ntama ya Kiebreo