MUTINDU YA KUBUYA KUMENGA BANTU YA NKAKA

3 | Katula Bangindu ya Kumenga Bantu na Mabanza na nge

Biblia Ke Tuba Nde:

“Beno soba kimuntu na beno mpi beno kumisa mabanza na beno ya mpa, sambu beno kudindimisa luzolo ya Nzambi yina kele ya mbote, yina yandi lenda ndima, mpi yina kele ya kukuka.”—BAROMA 12:2.

Mambu Yina Yo Ke Tendula:

Nzambi ke tulaka dikebi na mambu yina beto ke yindulaka. (Yeremia 17:10) Katula kubuya kutuba mambu yina ke lwadisa mpi kusala mambu ya mbi, beto fwete sala mpi mambu ya nkaka. Kikalulu ya kumenga bantu ya nkaka ke bandaka na mabanza mpi na ntima. Yo yina, na nswalu yonso, beto buya kuyindula konso kima yina ke sala nde beto kuma ti bangindu ya kumenga bantu ya nkaka. Yai kele kaka mutindu mosi yina ta sala nde beto ‘soba kimuntu na beto’ mpi beto buya kumenga bantu ya nkaka.

Mambu ya Nge Lenda Sala:

Beto fwete katula na nswalu yonso mambu yina ke salaka nde beto menga bantu ya nkaka. Mingi-mingi bantu yina kele ve mpusu mosi ti beto to insi mosi ti beto. Kudiyula nde: ‘Inki mutindu mono ke tadilaka bo? Keti bangindu ya mono ke vandaka ti yo sambu na bo kele sambu na mambu yina mono me zaba sambu na bo? To keti mono ke vandaka ti bangindu ya mbi sambu na bantu na bo?’ Buya kutala to kutanga bima yina ke pusaka bantu na kumenga bantu ya nkaka mpi na kusala bantu mambu ya mbi.

Yo ke vandaka mpenza ve pete ntangu yonso na kutadila mabanza mpi bangindu yina beto ke vandaka ti yo sambu na bantu ya nkaka. Kansi Nzambi lenda sadisa beto na ‘kusala luswaswanu na kati ya mabanza mpi bangindu ya ntima.’ (Baebreo 4:12) Yo yina, beto fwete landa kulonguka Biblia. Fwanisa malongi ya Biblia ti bangindu na nge mpi sala yonso sambu na kuyindula na mutindu yina ke pesaka Nzambi kiese. Ndinga ya Nzambi lenda sadisa beto na kununga kikalulu ya kumenga bantu yina me ‘kumaka ngolo na mabanza mpi na ntima na beto.’—2 Bakorinto 10:4, 5.

Ndinga ya Nzambi lenda sadisa beto na kukatula bangindu ya kumenga bantu ya nkaka na ntima mpi na mabanza na beto

Mambu ya Masonga Yina Salamaka—STEPHEN

Sobaka Mutindu na Yandi ya Kuyindula

Mindele vandaka kumenga Stephen mpi bantu ya dibuta na bo. Mambu yai salaka nde yandi kota na kimvuka mosi ya politiki yina vandaka kunwanina banswa ya bantu. Bantangu ya nkaka yandi mosi vandaka kumona mutindu bantu vandaka kumenga bantu ya nkaka. Yandi ke tuba nde: “Mu mbandu, kilumbu mosi, mono ti banduku na mono talaka bafilme yina monisaka mutindu bo vandaka kuniokula bantu ya Afrika yina vandaka bampika na États-Unis. Beto waka makasi mutindu bo vandaka kuniokula bantu-ndombe mpi beto nwanisaka batoko ya mindele yina vandaka na kisika yango. Na nima, beto kwendaka na bisika yina mindele vandaka kuzinga sambu na kubula bo.”

Stephen sobaka bangindu na yandi na mutindu ya kuyituka ntangu yandi bandaka kulonguka Biblia ti Bambangi ya Yehowa. Yandi ke tuba diaka nde: “Sambu mono yelaka na kisika yina bantu vandaka kuzola ve bantu ya mpusu ya nkaka, mambu yina mono monaka na Bambangi ya Yehowa yitukisaka mono mingi. Mu mbandu, ntangu Mbangi mosi ya Yehowa ya mundele vandaka kusala nzietelo, yandi vandaka kubika bana na yandi na dibuta ya Bambangi ya Yehowa ya bantu-ndombe.” Stephen monaka nde Bambangi ya Yehowa kele na dibuta mosi ya zola. Yo sadisaka yandi na kubakisa nde bo ke lungisa kibeni mambu yina Yezu tubaka nde balongoki na yandi fwete monisilana zola ya masonga.—Yoane 13:35.

Inki sadisaka Stephen na kubika mubulu mpi kikalulu ya kumenga bantu ya nkaka? Yo kele mukanda ya Baroma 12:2. Yandi ke tuba nde: “Mono bakisaka nde mono fwete soba mabanza na mono. Yo lombaka ve nde mono kumisa mabanza na mono ya mpa kaka sambu na kuzinga na ngemba, kansi mono bakisaka mpi nde yo kele luzingu mosi ya kuluta mbote.” Stephen me kumaka kuzinga mbote mpi yandi me bikaka kikalulu ya kumenga bantu ya nkaka, dezia bamvula kuluta 40 me luta.