Keti Dibundu Fwete Kota na Mambu ya Politiki?

Na ntoto ya mvimba, bantu mingi yina ke tubaka nde bo kele balongoki ya Yezu Kristu ke kudikotisaka mingi na mambu ya politiki. Bankaka ke mekaka kulonga bangindu na bo na mambu ya Nzambi mpi ya bikalulu ya mbote, yo yina bo ke pesaka maboko na bakandida ya politiki to na baparti politiki. Ebuna, mbala mingi, bantu ya politiki ke sadilaka mambu ya me tala bikalulu ya mbote to mambu ya luzingu sambu na kupusa bantu ya mabundu na kupesa bo maboko. Mbala mingi bamfumu ya mabundu ke vandaka bakandida sambu na kubaka kiyeka ya politiki. Mpi na bansi ya nkaka, dibundu mosi ya bo ke bingaka ya “Bukristu” lenda vanda ti lukumu ya mingi sambu bo ke bingaka yo dibundu ya leta to ya insi.

Nge ke yindula inki? Keti balongoki ya Yezu Kristu fwete kudikotisa na mambu ya politiki? Nge lenda baka mvutu kana nge tala mbandu ya Yezu. Yandi tubaka nde: “Mono me pesa beno mbandu, sambu beno sala mutindu mono me sala beno.” (Yoane 13:15) Inki mbandu Yezu pesaka na mambu ya politiki?

Ve. Yezu kotaka ve na mambu ya politiki ya nsi-ntoto.

Yezu sosaka ve kubaka kiyeka ya politiki. Yandi buyaka kubaka kiyeka ya kutwadisa baluyalu ya bantu ntangu Satana Diabulu pesaka yandi “bimfumu yonso ya nsi-ntoto.” (Matayo 4:8-10)a Kilumbu ya nkaka, bantu yina monaka nde Yezu me fwana na kuyala mekaka kupusa yandi na kukota na mambu ya politiki. Biblia ke tuba nde: “Sambu Yezu zabaka nde bo zolaka kukwisa kukanga yandi sambu na kutula yandi ntotila, yandi katukaka mpi kwendaka diaka na ngumba yandi mosi.” (Yoane 6:15) Yezu ndimaka ve mambu yina bantu zolaka nde yandi sala. Mpi yandi buyaka kudikotisa na mambu ya politiki.

Yezu kudikotisaka ve na mambu ya politiki. Mu mbandu, na bilumbu ya Yezu, Bayuda vandaka kuzola ve kufuta bampaku na luyalu ya Roma mpi bo vandaka kumona yo bonso kizitu ya nku. Ntangu bo pusaka Yezu na kudikotisa na diambu yina, Yezu kudikotisaka ve na matata yina ya politiki ya ke tadila kana yo vandaka mbote nde bo futa mpaku yina. Yandi songaka bo nde: “Beno pesa bima ya Kaisali na Kaisali, kansi bima ya Nzambi na Nzambi.” (Marko 12:13-17) Yandi kotaka ve na diambu yina ya politiki kansi yandi songaka bo nde bo fwete futa bampaku yina bamfumu ya Roma, yina vandaka mimonisi ya Kaisali, vandaka kulomba. Ata mpidina, yandi songaka bo nde bulemfu na bamfumu ya luyalu kele ti bandilu. Muntu fwete pesa ve Leta kima yina kele ya Nzambi; mu mbandu beto fwete kudipesa mpi kusambila kaka Nzambi.—Matayo 4:10; 22:37, 38.

Yezu vandaka kupesa maboko na luyalu ya zulu, disongidila Kimfumu ya Nzambi. (Luka 4:43) Yandi kudikotisaka ve na mambu ya politiki sambu yandi zabaka nde kima ta lungisa mambu yina Nzambi ke zola sambu na ntoto kele ve baluyalu ya bantu kansi Kimfumu ya Nzambi. (Matayo 6:10) Yandi zabaka nde Kimfumu ya Nzambi ta sala ve na nzila ya baluyalu ya bantu kansi yo ta yinga baluyalu yina.—Daniele 2:44.

Ve. Balongoki ya Yezu lemfukaka na nsiku na yandi ya kuvanda “ve bantu ya nsi-ntoto.” (Yoane 15:19) Bo landaka mbandu na yandi mpi bo kotaka ve ata fioti na mambu ya politiki ya nsi-ntoto. (Yoane 17:16; 18:36) Olie ya kudikotisa na mambu ya politiki, bo salaka kisalu yina Yezu pesaka bo, disongidila kisalu ya kusamuna mpi ya kulonga nsangu ya Kimfumu ya Nzambi.—Matayo 28:18-20; Bisalu 10:42.

Kulemfuka na Nzambi vandaka na kisika ya ntete na luzingu ya Bakristu ya mvu-nkama ya ntete, kansi bo zabaka nde bo fwete zitisa bamfumu ya luyalu. (Bisalu 5:29; 1 Piere 2:13, 17) Bo vandaka kuzitisa bansiku mpi kufuta bampaku. (Baroma 13:1, 7) Ata bo kotaka ve na mambu ya politiki, bo sadilaka mambu ya nsiku sambu na kuditanina mpi bo sadilaka bisalu yina baluyalu vandaka kusala.—Bisalu 25:10, 11; Bafilipi 1:7.

Biblia ke tuba pwelele nde Yezu ti balongoki na yandi kotaka ve na mambu ya politiki. Yo yina, sambu bo kele Bakristu, Bambangi ya Yehowa ya ntoto ya mvimba ke kotaka ve ata fioti na mambu ya politiki. Bonso Bakristu ya mvu-nkama ya ntete, bo ke salaka kisalu yina Yezu pesaka bo, disongidila kisalu ya kulonga ‘nsangu ya mbote ya Kimfumu.’—Matayo 24:14.