Bafilipi 4:6, 7—“Beno Kudiyangisa Ve Sambu na Konso Kima Yina”

“Beno kudiyangisa ve sambu na konso kima yina, kansi na mambu yonso na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba; ebuna ngemba ya Nzambi yina me luta mayele yonso ya kubakisa mambu ta tanina bantima na beno mpi mabanza na beno na nzila ya Kristu Yezu.”—Bafilipi 4:6, 7, Mbalula ya Nsi-Ntoto ya Mpa.

“Beno kumona mpasi ve na ntima sambu na konso mambu yina; kansi konso ntangu ya beno ke samba Nzambi, beno lomba yandi konso mambu yina ya beno ke na yo mfunu; ntangu beno ke lomba yandi yo, beno pesa yandi mersi. Ebuna ngemba ya Nzambi, ngemba yina me luta mambu yonso ya bantu ke yindulaka, yo ta keba ntima na beno ti mabanza na beno sambu na kimvuka yina ya beno kele ti Yesu Kristo.”—Bafilipi 4:6, 7, Bible en Kituba.

Kana bantu yina ke sambilaka Nzambi ke kudiyangisa mingi to kele ti basusi mingi, bo lenda samba Nzambi sambu yandi lembika bo. Nzambi ke sila nde yandi ta pesa bo ngemba ya kati, ebuna ngemba yina ta sadisa bo na kunwana ti basusi na bo mpi ta tanina mabanza ti mawi na bo. Verse 6 ke tubila mitindu ya bisambu yina lenda sadisa bo na kubaka ngemba yina.

Kubondila kele bisambu ya muntu ke salaka sambu na kubondila Nzambi na masonga yonso sambu yandi sadisa yandi. Muntu lenda bondila Nzambi kana yandi ke kudiyangisa to kana yandi kele na kigonsa, mutindu Yezu salaka. (Baebreo 5:7) Mbala mingi bantu ke salaka bisambu ya mutindu yina mbala na mbala.

Kulomba ke tendula kulomba mambu ya siki-siki na Nzambi. Bantu ya ke sambilaka Nzambi lenda lomba yandi “konso kima yina,” to “na konso dibaku.” Kansi, bisambu yina fwete vanda na kuwakana ti luzolo ya Nzambi yina kele na Biblia.—1 Yoane 5:14.

Bisambu ya kupesa matondo kele kupesa Nzambi mersi sambu na mambu yina yandi me salaka mpi ta sala sambu na beto. Kana beto ke tula dikebi na bikuma yina beto fwete pesa Nzambi mersi, yo ke sadisaka beto na kuvanda ntangu yonso na kiese.—1 Batesalonika 5:16-18.

Sambu na kupesa mvutu na bisambu yina, Nzambi ke pesaka ngemba na bantu yina ke sambaka yandi. “Ngemba ya Nzambi” ke tadila pima yina beto ke vandaka ti yo sambu beto kele ti kinduku ya ngolo ti Nzambi. (Baroma 15:13; Bafilipi 4:9) Ngemba yina “me luta mayele yonso ya kubakisa mambu” sambu yo ke katukaka na Nzambi mpi yo ke sadisaka beto kuluta mutindu beto ke yindulaka.

Verse yai ya Biblia ke tuba nde ngemba ya Nzambi lenda tanina bantima na beto. Ngogo ya Kigreki ya bo me balula awa nde “tanina” ke na kuwakana ti ngolo mosi ya bo ke sadilaka sambu na basoda mpi yo ke tendulaka mambu yina kimvuka ya basoda ke salaka sambu na kutanina mbanza ya ngolo. Mutindu mosi, ngemba ya Nzambi ke taninaka mawi mpi bangindu ya muntu. Yo ke sadisaka yandi sambu mambu ya mpasi kulutila yandi ve.

Ngemba yina Nzambi ke pesaka ke taninaka beto “na nzila ya Kristu Yezu,” sambu beto ke vandaka na kinduku ti Nzambi na nsadisa ya Yezu. Yezu pesaka luzingu na yandi bonso kimenga sambu na masumu na beto. Kana beto ke kwikila na Yezu, beto lenda baka balusakumunu ya Nzambi. (Baebreo 11:6) Yezu kele mpi nzila sambu na kusamba Nzambi. Yandi tubaka nde: “Ata muntu mosi ve ke kwisaka na Tata kana yandi kwisa ve na nzila na mono.”—John 14:6; 16:23.

Mukanda ya Bafilipi kele mukanda yina ntumwa Polo sonikilaka Bakristu yina vandaka kuzinga na mbanza ya Filipi.a Na kapu ya 4 ya mukanda yina, Polo siamisaka bantu yina kele na dibundu na kusepela, mpi yandi pesaka bo mersi sambu na kikalulu na bo ya kukaba, yina pesaka yandi kiese mingi. (Bafilipi 4:4, 10, 18) Yandi ke monisa mutindu kisambu ke sadisaka na kuvanda na ngemba ya Nzambi, mpi yandi ke tubila mambu ya beto fwete yindula mpi mambu ya beto fwete sala sambu beto baka “ngemba ya Nzambi.”—Bafilipi 4:8, 9.