Yoane 14:6—“Mono Kele Nzila, Mono Kele Kieleka, Mono Kele Moyo”

“Yezu tubilaka yandi nde: ‘Mono kele nzila mpi kieleka mpi luzingu. Ata muntu mosi ve ke kwisaka na Tata kana yandi kwisa ve na nzila na mono.’”—Yoane 14:6, Mbalula ya Nsi-Ntoto ya Mpa.

“Yesu nde: ‘Mono kele nzila, mono kele kieleka, mono kele moyo. Ata muntu mosi ve lenda kwenda na Tata na nzila ya nkaka kana yandi kwisa na mono nzila ve.’”—Yoane 14:6, Bible en Kituba.

Muntu yina ke zola kusambila Tata, disongidila Yehowaa Nzambi, fwete zaba kisalu ya mfunu ya Yezu.

“Mono kele nzila.” Yezu kele “nzila” ya ke sadisa na kusamba Nzambi na mutindu yandi ke ndimaka. Mu mbandu, bantu yina ke samba Nzambi, fwete samba yandi na zina ya Yezu. (Yoane 16:23, 24) Lufwa ya Yezu sadisaka sambu bantu kuwakana diaka ti Nzambi, to sambu Nzambi kuma kundima bo diaka. (Baroma 5:8-11) Yezu pesaka mpi mbandu ya ke monisa bikalulu yina bantu ya ke zola kupesa Nzambi kiese fwete landa.—Yoane 13:15.

“Mono kele kieleka.” Yezu vandaka ntangu yonso kutuba kieleka mpi kuzinga na kieleka. (1 Piere 2:22) Kana muntu ke widikila Yezu, yandi ta longuka kieleka ya me tala Nzambi. (Yoane 8:31, 32) Yezu vandaka mpi “kieleka” sambu yandi lungisaka bambikudulu ya Biblia. Na mutindu yina, yandi kumisaka balusilu ya Nzambi mambu ya kieleka.—Yoane 1:17; 2 Bakorinto 1:19, 20; Bakolosai 2:16, 17.

“Mono kele moyo.” Yezu pesaka luzingu na yandi sambu bantu yina ke kwikila na yandi kubaka luzingu ya mvula na mvula. (Yoane 3:16, 36) Yandi kele mpi “moyo” to luzingu sambu na bantu yina me fwaka, sambu yandi ta futumuna bo.—Yoane 5:28, 29; 11:25.

“Ata muntu mosi ve lenda kwenda na Tata na nzila ya nkaka kana yandi kwisa na mono nzila ve.” Bantu yina ke zola kuvanda ti kinduku ya mbote ya Nzambi fwete ndima kisalu ya mfunu ya Yezu. Sambu na kusala yo, bo fwete samba na zina ya Yezu; na mutindu yina bo ke monisaka nde bo ke ndima kiyeka yina Yezu Kristu kele ti yo. (Yoane 15:16) Bo ke ndimaka mpi nde bantu lenda guluka kaka sambu na Yezu.—Bisalu 4:12; Bafilipi 2:8-11.

Yoane kapu 13 tii na 17 kele ti bandongisila ya nsuka yina Yezu pesaka bantumwa na yandi 11 ya kwikama na mpimpa na yandi ya nsuka na ntoto na ntwala nde yandi fwa. Na kapu 14, Yezu siamisaka balongoki na yandi na kukwikila na yandi mpi na Tata na yandi mpi na kuzola ti kulemfukila bo. (Yoane 14:1, 12, 15-17, 21, 23, 24) Yandi monisaka kinduku ya ngolo yina kele na kati na yandi ti Tata na yandi. (Yoane 14:10, 20, 28, 31) Ata yandi zolaka kuvutuka ntama mingi ve na zulu, Yezu ndimisaka balongoki na yandi nde yandi ta yambula bo ve. (Yoane 14:18) Yandi silaka mpi na kutindila bo “nsadisi” mpi yandi tubaka nde nsadisi yango kele “mpeve santu, yina Tata ta tinda na zina na mono.” (Yoane 14:25-27) Na mitindu yai mpi na mitindu ya nkaka, Yezu yidikaka balongoki na yandi sambu na bampasi yina bo zolaka kukutana ti yo na nima.