2 Samuele

13 Ntangu yai, Absalomi mwana ya Davidi vandaka ti mpangi mosi ya nkento ya kitoko zina na yandi Tamare,+ mpi Amnoni+ mwana ya Davidi kumaka kuzola yandi. 2 Amnoni vandaka mawa-mawa kibeni yo yina yandi belaka sambu na mpangi na yandi ya nkento Tamare, sambu mpangi na yandi ya nkento vandaka mwense mpi yo vandaka kumonana nde Amnoni vandaka ve ti mpila ya kusala yandi konso kima yina. 3 Ntangu yai, Amnoni vandaka ti nduku mosi zina na yandi Yehonadabi,+ mwana ya Shimeah,+ mpangi ya Davidi; mpi Yehonadabi vandaka mayele kibeni. 4 Yo yina yandi tubilaka yandi nde: “Sambu na nki nge, mwana ya ntotila, nge ke mawa-mawa mingi mutindu yai konso suka? Sambu na nki ve kusonga mono?” Amnoni vutudilaka yandi nde: “Mono ke zola Tamare, mpangi-nkento+ ya Absalomi mpangi na mono.” 5 Yehonadabi vutudilaka yandi nde: “Lala na mbeto na nge mpi sala bonso nde nge ke bela. Ntangu tata na nge ta kwisa kutala nge, tubila yandi nde, ‘Pardo, bika nde Tamare mpangi na mono ya nkento kukwisa mpi kupesa mono mwa madia. Kana yandi lamba madia ya bo ke pesaka bambefo* na meso na mono, mono ta baka yo na maboko na yandi mpi ta dia yo.’”

6 Yo yina Amnoni lalaka mpi salaka bonso nde yandi ke bela, mpi ntotila kotaka sambu na kutala yandi. Ebuna Amnoni tubilaka ntotila nde: “Pardo, bika nde Tamare, mpangi na mono ya nkento kukwisa mpi kusala na meso na mono bagato zole ya kele bonso ntima sambu mono baka yo na maboko na yandi mpi mono dia yo.” 7 Yo yina Davidi tindilaka Tamare ndinga na nzo mpi tubaka nde: “Pardo, kwenda na nzo ya mpangi na nge Amnoni mpi lambila yandi madia.”* 8 Yo yina Tamare kwendaka na nzo ya mpangi na yandi Amnoni, kisika yandi vandaka ya kulala. Tamare bakaka poto-poto ya fufu, yandi nikaka yo mpi salaka bagato na meso na yandi mpi lambaka bagato yina. 9 Ebuna Tamare bakaka panu mpi pesaka yandi madia. Kansi Amnoni buyaka na kudia mpi tubaka nde: “Beno basisa bantu yonso!” Yo yina bantu yonso basikaka.

10 Ntangu yai Amnoni tubilaka Tamare nde: “Kwisa kunata madia yina* na suku ya kulala, sambu mono baka yo na maboko na nge mpi mono dia yo.” Ebuna Tamare bakaka bagato yina vandaka bonso ntima, yina yandi salaka, mpi natilaka yo mpangi na yandi Amnoni na suku ya kulala. 11 Ntangu Tamare natilaka yandi yo sambu yandi dia, Amnoni kangaka yandi mpi tubaka nde: “Kwisa, lala ti mono, mpangi na mono ya nkento.” 12 Kansi Tamare tubilaka yandi nde: “Ve, mpangi na mono! Kupesa mono nsoni ve, sambu diambu ya mutindu yai ke salamaka ve na Izraele.+ Kusala ve diambu yai ya nsoni.+ 13 Nki mutindu mono ta katula nsoni na mono? Ebuna bo ta monaka nge bonso muntu ya me sala diambu mosi ya nsoni na Izraele. Ntangu yai, pardo, tubila ntotila, sambu yandi ta buya ve kupesa mono na nge.” 14 Kansi Amnoni buyaka kuwila yandi, ebuna yandi lutaka yandi na ngolo mpi pesaka yandi nsoni na mutindu yandi ladisaka yandi na kingolo-ngolo. 15 Na nima Amnoni yantikaka kumenga yandi ngolo kibeni, na mpila nde kumenga yina yandi mengaka yandi kumaka ngolo kuluta zola yina yandi vandaka na yo sambu na yandi. Amnoni tubilaka yandi nde: “Telama; katuka awa!” 16 Ebuna Tamare tubilaka yandi nde: “Ve mpangi na mono, sambu kukula mono ntangu yai kele mbi kuluta mambu yina nge me sala mono!” Kansi Amnoni buyaka kuwila yandi.

17 Yo yina yandi bingaka nsadi na yandi ya leke mpi tubaka nde: “Pardo katula muntu yai na ntwala na mono, mpi kanga kielo na nsabi kana yandi me basika.” 18 (Tamare lwataka mvwela mosi ya kitoko,* sambu yo vandaka bilele yina bana-bankento ya ntotila, bayina vandaka bamwense, vandaka kulwata.) Yo yina nsadi ya Amnoni nataka Tamare na nganda, mpi yandi kangaka kielo na nsabi ntangu Tamare basikaka. 19 Ebuna Tamare tulaka putulu ya tiya na ntu na yandi,+ mpi yandi pasulaka mvwela ya kitoko yina yandi lwataka; yandi tulaka maboko na zulu ya ntu mpi kwendaka, mpi yandi vandaka kutula milolo ntangu yandi ke tambula.

20 Ebuna mpangi na yandi Absalomi+ yulaka yandi nde: “Keti mpangi na nge Amnoni muntu vandaka ti nge? Ntangu yai mpangi na mono ya nkento, vanda pima. Yandi kele mpangi na nge.+ Kubika ve nde ntima na nge kulanda kuyindula diambu yai.” Ebuna Tamare zingaka na kingenga na nzo ya mpangi na yandi Absalomi. 21 Ntangu ntotila Davidi waka mambu yai yonso, yandi waka makasi kibeni.+ Kansi yandi zolaka ve kupesa mwana na yandi Amnoni mpasi, sambu yandi vandaka kuzola yandi, sambu yandi vandaka mwana na yandi ya ntete. 22 Absalomi tubilaka ve Amnoni ata kima mosi, yo vanda ya mbi to ya mbote; sambu Absalomi vandaka kumenga+ Amnoni sambu yandi pesaka Tamare mpangi na yandi ya nkento nsoni.+

23 Na nima ya bamvula zole ya mvimba, bantu ya Absalomi yina ke zengaka mika ya mameme vandaka na Baale-azore, pene-pene ya Efrayimi,+ mpi Absalomi bingaka bana yonso ya ntotila.+ 24 Yo yina Absalomi kotaka kisika ya ntotila mpi tubaka nde: “Nsadi na nge ke kwenda kuzenga mameme na yandi mika. Pardo, bika nde ntotila ti bansadi na yandi kukwenda ti mono.” 25 Kansi ntotila tubilaka Absalomi nde: “Ve, mwana na mono. Kana beto yonso kukwenda, beto ta vanda kizitu sambu na nge.” Ata Absalomi landaka kundimisa yandi, yandi ndimaka ve na kukwenda, kansi yandi sakumunaka yandi. 26 Ebuna Absalomi tubaka nde: “Kana nge ta kwenda ve, bika nde mpangi na mono Amnoni kukwenda ti beto.”+ Ntotila vutudilaka yandi nde: “Sambu na nki yandi fwete kwenda ti nge?” 27 Kansi Absalomi ndimisaka yandi, yo yina yandi tindaka Amnoni ti bana yonso ya ntotila.

28 Ebuna Absalomi songaka bansadi na yandi nde: “Beno kangula meso, mpi ntangu ntima ya Amnoni ta kuma kiese-kiese sambu na vinu, mono ta tubila beno nde, ‘Beno fwa Amnoni!’ Ebuna beno fwete fwa yandi. Beno wa boma ve. Keti mono ve muntu me songa beno? Beno vanda ngolo mpi kikesa.” 29 Yo yina bansadi ya Absalomi salaka Amnoni kaka mutindu Absalomi songaka bo; ebuna bana yonso ya nkaka ya ntotila telamaka, mpi konso muntu mataka na mpunda na yandi mpi tinaka. 30 Ntangu bo vandaka na nzila, nsangu kuminaka Davidi nde: “Absalomi me fwa bana yonso ya ntotila, mpi ata mosi ve na kati na bo me guluka.” 31 Yo yina ntotila telamaka, yandi pasulaka bilele na yandi mpi lalaka na ntoto, ebuna bansadi na yandi yonso telamaka pene-pene na yandi ti bilele na bo ya kupasuka.

32 Kansi, Yehonadabi+ mwana ya Shimeah,+ mpangi ya Davidi, tubaka nde: “Bika nde mfumu na mono kuyindula ve nde bo me fwa bana-baleke yonso ya ntotila, sambu Amnoni mpamba muntu me fwa.+ Muntu tubaka nde bo sala mambu yina kele Absalomi, yina bakaka lukanu ya kusala yo+ tuka kilumbu yina Amnoni pesaka Tamare+ mpangi na yandi ya nkento+ nsoni. 33 Ntangu yai, bika nde mfumu na mono ntotila kutula ve dikebi na* nsangu yina ke tuba nde, ‘Bana yonso ya ntotila me fwa’; Amnoni mpamba muntu me fwa.”

34 Na ntangu yina, Absalomi tinaka.+ Na nima, nkengidi tombulaka meso na yandi mpi monaka nde bantu mingi vandaka kukwisa na nzila yina vandaka na nima na yandi pene-pene ya ngumba. 35 Ebuna Yehonadabi+ tubilaka ntotila nde: “Tala! Bana ya ntotila me vutuka. Kaka mutindu nsadi na nge tubaka.” 36 Ntangu yandi manisaka kutuba, bana ya ntotila kotaka, bo vandaka kudila ngolo; ntotila ti bansadi na yandi yonso dilaka mpi ngolo kibeni. 37 Kansi Absalomi tinaka mpi kwendaka na Talmai+ mwana ya Amihudi ntotila ya Geshure. Davidi dilaka mwana na yandi bilumbu mingi. 38 Na nima ntangu Absalomi tinaka mpi kwendaka na Geshure,+ yandi bikalaka kuna bamvula tatu.

39 Nsuka-nsuka, ntotila Davidi waka nzala ya ngolo ya kukwenda na Absalomi, sambu yandi ndimaka* lufwa ya Amnoni.