2 Samuele

15 Na nima ya mambu yai yonso, Absalomi bakaka pusu-pusu mosi, bampunda, mpi babakala 50 sambu na kubaka ntinu na ntwala na yandi.+ 2 Absalomi vandaka kutelama na suka-suka mpi kutelama na lweka ya nzila yina vandaka kunata na kielo ya mbanza.+ Konso ntangu yina muntu vandaka ti diambu yina vandaka kulomba nde ntotila kusambisa,+ Absalomi vandaka kubinga yandi mpi kutuba nde: “Nge me katuka na nki mbanza?” mpi muntu yina vandaka kutuba nde: “Nsadi na nge me katuka na dikanda mosi ya Izraele.” 3 Absalomi vandaka kutubila yandi nde: “Tala, mambu ya nge ke tuba kele mbote mpi yo kele mutindu yina, kansi ntotila me tula ve ata muntu mosi sambu na kuwa diambu na nge.” 4 Absalomi vandaka kutuba nde: “A kana bo tulaka mono zuzi na insi yai! Ebuna konso muntu yina kele ti diambu to yina ke zola nde bo sambisa diambu na yandi lendaka kukwisa na mono, mpi mono zolaka kusala na mpila nde bo zenga makambu na yandi na lunungu.”

5 Kana muntu kukwisa pene-pene sambu na kufukimina yandi, Absalomi vandaka kutandula diboko na yandi, kusimba muntu yina mpi kupesa yandi beze.+ 6 Absalomi vandaka kusala diambu yai na bantu yonso ya Izraele yina vandaka kukwisa na ntotila sambu na lusambisu; na mutindu yina Absalomi vandaka kuyiba bantima ya bantu ya Izraele.+

7 Na nsuka ya bamvula iya* Absalomi tubilaka ntotila nde: “Pardo, pesa mono nzila ya kukwenda na Ebroni+ sambu na kulungisa lusilu na mono ya mono salaka na Yehowa. 8 Sambu nsadi na nge salaka lusilu yai ya masonga+ ntangu mono vandaka kuzinga na Geshure+ na Siria: ‘Kana Yehowa kuvutula mono na Yeruzalemi, mono ta pesa dikabu na* Yehowa.’” 9 Yo yina ntotila tubilaka yandi nde: “Kwenda na ngemba.” Ebuna yandi telamaka mpi kwendaka na Ebroni.

10 Ntangu yai, Absalomi tindaka bantu na makanda yonso ya Izraele sambu na kutala yo na mayele yonso mpi tubaka nde: “Kaka na ntangu beno ta wa makelele ya kibongo, beno tuba nde, ‘Absalomi me kuma ntotila na Ebroni!’”+ 11 Ntangu yai, bantu 200 ya Yeruzalemi kwendaka kuna ti Absalomi; bo bingisaka bo mpi bo kwendaka kukonda kuzaba ata kima mosi, mpi bo zabaka ve mambu yina vandaka kusalama. 12 Diaka, ntangu Absalomi pesaka bimenga, yandi tindaka bantu na kubinga Ahitofele+ muntu ya Gilo, ndongisi ya Davidi,+ na mbanza na yandi Gilo.+ Komplo yina landaka kukuma ngolo, mpi ntalu ya bantu yina vandaka kupesa Absalomi maboko vandaka kukuma kaka mingi.+

13 Na ntangu yina, muntu mosi kwisaka na Davidi mpi tubaka nde: “Ntima ya bantu ya Izraele me baluka na Absalomi.” 14 Na mbala mosi, Davidi tubilaka bansadi na yandi yonso yina vandaka ti yandi na Yeruzalemi nde: “Beno telama mpi beto tina,+ sambu ata muntu mosi ve na kati na beto ta guluka na maboko ya Absalomi! Beto sala nswalu, kana ve yandi lenda kwisa kukanga beto nswalu mpi kunatila beto mpasi mpi kufwa mbanza ti mbele ya bitumba!”+ 15 Bansadi ya ntotila vutudilaka ntotila nde: “Konso kima yina mfumu na mono ntotila me baka lukanu ya kusala, bansadi na nge kele ya kuyilama na kusala yo.”+ 16 Yo yina ntotila basikaka mpi bantu yonso ya nzo na yandi vandaka kulanda yandi, kansi ntotila bikisaka bamakangu kumi+ sambu na kukeba nzo.* 17 Ntotila landaka kukwenda ti bantu yonso yina vandaka kulanda yandi, mpi bo telamaka na Bete-meraki.

18 Bansadi na yandi yonso yina vandaka kukwenda ti yandi* mpi bantu yonso ya Kereti, bantu ya Peleti+ mpi bantu ya Gati,+ bantu 600 yina landaka yandi katuka na Gati,+ vandaka kuluta na ntangu ntotila vandaka kutala bo mbote-mbote.* 19 Ebuna ntotila tubilaka Itai+ muntu ya Gati nde: “Sambu na nki nge mpi fwete kwenda ti beto? Vutuka mpi zinga ti ntotila ya mpa, sambu nge kele munzenza, nge mpi tinaka kisika na nge. 20 Nge kwisaka mazono, ebuna keti bubu yai mono fwete sala na mpila nde nge yungana-yungana ti beto, sambu na kukwenda na ntangu yina mono fwete kwenda mpi kisika yina mono fwete kwenda? Vutuka mpi nata bampangi na nge, mpi bika nde Yehowa kumonisila nge zola ya kwikama mpi kwikama!”+ 21 Kansi Itai vutudilaka ntotila nde: “Ya kieleka mutindu Yehowa kele na luzingu mpi ya kieleka mutindu mfumu na mono ntotila kele na luzingu, konso kisika yina mfumu na mono ntotila ta vanda, yo vanda sambu na lufwa to sambu na luzingu, nsadi na nge ta vanda pana!”+ 22 Ebuna Davidi tubilaka Itai+ nde: “Kwenda mpi sabuka.” Yo yina Itai muntu ya Gati sabukaka, kumosi ti bantu na yandi yonso ti bana.

23 Konso muntu na insi vandaka kudila ngolo ntangu bantu yai yonso vandaka kusabuka, mpi ntotila telamaka pene-pene ya Muwanda ya Kidroni;+ bantu yonso vandaka kusabuka sambu na kukwenda na nzila yina ke nataka na ntoto-makanga. 24 Zadoki+ mpi vandaka pana mpi Balevi yonso+ yina vandaka kunata sanduku+ ya kuwakana ya Nzambi ya kieleka+ vandaka ti yandi; ebuna bo tululaka Sanduku ya Nzambi ya kieleka pene-pene; mpi Abiatare+ tombukaka, na ntangu bantu yonso yina vandaka kukatuka na mbanza manisaka kusabuka. 25 Kansi ntotila tubilaka Zadoki nde: “Vutula Sanduku ya Nzambi ya kieleka na mbanza.+ Kana Yehowa me ndima mono, yandi ta vutula mono mpi, ebuna yandi ta pesa mono nzila ya kumona yo ti kisika yo ta vanda.+ 26 Kansi kana yandi fwete tuba nde, ‘Mono me wa kiese ve na nge,’ pana bika yandi sala mono konso kima yina kele mbote na meso na yandi.” 27 Ntotila tubilaka nganga-nzambi Zadoki nde: “Keti nge kele ve muntu ya ke monaka mambu?+ Vutuka na mbanza na ngemba, mpi nata bana na beno zole, Ahimaasi mwana na nge ti Yonatani+ mwana ya Abiatare. 28 Tala, mono ta sukinina na bisika ya ntoto-makanga ya bo lenda sabuka masa na makulu tii kuna beno ta tinda ndinga sambu na kuzabisa mono.”+ 29 Yo yina Zadoki ti Abiatare vutulaka Sanduku ya Nzambi ya kieleka na Yeruzalemi, mpi bo bikalaka kuna.

30 Ntangu Davidi vandaka kutombuka na Ngumba ya Banti ya Olive,+ yandi vandaka kudila ntangu yandi vandaka kutombuka; ntu na yandi vandaka ya kufika, mpi yandi vandaka kutambula makulu-ngulu. Bantu yonso yina vandaka ti yandi fikaka mpi ba-ntu na bo mpi bo vandaka kudila ntangu bo vandaka kutombuka. 31 Ebuna bo songaka Davidi nde: “Ahitofele kele na kati ya bantu yina ke sala komplo+ ti Absalomi.”+ Yo yina Davidi tubaka nde: “O Yehowa,+ mono me bondila nge, kumisa ndongisila ya Ahitofele diambu mosi ya buzoba!”+

32 Ntangu Davidi kumaka na nsongi ya ngumba kisika yina bantu vandaka kufukimina Nzambi, Ushai+ muntu ya Arki+ vandaka pana sambu na kukutana ti yandi, yandi vandaka ti mvwela ya kupasuka-pasuka mpi ti ntoto na ntu. 33 Kansi, Davidi tubilaka yandi nde: “Kana nge sabuka ti mono, nge ta kuma kizitu sambu na mono. 34 Kansi kana nge vutuka na mbanza mpi nge tuba na Absalomi nde, ‘O Ntotila, mono kele nsadi na nge. Mono vandaka nsadi ya tata na nge na ntama, kansi ntangu yai mono kele nsadi na nge,’+ pana nge lenda bebisa ndongisila ya Ahitofele sambu na mono.+ 35 Keti banganga-nzambi Zadoki ti Abiatare kele ve kuna ti nge? Mambu yonso yina nge ta wa na nzo ya ntotila+ nge fwete songa yo banganga-nzambi Zadoki ti Abiatare. 36 Tala! Bo kele kuna ti bana na bo zole, Ahimaasi+ mwana ya Zadoki mpi Yonatani+ mwana ya Abiatare, ebuna na nzila na bo beno tindila mono bansangu yonso ya beno ta wa.” 37 Yo yina Ushai, nduku ya Davidi,*+ kotaka na mbanza ntangu Absalomi vandaka kukota na Yeruzalemi.