2 Samuele

18 Ebuna Davidi tangaka ntalu ya babakala yina vandaka ti yandi mpi tulaka bamfumu ya mafunda mpi bamfumu ya bankama na zulu na bo.+ 2 Ebuna Davidi tindaka kimvuka mosi na kati ya bimvuka tatu ya bantu na nsi ya lutwadisu* ya Yoabi,+ kimvuka mosi na kati ya bimvuka tatu na nsi ya lutwadisu ya Abishai+ mwana ya Seruya,+ mpangi ya Yoabi, mpi kimvuka mosi na kati ya bimvuka tatu na nsi ya lutwadisu ya Itai+ muntu ya Gati. Ebuna ntotila tubilaka bantu yina nde: “Mono mpi ta basika ti beno.” 3 Kansi bo tubaka nde: “Nge fwete basika ve,+ sambu kana beto tina, bo ta tudila beto ve dikebi;* mpi kana kati-kati ya bantu na kati na beto kufwa, bo ta tudila beto dikebi ve, sambu nge kele bonso bantu 10 000 na kati na beto.+ Yo yina, yo ta vanda mbote kuluta kana nge tindila beto lusadisu katuka na mbanza.” 4 Ntotila tubilaka bo nde: “Mambu yonso yina ke monana mbote na meso na beno, mono ta sala yo.” Yo yina ntotila telamaka pene-pene ya kielo ya mbanza, mpi bantu yonso basikaka na bimvuka ya bankama mpi ya mafunda. 5 Ebuna ntotila songaka Yoabi, Abishai, ti Itai nde: “Beno sadila leke Absalomi mambu na mawete yonso sambu na mono.”+ Bantu yonso waka ntangu ntotila songaka bamfumu yina yonso mambu ya me tala Absalomi.

6 Bantu basikaka mpi kwendaka na mfinda sambu na kukutana ti Izraele, ebuna bitumba salamaka na mfinda ya Efrayimi.+ 7 Kuna bansadi ya Davidi+ bedisaka bantu ya Izraele,+ mpi bo fwaka bantu mingi kibeni kilumbu yina—bantu 20 000. 8 Bitumba yalumukaka na bwala yina ya mvimba. Diaka, na kilumbu yina, bantu mingi fwaka na mfinda kuluta bayina fwaka na mbele ya bitumba.

9 Nsuka-nsuka Absalomi kutanaka ti bansadi ya Davidi. Absalomi vandaka kutambula na zulu ya mpunda, ebuna mpunda yina lutaka na nsi ya balutangu ya nene ya nti mosi ya nene, mpi ntu na yandi kangamaka na nti yina ya nene, ebuna yandi kumaka kulela na zulu* kansi mpunda yina yandi vandaka kutambusa vandaka kaka kukwenda. 10 Ebuna muntu mosi monaka mambu yina mpi songaka Yoabi+ nde: “Tala! Mono me mona Absalomi ke lela na zulu ya nti mosi ya nene.” 11 Yoabi vutudilaka muntu yina songaka yandi, nde: “Kana nge monaka mambu yina, sambu na nki nge fwaka yandi ve yandi bwa na ntoto na kisika yina? Ebuna mono zolaka kupesa nge na kiese yonso mbongo kumi ya bibende ti mukaba.” 12 Kansi muntu yina tubilaka Yoabi nde: “Ata kana bo pesaka mono* mbongo 1 000 ya bibende, mono lenda nangula ve diboko na mono sambu na kunwanisa mwana ya ntotila, sambu beto waka ntotila ke songa nge, Abishai ti Itai nde, ‘Beno vanda banani, beno keba leke Absalomi.’+ 13 Kana mono lemfukaka ve mpi fwaka yandi,* yo zolaka kubikala ve ata fioti ya kubumbana na ntotila, mpi nge zolaka kutanina mono ve.” 14 Yoabi tubaka nde: “Mono ta lutisa diaka ve ntangu ti nge!” Yo yina yandi bakaka badionga* tatu na diboko na yandi mpi kotisaka yo na ntima ya Absalomi ntangu yandi vandaka kaka na luzingu na kati-kati ya nti ya nene. 15 Ebuna bansadi kumi yina vandaka kunata binwaninu ya Yoabi kwisaka mpi bulaka Absalomi tii kuna yandi fwaka.+ 16 Ntangu yai Yoabi bulaka kibongo ebuna bantu yambulaka kulanda Izraele mpi bo vutukaka; Yoabi bingaka bo sambu bo bikisa. 17 Bo bakaka Absalomi, bo losaka yandi na dibulu mosi ya nene na mfinda mpi bo tulaka matadi mingi kibeni na zulu na yandi.+ Ebuna bantu yonso ya Izraele tinaka na banzo na bo.

18 Ntangu Absalomi vandaka na luzingu, yandi bakaka dikunzi mosi sambu na yandi mosi mpi tedimisaka yo na Muwanda* ya Ntotila,+ sambu yandi tubaka nde: “Mono kele ve ti mwana ya bakala yina ta sala nde bo yibuka zina na mono.”+ Yo yina yandi pesaka dikunzi yina zina na yandi, mpi bo ke bingaka yo Monima ya Absalomi tii bubu yai.

19 Ahimaasi+ mwana ya Zadoki tubaka nde: “Pardo, bika mono baka ntinu mpi mono pesa nsangu na ntotila, sambu Yehowa me pesa yandi lunungu na mutindu yandi me gulusa yandi na maboko ya bambeni na yandi.”+ 20 Kansi Yoabi tubilaka yandi nde: “Bubu yai nge ta vanda ve muntu ya ke nataka nsangu. Nge ta pesa nsangu kilumbu ya nkaka, kansi bubu yai nge ta pesa ve nsangu, sambu mwana ya ntotila me fwa.”+ 21 Ebuna Yoabi tubilaka muntu mosi ya Kushi+ nde: “Kwenda, songa ntotila mambu yina nge me mona.” Muntu ya Kushi niekaka na ntwala ya Yoabi mpi bakaka ntinu. 22 Ahimaasi mwana ya Zadoki tubilaka diaka Yoabi nde: “Ata mpidina, pardo bika mono mpi mono baka ntinu na nima ya muntu ya Kushi.” Kansi, Yoabi tubaka nde: “Mwana na mono, sambu na nki nge fwete baka ntinu ntangu nge kele ve ti nsangu ya kupesa?” 23 Kansi yandi tubaka nde: “Ata mpidina, bika mono baka ntinu.” Yo yina Yoabi tubilaka yandi nde: “Baka ntinu!” Ahimaasi bakaka ntinu na nzila yina ke nataka na distrike ya Yordani,* mpi nsuka-nsuka yandi kutaka muntu ya Kushi.

24 Davidi vandaka ya kuvanda na kati-kati ya bakielo zole ya mbanza,+ mpi nkengidi+ tombukaka na zulu ya ludi ya kielo yina kele pene-pene ya kibaka. Yandi talaka mpi monaka muntu mosi ke kwisa ntinu yandi mosi. 25 Yo yina nkengidi tubaka na ndinga ya ngolo mpi songaka ntotila. Ntotila tubaka nde: “Kana yandi kele yandi mosi, yandi kele ti nsangu ya kupesa.” Ntangu yandi vandaka kupusana kaka pene-pene, 26 nkengidi monaka muntu ya nkaka ke kwisa ntinu. Ebuna nkengidi tubilaka nkengidi ya kielo nde: “Tala! Muntu ya nkaka ke kwisa ntinu yandi mosi!” Ntotila tubaka nde: “Muntu yai mpi ke kwisa kunata nsangu.” 27 Nkengidi tubaka nde: “Mono ke mona nde muntu ya ntete ke baka ntinu bonso Ahimaasi+ mwana ya Zadoki,” yo yina ntotila tubaka nde: “Yandi kele muntu ya mbote, mpi yandi ke kwisa ti nsangu ya mbote.” 28 Ebuna Ahimaasi tubaka na ndinga ya ngolo na ntotila nde: “Mambu yonso kele mbote!” Yo yina yandi niekaka na ntwala ya ntotila luse na ntoto. Ebuna yandi tubaka nde: “Bika nde Yehowa Nzambi na nge kubaka lukumu, sambu yandi pesaka na maboko ya mfumu na mono ntotila bantu yina kolamaka* na yandi!”+

29 Kansi ntotila tubaka nde: “Keti mambu yonso kele mbote sambu na leke Absalomi?” Ebuna Ahimaasi tubaka nde: “Mono monaka bantu mingi ke tula makelele ntangu Yoabi tindaka nsadi ya ntotila mpi nsadi na nge, kansi mono zabaka ve yo vandaka nki.”+ 30 Yo yina ntotila tubaka nde: “Kwenda na lweka, telama awa.” Ebuna yandi kwendaka na lweka mpi telamaka pana.

31 Ebuna muntu ya Kushi kumaka+ mpi muntu ya Kushi tubaka nde: “Bika nde mfumu na mono ntotila kundima nsangu yai: Bubu yai Yehowa me sala mambu ti lunungu na mutindu yandi me gulusa nge na maboko ya bantu yonso yina kolamaka na nge.”+ 32 Kansi ntotila tubilaka muntu ya Kushi nde: “Keti mambu yonso kele mbote sambu na leke Absalomi?” Ebuna muntu ya Kushi tubaka nde: “Bika nde bambeni yonso ya mfumu na mono ntotila ti bantu yonso yina kolamaka na nge sambu na kusala nge mbi kukuma bonso leke yina!”+

33 Diambu yai yangisaka ntotila, ebuna yandi tombukaka na suku ya zulu yina vandaka na zulu ya munoko ya kielo mpi dilaka mpi yandi vandaka kutuba mutindu yai ntangu yandi vandaka kutambula: “Mwana na mono Absalomi, mwana na mono, mwana na mono Absalomi! A kana mono fwaka na kisika na nge, Absalomi mwana na mono, mwana na mono!”+