Baka Luzingu na Nge na Valere

“Menga ya Kristo . . . ta katula bisalu ya kukonda mfunu na ntima na beto, sambu nde beto mona mpila ya kusadila Nzambi ya moyo [kisalu ya santu, NW].”​—BAEBREO 9:14.

 1. Inki mambu kemonisaka nde beto kebakaka luzingu na valere mingi?

KANA bo yula nge na kupesa valere ya luzingu na nge, inki nge tatuba? Beto kebakaka luzingu na beto ti ya bantu yankaka na valere mingi. Sambu na kumonisa yo, beto kekwendaka na munganga sambu na kubaka lusansu kana beto kebela to sambu na kutadisa nitu mbala na mbala. Beto kezolaka kuzinga mpi kuvanda na mavimpi ya mbote. Ata bantu mingi yina menuna to ke na kifu na nitu kezolaka ve kufwa, kansi bo kezolaka kuzinga.

2, 3. (a) Bingana 23:22 ketubila nki dyambu ya konso muntu fwete sala? (b) Inki mutindu dyambu yina kele na Bingana 23:22 ketadila mpi Nzambi?

² Valere ya nge kepesaka na luzingu kevandaka na bupusi na bangwisana na nge ti bantu yankaka. Mu mbandu, Ndinga ya Nzambi ketuba nde: “Wila tata na nge [yina butaka nge, NW]. Kusaula mama na nge ve ntangu yandi me nuna.” (Bingana 23:22) ‘Kuwila’ ketendula mambu mingi kuluta kuwa bangogo mpamba. Kingana yai ketendula kuwa mpi na nima kulemfuka. (Kubasika 15:26; Kulonga 7:12; 13:18; 15:5; Yozue 22:2; Nkunga 81:14) Inki kikuma Ndinga ya Nzambi kepesa sambu na kuwila tata ti mama na nge? Yo kele ve kaka sambu tata ti mama na nge kele bambuta kuluta nge to nde bo mezaba mambu mingi. Kikuma ya yo kepesa kele nde bo bantu “butaka nge.” Ba Biblia yankaka kebalulaka verse yai nde: “Wila tata na nge yina kupesaka nge luzingu.” Yo yina, kana nge kebaka luzingu na nge na valere, yo tapusa nge na kulemfukila nto ya luzingu yango.

³ Ya kyeleka, kana nge kele Mukristu ya kyeleka, nge kendimaka nde Yehowa kele Nto ya luzingu na nge. Sambu na ngolo na yandi nge “ke na moyo.” Nge lenda ‘tambula’ mpi kuvanda na mawi. Na nzila na yandi nge “ke na luzingu” mpi nge lenda yindula to kuvanda na balukanu sambu na bilumbu kekwisa, yika mpi luzingu ya kukonda nsuka. (Bisalu 17:28; Nkunga 36:10; Longi 3:11) Na kuwakana ti Bingana 23:22, yo ke mbote na ‘kuwila’ Nzambi mpi kulemfukila yandi, kuvanda na mpusa ya kubakisa mpi kubika nde mutindu yandi kemonaka luzingu kutwadisa beto na kisika ya kutadila luzingu na mutindu yankaka.

Zitisa Luzingu

 4. Na luyantiku ya luzingu ya bantu, inki mutindu kuzitisa luzingu kukumaka dyambu mosi ya mfunu mingi?

⁴ Na luyantiku ya luzingu ya bantu, Yehowa kumonisaka pwelele nde yandi kupesaka ve bantu nswa ya kusadila (to kubebisa) luzingu sambu na konso kikuma yina mutindu bo mezola. Sambu na kimpala mpi makasi ya ngolo ya yandi vandaka na yo, Kaini kufwaka mpangi na yandi Abele ya kusalaka ve ata kima mosi ya mbi. Keti nge keyindula nde Kaini kuvandaka ti nswa ya kubaka desizio ya mutindu yina sambu na luzingu? Nzambi kuyindulaka ve mpidina. Yandi yulaka Kaini nde: “Nki yina ya nge me sala mpidina? Wa, menga ya leki na nge ke dila ngolo na meso na mono.” (Kuyantika 4:10) Simba nde menga ya Abele yina kutyamukaka na ntoto vandaka kumonisa luzingu na yandi, yina bo sukisaka na kintulumukina, mpi yo vandaka kulomba Nzambi na kuvutula mbela.​—Baebreo 12:24.

 5. (a) Inki nsiku Nzambi pesaka na ntangu ya Noa, mpi yo vandaka kutadila banani? (b) Na nki mutindu nsiku yai kuvandaka kitambi ya nene?

⁵ Na nima ya Mvula ya Ngolo, bantu kuyantikaka luzingu ya mpa ti bantu nana mpamba. Na dyambu mosi ya Nzambi kutubaka ya ketadila bantu yonso, yandi monisaka mambu mingi ya kemonisa valere ya yandi kepesaka na luzingu mpi menga. Yandi pesaka bantu nswa ya kudya mbisi, kansi yandi pesaka nsiku yai: “Ntangu yai mono me pesa beno bambisi yonso sambu na kudia, mutindu mono pesaka beno ntete matiti yonso ya mubisu. Kansi kima mosi mpamba ya beno lenda kudia ve yo yai: beno lenda kudia ve mbisi ti menga na yo sambu moyo kele na kati ya menga.” (Kuyantika 9:3, 4) Bayuda yankaka ketendulaka verse yai nde bantu fwete dya ve musuni to menga ya mbisi yina vandaka kaka na moyo. Kansi yo monanaka pwelele na nima nde kima ya Nzambi kubuyisaka vandaka kudya menga sambu na kubikala na luzingu. Dyaka, nsiku yina Nzambi kupesaka na Noa vandaka kitambi ya nene na kulungana ya lukanu na Yandi ya nene ya ketadila menga, disongidila lukanu mosi yina zolaka kupesa bantu nzila ya kubaka luzingu ya kukonda nsuka.

 6. Na nzila ya Noa, inki mutindu Nzambi kumonisaka dibanza na Yandi na yina metala valere ya luzingu?

⁶ Nzambi landaka na kutuba nde: “Menga ya myoyo na beno mono talomba yo. Mono talomba yo na maboko ya konso kigangwa ya kezinga; mpi na diboko ya muntu, na diboko ya konso muntu yina ya kele mpangi na yandi, mono talomba moyo ya muntu. Konso muntu yina mebasisa menga ya muntu, muntu yankaka tabasisa menga na yandi mosi, sambu Nzambi kusalaka muntu na kifwani na yandi.” (Kuyantika 9:5, 6, NW) Nge mebakisa na nsadisa ya mambu yai ya Nzambi ketuba na bantu yonso nde na meso na yandi menga ya muntu kemonisaka luzingu na yandi. Ngangi kepesaka muntu luzingu, mpi ata muntu mosi ve ke na nswa ya kukatula luzingu yango, yina menga kemonisaka. Kana muntu mosi kufwa muntu yankaka bonso Kaini, Ngangi kele na nswa ya ‘kulomba’ luzingu ya muntu yina.

 7. Sambu na nki beto fwete tula dikebi na mambu yina Nzambi kuzabisaka Noa sambu na menga?

⁷ Na nsadisa ya mambu yina yandi tubaka, Nzambi kubuyisaka bantu na kusadila menga na mutindu mosi ya mbi. Keti nge mekudiyulaka ntete sambu na nki Nzambi kupesaka nsiku yina? Dyaka, sambu na nki Nzambi kupesaka nsiku sambu na yina metala menga? Mvutu kesimba dilongi mosi ya kuluta mfunu ya Biblia. Yo kele dilongi mosi ya mfunu mingi na nsangu ya Bukristu, ata mabundu mingi kendimaka yo ve. Inki dilongi yango, mpi nki mutindu yo kesimba luzingu, badesizio, ti mambu ya nge kesalaka?

Inki Mutindu Kusadila Menga?

 8. Inki nsiku Yehowa kutulaka sambu na yina metala kusadila menga ntangu yandi pesaka Nsiku?

⁸ Yehowa kutubilaka mambu mingi ya metala luzingu mpi menga ntangu yandi pesaka bantu ya Izraele Nsiku ya Moize. Ntangu yandi salaka mpidina, yandi salaka kitambi yankaka sambu na kulungisa lukanu na yandi. Ziku nge kezaba nde Nsiku vandaka kulomba nde bantu kutambika na Nzambi bima bonso bambuma, mafuta, mpi vinu. (Levi 2:1-4; 23:13; Kutanga 15:1-5) Yo vandaka kulomba mpi kutambika bimenga ya bambisi. Sambu na yo Nzambi kutubaka nde: “Moyo ya konso kima ke vandaka na menga; yo yina mono tubaka nde beno fweti losa menga na zulu ya mesa-kimenga sambu mono landa masumu na beno diaka ve. Ya kieleka, sambu moyo ke vandaka na menga, yo yina mono ke lolulaka mbi ya muntu sambu na menga. Kisina yo yai mono tubaka na bantu ya Israele nde . . . muntu kudia menga ve ata fioti.” Yehowa kuyikaka nde kana muntu mosi, bonso muzombi to muntu mosi ya kesalaka bilanga, kufwa mbisi sambu na kudya, yandi fwete losa menga na yo na ntoto mpi kufika yo putulu. Ntoto kele kisika Nzambi ketulaka makulu, mpi ntangu muntu kelosa menga na ntoto, yandi kendima nde luzingu mevutuka na Muntu Yina Kepesaka Luzingu.​—Levi 17:11-13; Yezaya 66:1.

 9. Inki mutindu mosi kaka ya kusadila menga Nsiku kutubilaka, mpi lukanu na yo kuvandaka inki?

⁹ Nsiku yango kuvandaka ve kaka dyambu mosi ya bantu zolaka kuzitisa na kati ya dibundu mpi yina kuvandaka ve ti mfunu sambu na beto. Keti nge memona sambu na nki Nzambi kubuyisaka bantu ya Izraele na kudya menga? Nzambi tubaka nde: “Kisina yo yai mono tubaka na bantu ya Israele nde . . . muntu kudia menga ve ata fioti.” Kikuma yango kuvandaka inki? “Mono tubaka nde beno fweti losa menga na zulu ya mesa-kimenga sambu mono landa masumu na beno diaka ve.” Keti nge memona nde dyambu yai kesadisa beto na kubakisa sambu na nki Nzambi kusongaka Noa nde bantu fwete dya ve menga? Ngangi kubakaka lukanu ya kumona nde menga kele na valere mingi, yandi kubumbaka yo sambu na kusadila yo na mutindu mosi ya mbote yina tagulusa bantu mingi. Yo vandaka na mfunu mingi sambu na kulolula masumu. Yo yina, na nsi ya Nsiku, Nzambi kupesaka nswa ya kusadila menga kaka na zulu ya mesa-kimenga sambu na kulolula masumu ya bantu ya Izraele, yina vandaka kulomba ndolula na Yehowa.

10. Sambu na nki menga ya bambisi lendaka kulolula ve masumu kimakulu, kansi bimenga ya bo vandaka kupesa na ngidika ya Nsiku vandaka kuyibusa bo inki?

¹⁰ Dibanza yai kewakana ti malongi ya Bukristu. Ntangu yandi tubilaka ngidika yai ya Nzambi kusalaka na Nsiku, ntumwa Polo kusonikaka nde: “Bansiku ke songa nde mambu yonso ya nsiku me simba, menga ke katulaka nsiku yina kubika fioti na bamambu yonso. Nzambi ke lolulaka bantu kaka kana bo me pesa makabu ya menga.” (Baebreo 9:22) Polo kumonisaka yo pwelele nde bimenga ya Nzambi vandaka kulomba na bantu ya Izraele kukitulaka bo ve bantu ya kukuka, ya kukonda masumu. Yandi sonikaka nde: “Bantu ke yindulaka masumu na bo konso mvula sambu na makabu yina. Sambu menga ya ngombe ti menga ya nkombo yo lenda ve ata fioti kukatula masumu ya bantu.” (Baebreo 10:1-4) Ata mpidina, bimenga yina kuvandaka mfunu. Yo vandaka kuyibusa bantu ya Izraele nde bo vandaka bantu ya masumu mpi bo vandaka na mfunu ya kima mosi ya kuluta mfunu sambu na kubaka ndolula ya kimakulu. Kansi, kana menga yina vandaka kumonisa luzingu ya bambisi lendaka kulolula ve masumu ya bantu kimakulu, keti kele ti menga yankaka yina lendaka kusala yo?

Dibanza ya Muntu Yina Kepesaka Luzingu

11. Inki mutindu beto mezaba nde bimenga ya menga ya bambisi vandaka kubenda dikebi na kima mosi?

¹¹ Nsiku vandaka kubenda dikebi na kima mosi ya kuluta nene sambu na kulungisa luzolo ya Nzambi. Polo kuyulaka nde: “Sambu na nki Nzambi pesaka mpi Bansiku?” Yandi pesaka mvutu nde: “Yandi pesaka yo sambu [masumu ya bantu kumonana pwelele, NW], tii kuna ya muntu ya dikanda ya Abrahami yina bikaka kubutuka na nima na yandi ta kwisa, muntu yina bakaka mambu yina ya Nzambi silaka. Bawanzio bantu nataka Bansiku yina na muntu mosi [Moize] yina vandaka na kati ya Nzambi ti bantu.” (Galatia 3:19) Mutindu mosi, Polo kusonikaka nde: “Bansiku . . . me fwanana mbote-mbote ve na mambu ya kieleka; kansi yo kele kaka bonso kifwanisu ya mambote ke kwisa na ntwala.”​—Baebreo 10:1.

12. Na yina metala menga, inki mutindu beto lenda bakisa ntendula ya lukanu ya Nzambi?

¹² Na bunkufi beto memona nde na ntangu ya Noa, Nzambi kupesaka bantu nswa ya kudya mbisi sambu na kubikala na luzingu, kansi menga ve. Na nima, Nzambi kutubaka nde “moyo ya konso kima ke vandaka na menga.” Ya kyeleka, yandi bakaka lukanu ya kutadila menga bonso luzingu mpi yandi tubaka nde: “Mono tubaka nde beno fweti losa menga na zulu ya mesa-kimenga sambu mono landa masumu na beno diaka ve.” Kansi, yo vandaka dyaka ti ntendula yankaka ya kitoko na lukanu ya Nzambi. Nsiku vandaka kifwanisu ya mambu ya mbote yina zolaka kukwisa na ntwala. Inki mambu yango?

13. Sambu na nki lufwa ya Yezu kuvandaka mfunu?

¹³ Mambu yango ya kyeleka vandaka kutubila lufwa ya Yezu Kristu. Nge mezaba nde bo monisaka Yezu mpasi mpi bo fwaka yandi na zulu ya nti. Yandi fwaka bonso muntu mosi ya mbi. Polo kusonikaka nde: “Ntangu beto vandaka me baka ngolo ntete ve, Kristo fwaka sambu na beto bantu ya mbi na kilumbu yina ya Nzambi tulaka. . . . Nzambi songaka beto mutindu yandi ke zolaka beto: Kristo fwaka sambu na beto ntangu beto vandaka kaka bantu ya masumu.” (Roma 5:6, 8) Lufwa ya Kristu kupesaka nkudulu sambu na kufika masumu na beto. Nkudulu yango kele dilongi ya kuluta mfunu ya nsangu ya Bukristu. (Matayo 20:28; Yoane 3:16; 1 Korinto 15:3; 1 Timoteo 2:6) Inki kuwakana kele na kati ya nkudulu ti menga mpi luzingu, mpi nki mutindu yo ketadila luzingu na nge?

14, 15. (a) Inki mutindu bambalula mingi ya Efezo 1:7 ketulaka dikebi mingi na lufwa ya Yezu? (b) Inki dyambu ya metala Efezo 1:7 bantu lenda vidisa?

¹⁴ Mabundu mingi ketubilaka mingi lufwa ya Yezu, mpi bantu yina kesambilaka na mabundu yango ketubaka mambu bonso “Yezu kufwaka sambu na mono.” Tala mutindu ba Biblia mingi kebalulaka Efezo 1:7: “Yo kele na kati na yandi mpi na nzila ya lufwa na yandi beto mebakaka luguluku, disongidila, kukatula ya masumu na beto.” (The American Bible, ya Frank Scheil Ballentine, 1902) “Na nzila ya lufwa ya Kristu beto mekatukaka na kimpika, mpi Nzambi melolulaka masumu na beto.” (Today’s English Version, 1966) “Yo kele na kati mpi na nzila ya Kristu mpi kimenga ya luzingu na yandi yo yina beto mekatukaka na kimpika, kukatuka na kimpika yina ketendula ndolula ya masumu.” (The New Testament, ya William Barclay, 1969) “Nzambi melolulaka masumu na beto mpi mekatulaka beto na kimpika na nzila ya lufwa ya Kristu.” (The Translator’s New Testament, 1973) Mutindu nge lenda mona yo, ba Biblia yai kebenda dikebi mingi na lufwa ya Yezu. ‘Kansi,’ bantu yankaka lenda tuba nde, ya kyeleka lufwa ya ‘Yezu’ kele mfunu. Ebuna, inki kima kekonda na ba Biblia yai?

¹⁵ Ya kyeleka, kana nge vandaka kaka ti ba Biblia yai, nge zolaka kuvidisa dyambu mosi ya mfunu mingi, mpi yo lendaka kukangisa nge nzila na kubakisa nsangu ya Biblia. Ba Biblia ya mutindu yai kebumbaka dyambu yai nde na Masonuku ya kisina verse ya Efezo 1:7 kele ti ngogo mosi ya Kigreki yina ketendula “menga.” Yo yina, ba Biblia mingi, mu mbandu Traduction du monde nouveau, kebalulaka verse yai na sikisiki yonso mutindu yai: “Na nsadisa na yandi beto mekatukaka na kimpika na nzila ya nkudulu sambu na menga ya muntu yina, ee, ndolula ya bifu na beto, na kutadila kimvwama ya mambote na yandi yina bantu mefwana ve na kubaka.”

16. Bangogo “menga ya muntu yina” fwete yibusa beto nki mambu?

¹⁶ Bangogo “menga ya muntu yina” kele mfunu mingi mpi fwete yibusa beto mambu mingi. Yo lombaka mambu mingi kuluta lufwa ya muntu mosi, ata nkutu lufwa ya Yezu, muntu ya kukuka. Yandi lungisaka mambu yina vandaka kifwani na Nsiku, mingimingi na Kilumbu ya Ndolula. Na kilumbu yina ya nene, bo vandaka kutambika bambisi yina Nsiku kuponaka dezia. Na nima, nganga-Nzambi ya nene vandaka kunata ndambu ya menga na yo na Kisika ya Kuluta Santu ya tabernakle to tempelo, kisika yandi vandaka kumonisa yo na ntwala ya Nzambi, bonso nde nganga-Nzambi kuvandaka na ntwala na yandi.​—Kubasika 25:22; Levi 16:2-19.

17. Inki mutindu Yezu kulungisaka mambu yina vandaka kifwani ya mambu yina vandaka kusalama na Kilumbu ya Ndolula?

¹⁷ Mutindu Polo kutendulaka, Yezu kulungisaka mambu yina vandaka kusalama bonso kifwani na Kilumbu ya Ndolula. Ntetentete, yandi tubaka nde na Izraele nganga-Nzambi ya nene vandaka kukota na Kisika ya Kuluta Santu ti menga ya mbisi mbala mosi na mvula, sambu na kupesa makabu “sambu Nzambi kulolula yandi ti bantu ya nkaka sambu na masumu ya bo ke salaka kukonda kubakisa.” (Baebreo 9:6, 7) Na kuwakana ti mambu yina, na nima ya kufutumuka bonso mpeve, Yezu kukwendaka na zulu kibeni. Sambu yandi kumaka mpeve, yandi vandaka ve ti nitu ya kinsuni mpi menga, yandi lendaka kumonana na meso “ya Nzambi sambu na beto.” Inki yandi monisaka na Nzambi? Yandi pesaka ve kima mosi ya kinsuni kansi kima mosi ya mfunu mingi kibeni. Polo kuyikaka nde: “Kristo kwisaka sambu na kuvanda mfumu ya banganga-Nzambi . . . Kristo kotaka kaka mbala mosi na kisika ya kuluta nsiku, yandi pesaka makabu ya menga ya nkombo to ya mwana-ngombe ve; kansi yandi pesaka menga na yandi mosi makabu, ebuna yandi bakilaka beto kuguluka ya mvula na mvula. Bo ke losaka menga ya nkombo ti menga ya ngombe . . . sambu na kukatula nsiku na bo ya kinitu. Kana yo kele mpidina, tuba nde menga ya Kristo me luta ngolo diaka! Na Mpeve ya mvula na mvula Kristo kudipesaka na Nzambi bonso makabu ya kulunga. Menga na yandi ta katula bisalu ya kukonda mfunu na ntima na beto, sambu nde beto mona mpila ya kusadila Nzambi ya moyo.” Ya kyeleka, Yezu kupesaka Nzambi valere ya menga na yandi.​—Baebreo 9:11-14, 24, 28; 10:11-14; 1 Piere 3:18.

18. Sambu na nki mambu yina Biblia ketuba sambu na menga fwete vanda ti mfunu mingi sambu na Bakristu bubu yai?

¹⁸ Kyeleka yai ya mekatukaka na Nzambi kesadisa beto na kubakisa bunene ya mambu yina Biblia ketuba sambu na menga, disongidila, sambu na nki Nzambi ketadilaka yo mutindu yina, mutindu beto fwete tadila yo, mpi sambu na nki beto fwete zitisa bansiku yina Nzambi metulaka na yina metala mutindu ya kusadila menga. Kana nge tanga mikanda ya Masonuku ya Kigreki ya Bukristu, nge tamona bisika mingi yina ketubila menga ya Kristu. (Tala lupangu.) Yo kemonisa pwelele nde konso Mukristu fwete kwikila “na menga [ya Yezu] na yandi.” (Roma 3:25, NW) Beto kebaka ndolula mpi kekuma na ngemba ti Nzambi kaka “na nzila ya menga ya yandi [Yezu] tyamunaka.” (Kolosai 1:20, NW) Dyambu yai kele mpenza kyeleka sambu na bantu yina Yezu kusalaka na bo kuwakana ya sipesiale sambu na kuyala ti yandi na zulu. (Luka 22:20, 28-30; 1 Korinto 11:25; Baebreo 13:20) Yo kele mpi kyeleka bubu yai sambu na ‘kibuka ya nene,’ (NW) yina taguluka na ‘mpasi ya nene’ ya kekwisa mpi tabaka luzingu ya mvula na mvula na ntoto yina takituka paladisu. Na mutindu ya kifwani, bo ‘meyobisa bamvwela na bo na menga ya Mwana-dimeme.’​—Kusonga 7:9, 14.

19, 20. (a) Sambu na nki Nzambi kubakaka lukanu ya kupesa nsiku na mutindu ya kusadila menga, mpi nki mutindu beto fwete tadila yo? (b) Mpusa na beto fwete vanda ya kuzaba inki?

¹⁹ Yo ke pwelele nde menga kele ti mfunu mingi na meso ya Nzambi. Yo fwete vanda mpi mfunu mingi na meso na beto. Ngangi, yina kekudibanza-banzaka sambu na luzingu, kele na nswa ya kupesa bansiku na mutindu bantu fwete sadila menga. Sambu yandi vandaka kudibanza-banza mingi sambu na luzingu na beto, yandi bakaka lukanu ya kusadila menga kaka na mutindu mosi ya kuluta mfunu. Mutindu mosi yango mpamba kepesaka dibaku ya kubaka luzingu ya mvula na mvula. Mutindu yango ketadila kusadila menga ya Yezu yina kele na valere mingi. Beto fwete pesa mpenza matondo mingi na Yehowa Nzambi na mpila yandi sadilaka menga sambu na mambote na beto, disongidila menga ya Yezu, na mutindu yai ya kegulusa! Yo yina, beto fwete pesa matondo mingi na Yezu sambu yandi tyamunaka menga na yandi bonso kimenga sambu na beto! Ya kyeleka, beto lenda bakisa mawi yina ntumwa Yoane kumonisaka ntangu yandi tubaka nde: “Yesu Kristo ke zolaka beto, menga na yandi me katulaka beto na masumu na beto. Yandi me salaka na mpila nde beto vanda bamfumu kisika mosi ti yandi, yandi me kumisaka beto mpi banganga-Nzambi sambu na kusadila Tata na yandi Nzambi. Mbote lukumu ti ngolo kuvanda na Yesu Kristo mvula na mvula! Amen.”​—Kusonga 1:5, 6.

²⁰ Nzambi na beto ya kuluta mayele mpi Muntu ya Kepesaka Luzingu vandaka kuzaba banda ntama kisalu yai ya kegulusaka. Kansi, beto lenda kudiyula nde, ‘Inki bupusi dyambu yai fwete vanda na yo na badesizio mpi mambu ya beto kesala?’ Disolo ya kelanda tatubila ngyufula yai.

Inki Mvutu Nge Tapesa?

• Inki dilongi beto lenda baka na mutindu Nzambi ketadilaka menga na disolo yina ketubila Abele ti Noa?

• Ntangu yandi pesaka Nsiku, inki nsiku Nzambi tulaka na mutindu ya kusadila menga, mpi sambu na inki?

• Inki mutindu Yezu kulungisaka mambu yina vandaka kifwani ya mambu yina vandaka kusalama na Kilumbu ya Ndolula?

• Inki mutindu menga ya Yezu kegulusaka luzingu na beto?

[Lupangu ya kele na lutiti 12]

MENGA YA NANI KEGULUSAKA?

“Beno keba beno mosi, beno keba mbote-mbote mameme yina ya Mpeve ya Nzambi me pesaka beno na kutala. Beno keba mbote-mbote Dibundu yina ya Nzambi bakaka na menga ya mwana na yandi mpenza.”​—Bisalu 20:28.

“Ntangu yai, sambu na menga ya Kristo, Nzambi me ndima beto; mpidina Kristo ta gulusa beto mpenza na ndola yina ya Nzambi ta pesa beto na makasi na yandi.”​—Roma 5:9.

“Beno vandaka kuzaba ve muntu yina ya beno lenda tula ntima, beno vandaka kuzaba Nzambi mpi ve. Kansi, na kimvuka yina ya beno kele ti Yesu Kristo, beno bantu yina vandaka ntama ti Nzambi, ntangu yai beno me kuma penepene na yandi sambu na menga ya Kristo.”​—Efezo 2:12, 13.

“Sambu Kristo kele kiteso mosi mpenza, na luzolo na yandi mosi Nzambi. Na lusadisu ya Kristo, Nzambi vutulaka bima yonso na yandi mosi [na kutulaka ngemba na nzila ya menga ya yandi tyamunaka na zulu ya nti ya mpasi, NW].”​—Kolosai 1:19, 20.

“Yo yina, bampangi, sambu na menga ya Yesu beto ke na nswa ya kukota na kisika ya kuluta nsiku.”​—Baebreo 10:19.

“Beno zaba nki Nzambi futaka sambu na kukatula beno na luzingu ya mpamba-mpamba yina ya bankaka na beno bikisilaka beno. Yandi futaka ve kima yina ya ntalu na yo ke kulumukaka, . . . Kansi kima katulaka beno na luzingu yango kele makabu yai ya kuluta ntalu: menga ya Kristo, yina vandaka bonso mwana-dimeme mosi ya kukonda kifu ti ya kukonda batashe.”​—1 Piere 1:18, 19.

“Kana beto ke zingaka na mwini mutindu yandi mosi kele na mwini, beto kele kimvuka mosi ti bampangi na beto bakristo, menga ya Mwana na yandi Yesu mpi ke katulaka masumu na beto yonso.”​—1 Yoane 1:7.

“Nge me lunga na kubaka mukanda yai ti na kupasula bidimbu yina kele na zulu na yo. Sambu bo fwaka nge, ebuna na menga na nge, nge sumbaka bantu sambu na Nzambi, bantu ya makanda yonso, ya bandinga yonso ti ya bansi yonso.”​—Kusonga 5:9.

‘Muntu yina kefundaka bampangi na beto, bo mekula yandi na zulu. Bampangi na beto mebedisa yandi, bo menunga sambu na menga ya Mwana-dimeme ti sambu na mambu ya kyeleka ya bo vandaka kuzabisa bantu.’​—Kusonga 12:11.

[Kifwanisu ya kele na lutiti 10]

Na nzila ya Nsiku, Nzambi kumonisaka yo pwelele nde menga lenda sala kisalu ya kulolula masumu

[Kifwanisu ya kele na lutiti 11]

Na nzila ya menga ya Yezu, bantu mingi lenda guluka