“Nzambi Kele Zola”

“Muntu yina ke zolaka . . . ve, yandi zaba Nzambi ve, sambu Nzambi [kele zola, NW].”​—1 YOANE 4:8.

1-3. (a) Inki bangogo Biblia kesadila sambu na yina metala kikalulu ya zola ya Yehowa, mpi na nki mutindu bangogo yai kele mpenza ya kuswaswana? (b) Sambu na nki Biblia ketubaka nde “Nzambi kele zola”?

BIKALULU yonso ya Yehowa kele ya mbote mpenza, ya kukuka, mpi ya kebendaka bantu. Kansi zola kele kikalulu ya Yehowa yina kebendaka bantu kuluta bikalulu na yandi yankaka yonso. Kele ve ti kikalulu yankaka kebendaka beto ngolo mpenza na Yehowa bonso zola. Yo kele kyese na kuzaba nde zola kele mpi kikalulu na yandi ya kuluta mfunu. Inki mutindu beto mezaba yo?

² Sambu na yina metala zola, Biblia ketubaka kima mosi yina yo ketubaka ve sambu na bikalulu yankaka ya mfunu ya Yehowa. Masonuku ketubaka ve nde Nzambi kele ngolo to nde Nzambi kele lunungu to nkutu nde Nzambi kele mayele. Yandi kele ti bikalulu yina mpi yandi muntu kele nto ya bikalulu yina yonso tatu. Kansi, sambu na yina metala zola, 1 Yoane 4:8 ketuba kima mosi ya meluta mfunu kibeni: “Nzambi kele zola.” Ya kyeleka, zola kele mpenza kimuntu ya Yehowa. Na kutuba ya mbote beto lenda yindula mutindu yai: Ngolo ya Yehowa kesadisaka yandi na kusala. Lunungu na yandi ti mayele na yandi ketwadisaka mutindu ya yandi kesalaka. Kansi, zola ya Yehowa kepusaka yandi na kusala. Nkutu zola na yandi kemonanaka ntangu yonso na mutindu ya yandi kesadilaka bikalulu na yandi yina yankaka.

³ Bantu ketubaka mbala mingi nde kimuntu ya Yehowa kele mpenza ya zola. Yo yina, kana beto kezola kulonguka zola, beto fwete longuka mambu ya Yehowa. Bika beto tadila ntangu yai mwa mambu yina kemonisaka zola ya Yehowa ya kuluta nene.

Dyambu ya Kuluta Nene Yina Kumonisaka Zola

4, 5. (a) Inki dyambu ya kuluta nene memonisaka zola na luzingu ya bantu? (b) Sambu na nki beto ketuba nde ngwisana ya zola ya kuluta ngolo kele na kati ya Yehowa ti Mwana na yandi?

⁴ Yehowa memonisaka zola na mitindu mingi, kansi kele ti mutindu mosi meluta yina yankaka yonso. Inki yo? Mutindu yandi tindaka Mwana na yandi na kwisa kumona mpasi mpi kufwa sambu na beto. Beto lenda tuba na masonga yonso nde yai kele dyambu mosi ya kuluta nene ya kumonisaka zola na luzingu ya bantu. Sambu na nki beto ketuba mpidina?

⁵ Biblia kebinga Yezu nde “mbuta [“mwana ya ntete,” NW] ya bantu yonso ti ya bima yonso ya Nzambi salaka.” (Kolosai 1:15) Yindula ntete​—Mwana ya Nzambi vandaka kuzinga na ntwala nde bima yonso kugangama. Ebuna beto tatuba nde Tata kuzingaka bamvula ikwa kumosi ti Mwana? Bantu ya siansi yankaka ketubaka nde inza kele ti bamvula bamiliare 13. Ata bamvula yai kele ya kyeleka, yo mefwana ve na kuzaba bamvula ya Mwana ya Ntete ya Yehowa! Inki yandi vandaka kusala na nsungi ya bamvula yina yonso? Mwana yai kuvandaka “kapita ya kisalu” ya Tata na yandi. (Bingana 8:30; Yoane 1:3) Yehowa kusalaka kumosi ti Mwana na yandi sambu na kuganga bima yankaka yonso. Bo lutisaka bantangu ya kyese kibeni! Nani na kati na beto lenda bakisa bangwisana ya ngolo yina bo vandaka na yo na nsungi ya nda ya mutindu yai? Yo kele pwelele nde ngwisana ya zola ya kuluta ngolo kele na kati ya Yehowa Nzambi ti Mwana na yandi.

 6. Ntangu Yezu kubakaka mbotika, inki mutindu Yehowa kumonisaka mawi na yandi sambu na Mwana na Yandi?

⁶ Ata mpidina, Yehowa kutindaka Mwana na yandi na ntoto sambu na kubutuka bonso muntu. Ntangu Yehowa kusalaka mutindu yina, yo monisaka nde yandi ndimaka na kukonda kuzinga na kinduku ya ngolo ti Mwana na yandi ya zola na zulu na nsungi mosi ya bamvula mingi. Katuka kuna na zulu, Yandi vandaka kutala na dikebi yonso mutindu Yezu vandaka kuyela tii kuna ya yandi kumaka bakala ya kukuka kibeni. Ntangu yandi lungisaka bamvula 30, Yezu kubakaka mbotika. Na okazio yai, Tata kutubaka yandi mosi katuka kuna na zulu nde: “Yai kele Mwana na mono ya mono ke zolaka mingi. Mono ke na kiese mingi sambu na yandi.” (Matayo 3:17) Yo fwete vanda nde Tata na yandi kuwaka kyese mingi kibeni ntangu Yandi monaka nde Yezu kulungisaka na kwikama mpenza mambu yonso yina baprofete kutubaka sambu na yandi ti yina ya Nzambi kulombaka yandi na kusala!​—Yoane 5:36; 17:4.

7, 8. (a) Inki bampasi Yezu kumonaka na Nisani 14 ya mvu 33 ya T.B., mpi inki mutindu Tata na yandi ya zulu kudiwaka? (b) Sambu na nki Yehowa kupesaka nzila nde Mwana na yandi kumona mpasi mpi kufwa?

⁷ Kansi nki mutindu Yehowa kudiwaka na Nisani 14, ya mvu 33 ya T.B., ntangu bo tekaka Yezu mpi bo kangaka yandi na bantu ya nku? Ntangu bo vandaka kufinga Yezu, kulosila yandi mate, mpi kubula yandi makofi? Ntangu bo bulaka yandi bafimbu, yina kulwadisaka yandi bamputa bisakasaka na mukongo? Ntangu bo bulaka yandi bansonso, na maboko ti na makulu, sambu na kutedimisa yandi na nti mpi kubika yandi kaka pana na mpila nde bantu kuseka yandi? Inki mutindu Tata kudiwaka ntangu Mwana na yandi kudidilaka yandi na ntangu mpasi kulutanaka ngolo? Inki mutindu Yehowa kudiwaka ntangu Yezu kufwaka, mpi ntangu Mwana na Yandi ya yandi kezolaka mingi kuvandaka dyaka ve na luzingu sambu na mbala ya ntete banda bima yonso kugangamaka?​—Matayo 26:14-16, 46, 47, 56, 59, 67; 27:26, 38-44, 46; Yoane 19:1.

⁸ Sambu Yehowa kevandaka ti mawi, yo fwete vanda nde yandi waka mpasi ntangu Mwana na yandi kufwaka, kansi beto kele ve ti bangogo ya beto lenda sadila sambu na kumonisa yo. Kima ya beto lenda tuba kele mambu yina kupusaka Yehowa na kupesa nzila nde dyambu ya mutindu yina kusalama. Sambu na nki Tata kundimaka na kumona mpasi ya mutindu yina? Yehowa kesonga beto kima mosi ya mbote mpenza na Yoane 3:16, verse ya Biblia mosi ya mfunu mingi kibeni yina bantu mekumaka kubinga nde Evanzile ya fyoti. Yo ketuba nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” Kima kupusaka Nzambi na kusala mutindu yina kele zola. Yai kele zola mosi ya kuluta nene.

Mutindu Yehowa Kendimisaka Beto Zola na Yandi

 9. Satana kezolaka kundimisa beto nki sambu na yina metala mutindu Yehowa ketadilaka beto, kansi Yehowa kendimisa beto nde inki?

⁹ Kansi, ngyufula mosi ya mfunu kebasika. Keti Nzambi kezolaka mosi mosi na kati na beto? Bantu mingi lenda kundima nde Nzambi kezolaka bantu yonso na kimvuka mutindu Yoane 3:16 ketuba. Kansi, bo keyindulaka nde ‘Nzambi lenda kuzola mono ve.’ Ya kyeleka, Satana Dyabulu kesosaka mpenza kundimisa beto nde Yehowa kezolaka beto ve, mpi yandi kemonaka beto mfunu ve. Kansi, ata beto keyindula nde bo kezolaka beto ve mpi nde beto kele na mfunu ve, Yehowa kendimisa beto nde konso nsadi na yandi ya kwikama kele mfunu na meso na yandi.

10, 11. Inki mutindu kingana ya Yezu ya bamwano kemonisa nde beto kele mfunu na meso ya Yehowa?

¹⁰ Mu mbandu, tala bangogo ya Yezu yina kele na Matayo 10:29-31. Sambu na kumonisa nde balongoki na yandi kele mfunu, Yezu kutubaka nde: “Keti bo ke tekaka [bamwano, NW] zole . . . ve na kibende mosi ya fioti-fioti? Kansi ata ndeke [mwano] mosi lenda bwa ve na ntoto kana Tata na beno me ndima ntete ve. Ata nsuki na beno ya ntu, Nzambi me tangaka yo yonso. Yo yina, beno kuwa boma ve; ata [bamwano] kele mingi, kansi beno me luta bo na mfunu!” Beto tadila ntendula yina bangogo yai kuvandaka na yo sambu na bawi ya Yezu ya mvu-nkama ya ntete.

¹¹ Na kati ya bima ya kudya yina bo vandaka kuteka na ntangu ya Yezu, mwano vandaka kuta ntalu fyoti kibeni. Kana musumbi mepesa kibende mosi ya fyoti ya mbongo, bo vandaka kupesa yandi bamwano zole. Kansi na nima, na Luka 12:6, 7, Yezu kutubaka nde kana muntu kupesa bibende zole ya mbongo, bo vandaka kupesa yandi bamwano iya ve, kansi tanu. Musumbi vandaka kumona ndeke yina bo vandaka kuyika bonso nde yo vandaka kwa yo na mfunu ve. Mbala yankaka bandeke ya mutindu yina kuvandaka ve ti mfunu na meso ya bantu, kansi nki mutindu Ngangi vandaka kutadila yo? Yezu kutubaka nde: “Kansi Nzambi ke vilaka ata ndeke mosi ve [ata yina ya bo meyika na zulu].” Ntangu yai beto lenda yantika na kubakisa dyambu yina Yezu zolaka kutuba. Sambu Yehowa kemonaka mwano mosi nde yo kele mfunu mingi, si yandi fwete mona mpenza nde muntu kele mfunu mingi kuluta! Mutindu Yezu kutubaka, Yehowa mezaba mambu yonso ya metala beto. Nkutu yandi ketangaka ata nsuki ya ntu na beto!

12. Sambu na nki beto fwete ndima nde Yezu kutubaka kyeleka ntangu yandi tubaka nde Nzambi ketangaka bansuki ya ntu na beto?

¹² Bantu yankaka lenda tuba nde Yezu vandaka kulutisa na kutuba na yandi. Kansi, yindula fyoti lufutumuku. Si Yehowa fwete zaba beto mbotembote mpenza sambu na kufutumuna beto! Yandi kemonaka beto mfunu kibeni yo yina yandi keyibukaka mambu yonso ya metala beto, ata nkutu mutindu nitu ya konso muntu mesalamaka, ti mambu yonso ya beto mezabaka na nima ya bamvula mingi. Kutanga bansuki na beto, yina bantu ketubaka nde ntu ya muntu kevandaka na bansuki kiteso ya 100 000, kele kisalu mosi ya pete kibeni sambu na yandi. Bangogo ya Yezu kendimisa beto mpenza nde Yehowa kekudibanzaka sambu na konso muntu na kati na beto!

13. Inki mutindu mbandu ya Ntotila Yozafati kemonisa nde Yehowa ketalaka mambu ya mbote ya beto kesalaka ata beto kele bantu ya kukonda kukuka?

¹³ Biblia kesonga beto kima yankaka ya kendimisa beto nde Yehowa kezolaka beto. Yandi kesosaka mambu ya mbote ya beto kesalaka mpi yandi kemonaka yo mfunu. Baka mbandu ya Ntotila Yozafati. Ntangu Ntotila yai kusalaka kima mosi ya kukonda mayele, profete ya Yehowa kutubilaka yandi nde: “Sambu na mambu yai ya nge me sala, Mfumu Nzambi me wila nge makasi.” Kutuba yai kumonisaka mpenza nde yo vandaka dyambu mosi ya nsaka ve! Kansi nsangu ya Yehowa kusukaka pana ve. Yo landaka nde: “Kansi ata mpidina, mambu ya nkaka ya nge salaka kele ya mbote.” (2 Bansangu 19:1-3) Yo ketendula nde ata Yehowa kuvandaka ti kikuma ya kuwa makasi, yo kangisaka yandi ve meso na kumona ‘mambu ya mbote’ yina Yozafati kusalaka. Keti ntima na beto kele na kyese ve na kuzaba nde Nzambi ketalaka mambu ya mbote yina beto kesalaka ata beto kele bantu ya kukonda kukuka?

Nzambi Mosi Yina Kele ya “Kuyilama na Kulolula”

14. Kana beto mesala disumu, inki mawi ya mbi lenda kwisila beto, kansi nki mutindu Yehowa lenda lolula beto?

¹⁴ Kana beto mesala disumu, mawa, nsoni, ti mpasi yina beto kewaka kepusaka beto na kuyindula nde beto mefwana dyaka ve na kusadila Yehowa. Kansi, kuvila ve nde Yehowa kele ya “kuyilama na kulolula.” (Nkunga 86:5, NW) Ya kyeleka, kana beto mebalula ntima na masumu na beto mpi beto mesala ngolo sambu na kuvutukila yo dyaka ve, Yehowa lenda lolula beto. Tala mutindu Biblia ketendula mpila Yehowa kemonisaka mutindu ya zola yai ya nene.

15. Yehowa ketulaka masumu na beto na nki kitamina?

¹⁵ Muyimbi-bankunga Davidi kusadilaka bangogo ya mfunu kibeni sambu na kutendula mutindu Yehowa kelolulaka: “Mutindu este kele ntama na weste, mutindu yo yina mpi yandi ke losa ntama masumu na beto.” (Nkunga 103:12) Inki kitamina kekabisa este ti weste? Este kevandaka ntama mingi kibeni ti weste; bandambu yai yonso zole lenda kutana ve ata nki mutindu. Muntu mosi ya mayele kemonisa nde bangogo yai ketendula “ntama mingi kibeni; kitamina mosi ya kuluta ntama.” Bangogo ya kupemama ya Davidi kemonisa beto nde ntangu Yehowa kelolulaka, yandi ketulaka masumu na beto na kisika mosi ya kuluta ntama kibeni.

16. Kana Yehowa melolula masumu na beto, sambu na nki beto lenda kudiwa nde na nima na yo yandi takuma kumona beto bunkete?

¹⁶ Keti nge memekaka ntete na kukatula tashe na lele mosi ya mpembe? Mbala yankaka ata nge salaka yonso sambu na kukatula yo, yo vandaka kumonika kaka. Tala mutindu Yehowa ketendula ngolo na yandi ya kulolula: “Ata beno ke na batashe mingi ya mbwaki-mbwaki sambu na masumu na beno, mono ta kumisa beno mpembe mpenza bonso mvula ya neze, mono ta sukula beno beno kuma bonso mika ya mameme.” (Yezaya 1:18) Na ngolo na beto mosi, beto lenda kuka ve kukatula tashe ya disumu. Kansi, Yehowa lenda katula masumu yina kele mbwaki mingi mpi yandi kumisa yo mpembe bonso mvula ya mpembe to mika ya mameme yina bo metula ve mukubu. Yo ketendula nde kana Yehowa melolula masumu na beto, mfunu kele dyaka ve nde beto landa na kuyindula tashe ya masumu ya mutindu yina na luzingu na beto.

17. Kulosa ya Yehowa kelosa masumu na nima ya mukongo na yandi ketendula inki?

¹⁷ Na nkunga mosi ya kyese ya Ezekiasi kusonikaka sambu na kumonisa ntonda ntangu Nzambi kubelulaka yandi na maladi yina zolaka kufwa yandi, yandi tubilaka Yehowa nde: “Masumu na mono yonso nge [melosa yo na mukongo na nge, NW].” (Yezaya 38:17) Awa Biblia kemonisa nde Yehowa kubakaka masumu ya muntu yai kubalulaka ntima mpi yandi losaka yo na mukongo na Yandi kisika Yandi lendaka kumona yo dyaka ve to kuyindula yo. Mukanda mosi ya ketendulaka Biblia kemonisa nde, ngindu ya bo mesadila awa lenda tendula nde: “Nge mekumisa [masumu na mono] bonso nde yo vandaka ve.” Keti ngindu yai kepesa ve kikesa?

18. Inki mutindu profete Mishe kemonisa nde kana Yehowa melolula, Yandi kekatulaka masumu na beto kimakulu?

¹⁸ Na lusilu mosi ya Nzambi kupesaka na bantu na yandi yina yandi ndimaka dyaka, profete Mishe kumonisaka kivuvu ya ngolo ya yandi vandaka na yo nde Yehowa talolula masumu ya bantu na yandi: “Ata nzambi ya nkaka kele ve bonso nge . . . nge [kevidisaka masumu , NW] ya bantu na nge yai me bikala, . . . nge ta losa yo tii na nsi ya nzadi-mungwa.” (Mishe 7:18, 19) Yindula ntendula yina bangogo yai kuvandaka na yo na meso ya bantu yina vandaka kuzinga na ntangu ya ntama. Keti kivuvu kuvandaka ya kumona dyaka kima yina bo losaka na “nsi ya nzadi-mungwa”? Bangogo ya Mishe kemonisa mpenza nde ntangu Yehowa kelolulaka, yandi kekatulaka masumu na beto kimakulu.

‘Nzambi Yina Kewilaka Beto Mawa’

19, 20. (a) Kisongi-dyambu ya Kiebreo yina bo kebalulaka nde “kumonisa mawa” to “kufwila nkenda” ketendula inki? (b) Inki mutindu Biblia kesadila mawi ya mama kevandaka na yo sambu na bebe na yandi sambu na kulonga beto mawa ya Yehowa?

¹⁹ Mawa kele mutindu yankaka ya Yehowa kemonisaka zola na yandi. Mawa kele inki? Na kati ya Biblia, kuwakana ya ngolo kele na kati ya mawa ti nkenda. Bangogo mingi ya Kiebreo ti ya Kigreki kepesaka ngindu ya mawa. Mu mbandu, kisongi-dyambu ya Kiebreo ra·chamʹ bo kebalulaka yo mbala mingi nde “kumonisa mawa” to “kufwila nkenda.” Ngogo ya Kiebreo yai, yina Yehowa kesadila sambu na yandi mosi, kewakana ti ngogo yina bo kebalulaka nde “divumu” mpi yo lenda tendula “mawa yina mama kevandaka na yo sambu na bebe na yandi.”

²⁰ Biblia kesadila mawi yina mama kevandaka na yo sambu na bebe na yandi sambu na kulonga beto mawa ya Yehowa. Yezaya 49:15 ketuba nde: “Keti mama lenda vila mwana ya yandi ke nwisa mabele? Keti yandi lenda wa mawa [ra·chamʹ] ve sambu na mwana yina me basika na divumu na yandi? Ata mama kuvila mwana na yandi, kansi mono, mono ta vila beno ve ata fioti!” Yo kele mpasi na kuyindula nde mama kuvila na kudisa mpi kusungimina mwana ya yandi kenwisa mabele. Ya kyeleka, bebe kevandaka ve ti ngolo ya kuditanina; yandi kevandaka ti mfunu ya dikebi ya mama na yandi na mwini ti na mpimpa. Kansi, yo kele mawa na kumona nde bamama yankaka ketulaka ve dikebi na babebe na bo, mingimingi na ‘bilumbu yai ya nsuka.’ (2 Timoteo 3:1, 3) “Kansi,” Yehowa ketuba nde, “mono, ta vila beno ve ata fioti!” Mawa ya Yehowa kevandaka na yo sambu na bansadi na yandi kele mingi mpi yo meluta ntama mpenza mawa yina bantu lenda monisa, mu mbandu, mawa yina mama kemonisaka na bebe na yandi.

21, 22. Inki mambu bantu ya Izraele kukutanaka na yo na ntangu ya ntama na Ezipte, mpi nki mutindu Yehowa kumonisaka nde yandi waka bidilu na bo?

²¹ Inki mutindu Yehowa kemonisaka mawa bonso tata mosi ya zola? Kikalulu yai kemonana pwelele na mambu yina yandi vandaka kusadila bantu ya Izraele na ntangu ya ntama. Penepene na nsuka ya mvu-nkama ya 16 ya N.T.B., bantu ya Izraele mingi kuvandaka na kimpika na Ezipte, kisika bo vandaka kunyokula bo mingi kibeni. (Kubasika 1:11, 14) Bantu ya Izraele kudidilaka Yehowa sambu na bampasi na bo. Inki Nzambi ya mawa kusalaka sambu na kumonisa nde yandi waka bidilu na bo?

²² Yehowa kuwaka mawa mingi na ntima na yandi. Yandi tubaka nde: “Mono me mona mbote-mbote mutindu bantu na mono ke mona mpasi na nsi ya Ezipte; mono me wa mutindu bo ke diladila . . . mono me zaba bampasi na bo.” (Kubasika 3:7) Yo lendaka kusalama ve nde Yehowa kumona bampasi ya bantu na yandi mpi kuwa bidilu na bo kansi yandi kuditula ve na kisika na bo. Yehowa kele Nzambi mosi ya kekuditulaka na kisika ya bantu yankaka. Kikalulu yai kewakana mpenza ti kuwa mawa. Kansi, Yehowa kusukaka kaka ve na kuditula na kisika ya bantu na yandi; yandi sadisaka bo. Yezaya 63:9 ketuba nde: “Yandi mosi katulaka bo na kimpika sambu na [zola na yandi ti, NW] mawa ya yandi wilaka bo.” Na “ngolo na yandi,” yandi katulaka bantu ya Izraele na kimpika na Ezipte. (Kulonga 4:34) Na nima, yandi pesaka bo madya na mutindu mosi ya kuyituka mpi yandi pesaka bo ntoto mosi yina vandaka kubuta bambuma mingi.

23. (a) Inki mutindu bangogo ya muyimbi-bankunga kendimisa beto nde Yehowa kekudibanzaka mpenza sambu na muntu mosimosi na kati na beto? (b) Na nki mitindu Yehowa kesadisaka beto?

²³ Yehowa kewilaka bantu na yandi mawa kaka na kimvuka ve. Nzambi na beto ya zola kekudibanzaka sambu na muntu mosimosi na kati na beto. Yandi kezabaka mbotembote konso mpasi yina beto kemonaka. Muyimbi​—bankunga kutubaka nde: “Mfumu Nzambi ke talaka mbote bantu ya mbote, makutu na yandi ke waka kudila na bo. Mfumu Nzambi kele penepene na bantu yina ke na kikesa ve, yandi ke gulusaka bantu yonso yina me katulaka ntima.” (Nkunga 34:16, 19) Inki mutindu Yehowa kesadisaka muntu mosimosi na kati na beto? Yandi kekatulaka ve ntangu yonso mambu yina kenyokulaka beto. Kansi yandi meyidikaka mambu mingi sambu na kusadisa bantu yina kedidila yandi sambu na kulomba lusadisu. Ndinga na yandi kepesaka beto bandongisila yina lenda sadisa beto mingi kibeni. Na kati ya dibundu, yandi mepesaka beto bankengi ya kufwana, yina kesalaka yonso na kumonisa mawa na yandi sambu na kusadisa bankaka. (Yakobo 5:14, 15) Sambu Yandi “ke ndimaka bisambu ya bantu,” Yehowa kepesaka ‘mpeve santu na yandi na bantu yina ke lombaka yandi yo!’ (Nkunga 65:3; Luka 11:13) Mambu yai yonso kemonisaka ‘mawa ya Nzambi na beto.’​—Luka 1:78.

24. Inki mutindu nge tamonisa ntonda sambu na zola yina Yehowa memonisaka?

²⁴ Keti yo kele kyese ve na kumona zola ya Tata na beto ya zulu? Na disolo yina kuyitaka bo yibusaka beto nde Yehowa mesadilaka ngolo, lunungu, mpi mayele na yandi na mitindu ya zola sambu na mambote na beto. Ebuna na disolo yai, beto memona nde Yehowa yandi mosi kemonisaka zola na yandi na bantu yonso na kimvuka mpi na muntu mosimosi na mitindu ya mbote kibeni. Ntangu yai, yo tavanda mbote nde konso muntu na kati na beto kudiyula nde, ‘Inki mono tasala sambu na kumonisa ntonda na zola yina Yehowa memonisaka?’ Yo tavanda mbote nde nge zola yandi na ntima, na mabanza, mpi na ngolo na nge yonso. (Marko 12:29, 30) Bika nde luzingu na nge ya konso kilumbu kumonisa nde nge kele mpenza na mpusa ya kukwenda penepene na Yehowa. Bika mpi nde Yehowa, Nzambi yina kele zola, kupusana penepene ti nge banda bubu yai tii kuna mvula na mvula!​—Yakobo 4:8.

Keti Nge Keyibuka?

• Inki mutindu beto mezaba nde zola ya Yehowa kele kikalulu mosi ya kuluta nene?

• Sambu na nki beto lenda tuba nde kutinda ya Yehowa kutindaka Mwana na yandi na kunyokwama mpi na kufwa sambu na beto kemonisaka zola ya kuluta nene?

• Inki mutindu Yehowa kendimisa beto nde yandi kezolaka muntu mosimosi na kati na beto?

• Na nki mitindu ya pwelele Biblia ketendula kulolula ya Yehowa?

[Kifwanisu ya kele na lutiti 24]

“Nzambi . . . pesaka mwana mosi yina kele na yandi”

[Kifwanisu ya kele na lutiti 25]

“Beno meluta bamwano na mfunu”

[Bangogo ya kemonisa kisina ya foto]

© J. Heidecker/VIREO

[Kifwanisu ya kele na lutiti 26]

Mawa ya mama kevandaka na yo sambu na bebe na yandi lenda longa beto mawa ya Yehowa