DILONGI 40
Inki Beto Fwete Sala Sambu na Kuvanda Bunkete na Meso ya Nzambi?
Yindula nde mama mosi ya zola ke yidika mwana na yandi ya bakala sambu yandi kwenda na nzo-nkanda. Yandi ke tala-tala mwana yango sambu na kuzaba kana yandi me yobila mbote mpi kana bilele na yandi kele ya kuyidika mbote mpi bunkete. Mambu yai ya mama ke sala ke sadisaka mwana na kuvanda ti sante ya mbote mpi yo ke salaka nde bantu ya nkaka kumona nde bibuti na yandi ke kebaka yandi mbote. Bibuti ke zolaka nde bana na bo kuvanda bunkete. Yehowa Tata na beto, ke zolaka mpi nde beto vanda bunkete na nitu, na mambu ya beto ke yindula, ke tuba mpi ke sala. Kana beto kele bunkete, yo ta natila beto mosi mambote mpi yo ta kumisa Yehowa.
1. Inki beto fwete sala sambu na kuvanda bunkete na nitu?
Yehowa ke songaka beto nde: “Beno fwete vanda santu.” (1 Piere 1:16) Sambu na kuvanda santu, beto fwete vanda bunkete na nitu, na mambu ya beto ke yindula, ke tuba mpi ke sala. Beto ke vandaka bunkete, kana beto ke yobila mbala na mbala mpi ke sala yonso sambu bilele, nzo, kamio, moto, velo to bima na beto ya nkaka kuvanda bunkete mpi ya kuyidika mbote. Beto lenda pesa mpi maboko na bisalu ya kutula bunkete na Nzo ya Kimfumu. Beto ke pesaka Yehowa lukumu kana beto ke landa kuvanda bunkete na nitu.—2 Bakorinto 6:3, 4.
2. Inki bikalulu ya mbi beto fwete buya sambu na kuvanda bunkete?
Biblia ke lombaka beto na ‘kukatula na nitu na beto mvindu yonso ya kinsuni mpi ya mpeve.’ (2 Bakorinto 7:1) Yo yina, beto fwete buya konso kima yina lenda bebisa nitu to mabanza na beto. Beto fwete yindula mambu ya ke sepedisaka Yehowa, yo yina beto fwete sala yonso sambu na kubuya bangindu ya mbi. (Nkunga 104:34) Diaka, beto fwete sala yonso sambu mambu ya beto ke tuba kuvanda ya bunkete.—Tanga Bakolosai 3:8.
Inki diaka lenda sala nde beto vanda ve bunkete na nitu mpi na mambu ya beto ke yindula mpi ke sala? Bima ya nkaka lenda bebisa nitu na beto. Yo yina beto fwete buya bima yango, mu mbandu makaya mpi kusadila na mutindu ya mbi bima yina ke lawusaka (drogue). Kana beto ke buya bima yai, beto ta vanda ti sante ya mbote mpi beto ta monisa nde beto ke bakaka dikabu ya luzingu na valere. Diaka, beto ke salaka yonso sambu na kuvanda bunkete na mambu ya beto ke yindula mpi ke sala, kana beto ke buya bikalulu ya mbi ya kusakana ti kinama ya kuvukisila nitu mpi ya kutala pornografi.a (Nkunga 119:37; Baefezo 5:5) Yo lenda vanda mpasi na kuyambula bikalulu yai ya mbi. Kansi Yehowa lenda sadisa beto na kuyambula yo.—Tanga Yezaya 41:13.
LONGUKA MAMBU MINGI
Beto tala sambu na nki kuvanda bunkete na nitu ke pesaka Yehowa lukumu mpi mambu ya nge fwete sala sambu na kuyambula bikalulu ya mbi.
3. Kuvanda bunkete ke pesaka Yehowa lukumu
Bansiku yina Yehowa pesaka bantu ya Izraele ya ntangu ya ntama, ke sadisaka beto na kuzaba nde yandi ke zolaka nde bansadi na yandi kuvanda bunkete na nitu. Beno tanga Kubasika 19:10 mpi 30:17-19. Na nima beno pesa mvutu na bangiufula yai:
Inki mutindu baverse yai ke sadisa beto na kuzaba nde Yehowa ke zolaka nde bansadi na yandi kuvanda bunkete?
Inki mambu nge fwete sala mbala na mbala sambu na kuvanda bunkete na nitu?
Yo ke lombaka ntangu mpi bikesa sambu beto mpi bima na beto kuvanda bunkete. Kansi beto lenda vanda bunkete yo vanda beto ke zingaka na konso kisika yina to yo vanda beto kele bansukami to bamvwama. Beno tala VIDEO mpi na nima beno pesa mvutu na ngiufula ya ke landa.
Kana bima na beto kele ntangu yonso bunkete mpi ya kuyidika mbote, yo ke pusaka bantu yina beto ke longaka na kukumisa Yehowa. Sambu na nki?
4. Yambula bikalulu ya mbi
Yehowa ta sadisa beto na kuyambula konso kikalulu ya mbi
Kana nge ke nwaka makaya to ke sadilaka na mutindu ya mbi bima ya ke lawusaka, yo lenda vanda mpasi sambu nge yambula kikalulu yango. Kansi nki lenda sadisa nge na kuyambula yo? Yindula bampasi yina yo lenda natila nge na luzingu. Beno tanga Matayo 22:37-39 mpi na nima beno tubila mutindu makaya mpi kusadila na mutindu ya mbi bima ya ke lawusaka ke . . .
bebisaka kinduku ya muntu ti Yehowa
natilaka bantu ya dibuta mpi bantu ya ke zingaka ti yandi bampasi
Yindula mambu ya nge fwete sala sambu na kuyambula kikalulu mosi ya mbi.b Beno tala VIDEO.
Beno tanga Bafilipi 4:13 mpi na nima beno pesa mvutu na ngiufula yai:
Inki mutindu kuvanda ti kikalulu ya kusamba, ya kulonguka Biblia mpi ya kukwenda na balukutakanu lenda sadisa nge na kuyambula kikalulu mosi ya mbi?
5. Sala yonso sambu na kuyambula bangindu mpi bikalulu ya mbi
Beno tanga Bakolosai 3:5 mpi na nima beno pesa mvutu na bangiufula yai:
Inki mutindu beto me zaba nde kutala pornografi, kutinda ba message, bafoto mpi bavideo ya telemisaka nzala ya kuvukisa nitu mpi kikalulu ya mbi ya kusakana ti kinama ya kuvukisila nitu kele mbi na meso ya Yehowa?
Nge ke ndima nde yo kele mbote mutindu Yehowa ke lombaka beto na kuvanda bunkete na mambu ya beto ke yindula mpi ke sala? Sambu na nki?
Tala mambu ya nge fwete sala sambu na kukatula bangindu ya mbi. Beno tala VIDEO.
Yezu pesaka mbandu mosi sambu na kumonisa nde beto fwete baka lukanu ya kuvanda ntangu yonso bunkete na mambu ya beto ke yindula mpi ke sala. Beno tanga Matayo 5:29, 30 mpi na nima beno pesa mvutu na ngiufula yai:
Yezu zolaka kutuba ve nde beto fwete kudisala mbi kansi yandi zolaka kutuba nde beto fwete sala yonso sambu na kukatula bangindu ya mbi. Inki lukanu muntu fwete baka sambu na kubuya bangindu ya mbi?c
Kana nge ke sala yonso sambu na kukatula bangindu ya mbi, zaba nde Yehowa ke sepela ti bikesa yina nge ke sala. Beno tanga Nkunga 103:13, 14 mpi na nima beno pesa mvutu na ngiufula yai:
Kana nge ke sala yonso sambu na kuyambula kikalulu mosi ya mbi, nki mutindu baverse yai ke sadisa nge na kusala kaka ngolo?
Kubwa diaka ke tendula ve nde pana imene!
Nge lenda tuba nde, ‘Sambu mono me bwa diaka, pana imene.’ Kansi yindula mambu yai: Kana muntu mosi ya ke sala nsaka ya kubaka ntinu me tutana mpi me bwa, yo ke tendula ve nde yandi me bela na nsaka yina to mpi nde yandi ta telama ve sambu na kubaka diaka ntinu. Mutindu mosi mpi kana nge me bwa diaka na kikalulu mosi ya mbi, yo ke tendula ve nde nge ta kuka diaka ve kuyambula yo to mpi nde bikesa yonso yina nge me salaka dezia kele mpamba. Ya kieleka nge lenda bwa diaka. Yo yina kana nge me bwa diaka, kulemba ve nitu mpi kuyambula ve! Tula ntima nde Yehowa ta sadisa nge na kuyambula kikalulu yango ya mbi.
BANTU YA NKAKA KE TUBAKA NDE: “Mono me yikanaka dezia ti kikalulu yai ya mbi. Mono ta kuka diaka ve kuyambula yo.”
Inki verse ya Biblia nge lenda tangila muntu ya mutindu yai sambu na kumonisa yandi nde Yehowa ta sadisa yandi na kuyambula kikalulu yango ya mbi?
NA BUNKUFI
Beto ke pesaka Yehowa kiese kana beto ke landa kuvanda bunkete na nitu, na mambu ya beto ke yindula, ke tuba mpi ke sala.
Inki Nge Me Simba?
Sambu na nki kuvanda bunkete kele mfunu mingi?
Inki nge fwete sala sambu na kuvanda bunkete na nitu?
Inki nge fwete sala sambu na kulanda kuvanda bunkete na mambu ya nge ke yindula, ke tuba mpi ke sala?
TALA MPI
Tala mambu ya fioti-fioti ya nge lenda sala sambu na kuvanda bunkete na nitu ata nge kele ve ti mbongo mingi.
Kuyobisa Maboko Ke Sadisaka Beto na Kuvanda ti Sante ya Mbote mpi Bunkete (3:01)
Tala mambu ya mfunu ya nge fwete sala sambu na kukatuka na kimpika ya makaya.
“ Comment arrêter de fumer ” (Telama!, Mayi 2010 ya Kifalansa)
Tala bampasi yina kutala pornografi ke nataka.
“Pornografi—Nsaka to Ndikila?” (Nzozulu ya Nkengi, Augusti 1, 2013)
Tala mambu yina sadisaka bakala mosi na kuyambula kutala pornografi.
“Mono Bwaka Mbala Mingi, Kansi Mono Me Nungaka” (Nzozulu ya Nkengi No. 4 2016)
a “Pornografi” kele kutala bavideo mpi bafoto ya ke monisa bantu kinkonga to kutanga mikanda mpi kuwidikila bankunga yina ke telemisaka nzala ya kuvukisa nitu.
b “Sambu na kuzaba mambu ya mfunu yina muntu fwete sala sambu na kukatuka na kimpika ya makaya, tanga “Comment arrêter de fumer” na Telama! ya Kifalansa ya kele na kitini Tala Mpi ya dilongi yai.
c Sambu na kuzaba mambu ya muntu fwete sala sambu na kuyambula kikalulu ya mbi ya kusakana ti kinama na yandi ya kuvukisila nitu, tanga disolo “ Comment arrêter de me masturber ? ” na mukanda Bangiufula ya Baleke Ke Kudiyulaka—Bamvutu ya Ta Sadisa Nge, Volime 1, kapu 25 ya kifalansa.