Beno Vingila, Beno Tamona Mutindu Yehowa Tagulusa Beno!

“Beno ta telama kaka pana, beno vingila, beno ta mona mutindu mono ta gulusa beno.”​—2 BANSANGU 20:17.

1, 2. Sambu na nki bitumba ya ‘Gogi ya insi ya Magogi’ ya mefinama tasala mambu mingi ya mbi kuluta bitumba ya kiterorizme ya kenwanisa ntoto ya mvimba?

BANTU mingi ketendulaka kiterorizme bonso bitumba ya kenwanisa bantu yonso ya ntoto, ata nkutu luzingu ya bantu yina metomaka. Yo yina, beto fwete mona ve mpamba kigonsa yai. Kansi, kele na bitumba yankaka ya bantu ketudilaka ve dikebi ata fyoti, yina tasala nkutu mambu mingi ya mbi kuluta. Inki bitumba yango?

² Yo kele bitumba yina ‘Gogi ya insi ya Magogi’ tabasisa, yina Biblia ketubila na Ezekiele kapu 38. Keti yo ke kulutisa ndilu na kutuba nde bitumba yai tasala mambu mingi ya mbi kuluta bitumba ya kiterorizme yina kenwanisa ntoto ya mvimba? Ve, sambu bitumba ya Gogi kenwanisa ve kaka baluyalu ya bantu. Yo kenwanisa mpi luyalu ya zulu ya Nzambi! Bantu kenungaka ve ntangu yonso bitumba yina kenwanisaka baluyalu na bo, kansi Ngangi mefwana mpenza na kunwana mpi kununga bitumba ya kuluta mbi ya Gogi.

Yo Kenwanisa Luyalu ya Nzambi

 3. Inki bo lombaka bamfumu ya ntoto na kusala banda na mvu 1914, mpi nki mvutu bo pesaka?

³ Kukonda kuwakana na kati ya Ntotila ya Nzambi ya ke na kuyala ti ngidika ya mbi ya Satana meyantikaka banda ntangu Kimfumu ya Nzambi kuyantikaka kuyala na zulu na mvu 1914. Na ntangu yina, bo zabisaka bamfumu ya baluyalu ya bantu na kulemfuka na Mfumu yina Nzambi meponaka. Kansi bo buyaka na kusala yo, mutindu bo tubilaka yo dezia nde: “Bantotila na bo me yilama sambu na kunwana bitumba, bo ke zola kunwanisa Mfumu Nzambi ti ntotila ya yandi me tula. Bo ke tuba nde: ‘Beto katukeno na maboko na bo, beto buya nde bo yala beto.’” (Nkunga 2:1-3) Kukonda kulemfuka na kiyeka ya Kimfumu takuma mpenza na nsuka na yo na ntangu Gogi ya insi ya Magogi tabasisa bitumba na yandi.

4, 5. Inki mutindu bantu lenda nwanisa luyalu ya zulu ya Nzambi yina kemonanaka ve?

⁴ Beto lenda kudiyula nde nki mutindu bantu lenda nwanisa luyalu ya zulu ya kemonanaka ve. Biblia kemonisa nde luyalu yango kele ti bantu “mile nkama mosi makumi iya na iya (144 000) ya Mwana-dimeme katulaka na kimpika ya nsi-ntoto,” yina tayala kumosi ti “Mwana-dimeme,” Kristu Yezu. (Kusonga 14:1, 3; Yoane 1:29) Sambu luyalu yai ya mpa kele ya zulu, bo kebinga yo “zulu ya mpa,” ebuna bo kebingaka bantu ya yo tayala na ntoto nde “ntoto ya mpa.” (Yezaya 65:17; 2 Piere 3:13) Mingi na kati ya bamfumu 144 000 yina tayala ti Kristu memanisaka dezia luzingu na bo na zulu ya ntoto na kwikama yonso. Yo yina, bo memonisaka nde bo mefwana mpenza na kubaka mikumba na bo ya mpa na zulu.

⁵ Kansi, ndambu fyoti ya bantu yina 144 000 kele dyaka na ntoto. Na kati ya bantu kuluta 15 000 000 yina kuvukanaka na Madya ya Nkokila ya Mfumu ya mvu 2002, kaka bantu 8 760 kumonisaka kivuvu na bo nde bo meponaka bo sambu na kukwenda kusala na zulu. Konso muntu yina tameka kunwanisa bantu yina ya Kimfumu ya mebikalaka, yandi kenwanisa Kimfumu ya Nzambi.​—Kusonga 12:17.

Mfumu Menunga Kimakulu

 6. Inki mutindu Yehowa ti Kristu ketadilaka kimbeni yina bantu kemonisaka kontre bantu ya Nzambi?

⁶ Biblia kutubilaka dezia dyambu ya Yehowa tasala bambeni ya Kimfumu na yandi nde: “Kansi Mfumu Nzambi ke seka-seka bo; kuna na zulu na kiti na yandi ya kimfumu, yandi ke mona bo mpamba. Yandi ke tubila bo na makasi, yandi ke pesa bo boma, nde: ‘Na zulu ya ngumba na mono Sioni mono me tula ntotila ya mono me sola.’” (Nkunga 2:4-6) Ntangu melunga sambu na Kristu, ya kesala na lutwadisu ya Yehowa, “na kununga kimakulu.” (Kusonga 6:2, NW) Inki mutindu Yehowa kemonaka kimbeni yina bantu kevandaka na yo kontre bantu na yandi na ntangu ya kununga na yandi ya nsuka? Yehowa kemonaka yo bonso nde bo kenwanisa yandi mosi kibeni ti Ntotila na yandi ya keyala. Yehowa ketuba nde: “Konso muntu yina ke bula bantu na mono . . . , yandi ke bula mono mpi.” (Zakaria 2:12) Kansi Yezu kumonisaka pwelele nde yandi ketangaka mambu yina bantu kesalaka to kesalaka ve na bampangi na yandi bonso nde bo kesalaka to kesalaka yo ve na yandi.​—Matayo 25:40, 45.

 7. Sambu na nki bikuma Gogi kewilaka bantu yina kele na kati ya “kibuka ya nene” yina Kusonga 7:9 ketubila makasi?

⁷ Ya kyeleka, Gogi tawila mpi bantu yina kesadisaka ndambu ya bapakulami yina mebikalaka makasi. Bantu yina tavanda na zulu ya “ntoto ya mpa” ya Nzambi kele “kibuka mosi ya nene” ya mekatuka na ‘makanda yonso ti bandinga yonso mpi ya mekatuka na bansi yonso.’ (Kusonga 7:9) Biblia ketubila bo nde bo “me telama na ntwala ya kiti ya kimfumu ti na ntwala ya Mwana-dimeme. Bo me lwata bamvwela ya mpembe.” Yo kesonga nde Nzambi ti Kristu Yezu kendimaka bo. Bo mesimba ‘mandala ya diba na maboko na bo,’ mpi bo ketuba nde Yehowa mefwana na kuvanda mfumu ya ntoto ya mvimba, mpi nde kimfumu na yandi kemonana na luyalu ya Ntotila ya yandi metulaka, Kristu Yezu, “Mwana-dimeme ya Nzambi.”​—Yoane 1:29, 36.

 8. Bitumba ya Gogi tapusa Kristu na kusala inki, mpi yo tasuka nki mutindu?

⁸ Bitumba ya Gogi tapusa Ntotila yina Nzambi metulaka na kuyantika mvita ya Armagedoni. (Kusonga 16:14, 16) Bantu yina kebuya na kundima kimfumu ya Yehowa tafwa. Kansi, bayina vandaka kumona mpasi sambu na kwikama na bo na Kimfumu ya Nzambi taguluka kimakulu. Sambu na dyambu yai, ntumwa Polo kusonikaka nde: “Mpidina ke songa nde kusambisa yina ya Nzambi ke sambisaka bantu yo kele ya kieleka. Sambu beno ta lunga na kukota na Kimfumu na yandi sambu na bampasi yai yonso ya beno ke mona sambu na Kimfumu yina. Nzambi ta sala kaka mambu yina kele ya kieleka: Yandi ta monisa mpasi na bantu yina ke monisaka beno mpasi, ebuna yandi ta katula mpasi na beto ti mpasi na beno bantu yina ke monaka mpasi. Yandi ta sala yo ntangu Mfumu Yesu ta katuka na zulu sambu na kwisa kumonika ti bawanzio na yandi ya ngolo, na kati ya tiya yina ke pela ngolo, sambu na kupesa ndola na bantu yina ke kuzaba Nzambi ve, bayina ke zola kulanda ve Nsangu ya Mbote ya Mfumu na beto Yesu.”​—2 Tesalonika 1:5-8.

9, 10. (a) Inki mutindu Yehowa kunungisaka Yuda na ntwala ya mbeni mosi ya ngolo? (b) Inki Bakristu fwete landa na kusala bubu yai?

⁹ Na ntangu ya mpasi ya nene yina kekwisa, yina tasuka na Armagedoni, Kristu takatula mambi yonso. Kansi balongoki na yandi tavanda ve na mfunu ya kunwana, kaka mutindu yo vandaka na ntangu ya makanda zole ya kimfumu ya Yuda bamvula mingi meluta. Yehowa muntu kunwanaka, mpi yandi muntu kunungisaka bo. Disolo yango ketuba nde: “Mfumu Nzambi kumisaka basoda ya bambeni kisakasaka; bo yantikaka kunwana bo na bo. Bantu ya Amoni ti bantu ya Moabi nwanisaka basoda kimakulu. Na nima bo balukaka, ebuna bo kudifwaka bo na bo. Ntangu bantu ya Yuda kwisaka kukuma na kisika ya bo ke talaka ntoto ya zelo na zelo, bo losaka disu na ndambu vandaka bambeni na bo, ebuna bo monaka nde kaka bamvumbi na bamvumbi me lala na ntoto, ata muntu mosi ya moyo bikalaka ve.”​—2 Bansangu 20:22-24.

¹⁰ Mambu yonso kusalamaka kaka mutindu Yehowa kutubaka yo: “Beno ta vanda na mfunu ya kunwanisa bo ve.” (2 Bansangu 20:17) Yo kepesa Bakristu mbandu ya bo talanda ntangu Yezu Kristu “tanunga kimakulu.” Na ntwala nde mambu yai kulungana, bo kelanda kunwana ti mambi, ti minduki ya kinsuni ve, kansi ti minduki ya kimpeve. Ebuna bo ‘kesala mambu ya mbote sambu na kubedisa mambu ya mbi.’​—Roma 6:13; 12:17-21; 13:12; 2 Korinto 10:3-5.

Nani Tatwadisa Mvita ya Gogi?

11. (a) Inki bimvuka Gogi tasadila sambu na bitumba na yandi? (b) Kuvanda meso ya kukangula na kimpeve ketendula inki?

¹¹ Bo kebingaka Satana Dyabulu nde Gogi ya insi ya Magogi sambu na pozisio ya yandi kele na yo tuka bo mekulumusaka yandi na mvu 1914. Sambu yandi kele kigangwa ya kimpeve, yandi mosi lenda nwanisa ve bantu kimuntu-kimuntu, kansi yandi kesadilaka bimvuka ya bantu sambu na kusala mambu ya yandi kezola. Inki bimvuka yango? Biblia ketuba ve mambu yonso yina tasalama, kansi yo kepesa beto mwa mambu yina kesadisa beto na kuzaba bimvuka yango. Mutindu mambu ya inza ke na kulungisa bambikudulu ya Biblia, yo tasadisa beto na kubakisa yo mbote malembemalembe. Bansadi ya Yehowa kezolaka ve kutuba mambu yina bo kezaba ve, kansi bo kevandaka meso ya kukangula na kimpeve sambu bo kezabaka mbote mambu ya politiki ti ya mabundu yina ke na kulungisa bambikudulu ya Biblia.

12, 13. Na nki bangogo profete Daniele kutubilaka dezia bitumba ya nsuka yina Gogi tanwanisa bantu ya Nzambi?

¹² Profete Daniele kupesaka bansangu mingi yina ketadila bitumba ya nsuka yina Gogi tanwanisa bantu ya Nzambi ntangu yandi sonikaka nde: “Yandi [ntotila ya nordi] ta nwana na makasi yonso, yandi ta fwa-fwa bantu mingi. Yandi ta tunga banzo na yandi ya kimfumu kwaku nzadi-mungwa [ya nene], kwaku ngumba [ya santu] yina kele Nzo-Nzambi, yo na kati.”​—Daniele 11:44, 45.

¹³ Na ntangu ya Biblia, ‘nzadi-mungwa ya nene’ vandaka Nzadi-Mungwa ya Nene, to Nzadi-Mungwa ya Mediterane, ebuna ‘ngumba ya santu’ vandaka Sioni, yina Yehowa kutubilaka nde: “Na zulu ya ngumba na mono [ya santu] Sioni mono me tula ntotila ya mono me sola.” (Nkunga 2:6; Yozue 1:4) Yo yina, na ntendula mosi ya kimpeve, ntoto yina vandaka ‘kwaku nzadi-mungwa ya nene, kwaku ngumba ya santu, yo na kati,’ ketendula kimvwama ya kimpeve ya Bakristu ya kupakulama. Bo kele dyaka ve na kati ya nzadi-mungwa ya bantu yina mekabwanaka ti Nzambi, kansi bo kekinga kuyala kumosi ti Kristu Yezu na Kimfumu ya zulu. Yo ke pwelele nde, bansadi ya kupakulama ya Nzambi, kumosi ti bampangi na bo ya kele na kibuka ya nene, tavanda bantu yina mfumu ya nordi tanwanisa na ntangu ya bitumba na yandi ya mbi yina talungisa mbikudulu ya Daniele.​—Yezaya 57:20; Baebreo 12:22; Kusonga 14:1.

Inki Bansadi ya Nzambi Tasala?

14. Inki mambu tatu bantu ya Nzambi tasala ntangu bo tanwanisa bo?

¹⁴ Inki bansadi ya Nzambi tasala ntangu bo tanwanisa bo? Awa dyaka, mutindu dikanda ya Nzambi kusalaka na bilumbu ya Yozafati kepesa bo mbandu ya bo talanda. Simba nde bo lombaka bantu ya dikanda yango na kusala mambu tatu: (1) kutelama, (2) kuvingila, (3) kumona lugulusu ya Yehowa. Na kuwakana ti bangogo yai, inki bansadi ya Nzambi ya ntangu yai tasala?​—2 Bansangu 20:17.

15. Kutelama ketendula nki sambu na bantu ya Yehowa?

¹⁵ Kutelama: kukonda kutekita, bantu ya Nzambi talanda na kupesa maboko na kikesa yonso na Kimfumu ya Nzambi. Bo talanda na kukonda kukota na mambu ya politiki. Bo tavanda ‘ngolo bonso bantu yina lenda bwa ve’ na kisalu na bo ya kwikama na Yehowa mpi bo talanda na kupesa Yehowa lukumu na meso ya bantu yonso sambu na ntima na yandi ya mbote. (1 Korinto 15:58; Nkunga 118:28, 29) Ata dyambu mosi ve ya ntangu yai to ya bilumbu kekwisa tanata bo na kuvidisa pozisio ya kundimama na Nzambi.

16. Na nki mutindu bansadi ya Yehowa tavingila?

¹⁶ Kuvingila: Bansadi ya Yehowa tameka ve na kudigulusa bo mosi kansi bo tatula ntima na bo yonso na Yehowa. Sambu yandi kaka muntu mefwana na kugulusa bansadi na yandi na mambu ya mbi ya ke na kusalama na inza, mpi yandi silaka na kusala mutindu yina. (Yezaya 43:10, 11; 54:15; Mawa 3:26) Kutula ntima na Yehowa ketendula mpi kutula ntima na nzila ya kemonana ya ntangu yai ya yandi kesadilaka banda ntama sambu na kulungisa balukanu na yandi. Bakristu ya kyeleka fwete tula ntima na bampangi na bo yina Yehowa mepesaka nzila mpi na Ntotila yina ke na kuyala kuluta mutindu bo kesalaka yo ntete. Bantu yai ya kwikama tatwadisa bantu ya Nzambi. Kukonda kulanda lutwadisu na bo lenda nata na lufwa.​—Matayo 24:45-47; Baebreo 13:7, 17.

17. Sambu na nki bansadi ya kwikama ya Nzambi tamona lugulusu ya Yehowa?

¹⁷ Kumona lugulusu ya Yehowa: Lugulusu tavanda dikabu ya bantu yonso yina tavidisa ve kwikama na bo ya Bukristu mpi yina tatula ntima na Yehowa sambu na kuguluka tabaka. Tii na ngunga ya nsuka, mpi na kiteso ya bo lenda sala yo, bo tazabisaka kaka kukwisa ya kilumbu ya kusambisa ya Yehowa. Bigangwa yonso fwete zaba nde Yehowa kele Nzambi ya kyeleka mpi nde yandi kele ti bansadi ya kwikama na ntoto. Ntembe tavanda dyaka ve sambu na yina metala nswa yina Yehowa kele na yo ya kuvanda mfumu ya ntoto ya mvimba.​—Ezekiele 33:33; 36:23.

18, 19. (a) Inki mutindu nkunga ya kununga yina kele na Kubasika kapu 15 kemonisa kyese ya bantu yina taguluka na bitumba ya Gogi? (b) Inki dyambu bantu ya Nzambi mefwana na kusala ntangu yai?

¹⁸ Bantu ya Nzambi tavanda na kikesa mingi ya kukota na inza ya mpa, bo tavanda na mpusa ya ngolo ya kuyimba nkunga ya kununga, kaka mutindu bantu ya Izraele ya ntama kusalaka na nima ya luguluku na bo na Nzadi-Mungwa ya Mbwaki. Sambu na kumonisa ntonda ya mingi ya bo kele na yo na Yehowa sambu na lutaninu na yandi, konso muntu mpi bo yonso na kimvuka, tatuba na ndinga ya ngolo bangogo yai ya ntama: “Mono ke yimbila Mfumu Nzambi nkunga sambu yandi me songa lukumu na yandi ya nene-nene. . . . Mfumu Nzambi kele muntu ke nwanaka bitumba, zina na yandi [Yehowa]. . . . Mfumu, diboko na nge ya [kitata] kele ngolo mingi mpenza, yo ke fwaka-fwaka bambeni. Lukumu na nge kele ya kuyituka mpenza mutindu nge ke bedisaka bambeni na nge. Kana nge wa makasi, bo fweti zika bonso nianga ke zikaka na tiya. . . . Na ntima na nge ya mbote, nge songaka nzila na bantu ya nge katulaka na kimpika; na ngolo na nge, nge kwisaka kunata bo na kisika ya nge Nzambi kele. . . . Nge ke nata bantu na nge, nge ke tula bo na zulu ya ngumba na nge, kisika ya nge Mfumu yidikaka sambu na nge mosi, kisika ya nge tungaka nzo na maboko na nge mosi. Mfumu Nzambi, nge kele mfumu ya nene tii kuna.”​—Kubasika 15:1-19.

¹⁹ Sambu na kivuvu ya luzingu ya kukonda nsuka ya mekuma mpenza pwelele ntangu yai, yai kele ntangu ya mbote mpenza sambu na bansadi ya Nzambi ya kumonisa kukangama na bo na Yehowa mpi ya kubaka lukanu ya mpa ya kusadila Ntotila na bo ya mvula na mvula!​—1 Bansangu 29:11-13.

Keti Nge Lenda Tendula?

• Sambu na nki Gogi tanwanisa bapakulami ti mameme yankaka?

• Kutelema ya bantu ya Nzambi tatendula inki?

• Kuvingila ya bantu ya Nzambi tatendula inki?

• Inki mutindu bantu ya Nzambi tamona lugulusu ya Yehowa?

[Kifwanisu ya kele na lutiti 28]

Yehowa kunungisaka Yozafati ti bantu na yandi, mpi bo vandaka ve na mfunu ya kunwana

[Kifwanisu ya kele na lutiti 30]

Bapakulami ti mameme yankaka kekotilaka kimfumu ya Yehowa

[Kifwanisu ya kele na lutiti 31]

Bonso bantu ya Izraele ya ntama, kubika fyoti bantu ya Nzambi tayimba nkunga ya kununga