Yobi kuvibidilaka​—⁠Beto mpi lenda kuvibidila!

“Tala! Beto kebinga bayina ya kuvibidilaka bankwa mayangi.”​—⁠YAKOBO 5:​11, NW.

‘DYABULU ketungisa mono! Mono kekudiwa kaka mutindu Yobi vandaka kudiwa!’ Kele na bangogo ya mutindu yai Alexander Macmillan kumonisaka mawi na yandi na nduku mosi ya luzolo na nto ya Bambangi ya Yehowa. Mpangi Macmillan kumanisaka luzingu na yandi na zulu ya ntoto na Augusti 26, 1966 na bamvula 89. Yandi vandaka kuzaba nde nsendo sambu na kisalu ya kwikama ya bakristu ya kusolama bonso yandi zolaka “kufidisa bau kaka.” (Kusonga 14:13) Ya kyeleka, bansolami kefula kukonda kuyambula kisalu ya Yehowa na nzila ya lufutumuku na luzingu ya kukonda kufwa na zulu. Banduku na yandi kuyangalalaka na mpila mpangi Macmillan kubakaka nsendo yina. Kansi, na bamvula na yandi ya nsuka na zulu ya ntoto, yandi kunyokwamaka na mimekamu ya mingi, yika mpi bampasi ya mavimpi ya kuyibusaka yandi mpenza mimekamu ya Satana sambu na kubebisa kwikama na yandi na Nzambi.

² Ntangu Mpangi Macmillan kutubaka nde yandi vandaka kudiwa kaka mutindu Yobi vandaka kudiwa, yandi vandaka kutubila muntu mosi yina kuvibidilaka mimekamu mingi ya lukwikilu. Yobi zingaka na “ntoto ya Uzi,” ngatu na nordi ya Arabi. Mwana mosi ya dibuta ya mwana ya Noa yina mebingama Shemi, yandi vandaka nsambidi ya Yehowa. Mimekamu ya Yobi kemonana bonso yau kusalamaka mwa ntangu na kati ya lufwa ya Yozefi ti ntangu ya Moize kudimonisaka muntu ya mbote. Na nsungi yina, ata muntu mosi ve na zulu ya ntoto kuvandaka ya kukukana ti Yobi na yina metala vumi ya Nzambi. Yehowa vandaka kumona Yobi bonso muntu ya masonga, ya mbote, muntu ya kebangaka Nzambi.​—⁠Yobi 1:​1, 8.

³ Bonso “muntu ya kuluta nene na kati ya bantu ya ndambu ya Este yonso,” Yobi kuvandaka na bansadi mingi, mpi bitwisi na yandi kuvandaka 11500. Kansi bimvwama ya kimpeve kuvandaka ya kuluta mfunu sambu na yandi. Bonso batata ya vumi bubu yai, Yobi kulongaka mpenza bana na yandi ya babakala nsambwadi mpi ya bankento tatu mambu ya metala Yehowa. Ata ntangu bana na yandi vandaka kuzinga dyaka ve na nzo na yandi, yandi vandaka kusala bonso nganga-nzambi ya dibuta na kutambikaka bimenga sambu na bau, kana bau zolaka kusumuka.

⁴ Yobi kele muntu yina bakristu ya kenyokwama lenda kutadila na kudipesa kikesa sambu na kuvibidila na nzizidi. Longoki Yakobo kusonikaka nde: “Tala! beto kebinga bantu yina kuvibidilaka, bankwa mayangi. Beno waka mvibidulu ya Yobi mpi beno monaka nsukulu ya Yehowa kupesaka, mpi beno monaka nde Yehowa kele ya kufuluka na nkenda mpi na ntima ya mawa.” (Yakobo 5:​11, NW) Bonso Yobi, balongoki ya kusolama ya Yezu ti “kibuka ya nene” ya bubu yai kele na mfunu ya kuvibidila sambu na kununga mimekamu ya lukwikilu na bau. (Kusonga 7:​1-9) Ebuna, inki mimekamu Yobi kuvibidilaka? Sambu na inki yau salamaka? Mpi inki mutindu beto lenda kubaka mambote ya disolo ya bampasi na yandi?

Ngyufula ya Kuluta Mfunu

⁵ Yobi vandaka kuzaba ve nde kubika fyoti ngyufula ya mfunu tabasisama na zulu. Kilumbu mosi “bana ya Nzambi ya kyeleka kukotaka sambu kutelema na ntwala ya Yehowa.” (Yobi 1:​1-3, NW) Mwana ya Nzambi mosi kaka, Ndinga, kuvandaka pana. (Yoane 1:​1-3) Bawanzyo ya bulemfu mpi kuvandaka pana ti bawanzyo ya bankolami, ‘bana ya Nzambi’. (Kuyantika 6:​1-3) Satana kuvandaka pana, sambu kukulama na yandi na zulu lendaka kusalama ve na ntwala ya kutulama ya kimfumu na 1914. (Kusonga 12:​1-12) Na ntangu ya Yobi, Satana zolaka kubasisa ngyufula mosi ya kuluta mfunu. Yandi vandaka ya kuyilama na kutula na mbefula kiyeka ya kimfumu ya Yehowa na zulu ya bigangwa na yandi yonso.

⁶ Yehowa kuyufulaka nde: “Nge mekatuka na wapi?” Satana kuvutulaka nde: “Na kukangalakangala na zulu ya ntoto mpi na kuzyunga pana.” (Yobi 1:​7, NW) Yandi vandaka kusosa muntu ya kudya. (1 Piere 5:​8, 9) Na kubebisaka kwikama ya bansadi ya Yehowa, Satana vandaka kusosa na kumonisa nde ata muntu mosi ve talemfukila mpenza Nzambi na zola. Na kutubilaka ngyufula yango, Yehowa kuyufulaka Satana nde: “Keti nge monaka nsadi na mono Yobi, nde ata muntu mosi ve na zulu ya ntoto kele bonso yandi, muntu ya masonga mpi ya mbote, ya kebangaka Nzambi mpi ya ketinaka mambi?” (Yobi 1:​8, NW) Yobi vandaka kulungisa malombilu ya Nzambi yina vandaka kutadila bifu na yandi. (Bankunga 103:​10-14) Kansi Satana kuvutulaka nde: “Keti Yobi kebangaka Nzambi mpamba? Keti nge mosi metulaka ve lupangu na nzyunga na yandi mpi na nzyunga ya nzo na yandi, mpi na nzyunga ya bima yonso yina kele na nzyunga na yandi? Kisalu ya maboko na yandi, nge mesakumunaka yau, mpi bitwisi na yandi meyalumukaka na zulu ya ntoto.” (Yobi 1:​9, 10, NW) Na bangogo yai, Dyabulu kukusilaka Yehowa na kumonisaka nde ata muntu mosi ve kezolaka mpi kesambilaka Yandi sambu na yina Yandi kele kansi nde Yandi kekusaka bigangwa na yandi sambu bau kusadila yandi. Satana kubulaka ntulu nde Yobi vandaka kusadila Nzambi sambu na nduta ya bwimi, sambu na zola ve.

Satana Kenwanisa!

⁷ Satana kutubaka nde: “Kansi, sambu na kusoba, tandula diboko na nge, kana nge mezola, mpi simba na yonso yina kele na yandi mpi tala kana yandi tafinga nge ve na ntwala na nge.” Inki mutindu Nzambi zolaka kuvutula mvutu na kusosila ya mutindu yina? Yehowa kutubaka nde: “Tala! Bima yonso yina yandi kele na yau kele na diboko na nge. Kaka kutandula ve diboko na nge na yandi mosi!” Dyabulu kutubaka nde yonso ya Yobi vandaka na yau vandaka ya kusambulama, ya kubilama, mpi ya kutaninama bonso na lupangu. Nzambi zolaka kupesa nzila nde Yobi kumona mpasi, kansi nitu na yandi zolaka kusimbama ve. Ti lukanu ya kusala mambi, Satana kukatukaka na lukutakanu.

⁸ Nswalu, ndwanisa ya Satana kuyantikaka. Mosi na kati ya bansadi ya Yobi pesaka yandi nsangu yai ya mbi nde: “Bangombe vandaka na kubundula na bilanga mpi bampunda vandaka kuluta na lweka na bau, ntangu bantu ya Saba mekwisa kunwanisa beto mpi bau mebaka yau, mpi bau mefwa bansadi na nge na mbele ya makasi.” (Yobi 1:​13-15, NW) Lutaninu kukatulamaka na nzyunga ya bima ya Yobi. Ziku na mbala mosi, ngolo ya mpeve ya mbi vandaka kusala, sambu nsadi ya nkaka kwisaka kutuba nde: “Tiya ya Nzambi mekatuka na mazulu mpi meyantika kupela na kati ya mameme ti bansadi mpi yau memina bau.” (Yobi 1:​16, NW) Yau vandaka kibeni mayele ya mbi ya Dyabulu! Sambu na kumonisa nde Nzambi kuvandaka kisina ya bampasi ya mutindu yina, ya kubwilaka nkutu ata nsadi na yandi mosi! Sambu nzasi kekatukaka na zulu, yau zolaka kuvanda mpasi ve na kufunda Yehowa, kansi na masonga yonso tiya kukatukaka na mpeve ya mbi.

⁹ Bonso Satana kulandaka ndwanisa na yandi, nsadi ya nkaka kutubaka nde bantu ya Kaldea kubotulaka bashamo ya Yobi mpi kufwaka bansadi ya nkaka yonso. (Yobi 1:​17, NW) Nkutu ata Yobi kuzwaka kubwa ya kimvwama ya mutindu yina, yau kubebisaka ve kuwakana na yandi ti Nzambi. Keti nge lenda kuvibidila mvidisa ya nene ya bima kukonda kubebisa kwikama na nge na Yehowa?

Mpasi ya Kuluta Ngolo

¹⁰ Dyabulu kusukisaka ve na kunwanisa Yobi. Nsadi ya nkaka kutubaka dyaka nde: “Bana na nge ya babakala ti ya bankento vandaka kudya mpi kunwa malafu na kati ya nzo ya mpangi na bau, mwana ya ntete. Mpi, tala! mupepe ya ngolo katukaka na ndambu ya nsi ya makanga, mpi yau kwendaka kubula bafuma yonso iya ya nzo, na mpila nde yau kubwaka na zulu ya batoko mpi bau kufwaka. Mpi mono nungaka na kutina, kaka mono mosi, sambu na kusonga nge.” (Yobi 1:​18, 19) Muntu ya bau metendudila mbote ve lenda kutuba nde mpasi ya mupepe yina kunataka vandaka ‘kima ya Nzambi kusalaka.’ Kansi, kuvandaka ngolo ya mpeve ya mbi kunwanisaka Yobi na mawi yina yandi vandaka na yau mpenza mfunu.

¹¹ Ya kufuluka na mawa, Yobi “kupasulaka bilele na yandi mpi kuzengaka bansuki na yandi na zulu ya ntu na yandi, mpi kuvandaka na ntoto, mpi yandi kufukamaka.” Kansi, widikila bangogo na yandi: “Yehowa yandi mosi kupesaka mpi Yehowa yandi mosi mebaka. Bika zina ya Yehowa kulanda na kuzitisama.” Disolo keyika nde: “Na yonso yina Yobi kusumukaka ve to kupesaka ve ata kima mosi ya mbi na Nzambi.” (Yobi 1:​20-22, NW) Satana kubelaka dyaka. Ebuna beto bansadi ya Nzambi inki beto tasala kana beto fwete kukutana na mafwa ti mawa? Kukangama na beto ya kukonda nduta na Yehowa mpi kutula ntima na beto na yandi lenda kusadisa beto na kuvibidila ti kwikama, kaka bonso Yobi kusalaka. Bansolami ti bankundi na bau yina kele ti kivuvu ya kuzinga na zulu ya ntoto, bau lenda kubaka mpenza nsyamisa mpi kikesa na disolo yai ya mvibidulu ya Yobi.

Ngyufula Mekuma Ngolo

¹² Ntama mingi ve, Yehowa mebingisa dyaka lukutakanu ya nkaka na kati ya zulu. Yobi kukumaka ya kukonda bana, nsukami mpi, yau kemonana bonso nde, yonso yina vandaka kukatuka na Nzambi, kansi kwikama na yandi kunikanaka ve. Ya kyeleka, Satana lendaka kundima ve nde balufundu na yandi ya Nzambi ti Yobi vandaka ya luvunu. Ntangu yai ‘Bana ya Nzambi’ vandaka ya kuyilama sambu na kuwa bangindu mpi na kumona Yehowa kunata Dyabulu sambu na kupesa mvutu ya nsuka na ngyufula ya kubasisamaka.

¹³ Na kubingaka Satana sambu na kupesa bakonti, Yehowa kuyufulaka nde: “Na wapi nge mekatuka?” Inki kuvandaka mvutu? “Na kukangalakangala na zulu ya ntoto mpi na kuzyunga na zulu na yau.” Yehowa kubendaka dyaka dikebi na yandi na zulu ya nsadi na yandi ya mbote, ya lunungu, ya kebangaka Nzambi, Yobi yina vandaka kusyamina kwikama na yandi. Dyabulu kuvutulaka nde: “Mpusu ya nitu sambu na mpusu, mpi yonso ya muntu kele na yau yandi tapesa yau sambu na moyo na yandi. Sambu na kusoba, tandula diboko na nge, kana nge mezola, mpi simba tii na mukwa na yandi ti na nsuni na yandi, mpi tala kana yandi tafinga nge ve na ntwala na nge.” Ebuna Nzambi kutubaka nde: “Yandi yai na maboko na nge! Kaka keba na moyo na yandi!” (Yobi 2:​2-6, NW) Satana vandaka kumonisa nde Yehowa kukatulaka ve kimakulu lutaninu ya yandi vandaka kupesa Yobi, mpi yandi vandaka kulomba nde mukwa na yandi ti nsuni na yandi kusimbama. Dyabulu kubakaka ve nswa ya kufwa Yobi, kansi yandi vandaka kuzaba nde maladi ya kinsuni tanyokula yandi mpi tandimisa nde Nzambi vandaka kupesa yandi ndola sambu na mwa masumu ya kubumbana.

¹⁴ Ya kukulama na lukutakanu yina, Satana kusadilaka bansosa ya nku. Yandi losilaka Yobi “maladi ya bivimbu, tuka na nsi ya kitambi na yandi tii na ntu.” Mpasi ya inki mutindu Yobi kuvibidilaka, ya kufonga na kati ya putulu ya tiya, na kudikwanzaka ti kipesi ya nzungu! (Yobi 2:​7, 8) Ata munganga mosi ve ya muntu lendaka kunatina yandi ndembikilu na maladi yina ya ngolo, ya mpasi, ya nzanzi, ya nsoni, kadi yau kukatukaka na ngolo ya Satana. Kaka Yehowa muntu lendaka kubelula Yobi. Kana nge kele nsadi ya Nzambi ya mebakama na maladi, kuvila ve ata fyoti nde Nzambi lenda kusadisa nge na kuvibidila mpi lenda kupesa nge luzingu na kati ya nza ya mpa, kisika maladi tavanda ve.​—⁠Bankunga 41:​1-3; Yezaya 33:⁠24.

¹⁵ Na nsukansuka, nkento ya Yobi kutubaka nde: “Keti nge kesyamina kaka kwikama na nge? Finga Nzambi mpi fwa!” Ngogo “kwikama” kemonisa ngindu ya kukangama ya kukonda kifu, mpi ziku yandi tubaka na mutindu mosi ya kuvweza sambu na kupusa bakala na yandi na kufinga Nzambi. Kansi yandi kuvutulaka nde: “Nge ketuba mutindu ketubaka nkento ya kizengi. Keti beto fwete kundima kaka mambu ya mbote ya kekatuka na Nzambi ya Kyeleka mpi beto tandima ve bampasi yina kekatuka na Nzambi?” Mayele ya Satana yai kubelaka bonso ya nkaka, sambu disolo kemonisa mbotembote nde: “Na yonso yai Yobi kusumukaka ve na bikobo na yandi.” (Yobi 2:​9, 10, NW) Yindula kana bamambere ya dibuta na beto ya keyinaka lusambu ya kyeleka kutubila beto nde beto kelawuka na kudilembisaka na bisalu ya bukristu mpi ketindika beto na kubuya Yehowa Nzambi. Bonso Yobi, keti beto lenda kuvibidila mumekamu ya mutindu yina sambu beto kezolaka Yehowa mpi beto kezolaka kukembisa zina na yandi ya santu?​—⁠Bankunga 145:​1, 2; Baebreo 13:⁠15.

Bakusi Tatu ya Luvwezo

¹⁶ Na yina kwisaka kumonana pula ya mpa ya Satana, “bankundi” tatu kwisaka, bonso sambu na kusyamisa yandi. Mosi kuvandaka Elifazi, yau kemonana bonso nde yandi kele mwana ya Abrahami na nzila ya Ezau. Sambu Elifazi muntu ya ntete kubakaka ndinga na kutuba, yau kemonana nde yandi vandaka mbuta. Bildadi mpi kuvandaka pana, yina vandaka mwana ya dibuta ya Kwah, mosi na kati ya bana ya Abrahami na nzila ya Ketura. Muntu ya tatu kuvandaka Zofare, ya mebingama muntu ya Namati na kutadilaka dibuta na yandi to kisika na yandi ya kuzingila, mbala ya nkaka na ndambu ya nordi-este ya Arabi. (Yobi 2:11; Kuyantika 25:​1, 2; 36:​4, 11) Bonso bayina kemeka kupusa Bambangi ya Yehowa na kubuya Nzambi bubu yai, kibuka ya bantu yai tatu kupusamaka na mayele ya Satana sambu na kundimisa Yobi na mambi yina ya bau vandaka kukusila yandi mpi na kubebisa kwikama na yandi.

¹⁷ Bantu yai tatu kumonisaka mawa na bau na nsaka mpenza na kudilaka, na kupasulaka bilele na bau, mpi na kulosaka putulu na zulu ya bantu na bau. Kansi na nima bau bikalaka ya kuvanda ti Yobi bilumbu nsambwadi mpi bampimpa nsambwadi kukonda kutuba ata ngogo mosi ya kusyamisa! (Yobi 2:​12, 13; Luka 18:​10-14) Bakusi yai tatu kukondaka kimpeve na mpila nde bau vandaka ve ata na ngogo mosi ya kusyamisa sambu na kutuba mambu na yina metala Yehowa mpi balukanu na yandi. Kansi, bau vandaka kubasisa bansukila ya mbi mpi bau vandaka kuyilama na kusadila yau na Yobi sambu bau kumanisa ntangu ya nkinsi ya mawa na meso ya bantu. Yau kele mfunu na kusimba nde, na ntwala ya nsuka ya bilumbu nsambwadi ya kuvanda mpima, toko Eliwu kuvandaka kisika yina ya yandi fwete kuwa mambu yonso.

¹⁸ Na nsukansuka Yobi kuzengaka mpima yina. Kutala ya bantu yai tatu kunatinaka yandi ata nsyamisa ve, Yobi singaka kilumbu ya lubutuku na yandi mpi kudiyufulaka sambu na inki luzingu na yandi ya mpasi vandaka kukuma nda. Yandi vandaka kuzodila ngemba na lufwa, na kuyindulaka nkutu ve nde yandi lenda kumona kyese ya kyeleka na ntwala yandi kufwa, ntangu yai ya yandi vandaka ya kukonda kimvwama, na mafwa, mpi ya kubela mingi. Kansi, Nzambi lendaka ve kubikisa Yobi na kukotama nsoki tii na lufwa.​—⁠Yobi 3:​1-26.

Bafundi ya Yobi Kenwanisa

¹⁹ Elifazi kuvandaka muntu ya ntete na kutuba bambala yonso tatu ya masolo na bau yina zolaka dyaka kumeka kwikama ya Yobi. Na disolo na yandi ya ntete, Elifazi kuyufulaka nde: “Wapi nge memonaka muntu mesala mbi ve yandi kufwa?” (NW) Yandi sukisaka nde Yobi fwete kuvanda mesalaka dyambu mosi ya mbi sambu na kubaka ndola ya Nzambi. (Yobi, kapu 4, 5) Na disolo na yandi ya zole, Elifazi kusekaka mayele ya Yobi mpi kuyufulaka nde: “Inki dyambu ya nge zaba ya beto kuzaba ve?” Elifazi vandaka kumonisa nde Yobi vandaka kumeka kudimonisa nde yandi meluta Nkwa-Ngolo. Na kusukisa disolo na yandi ya zole, yandi memonisa Yobi bonso muntu ya meyambulaka lukwikilu, ya mbi, mpi ya luvunu. (Yobi, kapu 15) Na disolo na yandi ya nsuka, Elifazi kukusilaka Yobi nde yandi salaka mambi mingi​—⁠kubotula bima ya nkweno kuyimina mampa mpi masa na bansukami, kunyokula fwola mpi nsyona.​—⁠Yobi, kapu 22.

²⁰ Na kutubaka muntu ya zole na ntangu ya kulandana ya masolo, Bildadi vandaka kaka kulanda ntu-dyambu ya kimvuka ya Elifazi kutubilaka. Masolo ya Bildadi kuvandaka ya kuluta nkufi kansi ya kulwadisa mpenza. Nkutu yandi fundaka bana ya Yobi nde bau salaka mbi mpi yau lombamaka nde bau kufwa. Na bangindu ya luvunu, yandi sadilaka kingana yai: Mutindu papirusi ti matiti ya kukonda masa keyumaka mpi kefwaka, mutindu mosi mpi na “bayina kevilaka Nzambi.” Ntubilu yai kele ya kyeleka, kansi yau vandaka kulungana ve na Yobi. (Yobi, kapu 8) Bildadi vandaka kutula bampasi ya Yobi na kati ya yina kekuminaka bantu ya mbi. (Yobi, kapu 18) Na disolo na yandi ya tatu mpi ya nkufi, Bildadi kupesaka ngindu nde muntu kele “difulu” mpi “musobi” mpi na yau, yandi kele ya kusumuka na ntwala ya Nzambi.​—⁠Yobi, kapu 25.

²¹ Zofare vandaka muntu ya tatu na kutuba na disolo. Na kimvuka, mabanza na yandi kufwananaka na yina ya Elifazi mpi ya Bildadi. Zofare kufundaka Yobi nde muntu ya mbi, mpi kupusaka yandi na kuyambula bisalu na yandi ya masumu. (Yobi, Kapu 11, 20) Na nima ya kitini ya zole ya disolo, Zofare kutubaka dyaka ve. Yandi vandaka dyaka ve na kima ya kuyika na kitini ya tatu. Kansi, na ntangu yonso ya disolo vandaka kusalama, Yobi vandaka kuvutudila bafundi na yandi ti kikesa yonso. Mu mbandu, na ntangu mosi yandi tubaka nde: “Beno yonso kele bansyamisi ya mpasi! Keti nsuka kele sambu na bandinga ya kele kaka mupepe?”​—⁠Yobi 16:​2, 3, NW.

Beto Lenda Kuvibidila

²² Bonso Yobi, beto lenda mbala ya nkaka kukutana ti mimekamu mingi na mbala mosi, mpi Satana lenda kusadila kulembwa to mambu ya nkaka yina kele na ngolo na yandi sambu na kubebisa kwikama na beto. Yandi lenda kumeka na kunata beto na kupesa Yehowa mikongo kana beto kele ti bampasi ya mbongo. Kana muntu ya beto kezolaka mingi mefwa to kana beto kele ya kubela, Satana lenda kusosa na kunata beto na kunganina Nzambi. Bonso bankundi ya Yobi, muntu mosi lenda nkutu kukusila beto makambu. Bonso Mpangi Macmillan kumonisaka yau, Satana lenda ‘kutungisa beto,’ kansi beto lenda kuvibidila.

²³ Bonso beto monaka yau tii awa, Yobi vandaka kuvibidila mimekamu ya mutindu na mutindu. Kansi, keti yandi vandaka kaka kuvibidila? Keti ya kyeleka yandi vandaka ti ntima ya kututama? Bika beto tala kana ya kyeleka Yobi kuvidisaka kivuvu.

[Study Questions]

 1. Inki mukristu mosi ya mbuta kutubaka na yina metala mimekamu na yandi?

2, 3. Yobi kuvandaka nani?

 4. (a) Sambu na inki bakristu ya kenyokwama fwete kutadila Yobi? (b) Na yina ketadila Yobi, inki bangyufula beto tatadila?

 5. Inki mambu vandaka kusalama na zulu nkatu Yobi kuzaba?

 6. Inki Satana vandaka kumeka na kusala, mpi na inki bangogo yandi mekaka na kukusila Nzambi?

 7. Na inki mutindu Dyabulu kusosilaka Nzambi, mpi inki mutindu Yehowa kuvutulaka mvutu?

 8. (a) Inki bamvidisa ya bima kukuminaka Yobi? (b) Kisina ya kyeleka ya “tiya ya Nzambi” kuvandaka inki?

 9. Inki mutindu kubebisama ya bima ya Yobi kusimbaka na kuwakana na yandi ti Nzambi?

10, 11. (a) Inki kukuminaka bana kumi ya Yobi?(b) Na nima ya lufwa ya mpasi ya bana ya Yobi, inki mutindu yandi vandaka kubaka Yehowa?

12, 13. Na lukutakanu ya nkaka na zulu, inki Satana kulombaka, mpi inki mutindu Nzambi kuvutulaka mvutu?

14. Inki Satana kulosilaka Yobi, mpi sambu na inki ata muntu mosi ve lendaka kulembika yau?

15. Inki nkento ya Yobi kupusaka yandi na kusala, mpi inki kuvandaka mvutu na yandi?

16. Yau kemonana nde, nani kukwisaka na kusyamisa Yobi, kansi inki mutindu Satana kusadilaka bau?

17. Inki bantu yina tatu ya kwendaka kutala yandi kusalaka, mpi inki bau salaka ve bilumbu nsambwadi mpi bampimpa nsambwadi?

18. Sambu na inki Yobi kusosaka ngemba na kati ya lufwa?

19. Na inki mambu Elifazi kukusilaka Yobi makambu?

20. Bandwanisa ya Bildadi kulosilaka Yobi kuvandaka ya inki mutindu?

21. Inki mambu Zofare kukusilaka Yobi?

22, 23. (a) Bonso na dyambu ya Yobi, inki mutindu Dyabulu lenda kumeka na kubebisa kwikama na beto na Yehowa Nzambi? (b) Ata Yobi vandaka kuvibidila mimekamu ya mutindu na mutindu, inki mambu beto lenda kuyufula sambu na nkadulu na yandi?

[Caption on page 1]

[Questions]

[Caption on page 1]

[Picture caption]

A. H. Macmillan

[Caption on page 1]

[Question box]

Inki Mutindu Nge Tapesa Mvutu?

◻ Inki ngyufula ya kuluta mfunu Satana kubasilaka na ntangu ya Yobi?

◻ Na inki mitindu Yobi kumekamaka na kuluta ndilu?

◻ Na Inki mambu “bankundi” tatu ya Yobi kukusilaka yandi makambu?

◻ Bonso na dyambu ya Yobi, Inki mutindu Satana lenda kumeka na kubebisa kwikama na beto ti Yehowa?