• Yehowa Kele Ngolo Mpenza
    Nzozulu ya Nkengi—2000 | mars 1

    •  5. Inki kima kesongaka ngolo ya Yehowa na bima yina yandi salaka?

      5 Kana beto ‘kesosa kuzaba bisalu ya Nzambi’ mutindu Davidi vandaka kusala, beto tamona na meso na beto nde ngolo na yandi kele bisika yonso: na mupepe ya ngolo ti na bitembo ya masa, na banzasi ti nsemo ya mvula, ti na banzadi ya nene mpi na bangumba ya nene. (Nkunga 111:2; Yobi 26:12-14) Kima yankaka kele nde, mutindu Yehowa kuyibusaka Yobi, bambisi kemonisaka ngolo na Yandi. Na kati na bo beto lenda tanga Behemoti to kiboko. Yehowa kuzabisaka Yobi nde: “Misuni na yandi kele ngolo mingi. . . . Mikwa ti bampanzi na yandi kele ngolo bonso bibende.” (Yobi 40:15-18) Bantu ya ntangu ya ntama vandaka kuzaba mpi mbote nde ngolo ya mpakasa kepesaka boma, yo yina Davidi kusambaka nde Nzambi kukatula yandi na “minoko ya bantambu ti na bibongo ya bampakasa.”​—Nkunga 22:21; Yobi 39:9-11.

       6. Ngombe kele kifwani ya nki na kati ya Masonuku, mpi sambu na nki? (Tala noti na nsi ya lutiti.)

      6 Sambu na ngolo na yo, Biblia kesadilaka ngombe sambu na kumonisa kifwani ya ngolo ya Yehowa.c Na mbona-meso yina ntumwa Yoane kumonaka kiti ya kimfumu ya Yehowa, yandi monaka mpi bigangwa iya ya moyo, mosi na kati na yo vandaka na luse bonso ya ngombe. (Kusonga 4:6, 7) Dyambu yai kemonisa nde mosi na kati ya bikalulu iya ya Yehowa yina basheribe yai kemonisa kele ngolo. Bikalulu na yandi yankaka kele zola, mayele, ti lunungu. Sambu ngolo kele kitini mosi ya mfunu ya kimuntu ya Nzambi, kana beto kebakisa mbote ngolo na yandi ti mutindu yandi kesadilaka yo, yo tasadisa beto na kukuma penepene kibeni ti yandi, yo tasadisa beto dyaka na kulanda mbandu na yandi sambu na kusadila mbote konso ngolo yina beto kele na yo.​—Efezo 5:1.

  • Yehowa Kele Ngolo Mpenza
    Nzozulu ya Nkengi—2000 | mars 1

    • c Mpakasa ya bo ketubila na Biblia kemonana nde yo vandaka bonso bangombe ya nene ya vandaka na bibongo ya nda mpi yina vandaka kuzinga na bamfinda ya Eropa (na Latini urus). Bamvu-funda zole meluta, bo sengumunaka bambisi yai na ndambu ya Gaule (yina kele France bubu yai). Julius Cesar kusonikaka mpi mutindu yai sambu na bambisi yango: “Banzyoku meluta fyoti ba uri yango na nene. Kansi mutindu ya bo salaka bo, kulere na bo, ti nitu na bo vandaka bonso ya ngombe. Bo vandaka ngolo mingi, mpi bo vandaka ntinu mingi: bo vandaka kugulusa ve ata muntu to mbisi kana dezia bo memona yandi.”