Bupusi ya Ndinga ya Mbote

“Mayindula na ntima ya muntu kepesaka yandi mpasi, kansi ndinga ya mbote tapesa yandi kyese!”​—⁠Bingana 12:​25, Knox.

BAKRISTU metaninama kimakulu ve na kimbeni. Bau kele na mbala ya nkaka na kyadi sambu na “ntangu ya mpasi” ya bau kezinga.​—⁠2 Timoteo 3:⁠1.

Na ntangu bau kezwaka bampasi ya mutindu yina, mutindu yau kevandaka mbote na kuwidikila ndinga ya mbote ya nduku mosi ya kwikama! Biblia ketuba nde: “Nduku ya kyeleka kezolaka konso ntangu, mpi kele mpangi yina butukaka sambu na ntangu ya mpasi.” (Bingana 17:​17, NW) Muntu ya kwikama Yobi kuzabanaka bonso nduku ya mutindu yina. Ata Elifazi tubaka sambu na yandi nde: “Ntangu bantu vandaka me lemba, ke zola kubwa, malongi na nge vandaka kupesa bo diaka ngolo.”​—⁠Yobi 4:⁠4.

Kansi, ntangu Yobi yandi mosi kuvandaka na mfunu ya nsyamisa, Elifazi mpi banduku na yandi kutubilaka yandi ve bandinga ya mbote. Bau kufundaka yandi nde yandi vandaka nkwa bampasi na yandi, na kutubaka nde yandi salaka disumu na kinsweki. (Yobi 4:⁠8) Sambu na yau, komantere mosi ya Biblia (The Interpreter’s Bible) ketuba nde: “Yobi vandaka ti mfunu ya mawa ya ntima ya muntu. Kansi, yina ya yandi vandaka kuwa kuvandaka kaka ndandana ya kifwanisu ya mabundu ya kitoko mpi mbatalala ya bikalulu ya ‘kyeleka’ kibeni mpi ya kuluta kitoko kibeni.” Mpasi ya Yobi kulutaka ngolo na mpila nde na kuwaka ndinga ya Elifazi mpi ya banduku na yandi, yandi kwisaka kutuba nde: “Beno bika kuyangisa mono na mambu ya beno ke tuba. Sambu na nki beno ketubila mono bima yina ke pesa mono mpasi na ntima?”​—⁠Yobi 19:⁠2.

Beto fwetele ve kunata nduku mosi na kuboka na mpasi sambu na bandinga na beto ya mbi mpi ya kukonda kuyindula. (tala Kulonga 24:15.) Kingana mosi ya Biblia ketuba nde: “Bandinga lenda kuvanda nto ya luzingu to ya lufwa. Muntu yina kezolaka kutuba fwete kundima bansukilu na yau.”​—⁠Bingana 18:​21, NW.

Na kuzabaka ngolo ya bandinga, beto landa mbandu ya ntumwa Polo. Na Masedonia, yandi “syamisaka na bandinga mingi bayina kuvandaka pana.”​—⁠Bisalu 20:​2, NW.