Sepela na Ndinga ya Nzambi

KYESE na muntu yina “ke monaka kiese na bansiku ya Mfumu Nzambi.” Muntu ya mutindu yai ketangaka Ndinga ya Nzambi “[na ndinga ya nsi-nsi, NW] mpimpa ti mwini.” (Nk. 1:1, 2) Keti nge kemonaka kyese yango? Inki mutindu nge lenda yedisa kyese yina Ndinga ya Nzambi kepesa nge?

Kutanga ve bangogo mpamba. Sala bonso nde nge kemona mambu yina nge ketanga na mabanza na nge. Yindula bonso nde nge kewa bandinga ya bantu yina bo ketubila. Na ntangu nge ketanga bakapu ya luyantiku ya Biblia, widikila mutindu Yehowa kemonisa, malembe-malembe, mambu ya yandi mesalaka sambu ntoto kuvanda kisika ya kitoko sambu na muntu. Widikila mutindu yandi kesonga Mwana na yandi, Kapita ya Kisalu, nde ntangu melunga ya kusala bantu ya ntete. Yindula na mabanza na nge mambu yai: Adami ti Eva mekolama, Nzambi mezengila bo ndola, ebuna, yandi mekula bo na Paladisu. (Kuyantika, bakap. 1-3) Sala bonso nde nge kewa boma ntangu nge ketanga nde ndinga mosi ya mekatuka na zulu kebinga Yezu Kristu nde Mwana ya Nzambi, ya yandi kezolaka mingi, yina Nzambi tindaka sambu na kupesa luzingu na yandi sambu na bantu. (Mat. 3:16, 17) Meka na kuyindula mutindu ntumwa Yoane kudiwaka ntangu yandi waka Yehowa ketuba: “Ntangu yai mono ke sala bima yonso ya mpa!” (Kus. 21:5) Ya kyeleka, kutanga Ndinga ya Nzambi mutindu yai kele kima mosi ya kepesaka kyese!

Landa na kutanga disolo ya kupemama, ebuna nge tabakisa nde Yehowa kele muntu mosi ya nene mpi ya nge fwete zitisa. Nge tawa mpenza nde Muntu yai ya kezolaka beto, ya kewilaka beto mawa, ya kesadisaka beto kana beto kesala ngolo ntangu yonso mpi na kudikulumusa na kusala luzolo na yandi, mpi ya kemonisaka beto nki mutindu kununga na mambu yonso ya beto kesalaka kebenda nge penepene na yandi.​—Yoz. 1:8; Nk. 8:1; Yez. 41:10.

Kana nge kelutisa ntangu mingi na kutanga Biblia, nge tabaka mpi mambote mingi sambu nzayilu na nge ya luzolo yina Nzambi kele na yo sambu na nge kekuma mingi. Kansi, kyese na nge tasuka pana ve. Kana kutanga na nge kepesa nge lusadisu ya nge kele na yo mfunu sambu na kuyidika makambu na nge na mayele yonso, nge tawa mutindu muyimbi-bankunga kuwaka ntangu yandi tubaka nde: “Malongi na nge kele ya kuyituka, mono ke landaka yo na ntima na mono yonso.” (Nk. 119:129) Nge mpi tasepela ntangu nge tazwa na kati ya Masonuku minsiku yina tasadisa nge na kuwakanisa mabanza na nge ti bampusa na nge na mutindu Nzambi kezolaka.​—Yez. 55:8, 9.

Biblia kepesa bansiku ya bikalulu ya mbote ya ketaninaka beto na mambi mpi kesongaka beto nzila ya mbote ya kulanda. Kana beto ketanga yo, beto tabakisa nde Yehowa kele Tata yina mezaba makambu yina takumina beto kana beto pesa nzila na bampusa ya nitu na beto ya kukonda kukuka kubwisa beto. Yandi kezolaka ve nde beto mona mpasi yina takonda ve kubwila beto kana beto zitisa ve bansiku na yandi ya bikalulu ya mbote. Yandi kesungiminaka beto mpi kezolaka nde beto vanda na luzingu ya kuluta mbote. Kutanga Ndinga na yandi kesadisaka beto na kubakisa mbote nde beto kele na lusakumunu ya nene mpenza sambu yandi kele Nzambi mpi Tata na beto ya zulu.

Muyimbi-bankunga kutubaka sambu na muntu yina ketangaka Ndinga ya Nzambi konso kilumbu nde: “Mambu yonso ya yandi ke salaka ke vandaka mbote.” (Nk. 1:3) Ya kyeleka, ata beto kele bantu ya kukonda kukuka, ata beto kezinga na inza ya mbi ya Satana, mpi ata Dyabulu kesalaka ngolo sambu na kudya beto, kutanga mbala na mbala mpi kusadila mambu yina kele na Ndinga ya Nzambi tasadisa beto na kununga na mambu yonso yina kesimba kuwakana na beto ti Yehowa.

Sambu beto kezingaka na inza yai ya kele na bupusi mingi na luzingu na beto, kukotisa bangindu ya Ngangi na ntu na beto, ata sambu na mwa ntangu fyoti ya mbote konso kilumbu, lenda pesa beto ngolo. Bantu yankaka yina bo kangaka na boloko sambu na lukwikilu na bo vandaka kuzwa kaka ndambu ya baverse yina bo vandaka kumona na masolo ya bazulunalu. Bo vandaka kuzenga yo, kusimba yo na ntu, mpi kuyindulula yo. Yehowa kusakumunaka bikesa na bo sambu bo salaka mambu yina luzingu na bo vandaka kupesa bo nswa na kusala sambu na kubaka nzayilu ya Ndinga ya Nzambi. (Mat. 5:3) Kansi, mingi na kati na beto kele na kimpwanza mingi kuluta bantu yina. Beto fwete tuba ve nde kutanga nswalunswalu verse mosi ya Biblia mbala mosi na kilumbu, tasadisa beto na mutindu mosi ya kuyituka. Kansi, beto tabaka balusakumunu, kana beto yidika mbote mambu yina beto metulaka na kisika ya ntete na mpila nde beto zwa ntangu ya kutanga kitini ya Biblia konso kilumbu, kuyindula yo, mpi kusadila yo na luzingu na beto.

Na kuta masonga, kusala mpidina lenda bebisa baprograme na beto ya kuluta mbote. Kana yo mesalama, beto ketulaka mambu yina meluta mfunu na kisika ya ntete. Mu mbandu, beto lenda basika ve na nzo kukonda kunwa masa na luzolo yonso kilumbu ya mvimba to zole. Yo yina, ata konso nki mambu yina mekumina beto na luzingu na beto ya konso kilumbu, beto fwete baka mwa ntangu ya kulembika ntima na beto ti masa ya kyeleka.​—Bis. 17:11.

Keti nge metangaka dezia Biblia ya mvimba? Bantu mingi kemonaka mpasi dibanza ya kutanga banda na Kuyantika tii na Kusonga. Yo yina, bantu mingi yina vandaka na nzala ya kutanga Biblia ya mvimba, kuyantikaka na kutanga ntete Masonuku ya Kigreki ya Bukristu. Sambu na inki? Ziku sambu bo kemonaka nde mambu yina mikanda yina ya Biblia ketubaka melungana na bo bantu ya kesosaka kulanda bitambi ya Kristu. To mbala yankaka sambu bo monaka nde Masonuku ya Kigreki ya Bukristu kemonanaka mingi ve na kutanga. Kana beto kabisa Biblia na bandambu iya, bo kemonaka nde yo kebaka kitini mosi na ndambu fyoti. Kansi na nima ya kumanisa kutanga mikanda yina 27, bo tulaka ntangu yai dikebi na bo na mikanda 39 ya Masonuku ya Kiebreo mpi bo yantikaka na kutanga mpi kuyangalala na yo. Ntangu bo manisaka kutanga Masonuku ya Kiebreo, bo salaka manaka ya kutanga Biblia mbala na mbala, yo yina bo landaka na kutanga. Yo sadisaka bo na kutanga Masonuku ya Kigreki ya Bukristu mbala ya zole, mpi banda pana bo meyambulaka ve. Nge mpi kumisa kutanga Ndinga ya Nzambi konso kilumbu kikalulu ya luzingu na nge ya mvimba.

Keti kele na muntu na dibuta na beno to na dibundu na beno ya mezaba ve kutanga? Sambu na nki ve kutangila yandi Biblia mbala na mbala? Nge mosi tabaka mambote mingi, mpi yandi tabakila yo mambote mingi kana yandi keyindulula mambu yina yandi kewa mpi na nima kana yandi kesadila yo na luzingu na yandi.​—Kus. 1:3.

Na nima, nge lenda wa nzala ya kusala manaka ya sipesiali sambu na lutangu na nge ya Biblia. Manaka yango lenda sadisa nge na kubakisa mbote kuwakana yina kele na kati ya bitini ya kuswaswana ya Biblia. Kana Biblia na nge kele ti bareferanse na katikati ya konso lutiti, yo lenda sadisa nge na kuzaba bansangu yankaka ya ntama ti masolo ya mutindu mosi. Yo lenda sadisa nge na kuzaba mambu yina kupusaka Davidi na kusonika bankunga ya kuswaswana mpi mikanda yina bantumwa ya Yezu Kristu kusonikaka. Étude perspicace des Écritures kepesaka bansangu mingi ya kitoko ya metala bantu, bisika, mpi bikalulu yina bo ketubila na Biblia. Batablo yina kele na kati kebendaka dikebi na kulungana ya bambikudulu ya Biblia. Yo kemonisaka nki bantotila ti baprofete kuzingaka na ntangu mosi, mpi yo kepesaka badati ya penepene ya kesongaka ntangu mambu mingi kusalamaka.

Kana nge keyindulula mambu ya nge kelonguka, nge tabakisa bikuma yina kusalaka nde mambu mingi kusalama na kati ya bantu ya Nzambi. Nge tabakisa mpi kikuma Yehowa vandaka kuzinga ti bantu na yandi mutindu yandi salaka yo. Nge tabakisa nki mutindu Yehowa ketadilaka mambu yina baluyalu, bantu, mpi konso muntu kesalaka. Mambu yai tasadisa nge na kubakisa mbote bangindu na yandi.

Mambu ya ntama yina kele na Biblia takuma kusepidisa nge mingi ntangu nge kemona bisika mambu yango kubwilaka. Bakarte ya bansi yina bo ketubila na Biblia kesongaka ntoto mpi bitamina yina kele na kati ya bisika mingi. Mu mbandu, keti nge lenda meka na kusonga kisika bantu ya Izraele kusabukaka Nzadi-Mungwa ya Mbwaki? Ntoto ya Lusilu vandaka nene nki kiteso? Tii wapi Yezu kutambulaka ntangu yandi vandaka kusala kisalu na yandi na ntoto? Inki mambu Polo kumonaka na bavwayaze na yandi ya kimisionere? Bakarte ti bantendula ya bisika ya bo kepesa kepesaka bansangu yina takumisa kutanga na nge kitoko mingi. Wapi nge lenda zwa bakarte ya bansi yina bo ketubila na Biblia? Mingi kele na Les Saintes Écritures—Traduction du monde nouveau. Bavolime ya mukanda Étude perspicace kele na bakarte kiteso ya 70, mpi yo kele ti index ya bakarte na nsuka ya volime ya ntete. Sadila Index des publications de la Société Watch Tower sambu na kuzaba bisika bakarte yankaka kele. Kana nge kele ve na mikanda yai, sadila bakarte yina kebasikaka na Nzozulu ya Nkengi sambu yo tasadisa nge na lutangu na nge ya Biblia.

Na Masonuku ya Kiebreo, Ntotila Davidi kukumisaka Yehowa na bangogo yai: “Nzambi, bangindu na nge kele mpasi mono na kuzaba yo; yo kele mpi mingi mpenza!” (Nk. 139:17) Na Masonuku ya Kigreki ya Bukristu, ntumwa Polo kukumisaka Yehowa sambu Yandi “pela, [Yandi] songa beto mayele ya kuzaba lukumu ya Nzambi, lukumu yina ke monikaka na ilungi ya Kristu.” (2 Kor. 4:6) Davidi ti Polo kuzingaka na bamvu-nkama ya kuswaswana; kansi bo zole kusepilaka na Ndinga ya Nzambi. Nge mpi lenda sepila na yo kana nge baka ntangu ya kutanga mambu yonso yina Yehowa mepesaka nge na kati ya Ndinga na yandi ya kupemama.