Kwenda Penepene na Nzambi

Keti Yehowa Kevandaka ti Mawi?

KANA mvutu kele ee, ngyufula yankaka yo yai: Keti nkadilu na beto kepesaka Nzambi kyese to mawa? Na bangogo yankaka, keti mambu yina beto kesalaka lenda pesa Nzambi kyese to mpasi? Bafilozofe yankaka ya ntama kubuyaka dibanza yina. Bo tubaka nde, ata muntu mosi ve lenda pusa Nzambi na kuwa kyese to mawa. Kansi, Biblia kelongaka mpidina ve, yo ketubaka nde Yehowa kevandaka ti mawi ya zola mpi yandi ketulaka mpenza dikebi na mambu yina beto kesalaka. Beto tadila bangogo yina kele na Nkunga 78:40, 41.

Nkunga 78 ketubila mambu yina Nzambi kusadilaka dikanda ya Izraele. Na nima ya kubasisa dikanda yina na kimpika na Ezipte, Yehowa kulombaka bo na kusala bangwisana ya sipesiali ti yandi. Yandi silaka nde kana bo landa kulemfukila bansiku na yandi, bo ta kuma ‘bantu na yandi mpenza’ mpi yandi tasadila bo na mutindu ya kuyituka sambu na kulungisa lukanu na yandi. Bantu ya Izraele kundimaka mpi kusalaka kuwakana ya Nsiku. Keti bo salaka na kuwakana ti mambu yina?​—Kubasika 19:3-8.

Muyimbi-bankunga ketuba nde: “Mbala mingi bo vandaka kutombukila Nzambi na ntoto ya zelo na zelo!” (Verse 40) Verse ya kelanda keyika nde: “Mbala mingi bo vandaka kumeka Nzambi.” (Verse 41) Simba nde nsoniki ketubila nkadilu ya nkolama. Nkadilu yai kuyantikaka ntama​—na ntoto ya zelo na zelo, ntangu fyoti na nima ya kubasika na bo na Ezipte. Bantu yantikaka na kubokutila Nzambi na kudiyulaka kana yandi vandaka ti makuki mpi luzolo ya kutanina bo. (Kutanga 14:1-4) Mukanda mosi ya bambaludi ya Biblia ketuba nde, bo lenda balula bangogo “bo vandaka kutombukila Nzambi” nde ‘bo kumisaka bantima na bo ngolo sambu na kubuya kulemfukila Nzambi’ to “bo zabisaka Nzambi nde ‘Ve.’” Ata mpidina, na mawa na yandi Yehowa vandaka kulolula bantu na yandi ntangu bo vandaka kubalula ntima. Kansi, na nima bo vandaka kuvutukila banzila na bo ya mbi mpi kukolamaka dyaka na yandi, mpi nkadilu yina kulandaka kaka mutindu yina.​—Nkunga 78:10-19, 38.

Yehowa vandaka kuwa inki mutindu ntangu yonso yina bantu na yandi vandaka kulemfuka mpi na nima kukolama? Verse 40 ketuba nde: “Bo vandaka kumonisa yandi mpasi.” Mbalula yankaka ketuba nde: “Bo vandaka kusala mambu yina vandaka kupusa yandi na kuwa makasi.” Mukanda mosi ketuba nde: “Verse yai kemonisa nde mambu yina bantu ya Ebreo vandaka kusala, vandaka kupesa mpasi, kaka mutindu mambu yina mwana mosi ya kukonda bulemfu mpi ya nkolami kesalaka kepesaka mpasi.” Kaka mutindu mwana ya ntu-ngolo lenda pesa bibuti na yandi mpasi na ntima, bantu ya Izraele ya bankolami “vandaka kupesa [Musantu ya Izraele] makasi” mpi mpasi na ntima.​—Verse 41.

Inki dilongi beto lenda baka na nkunga yai? Yo kepesa kivuvu na kumona nde Yehowa ketudilaka bansambidi na yandi dikebi ya mingi mpi keyambulaka bo ve nswalu. Dyaka, yo kele mayele na kuzaba nde Yehowa kevandaka ti mawi mpi mambu yina beto kesalaka lenda pesa yandi kyese to mpasi. Kuzaba mambu yai kepusa nge na kusala inki? Keti yo kepusa nge na kusala mambu ya mbote?

Na kisika ya kulanda nkadilu ya masumu mpi kupesa ntima ya Yehowa mpasi, beto lenda pona kusala mambu ya mbote mpi kusepedisa ntima na yandi. Yo kele mpenza dyambu yina yandi kelombaka bansambidi na yandi: “Mwana na mono, vanda mayele, ebuna mono ta mona kiese.” (Bingana 27:11) Kele ve ti kima mosi ya mbalu mingi yina beto lenda pesa Yehowa kuluta kuvanda ti luzingu yina kesepedisaka ntima na yandi.

[Bangogo sambu na kubenda dikebi ya kele na lutiti 32]

Kele ve ti kima mosi ya mbalu mingi yina beto lenda pesa Yehowa kuluta kuvanda ti luzingu yina kesepedisaka ntima na yandi