Yehowa Kele Kisika ya Beto Ketininaka

“Sambu nge [tubaka nde: ‘Yehowa kele kisika ya mono ketininaka,’ NW], . . . ata mpasi ta bwila nge ve.”​—NKUNGA 91:9, 10.

 1. Sambu na nki beto lenda tuba nde Yehowa kele kisika ya beto ketininaka?

YEHOWA kele kisika ya kyeleka ya bantu na yandi ketininaka. Kana beto mekudipesaka beto ya mvimba na yandi, bantu lenda ‘yangisa beto na mambu yonso, kansi bo kefwa beto ve; ntima lenda sala beto mpasi, kansi beto ketulaka ntima kaka; beto ke na bambeni mingi, kansi Nzambi ke bikisaka beto ve; bo kemonisaka beto mpasi, kansi bo kefwaka beto ve.’ Sambu na nki? Sambu Yehowa kepesaka beto “ngolo ya nene.” (2 Korinto 4:7-9) Ya kyeleka, Tata na beto ya zulu kesadisaka beto na kuvanda na luzingu yina Nzambi kezolaka, mpi bangogo yai ya muyimbi-bankunga kesimba mpenza ntima na beto: “Sambu nge [tubaka nde: ‘Yehowa kele kisika ya mono ketininaka, nge mekumisaka Nzambi ya Kuluta-Kuzanguka nzo na nge, NW]; ata mpasi ta bwila nge ve.”​—Nkunga 91:9, 10.

 2. Inki beto lenda tuba sambu na Nkunga 91 mpi balusilu yina yo kepesa?

² Ziku Moize muntu kusonikaka mambu yina kele na Nkunga 91. Bangogo yina kele na zulu ya Nkunga 90 kemonisa nde yandi muntu kusonikaka nkunga yai, ebuna Nkunga 91 kelanda mbala mosi kukonda kutuba ata kima mosi ya kemonisa nde muntu yankaka kusonikaka yo. Mbala yankaka bibuka zole ya bantu kuyimbaka Nkunga 91; disongidila, ziku muntu mosi kuyimbisaka ntete (91:1, 2), ebuna kibuka ya bantu kuyambaka (91:3-8). Ziku na nima muntu mosi kuyimbisaka dyaka (91:9a) ebuna kibuka kuyambaka (91:9b-13). Na nsuka, ziku muntu mosi kuyimbaka bangogo ya nsuka (91:14-16). Ata bo yimbaka yo mutindu yina to ve, Nkunga 91 kepesa balusilu ya lutaninu ya kimpeve na Bakristu ya kupakulama na kimvuka mpi yo kepesa lusilu ya mutindu mosi na kimvuka ya bampangi na bo yina mekudipesaka na Nzambi.a Bika beto tadila mutindu nkunga yai kelungana na kimvuka ya bansadi ya Yehowa yonso.

Vanda na Lutaninu na ‘Kisika ya Kinsweki ya Nzambi’

 3. (a) “Kisika ya kinsweki ya Muntu ya Kuluta Kuzanguka” kele inki? (b) Inki beto kezwaka na ntangu beto ‘kezingaka na kivudi ya Nkwa-Ngolo Yonso’?

³ Muyimbi-bankunga keyimba nde: “Konso muntu yina kezingaka na kisika ya kinsweki ya Muntu ya Kuluta Kuzanguka tazwa kisika ya kuzinga na kivudi ya Nkwa-Ngolo Yonso. Mono tasonga Yehowa nde: ‘Nge kele kisika na mono ya kutinina mpi nzo ya ngolo ya kubumbanina, Nzambi na mono yina mono ketulaka ntima.’” (Nkunga 91:1, 2, NW) “Kisika ya kinsweki ya Muntu ya Kuluta Kuzanguka” kele kisika ya kifwani ya lutaninu sambu na beto, mpi ntetentete sambu na bapakulami, bantu ya ntete ya Dyabulu kenwanisaka. (Kusonga 12:15-17) Kana beto vandaka ve na lutaninu yina beto kele na yo bonso banzenza ya kimpeve na nzo ya Nzambi, nga beto yonso mefwaka. Mutindu beto “kezingaka na kivudi ya Nkwa-Ngolo Yonso,” Nzambi ketaninaka beto na kivudi na yandi. (Nkunga 15:1, 2; 121:5) Kisika yankaka ya lutaninu to nzo ya ngolo ya kubumbanina kele ve ya meluta yai ya Yehowa, Nkwa-Kimfumu.​—Bingana 18:10.

 4. Inki mayele ya mbi Satana, “muntu ya kekangaka bandeke,” kesadilaka mpi nki mutindu beto ketinaka yo?

⁴ Muyimbi-bankunga keyika nde: “Yandi [Yehowa] muntu ta katulaka nge na [mutambu ya muntu yina kekangaka bandeke, na maladi ya kenataka kimbeni, NW].” (Nkunga 91:3) Na ntangu ya ntama na Izraele, muntu yina vandaka kukanga bandeke vandaka kusadila mbala mingi mitambu. Na kati ya mitambu yina “muntu ya kekangaka bandeke,” to Satana, kesadilaka, beto lenda tanga organizasio na yandi ya mbi ti “mayele ya mbi.” (Efezo 6:11, NW, noti na nsi ya lutiti) Yandi metulaka mitambu ya kubumbana na nzila ya beto ketambulaka sambu yo benda beto na kusala mambi mpi na kubwa na kimpeve. (Nkunga 142:3) Kansi, sambu beto meyambulaka na kusala mambu ya mbi, beto mekumaka bonso ‘ndeke ketina na mutambu.’ (Nkunga 124:7, 8) Beto kepesa mersi mingi kibeni na mpila Yehowa mekatulaka beto na mutambu ya “muntu [ya mbi] ya kekangaka bandeke.”​—Matayo 6:13.

5, 6. Inki “maladi” kenataka “kimbeni,” kansi sambu na nki yo kesimbaka ve bantu ya Yehowa?

⁵ Muyimbi-bankunga ketubila “maladi ya kenataka kimbeni.” Bonso maladi ya nsambukila yina kesimbaka bantu mingi, kele ti kima mosi kenataka “kimbeni” na bantu yonso na kimvuka mpi na bayina kenwaninaka kimfumu ya Yehowa. Sambu na dyambu yai, Arnold Toynbee, yina kelongukaka mambu ya melutaka kusonikaka mutindu yai: “Banda na nsuka ya Mvita ya Zole ya Inza, politiki ya kuzola insi mekumaka ngolo na bansi mingi yina mebakaka kimpwanza . . . Kukonda kuwakana na kati ya bantu ke na kukuma ngolo mpenza mpi yo kekabula bantu mingi.”

⁶ Banda ntama, bamfumu mingi mekotisaka kukonda kuwakana ya ngolo ya kekabulaka bantu mpi yina kenataka bamvita na ntoto ya mvimba. Bo kelombaka mpi nde bantu kusambila bo to biteki to bidimbu ya mutindu na mutindu yina bo ketulaka. Kansi Yehowa meyambulaka ve ata fyoti nde bansadi na yandi kubwa na “kimbeni” ya mutindu yina. (Daniele 3:1, 2, 20-27; 6:7-10, 16-22) Beto bantu kezinga na kati ya dibuta ya bampangi ya ntoto ya mvimba, beto kekangamaka kaka na Yehowa, beto kekotaka ve na mambu ya politiki mutindu Masonuku kelongaka, mpi beto kendimaka na ntima mosi nde “na konso dikanda ya bantu [Nzambi] ke ndimaka bantu yina ke zitisaka yandi ti ke salaka mambu ya mbote.” (Bisalu 10:34, 35; Kubasika 20:4-6; Yoane 13:34, 35; 17:16; 1 Piere 5:8, 9) Ata beto kekutana na ‘kimbeni’ na mpila bantu kepesa beto mpasi sambu beto kele Bakristu, beto kele na kyese mpi na lutaninu na kimpeve “na kisika ya kinsweki ya Muntu ya Kuluta Kuzanguka.”

 7. Inki mutindu Yehowa ketaninaka beto na nsi ya “mapapu na yandi”?

⁷ Sambu Yehowa kele kisika na beto ya kutinina, bangogo yai kepesa beto kikesa mingi: “Yandi ta bumba nge bonso ndeke ke bumbaka bana na yandi na nsi ya mapapu, kuna nge ta vandaka mbote; [kwikama na yandi tavanda dibaya ya nene yina ketaninaka muntu na batolotolo mpi kibaka ya ngolo ya lutaninu, NW].” (Nkunga 91:4) Nzambi ketaninaka beto, kaka mutindu mama to tata ya ndeke kefikaka bana na yandi mapapu sambu na kutanina bo. (Yezaya 31:5) Ndeke kefikaka bana na yandi mapapu sambu na kutanina bo na bambeni. Bonso bana ya bandeke, beto kele na nsi ya lutaninu ya mapapu ya kifwani ya Yehowa sambu beto mebumbanaka na organizasio na yandi ya kyeleka ya Bukristu.​—Ruti 2:12; Nkunga 5:1, 11.

 8. Inki mutindu “kwikama” ya Yehowa kele dibaya ya nene ya ketaninaka beto na batolotolo mpi kibaka ya ngolo?

⁸ Beto ketulaka ntima na “kwikama,” to na masonga. Yo kele bonso dibaya ya nene yina basoda vandaka kusadila na ntangu ya ntama sambu na kuditanina na batolotolo. Mbala mingi nda ti nene na yo vandaka ya kufwana sambu na kufika nitu ya muntu ya mvimba. (Nkunga 5:12) Ntima ya beto ketulaka na lutaninu ya mutindu yai kekatulaka beto boma. (Kuyantika 15:1; Nkunga 84:11) Bonso lukwikilu na beto, kwikama na Nzambi kele dibaya ya nene ya ketaninaka beto na batolotolo ya tiya yina Satana kesadilaka mpi na kutina makofi ya mbeni. (Efezo 6:16) Yo kele mpi kibaka ya ngolo, lupangu ya lutaninu, kisika beto kebumbanaka.

‘Beto Tawa Boma Ve’

 9. Sambu na nki mpimpa lenda vanda ntangu mosi ya boma, kansi sambu na nki beto kewaka ve boma?

⁹ Sambu na yina metala lutaninu ya Nzambi, muyimbi-bankunga ketuba nde: “Nge ta wa boma ve [ata ya kima mosi yina kebangisaka na mpimpa, to ya tolotolo yina kepumbukaka na mwini, NW], ata maladi yina ke bwilaka bantu na mpimpa to bampasi yina ke fwaka bantu na [midi], yo tasala nge kima ve.” (Nkunga 91:5, 6) Sambu mambu mingi ya mbi kesalamaka na bisika mpimpa kele, mpimpa lenda vanda ntangu mosi ya boma. Na kati ya mpimpa ya kimpeve ya mefika ntoto ya mvimba, bambeni na beto kesadilaka mbala mingi mambu ya mbi ya kubumbana sambu na kubebisa kimpeve na beto mpi kusukisa kisalu na beto ya kusamuna. Kansi ‘beto kewaka ve boma ata ya kima mosi yina kebangisaka na mpimpa’ sambu Yehowa ketaninaka beto.​—Nkunga 64:1, 2; 121:4; Yezaya 60:2.

10. (a) “Tolotolo yina kepumbukaka na mwini” lenda tendula inki, mpi nki beto kesalaka na ntwala na yo? (b) “Maladi yina ke bwilaka bantu na mpimpa,” kevandaka nki mutindu, mpi sambu na nki beto kewaka yo boma ve?

¹⁰ “Tolotolo yina kepumbukaka na mwini” lenda tendula kunwanisa ya munoko. (Nkunga 64:3-5; 94:20) Sambu beto kelandaka kaka na kuzabisa bantu nsangu ya kyeleka, kumenga yina bantu kemengaka beto na meso ya bantu yonso sambu na kisalu na beto ya santu kevandaka ya mpamba. Dyaka, beto kewaka ve boma ya “maladi yina ke bwilaka bantu na mpimpa.” Yai kele maladi ya kifwani ya bantu kebakaka na mpimpa ya inza yai kele ya kubela na bikalulu ya mbote mpi na lusambu ya kele na maboko Satana. (1 Yoane 5:19) Yo mefwaka mabanza ti ntima ya bantu, yo yina bo kebakisaka ve ata kima mosi sambu na yina metala Yehowa, balukanu na yandi, ti mambu yina yandi meyidikaka na zola yonso. (1 Timoteo 6:4) Beto kewaka ve boma ya mpimpa ya mutindu yai, sambu beto kevandaka na nsemo mingi ya kimpeve.​—Nkunga 43:3.

11. Inki mambu kekuminaka ‘bantu yina kemonaka mpasi na midi’?

¹¹ “Bampasi yina ke fwaka bantu na midi” kepesaka beto mpi boma ve. “Midi” lenda tendula kima yina bantu kebingaka nde nsemo ya inza. Bantu yina kebwaka na bangindu ya nzala ya bima mingi ya kinsuni kefwaka na kimpeve. (1 Timoteo 6:20, 21) Na ntangu beto kesamunaka nsangu ya Kimfumu na kikesa yonso, beto kewaka ve boma ya bambeni na beto, sambu Yehowa Muntu ketaninaka beto.​—Nkunga 64:1; Bingana 3:25, 26.

12. Bantu mile ‘kebwa’ penepene ya nani, mpi yo ketendula inki?

¹² Muyimbi-bankunga kelanda na kutuba nde: “Ata bantu kubwa penepene na nge kwaku mile mosi kwaku [na diboko ya kibakala, NW] mile kumi, nge, nge ta sala kima ve. Nge ta talaka kaka na meso, ebuna nge ta mona mutindu bantu ya mbi ke baka ndola.” (Nkunga 91:7, 8) Sambu bo mekumisaka ve Yehowa kisika na bo ya kutinina, bantu mingi ‘kebwa’ na lufwa ya kimpeve “penepene” na beto kibeni. Na kutuba ya mbote, bantu “mile kumi” mebwaka na “diboko ya kibakala” ya Izraele ya kimpeve ya bubu. (Galatia 6:16) Kansi, ata beto kele Bakristu ya kupakulama to bampangi na bo yina mekudipesaka na Nzambi, beto kele na lutaninu na “kisika ya kinsweki” ya Nzambi. Beto ‘ketalaka kaka na meso, ebuna beto kemonaka mutindu bantu ya mbi kebaka ndola.’ Bo kebukaka bambuma na bo ya mbi na mumbongo, na mabundu, ti na mambu yankaka.​—Galatia 6:7.

‘Ata Mpasi Mosi Ve Tabwila Beto’

13. Inki bampasi kebwilaka beto ve, mpi sambu na inki?

¹³ Ata lutaninu ya inza yai ke na kubeba, beto ketulaka Nzambi na kisika ya ntete mpi beto kebakaka kikesa na bangogo yai ya muyimbi-bankunga: “[Sambu nge tubaka nde: ‘Yehowa kele kisika ya mono ketininaka,’ nge mekumisaka Muntu ya Kuluta Kuzanguka yandi mosi nzo na nge, NW]; ata mpasi ta bwila nge ve to maladi ta kota ve na nzo na nge.” (Nkunga 91:9, 10) Ya kyeleka, Yehowa kele kisika na beto ya kutinina. Kansi, beto kekumisaka mpi Nzambi ya Kuluta Kuzanguka ‘nzo na beto,’ kisika ya beto kekwendaka kubumbana. Beto kepesaka Yehowa lukumu sambu yandi kele Nkwa-Kimfumu, beto kezingaka na kati ya ‘nzo’ na yandi sambu yandi kele Nto ya lutaninu na beto, mpi beto kesamunaka nsangu ya mbote ya Kimfumu na yandi. (Matayo 24:14) Yo yina, ‘ata mpasi mosi ve ta bwila beto,’ disongidila, ata mpasi mosi ve yina beto tubilaka dezia na nkunga yai lenda bwila beto. Ata bampasi bonso kunikana ya ntoto, mupepe ya ngolo ti mvula ya banzasi, kufuluka ya masa, nzala, mpasi yina kekwisaka na nima ya bamvita, mebwila beto kumosi ti bantu yankaka, mambu yai yonso kefwaka ve lukwikilu na beto to lutaninu ya kimpeve yina beto kevandaka yo.

14. Sambu na nki maladi ya kefwaka bantu kesimbaka ve beto bansadi ya Yehowa?

¹⁴ Bakristu ya kupakulama kele bonso banzenza yina kezingaka na batenta na ngidika ya bima ya bubu yai. (1 Piere 2:11) ‘Maladi ta kota ve na nzo na bo.’ Ata kivuvu na beto kele ya kuzinga na zulu to na ntoto, beto kekotaka ve na makambu ya inza yai, mpi maladi yina kefwaka bantu na kimpeve bonso mansoni, mpusa ya bima mingi ya kinsuni, lusambu ya luvunu, mpi lusambu ya “mbisi ya makasi” ti ya “kiteki” na yo, Nations unies kesimbaka beto ve.​—Kusonga 9:20, 21; 13:1-18; Yoane 17:16.

15. Na nki mambu bawanzyo kesadisaka beto?

¹⁵ Sambu na yina metala lutaninu ya beto kele na yo, muyimbi-bankunga keyika nde: “Nzambi ta songa bawanzio na yandi na kutanina nge na banzila na nge yonso. Bo ta nataka nge na maboko na bo, mpidina makulu na nge ta tutana ve na matadi.” (Nkunga 91:11, 12) Nzambi mepesaka bawanzyo ngolo ya kutanina beto. (2 Bantotila 6:17; Nkunga 34:7-9; 104:4; Matayo 26:53; Luka 1:19) Bo ketaninaka beto ‘na banzila na beto yonso.’ (Matayo 18:10) Bawanzyo ketwadisaka mpi ketaninaka beto sambu beto kele bansamuni ya Kimfumu mpi beto kebwaka ve na kimpeve. (Kusonga 14:6, 7) Ata ‘matadi’ bonso bansiku ya leta yina kebuyisaka kisalu na beto kebwisaka beto ve mpi yo mepusaka ve Nzambi na kubuya beto.

16. Na nki mutindu kunwanisa ya “mwana ya ntambu” ti ya “kobra” keswaswanaka, mpi nki mutindu beto kesalaka na ntwala na yo?

¹⁶ Muyimbi-bankunga kelanda na kutuba nde: “Nge tatambula na zulu ya mwana ya ntambu ti ya kobra; nge tanyata mwana ya ntambu na mika ya nkingu mpi nyoka ya nene.” (Nkunga 91:13, NW) Kaka mutindu mwana ya ntambu kenwanisaka kimuntukimuntu, bambeni na beto yankaka kemonisaka kimbeni na bo na meso ya bantu yonso na ntangu bo kebasisaka bansiku yina kebuyisaka kisalu na beto ya kusamuna. Katula kunwanisa yina ya kintulumukina, beto kenwanaka mpi bamvita yankaka ya mefwanana ti kunwanisa ya kobra yina kebumbanaka sambu na kunwanisa beto. Mbala mingi bamfumu ya mabundu kebumbanaka na nima ya bantu yina ketulaka bansiku, bazuzi, ti bantu yankaka sambu na kunwanisa beto. Kansi na lusadisu ya Yehowa, beto kesosaka na ngemba yonso nde tribinale kuyidika mambu na beto, ebuna, beto ‘kenwaninaka Nsangu ya Mbote ti kuzabisa yo na bantu na kikesa.​—Filipi 1:7; Nkunga 94:14, 20-22.

17. Inki mutindu beto kenyataka “mwana ya ntambu na mika ya nkingu mpi nyoka ya nene”?

¹⁷ Muyimbi-bankunga ketubila kunyata “mwana ya ntambu na mika ya nkingu mpi nyoka ya nene.” Mwana ya ntambu yina memena dezia mika ya nda na nkingu lenda vanda makasi mingi, mpi nyoka ya nene lenda vanda nyoka mosi ya kigonsa kibeni. (Yezaya 31:4) Kansi, ata mwana ya ntambu lenda vanda makasi nki mutindu na ntangu yandi kenwanisa beto kimuntukimuntu, beto kenyataka yandi na mutindu mosi ya kifwani na ntangu beto kelemfukilaka Nzambi na kisika ya kulemfukila bantu to baorganizasio yina kele bonso bantambu. (Bisalu 5:29) Yo yina kesalaka nde “ntambu” yina kenwanisaka beto kubwisa beto ve na kimpeve.

18. “Nioka ya nene” lenda yibusa beto nani, mpi nki beto fwete sala kana yandi kenwanisa beto?

¹⁸ Na la Septante ya bo sonikaka na Kigreki, bo kebingaka “nioka ya nene” nde “dragoni.” Dyambu yai lenda yibusa beto “dragoni yina ya nene, . . .  nioka yina ya ntama, ya bo ke bingaka Satana.” (Kusonga 12:7-9; Kuyantika 3:15) Yandi kele bonso nyoka mosi ya nene kibeni mpi ya kuyituka yina lenda kanga mbisi mpi kumina yo. (Yeremia 51:34) Kana Satana kesosa kutudila beto mitambu sambu na kukanga beto, kulembisa beto na nzila ya bampasi ya inza, mpi kumina beto, beto fwete sala ngolo na kukatuka na bansinga ya mitambu na yandi, mpi kunyata “nioka” yai ya nene. (1 Piere 5:8) Bapakulami yina mebikalaka fwete sala mutindu yai kana bo kezola kulungisa mambu yina kele na Roma 16:20.

Yehowa Kele Nto ya Luguluku na Beto

19. Sambu na nki beto kekwendaka kubumbana na Yehowa?

¹⁹ Sambu na yina metala Mukristu ya kyeleka, muyimbi-bankunga kemonisa nde Yehowa ketubila muntu yango nde: “Mono ta gulusa bantu yina [kezolaka, NW] mono, mono ta taninaka bayina kuzaba mono ti ke zitisaka [zina na, NW] mono.” (Nkunga 91:14) Bangogo ‘mono tataninaka bo’ ketendula ntetentete, “Mono tatula bo na kisika mosi ya zulu,” disongidila, kisika yina bambeni lenda kuma ve. Beto bansadi ya Yehowa, beto kekwendaka kubumbana na Yehowa ntetentete sambu ‘beto kezolaka yandi.’ (Marko 12:29, 30; 1 Yoane 4:19) Yo yina, Nzambi ‘kegulusaka beto’ na bambeni na beto. Beto tafwa ve. Kansi, beto taguluka sambu beto mezaba zina ya Nzambi mpi beto kebingaka yo na lukwikilu yonso. (Roma 10:11-13) Beto mebakaka mpi lukanu ya ‘kutambula mvula na mvula na zina ya Yehowa.’​—Mishe 4:5, NW; Yezaya 43:10-12.

20. Mutindu Nkunga 91 ketuba na nsuka, inki lusilu Yehowa kepesa na nsadi na yandi ya kwikama?

²⁰ Mutindu Nkunga 91 ketuba na nsuka, Yehowa ketuba mutindu yai sambu na nsadi na yandi ya kwikama: “Ntangu bo ta binga mono, mono ta ndima; ntangu bo ke na mpasi, mono ta vanda ti bo. Mono ta katula bo na mpasi, mono ta pesa bo lukumu. Mono ta pesa bo luzingu ya nda, bo ta zaba mpenza mutindu mono ke gulusaka bantu.” (Nkunga 91:15, 16) Na ntangu beto kezabisaka Nzambi mambu yina kewakana ti luzolo na yandi na kati ya kisambu, yandi kendimaka yo. (1 Yoane 5:13-15) Beto mekutanaka dezia ti mambu mingi ya mpasi sambu na kimbeni yina kekatukaka na Satana. Kansi bangogo “mono ta katula bo na mpasi” kepesa beto kikesa ya kunwana ti bampasi yina beto takutana na yo na bilumbu kekwisa mpi yo kendimisa beto nde Nzambi tasadisa beto na ntangu inza yai ya mbi tafwa.

21. Inki mutindu Nzambi mepesaka dezia lukumu na bapakulami?

²¹ Ata Satana kebasisilaka beto kimbeni ya nku, bapakulami yonso yina kele na kati na beto tabaka lukumu na zulu na ntangu yina Yehowa mebongisaka​—na nima ya kuzinga “luzingu ya nda” na zulu ya ntoto. Kansi, mutindu Nzambi megulusaka bo mbala mingi na mutindu mosi ya kuyituka menatilaka dezia bapakulami lukumu mingi. Ebuna bo mepesaka bo lukumu mingi mpenza na kutwadisa Bambangi ya Yehowa ya ntoto ya mvimba na bilumbu yai ya nsuka! (Yezaya 43:10-12) Luguluku ya kuluta nene yina Yehowa tapesa bantu na yandi tasalama na Armagedoni, mvita na yandi ya nene, ntangu yandi tanungisa kimfumu na yandi mpi tasantisa zina na yandi ya santu.​—Nkunga 83:18; Ezekiele 38:23; Kusonga 16:14, 16.

22. Banani ‘tazaba mpenza mutindu Yehowa kegulusaka bantu’?

²² Ata beto kele Bakristu ya kupakulama to bampangi na bo yina mekudipesaka na Nzambi, beto ketulaka ntima na Nzambi sambu na kusosa luguluku. Ntangu “kilumbu . . . ya Mfumu Nzambi takwisa, kilumbu ya nene ti ya boma,” bantu yina kesadilaka yandi na kwikama yonso taguluka. (Yoele 2:30-32) Na kati na beto, bantu yina tavanda na kati ya “kibuka ya nene” ya bantu yina taguluka sambu na kukota na inza ya mpa ya Nzambi mpi tabikala ya kwikama na kumekama ya nsuka, yandi ‘ta pesa bo luzingu ya nda,’ to ya kukonda nsuka. Yandi tafutumuna bantu mingi. (Kusonga 7:9, NW; 20:7-15) Ya kyeleka, Yehowa tavanda na kyese mpenza na kusadisa beto sambu beto ‘zaba mpenza mutindu yandi ke gulusaka bantu’ na nzila ya Yezu Kristu. (Nkunga 3:8) Ti kivuvu ya nene mpi ya kitoko ya mutindu yai ya kevingila beto, bika beto landa na kulomba Nzambi nde yandi sadisa beto na kuzaba kutanga bilumbu na beto na mutindu mosi ya kepesa yandi lukumu. Na kutuba mpi na bisalu na beto, bika beto landa na kumonisa nde Yehowa kele kisika na beto ya kutinina.

[Noti na nsi ya lutiti]

Inki Mutindu Nge Tavutula?

• “Kisika ya kinsweki ya Muntu ya Kuluta Kuzanguka” kele inki?

• Sambu na nki beto kewaka ve boma?

• Inki mutindu ‘ata mpasi mosi ta bwila beto ve’?

• Sambu na nki beto lenda tuba nde Yehowa kele nto ya luguluku na beto?

[Kifwanisu ya kele na lutiti 15]

Keti nge kezaba nki mutindu kwikama ya Yehowa kele dibaya ya nene ya ketaninaka beto na batolotolo?

[Bifwanisu ya kele na lutiti 16]

Yehowa kesadisaka bansadi na yandi na kusala kisalu na bo ata bantu kenwanisaka bo na kintulumukina mpi kimuntukimuntu

[Bangogo ya kemonisa kisina ya foto]

Cobra: A. N. Jagannatha Rao, Trustee, Madras Snake Park Trust