Yehowa Kesungiminaka Nge

“Beno katula mabanza na beno yina yonso ke yangisaka beno, ebuna beno pesa yo na Nzambi, sambu yandi muntu [kesungiminaka, NW] beno.”​—1 PIERE 5:7.

 1. Na nki mambu ya mfunu Yehowa ti Satana kele mpenza ya kuswaswana?

YEHOWA ti Satana kele ya kuswaswana mpenza. Konso muntu yina kekudiwaka nde yandi kele penepene na Yehowa, Dyabulu fwete buya yandi kaka. Luswaswanu yai bo ketubila yo na mukanda mosi ya bantu ketangaka mingi. Sambu na yina metala bisalu ya Satana yina Biblia ketubila na mukanda ya Yobi, mukanda mosi (Encyclopædia Britannica, 1970) ketuba nde: ‘Kisalu ya Satana kele kutambula-tambula na ntoto ya mvimba sambu na kusosa bisalu to bantu yina ya yandi fwete funda nde bo mesala mbi; ebuna kisalu na yandi meswaswana mpenza ti “meso ya Mfumu,” yina ketambula-tambulaka na ntoto ya mvimba sambu na kupesa ngolo na bantu yonso yina kele ya mbote (II Chron. xvi, 9). Satana kendimaka ve nde bantu kesalaka mambote kukonda kusosa lufutu mpi Nzambi kepesaka yandi nswa ya kuzikisa ngindu yai, ebuna Nzambi yandi mosi ketalaka mutindu yandi kezikisa yo mpi yandi kesongaka yandi bisika ya yandi fwete simba ve.’ Ya kyeleka, bantu yai zole kele ya kuswaswana mpenza!​—Yobi 1:6-12; 2:1-7.

2, 3. (a) Inki mutindu ntendula ya ngogo “Dyabulu” kemonana pwelele na mambu yina kukuminaka Yobi? (b) Inki mutindu Biblia kemonisa nde Satana kelanda na kufunda bansadi ya Yehowa yina kele na zulu ya ntoto?

² Ngogo “Dyabulu” mekatuka na ngogo ya Kigreki yina ketendula “muntu ya kekusilaka bankaka makambu,” “muntu ya luvunu.” Mukanda ya Yobi kesonga nde Satana kufundaka Yobi, nsadi ya kwikama ya Yehowa, nde yandi kesadilaka Yandi sambu na mambote na yandi mosi. Yandi tubaka nde: “Keti Yobi lenda lemfukila nge na mpamba, kukonda kima?” (Yobi 1:9) Disolo yina kele na mukanda ya Yobi kemonisa nde ata Yobi kumekamaka mpi kumonaka mpasi, yandi kangamaka kaka ngolo na Yehowa. (Yobi 10:9, 12; 12:9, 10; 19:25; 27:5; 28:28) Na nima ya mpasi ya ngolo yina yandi monaka, Yobi kutubilaka Nzambi nde: “Ntangu yina mono vandaka kuzaba nge kaka na kutuba ya bantu ya nkaka, kansi ntangu yai mono me mona nge na meso na mono mosi.”​—Yobi 42:5.

³ Keti Satana meyambulaka na kufunda bansadi ya kwikama ya Nzambi banda na ntangu ya Yobi? Ve. Mukanda ya Kusonga kemonisa nde na ntangu yai ya nsuka, Satana kelanda na kufunda bampangi ya kupakulama ya Kristu mpi ntembe kele ve nde yandi kefundaka mpi bampangi na bo ya kwikama. (2 Timoteo 3:12; Kusonga 12:10, 17) Yo yina, mpusa ya ngolo ya beto Bakristu ya kyeleka kele ya kulemfukilaka Nzambi na beto Yehowa, yina kesungiminaka beto mpi kusadila yandi na zola mingi kibeni sambu na kumonisa nde Satana kele muntu ya luvunu. Kana beto kesala mpidina, beto tayangidika ntima ya Yehowa.​—Bingana 27:11.

Yehowa Kesosaka Mitindu ya Kusadisa Beto

4, 5. (a) Inki mambu Yehowa kesosaka na zulu ya ntoto ya meswaswana ti yina Satana kesosaka? (b) Kana beto kezola nde Yehowa kundima beto, inki beto fwete sala?

⁴ Dyabulu ketambula-tambulaka na ntoto, sambu na kusosa muntu ya kufunda mpi ya kudya. (Yobi 1:7, 9; 1 Piere 5:8) Kansi, Yehowa kesosaka kusadisa bayina kele na mfunu ya ngolo na yandi. Profete Anani kutubilaka Ntotila Aza nde: “Mfumu Nzambi ke talaka bantu yonso ya nsi-ntoto ya mvimba sambu na kusadisa bayina me kudipesaka na yandi mpenza.” (2 Bansangu 16:9) Luswaswanu kele ya ngolo kibeni na kati ya mutindu Satana ketalaka bantu ti ntima ya mbi ti mutindu Yehowa ketalaka bantu na zola yonso!

⁵ Yehowa ketalaka beto ve na kinsweki ti mayele ya mbi ya kusosa kuzwa bifu yonso ya beto kesalaka. Muyimbi-bankunga kusonikaka nde: “Kana nge landaka masumu na beto, nani zolaka kubaka ndola ve?” (Nkunga 130:3) Mvutu ya kemonana pwelele kele nde: ata muntu mosi ve. (Longi 7:20)Kana beto pusana na Yehowa na ntima na beto ya mvimba, meso na yandi tavanda na zulu na beto, sambu na kupesa beto ndola ve, kansi sambu na kutala bikesa ya beto kesala mpi sambu yandi pesa mvutu na bisambu ya beto kesala sambu na kulomba yandi lusadisu ti ndolula. Ntumwa Piere kusonikaka nde: “Mfumu Nzambi ke tulaka meso na yandi na bantu ya mbote konso ntangu, yandi mpi ke waka bisambu na bo konso ntangu; kansi yandi ke buyaka bantu yina ke salaka mambu ya mbi.”​—1 Piere 3:12.

 6. Inki mutindu dyambu yina kukuminaka Davidi kepesa beto kikesa mpi kekebisa beto?

⁶ Davidi kuvandaka muntu ya kukonda kukuka mpi yandi sumukaka ngolo kibeni. (2 Samuele 12:7-9) Kansi yandi songaka Yehowa mambu yonso yina kuvandaka na ntima na yandi mpi yandi pusanaka penepene na yandi na kisambu ya ngolo kibeni. (Nkunga 51:1-12, tala bangogo yina kele na zulu ya kapu yai.) Ata Davidi kukutanaka na bampasi mingi sambu na disumu na yandi, Yehowa kuwaka kisambu na yandi mpi yandi lolulaka yandi. (2 Samuele 12:10-14) Dyambu yai kepesa beto kikesa mpamba ve kansi yo kekebisa beto mpi. Yo kepesaka beto kikesa mingi na kuzaba nde Yehowa kele ti luzolo ya kulolula masumu na beto kana beto mebalula ntima na masonga yonso, kansi beto fwete zaba nde masumu kenataka bampasi ya ngolo. (Galatia 6:7-9) Kana beto kezola kupusana penepene na Yehowa, beto fwete sala yonso sambu na kutina ntama kibeni konso kima yina kesepedisaka yandi ve.​—Nkunga 97:10.

Yehowa Kebendaka Bantu na Yandi na Yandi

 7. Yehowa ketalaka bantu ya nki mutindu, mpi nki mutindu yandi kebendaka bo na yandi?

⁷ Na mosi na kati ya bankunga na yandi Davidi kusonikaka nde: “Ata Mfumu Nzambi kele ntama kuna na zulu, yandi ke talaka bantu yina ke kudikulumusaka; bantu ya lulendo mpi yandi ke zabaka bo [na ntama, NW].” (Nkunga 138:6) Mutindu mosi mpi, nkunga yankaka ketuba nde: “Nani kele bonso Mfumu Nzambi, Nzambi na beto? Yandi ke zingaka kuna na zulu mpenza, kansi yandi ke losaka meso na yandi na kutala zulu ti ntoto. Yandi ke [tombulaka muntu ya kudikulumusa na mfututu, yandi kekatulaka nsukami na dibulu ya putulu, NW].” (Nkunga 113:5-7) Ya kyeleka, Ngangi ya bima yonso mpi nkwa-ngolo yonso, kekulumusaka meso na yandi sambu na kutala nsi-ntoto, mpi meso na yandi kemonaka “muntu ya kudikulumusa,” “nsukami,” bantu yina “ke mona mpasi ti kudila sambu na mambu yonso ya [mbi, NW] yina ke luta.” (Ezekiele 9:4) Yandi kebendaka bantu ya mutindu yina penepene na yandi mosi na nzila ya Mwana na yandi. Ntangu yandi vandaka na ntoto, Yezu kutubaka nde: “Ata muntu mosi ve lenda kwisa na mono kana Tata yina tindaka mono me benda yandi ve . . . Ata muntu mosi ve lenda kwisa na mono kana Nzambi me pesa yandi nzila ve.”​—Yoane 6:44, 65.

8, 9. (a) Sambu na nki yo kele mfunu nde beto yonso kukwenda na Yezu? (b) Inki dyambu ya kuluta nene ngidika ya nkudulu kemonisaka?

⁸ Bantu yonso fwete kwisa na Yezu mpi kutula lukwikilu na nkudulu ya kimenga na yandi sambu bo kebutukaka bantu ya masumu, mpi bo kevandaka ntama ti Nzambi. (Yoane 3:36) Yo kele mfunu na kuwakana ti Nzambi. (2 Korinto 5:20) Nzambi kuvingilaka ve nde bansumuki kubondila yandi sambu yandi yidika mwa mambu yina lenda sadisa bo na kuzinga na ngemba ti yandi. Ntumwa Polo kusonikaka nde: “Nzambi songaka beto mutindu yandi ke zolaka beto: Kristo fwaka sambu na beto ntangu beto vandaka kaka bantu ya masumu. . . . Beto vandaka ntete bambeni ya Nzambi, kansi beto me wakana ti yandi sambu na lufwa ya Mwana na yandi. Ebuna, kana beto me wakana ti Nzambi ntangu yai, moyo ya Mwana na yandi ta gulusa beto mpenza.”​—Roma 5:8, 10.

⁹ Ntumwa Yoane kundimaka ngindu yai ya kyeleka kibeni ya kemonisa nde Nzambi yandi mosi muntu kusosaka kuwakana ti bantu, ntangu yandi sonikaka nde: “Yai kele mutindu Nzambi songaka beto nde yandi ke zolaka beto: Yandi tindaka awa na nsi-ntoto Mwana na yandi mosi ya yandi vandaka na yandi, sambu beto vanda na moyo na ngolo na yandi. Kuzola yango kele mutindu yai: Yo kele ve nde beto bantu me zolaka Nzambi, kansi yandi muntu me zolaka beto bantu; yo yina, yandi tindaka Mwana na yandi sambu na kwisa kufwa sambu na kukatula masumu na beto.” (1 Yoane 4:9, 10) Nzambi muntu yantikaka ntete na kuzola, kansi bantu ve. Keti nge kekudiwa ve nde nge fwete pusana penepene na Nzambi yina kumonisaka zola ya mingi ya mutindu yai na beto bantu yina kuvandaka “bansumuki” kaka ve kansi mpi “bambeni” na yandi?​—Yoane 3:16.

Beto Fwete Sosa Yehowa

10, 11. (a) Inki beto fwete sala sambu na kusosa Yehowa? (b) Inki mutindu beto fwete tadila inza ya Satana?

¹⁰ Mutindu beto mezaba yo, Yehowa kebendaka beto ve na ngolo na kukwenda na yandi. Beto fwete ‘sosa yandi, mpi beto tamona yandi mpenza. Na kutuba ya mbote yandi kele ntama ve na konso muntu awa na kati na beto.’ (Bisalu 17:27) Beto fwete ndima nde Yehowa kele ti nswa ya kulomba nde beto lemfukila yandi. Longoki Yakobo kusonikaka nde: “Beno lemfuka na Nzambi; beno vanda bambeni ya Satana, ebuna yandi ta tina beno, yandi ta kwenda ntama. Beno kwenda penepene na Nzambi, ebuna yandi ta kwisa penepene na beno. Beno bantu ya masumu, beno yidika bikalulu na beno sambu masumu na beno kukatuka. Beno bantu ke na ntima mosi ve, beno vanda kaka na ntima mosi mpamba sambu Nzambi kukatula masumu na beno.” (Yakobo 4:7, 8) Beto fwete wa ve boma na kubaka lukanu ya ngolo ya kuvanda kontre Dyabulu mpi ya kukotila Yehowa.

¹¹ Yo kezola kutuba nde beto fwete kota ve na inza ya mbi ya Satana. Yakobo kusonikaka dyaka nde: “Keti beno zola lemfuka na Nzambi ve? Keti beno zaba ve nde, kana nge kele nduku ya mambu ya nsi-ntoto, nge kele mbeni ya Nzambi? Muntu yina ke zola kuvanda nduku ya mambu ya nsi-ntoto, yandi ke kuma mbeni ya Nzambi.” (Yakobo 4:4) Kansi, kana beto kezola kuvanda banduku ya Yehowa, beto fwete zaba nde inza ya Satana tamenga beto.​—Yoane 15:19; 1 Yoane 3:13.

12. (a) Inki bangogo ya kepesa kikesa Davidi kusonikaka? (b) Inki lukebisu Yehowa kupesaka na nzila ya profete Azaria?

¹² Ntangu inza ya Satana kemenga beto sambu na dyambu mosi, beto fwete pusana mpenza na Yehowa na kisambu, sambu na kulomba yandi lusadisu. Davidi, yina kumonaka mutindu Yehowa kugulusaka yandi mbala mingi, kusonikaka mambu yai ya kepesa beto kikesa: “Yandi [Yehowa] kele penepene na bantu yonso yina ke bingaka yandi, bayina ke bingaka yandi na ntima ya mbote. Bantu yonso yina ke tinaka yandi boma yandi ke pesaka bo bima ya bo ke na yo mfunu; yandi ke waka kudila na bo, yandi ke gulusaka bo. Yandi ke taninaka bantu yonso yina ke lemfukaka na yandi, kansi yandi ta fwa bantu yonso ya mbi.” (Nkunga 145:18-20) Nkunga yai kemonisa nde Yehowa lenda gulusa muntu mosi-mosi na kati na beto kana yandi memekama mpi nde yandi tagulusa bantu na yandi yonso na kimvuka na ‘mpasi ya nene.’ (Kusonga 7:14) Yehowa tavanda kaka penepene na beto kana beto mpi kele kaka penepene na yandi. “Mpeve ya Nzambi” kunataka profete Azaria na kutuba mambu ya kyeleka yina metala bantu yonso: “Mfumu Nzambi kele ti beno kana beno mpi kulemfuka na yandi. Kana beno sosa yandi, beno mpi ta mona yandi; kana beno pesa yandi nima, yandi mpi ta bikisa beno.”​—2 Bansangu 15:1, 2.

Yehowa Fwete Vanda Muntu ya Kyeleka Sambu na Beto

13. Inki mutindu beto lenda monisa nde Yehowa kele muntu ya kyeleka sambu na beto?

¹³ Ntumwa Polo kusonikaka sambu na yina metala Moize nde “Yandi tulaka kaka ngolo bonso nde yandi ke mona na meso na yandi Nzambi yina ke monikaka ve.” (Baebreo 11:27) Na kutuba ya mbote, Moize memonaka ntete ve Yehowa na meso. (Kubasika 33:20) Kansi, yandi vandaka kubaka Yehowa bonso muntu mosi ya kyeleka mpenza na mpila nde yo vandaka bonso yandi kemona Yandi. Mutindu mosi mpi, na nima ya mpasi yina yandi monaka, meso ya lukwikilu ya Yobi kumonaka Yehowa mbotembote, nde yandi kele Nzambi mosi ya kepesaka nzila nde bansadi na yandi ya kwikama kumekama kansi yandi keyambulaka bo ve ata fyoti. (Yobi 42:5) Biblia ketubaka nde Enoki ti Noa vandaka ‘kutambula ti Nzambi.’ Bo salaka yo na mutindu bo vandaka kusosa kupesa Nzambi kyese mpi kulemfuka na yandi. (Kuyantika 5:22-24; 6:9, 22, NW; Baebreo 11:5, 7) Kana Yehowa kele muntu ya kyeleka sambu na beto mutindu Enoki, Noa, Yobi, ti Moize vandaka kumona yandi, beto ‘tayindula yandi’ na mambu yonso ya luzingu na beto, mpi yandi “ta songa [beto] nzila ya mbote.”​—Bingana 3:5, 6.

14. “Kutula ntima” na Yehowa ketendula inki?

¹⁴ Ntangu bana ya Izraele kukumaka penepene na kukota na Ntoto ya Lusilu, Moize kulongisilaka bo nde: “Beno landa Mfumu Nzambi, beno zitisa yandi; beno lemfuka na yandi, beno landa mpi bansiku na yandi; beno samba yandi, beno tula yandi ntima.” (Kulonga 13:5) Yo vandaka kulomba nde bo landa Yehowa, bo zitisa yandi, bo lemfukila yandi, mpi bo tula ntima na yandi. Sambu na yina metala ngogo ya bo mebalula awa nde “kutula ntima,” muntu mosi ya ketendulaka Biblia ketuba nde “na ndinga ya kisina ngogo yai ketendula kinduku mosi ya ngolo mpenza.” Muyimbi-bankunga kutubaka nde: “Mfumu Nzambi ke songaka kinsweki na yandi na bantu yina [“kewaka yandi boma,” NW].” (Nkunga 25:14) Kana Yehowa kele muntu ya kyeleka sambu na beto mpi kana beto kezola yandi mingi kibeni na mpila nde beto ketita na kupesa yandi mawa na mambu yonso, beto takuma banduku na yandi ya ngolo kibeni.​—Nkunga 19:10-15.

Keti Nge Kezabaka nde Yehowa Kesungiminaka Nge?

15, 16. (a) Inki mutindu Nkunga 34 kemonisa nde Yehowa kesungiminaka beto? (b) Inki beto fwete sala kana beto kekuka ve kuyibuka mambote yina Yehowa mesadilaka beto?

¹⁵ Mosi na kati ya mambu ya kesonga mayele ya mbi yina Satana kesadilaka kele kupusa beto na kuvila nde Nzambi na beto, Yehowa, kesungiminaka ntangu yonso bansadi na yandi ya kwikama. Ntotila Davidi ya Izraele kuzabaka mbote nde diboko ya Yehowa vandaka kutanina yandi ata na ntangu yandi vandaka na bampasi ya kuluta ngolo. Ntangu yo lombaka nde yandi kusa nde yandi kele muntu ya kilau na meso ya Ntotila Akishi ya bwala Gati, yandi sonikaka nkunga mosi, nkunga ya kitoko kibeni, yina kuvandaka ti bangogo yai ya lukwikilu: “Beto vukana beto yonso, beto pesa Mfumu Nzambi lukumu, beto kumiseno zina na yandi. Mono sambaka Mfumu Nzambi, yandi wilaka mono; yandi katulaka mono boma yonso. Wanzio ya Nzambi me ziungaka bantu yina ke lemfukaka na yandi, yandi ke katulaka bo na kigonsa. Beno meka, beno tala beno mosi mutindu Mfumu Nzambi kele mbote! Kiese na muntu yina ke tina na yandi! Mfumu Nzambi kele penepene na bantu yina ke na kikesa ve, yandi ke gulusaka bantu yonso yina me katulaka ntima. Mbala mingi muntu ya mbote ke monaka mpasi, kansi Mfumu Nzambi ke gulusaka yandi na bampasi yango yonso.”​—Nkunga 34:4, 5, 8, 9, 19, 20; 1 Samuele 21:10-15.

¹⁶ Keti nge kendima nde Yehowa kele ti ngolo ya kugulusa? Keti nge kezabaka nde bawanzyo na yandi ketaninaka nge? Keti nge mosi memekaka mpi memonaka nde Yehowa kele mbote? Keti nge keyibuka mbala ya nsuka ya nge monaka mpenza nde Yehowa kuvandaka mbote sambu na nge? Meka na kuyibuka. Keti yo vandaka na nzo ya nsuka ya nge talaka bantu na kisalu ya kusamuna, ntangu nge vandaka kudiwa nde nge melemba mingi? Mbala yankaka na nima nge solulaka mbote kibeni ti muntu ya nge kutaka na nzo yango. Keti nge yibukaka na kupesa Yehowa mersi na mpila yandi yikaka nge ngolo ya nge vandaka na yo mfunu mpi na mpila yandi sadisaka nge? (2 Korinto 4:7) Ziku, yo lenda vanda mpasi sambu na nge na kuyibuka mwa mambu ya sikisiki ya mbote yina Yehowa mesadilaka nge. Yo lenda lomba nde nge yindula mambu yina ya nge kutanaka na yo mposo mosi, ngonda mosi, mvula mosi, to nkutu bamvula mingi meluta. Kana nge mezwa mambu yina yandi mesadilaka nge, sambu na nki nge sala ve kikesa na ntima mosi sambu na kupusana dyaka penepene ti Yehowa mpi kusosa kumona mutindu yandi ketwadisaka nge? Ntumwa Piere kulongisilaka Bakristu nde: “Beno kudikulumusa na nsi ya diboko ya ngolo ya Nzambi . . . Beno katula mabanza na beno yina yonso ke yangisaka beno, ebuna beno pesa yo na Nzambi, sambu yandi muntu [kesungiminaka, NW] beno.” (1 Piere 5:6, 7) Ya kyeleka, nge tayituka na kumona nde Yehowa kesungiminaka nge mingi mpenza!​—Nkunga 73:28.

Landa na Kusosa Yehowa

17. Inki beto fwete sala kana beto kezola kulanda na kusosa Yehowa?

¹⁷ Kutanina kinduku na beto ti Yehowa kele dyambu mosi ya beto fwete landa na kusala kukonda nsuka. Yezu kutubaka na kisambu mosi na Tata na yandi nde: “Kana bo [longuka na kuzaba, NW] nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.” (Yoane 17:⁠3) Kulonguka na kuzaba Yehowa ti Mwana na yandi kelombaka kusala kikesa ntangu yonso. Beto kele na mfunu ya lusadisu ya kisambu mpi ya mpeve santu sambu na kubakisa “mabanza yina me bumbanaka mpenza na nsi ya ntima ya Nzambi.” (1 Korinto 2:10; Luka 11:13) Beto kele mpi na mfunu ya lutwadisu ya “mpika ya kwikama mpi ya mayele” (NW) sambu na kudisa mabanza na beto madya ya kimpeve yina bo kepesaka beto “na ntangu ya mbote.” (Matayo 24:45) Na nzila ya mpika yai, Yehowa kelongisilaka beto na kutanga Ndinga na yandi konso kilumbu, kuvanda mbala na mbala na balukutakanu ya Bukristu, mpi kudipesa mingi na kisalu ya kusamuna “Nsangu yai ya Mbote ya Kimfumu.” (Matayo 24:14) Kana beto kesala mutindu yina, beto talanda na kusosa Nzambi na beto, Yehowa, yina kesungiminaka beto.

18, 19. (a) Beto fwete vanda na lukanu ya kusala inki? (b) Kana beto baka desizio ya ngolo ya kuvanda bambeni ya Dyabulu mpi kulanda na kusosa Yehowa, inki mutindu yandi tasakumuna beto?

¹⁸ Satana kesalaka yonso sambu na kubendila bantu ya Yehowa bampasi, kimbeni, mpi munyokudi na bandambu yonso. Yandi kesosaka kukatula ngemba ya beto kele na yo mpi kubebisa kinduku ya mbote ya beto kele na yo ti Nzambi na beto. Yandi kezolaka ve nde beto landa na kusala kisalu ya kusosa bantu yina kele na ntima ya masonga mpi kusadisa bo na kukwisa na lweka ya Yehowa na dyambu yina metala nswa ya yandi kele na yo ya kuvanda mfumu ya bima yonso. Kansi beto fwete baka lukanu ya kuvanda kaka ya kwikama na Yehowa, kutudila yandi ntima nde yandi ta gulusa beto na maboko ya muntu ya mbi. Kana beto kepesa nzila nde Ndinga ya Nzambi kutwadisa beto mpi kana beto kelanda kaka na kusala kumosi ti organizasio na yandi ya kemonana, beto lenda tula ntima nde yandi tavandaka kaka ya kuyilama na kusadisa beto.​—Yezaya 41:8-13.

¹⁹ Yo yina, bika beto yonso kubaka desizio ya ngolo ya kuvanda bambeni ya Dyabulu ti bisalu na yandi ya mayele ya mbi, mpi beto sosa ntangu yonso Nzambi na beto ya zola, Yehowa, yina beto ketulaka ntima nde yandi ‘tapesa beto ngolo, yandi ta tula beto na fondasio ya ngolo.’ (1 Piere 5:8-11) Ebuna, ‘beto ta zinga kaka na kuzola yina ya Nzambi ke zolaka beto ntangu beto ke vingila nde Mfumu na beto Yesu Kristo, sambu na mawa na yandi, yandi kupesa beto moyo ya mvula na mvula.’​—Yude 21.

Inki Mutindu Nge Tavutula?

• Ngogo “Dyabulu” ketendula inki, mpi nki mutindu Dyabulu kemonisaka nde zina yina mefwana na yandi?

• Inki mutindu Yehowa ke ya kuswaswana ti Dyabulu na mutindu ya Yandi ketalaka bantu ya nsi-ntoto?

• Sambu na nki muntu fwete ndima nkudulu na ntwala ya kupusana penepene na Yehowa?

• “Kutula ntima” na Yehowa ketendula inki, mpi nki mutindu beto lenda landa na kusosa yandi?

[Kifwanisu ya kele na lutiti 15]

Ata Yobi kumonaka bampasi mingi, yandi bakisaka na nsuka nde Yehowa kusungiminaka yandi

[Bifwanisu ya kele na lutiti 16]

Kutanga Biblia konso kilumbu, kukwenda mbala na mbala na balukutakanu ya Bukristu, mpi kusala kisalu ya kusamuna na kikesa yonso keyibusaka beto nde Yehowa kesungiminaka beto